LUKE 6
6
Mme Pharisee Ebup Jesus Mbume Abaŋade Sabbath
(Mt 12.1-8; Mk 2.23-28)
1EDIKEM ke sabbath kiet Enye asaŋa ebe ke iŋwaŋ ibokpot; ndien mbet Esie ke ekibi ibokpot, efiak ke ubɔk, eta. 2Edi ndusuk mme Pharisee edɔhɔ mmɔ ete, Nsinam mbufo enamde se minenke owo ndinam ke sabbath. 3Edi Jesus ɔbɔrɔ mmɔ ete, Nte mbufo ikokotke emi, kpa se David akanamde, ke ini ɔbiɔŋ ɔdɔŋde enye ye mmɔ emi edude ye enye? 4nte enye okodukde ke ufɔk Abasi emen uyo-iso-Abasi adia, onyuŋ ɔnɔ mmɔ emi edude ye enye, uyo eke minenke owo ndidia, ke mibɔhɔke mme oku ikpɔŋ? 5Enye onyuŋ ɔdɔhɔ mmɔ ete, Eyen Owo edi Ɔbɔŋ sabbath.
6Edikem ke sabbath eŋwen, Enye oduk ke synagogue ekpep owo ŋkpɔ: ndien owo kiet emi ubɔk nnasia esie akpade odu do. 7Edi mme scribe ye mme Pharisee ekpeme Jesus mme Enye eyenam udɔŋɔ okure ke sabbath: man mmɔ ekut ŋkpɔ ndida ndori Enye ikɔ. 8Edi Enye ɔdiɔŋɔ eneni mmɔ, onyuŋ ɔdɔhɔ owo emi ubɔk esie akpade, ete, Daha ke enyɔŋ, wɔrɔ, da mi ke ufɔt. Ndien enye adaha ke enyɔŋ, ɔwɔrɔ, ada. 9Edi Jesus ɔdɔhɔ mmɔ ete, Mmɔŋ mbup mbufo mme enen ndinam ufɔn ke sabbath, mme ndinam idiɔk? ndinyaŋa uwem owo, mme ndibiat?, 10Ndien Enye asuan enyin ese mmɔ kpukpru, onyuŋ ɔdɔhɔ owo oro ete, Nyanare ubɔk fo. Enye anam ntre, ubɔk esie onyuŋ akabare ɔfɔn. 11Edi esit ofut mmɔ eti-eti; mmɔ enyuŋ eneme ye kiet eken ebaŋa se ekpanamde Jesus.
12Edikem ke mme usen oro, Enye ɔwɔrɔ ɔdɔk ke akamba obot ndibɔŋ akam; onyuŋ ama ofuri okoneyo ke eribɔŋ akam nɔ Abasi. 13Ndien ke ini eyo esierede, Enye okot mbet Esie, onyuŋ emek owo duopeba osio ke otu mmɔ, onyuŋ okot mmɔ, ete, mme apostle; 14Simon, emi Enye osiode enyiŋ. Peter, ye Andrew eyen-eka esie, ye James ye John, 15ye Philip ye Bartholomew, ye Matthew ye Thomas, ye James eyen Alphaeus, ye Simon emi ekerede Zealot, 16ye Judas eyen James, ye Judas Iscariot emi akabarede edi andida Enye nnɔ.
17Ekem Enye asaŋa ye mmɔ ɔsuhɔre edida ke una-isɔŋ; akwa otu mbet Esie, ye ata ediwak owo enyuŋ edu ye mmɔ; emi etode ke ofuri Judaea ye Jerusalem, ye mben inyaŋ Tyre ye Sidon, emi ekedide ndikop ikɔ Esie, man Enye onyuŋ anam udɔŋɔ okure mmɔ; 18mmɔ emi ndidehe spirit edutuhɔde enyuŋ ekop nsɔŋidem. 19Ndien ofuri otu owo eyom ndituk Enye ubɔk: koro odudu otode Enye ke idem ɔwɔrɔ, anam udɔŋɔ okure mmɔ kpukpru.
20Ndien Enye emenere enyin ese mbet Esie, onyuŋ ɔdɔhɔ ete,
Mi Ɔfɔfɔn ɔnɔ mbufo, nditɔ ubuene, koro Obio Ubɔŋ Abasi enyene mbufo.
21 Ɔfɔfɔn ɔnɔ mbufo emi etiede biɔŋ ke emi, koro mbufo eyeyuhɔ.
Ɔfɔfɔn ɔnɔ mbufo emi etuade eyet ke emi, koro mbufo eyesak imam.
22 Ɔfɔfɔn ɔnɔ mbufo ke ini owo edisuade mbufo, edinyuŋ edianarede mbufo ke idem mmɔ efep, ediyuŋ esuŋide mbufo, enyuŋ esin enyiŋ mbufo nte idiɔk ŋkpɔ kabaŋa Eyen Owo. 23Edara ke usen oro, enyuŋ efrɔ ke idaresit: koro, sese, utip mbufo ke heaven omokpon; koro mme ete mmɔ ekenam kpasuk ntre ye mme prophet.
24 Eyedɔdiɔk ɔnɔ mbufo mbon inyene! koro mbufo emenyene ndɔŋesit mbufo.
25 Eyedɔdiɔk ɔnɔ mbufo emi eyuhɔde ke emi! koro mbufo eyetie biɔŋ.
Eyedɔdiɔk ɔnɔ mbufo emi esakde imam ke emi! koro mbufo eyeseme enyuŋ etua eyet.
26 Eyedɔdiɔk ɔnɔ mbufo, ke ini kpukpru owo editiŋde se ifɔnde ebaŋa mbufo! koro mme ete mmɔ ekanam ntre ye prophet abiaŋa.
27 Edi ndɔhɔ mbufo emi ekopde ikɔ Mi, nte, Ema mme asua mbufo, enyuŋ enam ufɔn enɔ mmɔ eke esuade mbufo, enyuŋ ediɔŋ mmɔ eke esuŋide mbufo, 28enyuŋ ebɔŋ akam eyom ufɔn mmɔ eke esuenede mbufo. 29Owo ama oyibi fi ke mfuk kiet, kabare eken nde nɔ enye: owo ama onyuŋ ɔbɔ fi ekura fo, kusin ndinɔ enye ekpri ɔfɔŋidem fo nde. 30Nɔ kpukpru owo eke ebeŋede fi ŋkpɔ, owo eke onyuŋ ɔbɔde fi ŋkpɔ, kubup enye ɔtɔŋɔ ntak ɔnɔ fi. 31Nte mbufo eyomde owo enam ye mbufo, enam kpa ntre ye mmɔ. 32Ndien edieke mbufo emade mmɔ eke emade mbufo, nso itoro ke enyene do? koro kpa mme idiɔk owo ema owo eke emade mmɔ. 33Onyuŋ edieke mbufo enamde ufɔn enɔ mmɔ eke enamde ufɔn enɔ mbufo, nso itoro ke enyene? kpa mme idiɔk owo enam ntre. 34Onyuŋ edieke mbufo emende ebuɔt enɔ mmɔ eke mbufo edoride enyin ete eyesio enɔ mme imɔ, nso itoro ke enyene? kpa mme idiɔk owo ebɔbuɔt mme idiɔk owo ŋkpɔ, man mmɔ etɔŋɔ ntak ebɔ ekem ye se mmɔ ekɔnɔde. 35Edi ema mme asua mbufo, enyuŋ enam ufɔn enɔ mmɔ, enyuŋ ebuɔt, ekudori-enyin ndifiak mbɔ; ndien utip mbufo eyekpon: mbufo eyenyuŋ edi nditɔ Andikoŋ-ŋkan: koro Enye ɔfɔnde ido kpa ye mmɔ eke mikɔmke Enye ye mme idiɔk owo. 36Etua owo mbɔm ndien kpa nte Ete mbufo atuade owo mbɔm, Ekunyuŋ esioŋo owo ndo, 37ndien owo idisioŋoke mbufo ndo. Ekunyuŋ ebiom owo ikɔ, ndien owo idibiomke mbufo ikɔ. Esana owo eyak, ndien owo eyesana mbufo eyak. 38Enɔ, ndien eyenɔ mbufo; eyedomo ɔyɔhɔ udomo eke emiŋde ɔsuhɔre, eke enyeŋede, onyuŋ ɔyɔhɔde ɔduɔhɔ, esin mbufo ke ɔfɔŋ. Koro udomo eke mbufo edade edomo enɔ owo, ke edida edomo enɔ mbufo.
39Enye onyuŋ otop ŋke ɔnɔ mmɔ ete, Nte nnan ekeme ndida nnan usun? nte mmɔ mbiba ididuɔhɔ iduk ke obube? 40Eyen ukpep-ŋkpɔ ikanke andikpep enye: edi kpukpru eyen ukpep-ŋkpɔ eyetie nte andikpep enye ke ini etimde ekpep enye ŋkpɔ ema. 41Edi nsinam afo esede ekpri mbio eke odude ke enyin eyen-ete fo, edi mukereke obukpɔk oro odude fi ke enyin? 42Edikeme didie ndidɔhɔ eyen-ete fo ete, Eyen-ete mi, yak nsio fi ekpri mbio ke enyin, ke adaŋemi afo ke idemfo mukwe obukpɔk eke odude fi ke enyin? Afo mbubik! bem iso sio obukpɔk oro odude ke enyin fo fep, ndien eyetim okut usuŋ nte asaŋade osio ekpri mbio ke enyin eyen-ete fo efep. 43Koro baba eti eto kiet iduhe eke oŋwomde idiɔk mfri; mbiara eto inyuŋ iduhe eke oŋwomde eti mfri. 44Koro efiɔk kpukpru eto kiet kiet ke mfri esie. Koro owo itetke fig ke ŋkukim, inyuŋ itetke grape ke mbara-ekpe. 45Eti owo osioŋo se ifɔnde ke nti ŋkpɔ eke enye okobonde ke esit esie; idiɔk owo onyuŋ osioŋo se idiɔkde ke mme idiɔk ŋkpɔ eke enye okobonde ke esit esie; koro oto ke uyɔhɔ esit ndien inua etiŋ.
46 Nsinam mbufo ekotde Mi ete, Ɔbɔŋ, Ɔbɔŋ, ndien minamke se ndɔhɔde? 47Owo ekededi eke etienede Mi, onyuŋ okopde ikɔ Mi, onyuŋ anmde mmɔ, nyewut mbufo oruk owo eke enye ebietde. 48Enye ebiet andibɔp ufɔk, emi otibide isɔŋ ɔtuŋɔ, onyuŋ owukde ukot ufɔk ke itiat: ndien ke ini ukwɔ edide, udiɔŋ-mmɔŋ edibere ufɔk oro ɔkpɔsɔŋ, edi ikemeke ndiyeŋe enye, koro eketimde ebɔp enye. 49Edi owo eke okopde ndien minamke ebiet owo emi owukde ufɔk esie ke enyɔŋ utan, emi itiat miduhe ke idak ufɔk: udiɔŋ-mmɔŋ edibere ufɔk oro ɔkpɔsɔŋ, ndien idaha oro enye ɔduɔ; ŋwure ufɔk oro onyuŋ okpon.
Currently Selected:
LUKE 6: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.