UTOM MME APOSTLE 1
1
Emen Jesus Edɔk Ke Enyɔŋ Ndien Mme Mbet Esie Emek Owo Esin ke Itie Utom Judas
(Mk 16.19-20; Lk 24.50-53; Mt 27.3-10)
1ŊKEBEM iso nnam mbuk, O Theophilus, mbaŋa kpukpru se Jesus ɔkɔtɔŋɔde ndinam nnyuŋ ŋkpep, 2tutu osim usen oro emende Enye edɔk ke enyɔŋ, ke Enye ama ɔkɔnɔ mme apostle emi Enye ekemekde item oto ke Edisana Spirit: 3Enye onyuŋ ada ediwak idiɔŋɔ owut mmɔ Idem Esie nte odu-uwem, ke mkpa Esie ama ekebe, owut mmɔ Idem usen aba, onyuŋ etiŋ ŋkpɔ abaŋa Obio Ubɔŋ Abasi. 4Ndien ke ini Enye osobode ɔtɔ kiet ye mmɔ, Enye ɔnɔ mmɔ uyo ete ekukpɔŋ Jerusalem, edi etie ebet se Ete ɔkɔŋwɔŋɔde ndinɔ; emi mbufo ekokopde ke inua Mi: 5Koro John akadade mmɔŋ onim baptism, edi eyenim mbufo baptism ke Edisana Spirit ke usen ifaŋ mibehe kaŋa.
6Mmɔdo, ke ini mmɔ ebonode ɔtɔ kiet, mmɔ ebup Enye ete, Ɔbɔŋ, nte Afo ɔmɔŋ ɔtɔŋɔ ntak ayak Obio Ubɔŋ ɔnɔ Israel ke emi? 7Enye ɔbɔrɔ mmɔ ete, Inaŋa inɔ mbufo ndifiɔk ini me eyo, eke Ete okonimde akama ke ubɔk Esiemɔ. 8Edi mbufo eyebɔ odudu, ke Edisana Spirit ama edi edidoro mbufo ke idem: mbufo eyenyuŋ edi mme ntiense Mi ke Jerusalem, ye ke ofuri Judaea ye Samaria, tutu osim utit ererimbot. 9Ndien ke Enye ama eketiŋ ikɔ oro ama, nte mmɔ esuk esede, emen Enye edɔk ke enyɔŋ; ndien ikpa-enyɔŋ ofuk Enye, mmɔ inyuŋ ikwe Enye aba. 10Ndien nte mmɔ esuk ewukde enyin ese enyɔŋ nte Enye ke ɔdɔdɔk, sese, owo iba, emi esinede mfia ɔfɔŋidem, eda ekpere mmɔ; mmɔ oro enyuŋ edɔhɔ ete, 11Mbufo mbon Galilee, nsinam mbufo edade ese ikpa-enyɔŋ? Jesus emi, emi emende Enye ekpɔŋ mbufo eduk ke heaven, eyedi kpa ke ido emi mbufo ekutde Enye ɔnyɔŋde oduk ke heaven.
12Ekem mmɔ eto ke obot emi ekerede Olivet, emi eseherede ɔkpɔŋ Jerusalem isaŋ usen sabbath kiet, efiak edi ke Jerusalem. 13Ndien ke ini mmɔ edukde ufɔk, mmɔ edɔk eka ke ubet enyɔŋ ke ɔtɔ nduŋ mmɔ, kpa ɔtɔ nte Peter ye John ye James ye Andrew, ye Philip ye Thomas, ye Bartholomew ye Mathew, ye James eyen Alphaeus, ye Simon Zealot, ye Judas eyen James eduŋɔde do. 14Kpukpru mmɔ emi eda esit kiet edɔdiɔŋ eyire ke akam, ye iban oro, ye Mary eka Jesus, ye nditɔ eka Esie.
15Ekem ke mme usen oro Peter adaha ke enyɔŋ ke otu nditɔ-ete (otu owo emi ebonode ekpere owo ikie ye edip), onyuŋ ɔdɔhɔ ete, Nditɔ-ete, se ekewetde, 16kpa se Edisana Spirit akadade inua David ebem iso etiŋ abaŋa Judas, emi ekedide andida mme andimum Jesus usuŋ, enyene ndisu. 17Koro ema ebat enye esin ke otu nnyin, enye ama onyuŋ enyene udeme ke utom emi. 18(Owo emi ada utip ukwaŋido esie edep iŋwaŋ; ndien idem ofut enye, idibi esie onyuŋ asiaha, ndien ofuri nsia esie ewɔŋɔ. 19Kpukpru mme andiduŋ Jerusalem ekabare efiɔk ŋkpɔ emi; oro esin ekot iŋwaŋ oro ke usem mmɔ, ete, Akeldama, oro edi, Iŋwaŋ Iyip.) 20Koro ewet ke ŋwed mme psalm, ete,
Yak ebiet esie edi ndon,
Owo okunyuŋ oduŋ ke esit:
Ŋko-ŋko,
Yak owo efen ada itie-utom esie.
21Mmɔdo ke otu mmɔ emi ekesaŋade ye nnyin ofuri ini emi Ɔbɔŋ 22Jesus ododuk ɔwɔwɔŋɔ ke otu nnyin, tɔŋɔ ke baptism John tutu osim usen emi emende Enye edɔk ekpɔŋ nnyin, ke otu mmɔ emi owo kiet enyene nditiene nnyin ndi ntiense eriset Esie. 23Ndien mmɔ esiak owo iba, Joseph emi ekerede Barsabbas, enyuŋ ekotde enye edian Justus ye Matthias. 24Mmɔ enyuŋ ebɔŋ akam ete, Afo, ɔbɔŋ, emi ɔfiɔkde esit kpukpru owo, wut enye emi ekemekde ke otu owo iba emi, 25ete ada itie-utom emi ye idaha apostle, emi Judas ɔkɔduɔde ɔkpɔŋ, man enye aka ke itie esiemo. 26Ndien mmɔ esin afia ebaŋa mmɔ; afia onyuŋ ɔwɔrɔ Matthias; enyuŋ eda enye edian ye mme apostle duopekiet.
Currently Selected:
UTOM MME APOSTLE 1: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.