JAMES 2
2
Matt pi hedai has wo ha elidad ab ha neidch mo has i mahs
1Ab am s-wohochud g t-kownalig Jesus Christ. Pegih, k pi hab chum chuꞌig mams pi ab hu wo ha haꞌichuch g shoꞌigkam. 2-3Pi o apꞌe mamtp hema wo si s-ap dai g s-kais oꞌodham k eda hab wo ah g shoꞌigkam mat gam hu wabsh wo kehkkad o wo dahiwua jewedo. 4Pi o apꞌe g em-tatchui mamtp ha baꞌich ab wo i haꞌichuch g s-kais oꞌodham.
5Jiosh ash ab ha makiog g shoꞌig hemajkam g geꞌe wohochudadag mat am wo apꞌedagk kihdaj ed. Kutsh wehsijj ab wo i ha wahpki hegam mo ab tatchua. 6M eda haꞌi pi ab hu has ha elid g shoꞌigkam ch hegam waꞌi s-kakais ab si has ha elid. Am g wo i oidahim mo haꞌi g s-kakais em-shoꞌigchud ch am i em-wahpkid chehanig ch ed 7ch s-koꞌokam has ahg hegai mach ab ihm mo d t-doꞌibiakam.
8Am g hab wo junihid g Jiosh chehanig mo hab masma an oꞌohanas:
Ab amt wo si pihk e elidad wehs ha wui g hemajkam hab masma mam has i masma hejel e wehhejed si pihk e elid. Leviticus 19:18
9Mt wo melchkwuhid g Jiosh chehanig mamtp ab aꞌai wo i ha gaꞌagwulkadad g hemajkam ab ha neidch mo has i mahs. 10Kumt d wo pi ap chuꞌijkamk am Jiosh chehanig ed mamtp chum hems al hemako chehanig wo melchkwua. 11An o hab chuꞌig mamt wo si e nuhkud heg waꞌi wehhejed hejel e‑wehm kihkam ch an hab ep chuꞌig mamt pi wo mua g hemajkam. Kumtp hems s‑ap wo e nuhkud g e‑wehm kihkam wehhejed k wabshaba d wo pi ap chuꞌijkamk mamtp wo hema mua.
12-13T wabshaba g Jiosh gam hu hab i juh g pi ap t‑chuꞌijig mat wo t‑doꞌibia ab amjed g s‑koꞌok t‑namkidadag mat hekid wo t‑lodai. Pegih, tt hemho wa hab masma hab wo t‑junihid ch hab wo kaijjid mach d t‑doꞌibiakam ch ab wo i s‑ha hoꞌigeꞌidad g hemajkam. Pi at ab hu wo i ha hoꞌigeꞌel g Jiosh hegam mat pi ab hu wo ha hoꞌigeꞌidad g hemajkam.
Matt hab wo chum junihid g t‑wohochudadag
14Pi o woho d Jiosh wohochuddam hegam mat pi hab wo junihid g tatchuij. Kut pi wo ha doꞌibia. Haꞌichu hab t‑juni at wo t‑wohokamch machs d wohochuddam. 15Neh, matp hems haꞌi g t‑wehm wohochuddam d wo shoꞌigkamk ch wo haꞌichu si tatchua. 16Pi o apꞌe machs pi am hu wo i ha wehmt k hab wabsh wo chei, “Jiosh at wo waꞌi i em‑wehmt.” 17Pi ach woho wohochud g Jiosh mattp pi am hu hab wo junihid g tatchuij.
18Haꞌijj amki hab e elid mamt ab wabsh wo s‑wohochudad g Jiosh ch eda pi am hu hab wo junihid g tatchuij. K eda hab chuꞌig mat g haꞌichu hab t‑juni wo tashogi g t‑wohochudadag. 19Jijawul o hab waꞌap chum s‑wohochud mo an hema d Jiosh ch shaꞌi si s‑ehbid ch eda pi am hu hab junihim g tatchuij ch hab masma e chehgidch mo pi d shaꞌi e doꞌibiakam.
20K heg hekaj tasho mo pi woho wohochud g Jiosh hegam matp hedai pi hab wo junihid g e‑wohochudadag. Am ant haꞌichu ep wo em‑ahgi mant hekaj wo si tasho em‑chehgi ihda. 21Ab ach d amjedkam hegai mash hab chehgig Abraham. Kush heg ab s‑wohochud g Jiosh. Tsh g Jiosh am cheha matsh ab wui wo iagchul g e‑alidag muꞌak. Tsh g Abrahambad am woho hab chum juh k hekaj e chehgid mo ab s‑wohochud g Jiosh ch d e doꞌibiakam. Tsh g Jiosh am hahawa pi hiwigi mas wo mua g e‑alidag no pi wabsh aꞌappem g wohochudadgaj. 22Abrahambad at ab wehnad g haꞌichu hab e‑juni g e‑wohochudadag. Wohochudadgaj at s‑ap i e nahto heg hekaj haꞌichu hab junij. 23T hekaj am e wohokamch hegai mo an oꞌohanas:
Abraham at ab i s‑wohoch g Jiosh.
K heg hekaj hab kaij g Jiosh mo d e doꞌibiakam ch pi ha chuꞌijig. Genesis 15:6
Neh sh g Jiosh am hahawa hab masma ihm mo d nawojij. 24Pegih, id o am t‑chehgidch mo pi d e doꞌibiakam hegam mat hab wabsh wo kaijjid mo d wohochuddam. Hemho wa att am hab wo junihid g t‑wohochudadag ch hab wa masma am wo t‑chehgi mach d t‑doꞌibiakam.
25Am g wo s‑chegitok mo haschu an oꞌohanas ab amjed g Rahabbad. Heg atsh wa haꞌi ha doꞌibia g t‑shohshonbad mash eda g wehmaj oꞌodham s‑ha kokdaimk. Id at am wohokamch mo ab s‑wohochud g Jiosh. Kutsh g Jiosh doꞌibia. 26Pegih, am ach t‑chehgidch g haꞌichu hab t‑junikaj mach haschu ab i s‑wohochud. K hegam mat pi am hu hab wo junihid g Jiosh tatchui pi ab hu wohochud g Jiosh.
Currently Selected:
JAMES 2: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.