COLOSSIANS 3
3
1Jiosh at ab t-mah g wechij doakag ahchim matt ab ihm g alidaj mo d t-doꞌibiakam. K id heg wa wepo mat ab i t-wuwhas muhkig t amjed hab masma mat ab i wuhshad g e-alidag. Hemuch o an daha g alidaj s-apkojed hugidaj an ch am t-wehhejed apꞌechud matt wo wehmajk. Kutt heg wui am wo i t-gewpkai. 2Pi g am hu wo chegitokad g jewed dahm haꞌichu ch wabshaba g dahm kahchim haꞌichu wo tatchuad. 3Jiosh at am i t-wehnadk g e-alidag. T heg heki hu muh k an hab chuꞌig dahm kahchim ch ed. K id heg wa wepo matt heki hu koꞌo k an wehmaj. 4Ia at ep wo i wuhsh g Christ jewed dahm. Kutt am wehmaj wo i wuwhag k wepo masma wo si s-kehgajk.
Matt dagito g pi apꞌekam
5Mt gam hu hab wo i juh g pi kehg e-tatchui ch pi kehg e-chegitoi k pi wo wehmaj woꞌiwua matp hedai pi d em-wehm kihkam k pi wo pihk e elidad mamt geꞌe haꞌichu wo bei. Hegai mat wo s-behim mo haschu pi ab hu d wuikamaj o heg jioshchud. 6S-koꞌok namkidadag at ab ha ab wo gei hegam mo hab masma haꞌichu hab junihim. 7Ahpim o wa an em-uꞌukch g pi kehg tatchui. Kum wa g pi apꞌekam hab junihim. 8An o wa em-uꞌukch g bagatalig ch hehgamdadag ch kehꞌidadag. Mt wabshaba hemuch im hu wehs hab wo i juh ihda pi apꞌekam ab e amjed k pi hekid pad wo neokad 9ch pi haꞌichu wo ha iattogidad. Wehs at mukito ihda hab mahs haꞌichu ab em-ab.
Matt bei g wechij doakag
10Ab amt i e dagito Jiosh wui. T heg ab em-mah g wechij doakag k em-tatchuid mamt wo wepo masmak ch ab wo s-ap s-mahchk. 11Christ o d si s-has haꞌichu am t-wehhejed ahchim mach ab ihm. Heg doakag o am haꞌichug t-dodakag ed. Kuch heg hekaj ab i t-hemakochudch. Pi ach hahawa t-gawulkadch ab em-amjed ahchim mach d Tutuligo. Pi o has d ahga g pahl hikuchka. Pi o t-gawulkadch g haꞌichu t-amichudadag. Nenehol o d hemako ahchim t-wehm mach pi d nenehol. Wehsijj ach d hemako ab ihmch g Christ.
12Jiosh o si pihk e elid t-hekaj ch ab i t-gawulkai. Kutt heg hekaj wo si pihk t-elidad ha hekaj g hemajkam ch wo s-hemajimak ch s-t-tahtk ch wo nakogad haꞌichu ch pi hab wo chum t-wuad machs d s-has hahaꞌichu am ha-nena ed. 13Jiosh at ab s-t-hoꞌigeꞌid k gam hu hab i juh g pi ap t-chuꞌijig. Kutt hab waꞌap wo s-ha bahbgi hegam mat hab wo juh g pi apꞌekam ab t-wui k hab waꞌap ab wo s-ha hoꞌigeꞌel. 14Ab o t-ab matt aꞌai t-hekaj wo si pihk t-elidad ch hab s-ap d wo hemakok.
15Christ o ab em-makiog g s-ap tahhadkam. Ab g wo i hoꞌigeꞌidad heg hekaj ch wo si s-ap e tahtkkad ab aꞌai e wui nam pi d hemako heg wehm hab sha masma mam d honshpadaj. 16Mt am wo s-chegitok g Christ haꞌichu ahga. Jiosh o ab em-makiog g amichudadag. Kumt ab aꞌai wo i e mashchamad ch wo ahgad g Jiosh oꞌohana ed nenꞌei ch mihshmda nenꞌei ch wo neꞌichudad g Jiosh ch ab wo i mahkchid g geꞌe hoꞌigeꞌidadag. 17Wehs amt hab wo jundad g t-kownalig Jesus hegai mamt haschu hab wo junihid. Kumt ab wo hoꞌigeꞌidad g t-ohg Jiosh am gahi wuhshanim g Jesus.
Matt has masma ab aꞌai wo t-neidad
18Ahpim uꞌuwi mam ab ihm g Christ amt ab wo s-wohog ha elidad g e-wehm kihkam. Bo masma em-tatchuid g Jiosh.
19Kumt ahpim chechoj wo si pihk e elidad ha hekaj g e-wehm kihkam ch ab wabsh wo i s-ha bahbgi.
20Ahpim aꞌal amt ab wo s-wohog ha elidad g e-jehj chum hekid. Id o d tatchuij g Jiosh.
21Kumt ahpim ha-jehj pi am wo si ha babgachudad g e-aꞌaliga mat pi wo heb hu wua g e-chegitoidag.
22Ahpim mam d ha-pionag amt ab wo s-wohog ha elidad g e-aꞌamo wohoꞌi e-tatchui ab heg wabsh hekaj mam ab si has elid g Jiosh ch pi heg hekaj mas am wo em-nei g em-aꞌamo k wo s-hohhoꞌi g em-chikpan. 23-24Pi o d waꞌi oꞌodham mo em-chikpnachud ch wabshaba d t-kownalig Jesus. Ab o him g tash mamt an wo wehmajk. T heg ab wo em-namkid heg hekaj em-chikpan. Kumt heg hekaj wohoꞌi e-tatchui ab am hab wo junihid g e-chikpan. 25T-kownalig Jesus at ep wo namkid hegai matp hedai hab wo juh g pi apꞌekam. Heg at wo bei g s-koꞌok e-namkidag. Jiosh at wehs wo ha lodai g hemajkam k hab masma wo ha namkid matp has i masma hab e junihim.
Currently Selected:
COLOSSIANS 3: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.