A Bolokiana 23

1Hikani i Pol u taga bakotoki vovohi na nako na Tangaloi Tovotovo Lalakua mo viti “Ratua, nu rongo lo tarabehigu kwara nu toka u taritarisa lo mamaurianagu doluaki lo nako i God vaki na hika.” #Bol 24.16 2A hugwe na tangaloi* lingilingi i Ananaeas mo viti lakwara hinea rau tu garagarani mai Pol kwara rana vosa korokoro kwakwana. #Sione 18.22-23 3I Pol mo viti lakwae kwara, “!I nigo a roi vuroki! #23.3: !I nigo a roi vuroki! Aira Kwalaha rau viti kwara, !I nigo a oro vuroki! I God ne kwohiko. I nigo ku hugu takwa-hi kwara kona rongo na leo hi huriau lo hala na Tangwata*. Vunu i nigo ku galo lo Tangwata komo viti lakwara kwara rana vosaiau.” #a Esik 13.10-15; b Lev 19.15

4A tangaloi hi ramo tu garagarani mai Pol ramo kwaha maia rau viti “I nigo ku tuku kwahakwaha hati vovohi na hugwe na tangaloi lingilingi noi God.”

5I Pol mo daraki mo viti “Ratua. I nau nohe kikilai tea, kwara aia a hugwe na tangaloi lingilingi. Nu kikilai a Uliuli* Kokona u viti kwara, ‘I kamu tulu hatu kwahakwaha hati vovohi na nomiu kaitomuaki.’ ” #Esik 22.28

6Lolona i Pol mo tagaira, a tangaloi vano hi ratuaki a Satiusi*, ratuaki a Varisi*, aia mo kwaha karakara lo nako na Tangaloi Tovotovo Lalakua mo viti “!Ratua! !I nau a Varisi, a natu na Varisi! I kamu tulu arekiau hika huri hi, lolo domigu nu kikilai kwara a mateana rana maraka taliku rana ahi.” #a Bol 4.2; b Bol 26.5; Vil 3.5; d Bol 24.15,21

7Lolona mo viti kwehini, a Varisi mana Satiusi ramo maraka ramo viroro, ramo makwahe gwatu kairua, 8huri a Satiusi rau viti kwara a tangaloi hinea rau mate ranahe maraka te taliku tina mateana. Rau viti kwara a kaihora tina taetae tikei, vake a tanungwe tikei. Vae a Varisi rau hauhuri lo kinau vano hi kaitolu. #Mat 22.23 9Hokinia a leoki mo lakua, vunu a tangaloi kikikila na Uliuli* Kokona ratuaki tina bulubulu na Varisi, ramo maraka hake ramo kwaha karakara ramo viti “I kami kehe hagwe na kinau tea kwara u hati lo tangaloi hi. Vae keu domi kwara a tanungwe diko a kaihora tina taetae rau kwaha maia kareaki.” #Luk 23.4,14,22; Sione 18.38; 19.4,6; Bol 25.25

10Ramo vikwahaki karakara, vae a kaitovo na vuro hi u mataku kwara vae ramai vireveki Pol ne mai mate. Hikani mo hora na nona tangaloi na vuro kwara rana vano tegetano rana lavi Pol tiura vaki lolo ingwaga.

11Mavukona bongi a Hugwe* i Jisas mo tu mai Pol mo viti lakwae kwara, “Ko hatu mataku. I nigo ku hago leo huriau hike Serusalem, vae kona vai vake hokinia lo gwatuivanua lakua Rom.” #a Bol 18.9; b Bol 19.21; 27.24; 28.16,23

A gwaloana noi Isrel rau tovotovo hati ki Pol

12Mavukona sirovobongi a gwaloana noi Isrel* tuaki ramo vileki tabulutaki ramo tovoki na domi hati. Ramo hariki na leo huira mai God kwara ranahe kani na kinau tea ranahe inumi na kinau te vohoki tarisaki hi rana kwohi matei i Pol. Rau viti kwara i God ne vai mateira diko ranahe vai te kwehi. 13A tangaloi vano hi ramo tovoki na domi hati hi tabulutaki a gwiraga u sileti na ngavu kaivati. 14Vunu ramo vano vaki mana tangaloi* lingilingi lalakua mana ngwarasea* rau viti “I kami keu hariki na leo tabulutaki u huira mai God kwara kenahe kani na kinau te vohoki tarisaki hi kena kwohi matei i Pol. #a Bol 21.30-33; b Bol 22.27 15Hikani i kamu mana Tangaloi* Tovotovo Lalakua tulu hora na leo vaki mana kaitovo na vuro nona ngwera Rom kwara ne lavi Pol tegetano vaki maikamu taliku. Tulu sinae, tulu viti lakwae kwara, ‘Keu lengaia kwara kena kikilai vakevake a havakinau hi aia mo vai, vae kena uduhuri kinia.’ Tulu ne vai kwehi, vae i kami kena rarai kena kwohi mateia lo hala.”

16Vae i duvi i Pol, a natu ngwera, u rongo na domi hati hi. Hokinia mo vano mo soro tilolo ingwa na tangaloi na vuro hi, mo vitia lakwai Pol. 17Vunu i Pol mo kware na kaitomuaki na tangaloi na vuro katukwale mo kwaha maia mo viti kwara, “Ko lavi na natu hika vaki mana kaitovo na vuro. Te leo maia kwara ne viti lakwae.” 18A kaitomuaki hi mo lavia, mo tomuakinia vaki mana kaitovo na vuro. Mo viti lakwae kwara, “A tangaloi gwarugwaru i Pol, u kwareau mo viti lakweau kwara na lavi na natu hika vaki maiko. Te leo maia kwara ne viti lakwako.”

19A kaitovo na vuro hi mo hago lo kabana, mo lavia raru mo vano kaherarua, mo uduhuri kinia mo viti “?Ku vanamai mana hava leo kwara kona viti lakweau?”

20Mo viti “A kaitomuaki nona gwaloana noi Isrel rau kwahakwaha tabulutaki ba kwara rana uduhuri kinigo kwara mavuko kona lavi Pol tegetano vaki mana Tangaloi Tovotovo Lalakua. Vae rana sinako, rana viti kwara a Tangaloi Tovotovo Lalakua rana uduhuri kinia kwara rana kikilai vakevake a havakinau hi aia mo vai. 21Vae ko hatu rongohuria, huri a gwaloana noi Isrel tuaki a gwiraga u sileti na ngavu kaivati vae rana hilikinia lo hala. Aira rau hariki na leo huira mai God kwara ranahe kanikani tea, ranahe inuinu tea tarisaki hi rana kwohi mateia. Hika rau rarai kwara rana vaia, vae rau hugu tara na leomu kehekeheki.”

22A kaitovo na vuro hi mo kwaha maia mo viti “Konahe viti tea lakwa na tangaloi vake kwara ku viti na leo hika lakweau.” Vunu mo hora na natu hi mo mule.

A kaitovo na vuro u hora i Pol vaki mana kavman lakua i Vilikis

23Hikani a kaitovo na vuro hi mo kware na nona kaitomuaki na tangaloi na vuro kairua mo viti lakwararua kwara, “Kuru vai rarai na tangaloi na vuro vidolua vakairua mana tangaloi na osi ngavu kaibitu mana tangaloi na hari vidolua vakairua tulu ne vano vaki lo gwatuivanua lakua Sisaria. Tulu mo rarai vae bongi hika ne bongi ne madi tulu neri vano. 24Tulu bete te osi lakwai Pol ne kwalao luga, tulu mo lavia, a kinau ne hatu vaia vohoki hi tulu mo maravuti mana kavman lakua hi i Vilikis.” 25Hikani a kaitovo na vuro hi mo uli na leo hokinia hika. Mo viti

26“I nau i Klotias Lisias nu uli na leo hika lakwako, Vilikis hinea i nigo a kavman lakua kareaki. Nu lengaia kwara na kwahakwaha maiko. 27A tangaloi hikani a gwaloana noi Isrel* rau kwiribibia u garagarani kwara rana kwohi mateia. Nu rongo kwara aia tavuti na gwatuivanua lakua Rom, hokinia nomo vano mana nogu tangaloi na vuro kemo hago maia. #a Bol 21.30-33; b Bol 22.27 28Nu lengaia kwara na kikilai kwara u hati kworohokinia ramo toko kwaha u huira vovohia. Hokinia nomo lavia vaki mana noga Tangaloi* Tovotovo Lalakua. #Bol 22.30 29I nau nahe hagwe na hatiki te vohoki luna hinea mo vaia kwara u taritarisa kwara ne mate diko na taua tilo ingwa na gwarugwaru huri. A noga leo ramo taua lakweau a leo na noga Tangwata* siboga vohoki. #a Bol 18.14-15; 25.18-19; b Bol 23.6; d Bol 23.9; 27.31; 28.18 30Vae lolona nomo rongo kwara a gwaloana noi Isrel rau vai na domi hati tavuniki huria, nu domi kwara na horae vaki maiko. Nu viti lakwa na tangaloi hinea rau vaivai leo kinia kwara rana venatu ki nakoga mana noga leo vaki lo kwahakwaha, rana viti huri na doridorina lakwako lo nakomu bakotoki. A leogu rovonaki hike.” #Bol 24.5-8; 25.5

31A tangaloi na vuro ramo vai na nona leo. Ramo lavi Pol ramo vano bongi vaki lo gwatuivanua Antivatris. 32Mavukona a tangaloi na vuro ramo mule taliku vaki lo ingwa na tangaloi na vuro ramo tiraki na tangaloi na osi vano hi ramo huri i Pol. 33Ramo lavia vaki lo gwatuivanua lakua Sisaria ramo bete na leo lakwa na kavman lakua hi ramo tau i Pol lakwae. 34A kavman lakua hi mo valuki na leo hi mo rovo mo uduhuri ki Pol mo viti kwara, “?I nigo ku vanamai lo hava vanua?” Lolona hi mo kikilai kwara u vanamai tina vanua Silisia, #Bol 22.3 35mo viti “A tangaloi na leo rana maravuti rana viti huri na doridorimu, nari rongo a leomu kwara ku viti kworoho.” Vunu mo kwaha mana tangaloi na vuro kwara rana kwiribibi Pol lolo tanotano lakua nona hugwe i Herot. #23.35: I Herot. I Herot hi aia i Herot Lakua. Kona taga lo Deksenare lo buku hika takuni.

Currently Selected:

A Bolokiana 23: HWT

Highlight

Copy