A Bolokiana 11

I Pita mo vitiviti huri na halana

1A kaihora* kokona mana ratua lo vanua Sutia doluaki rau rongo kwara a tangaloi tavalavarea tina gwaloana noi Isrel* vake rau lavi na leo noi God. 2Lolona i Pita mo galo hake vaki Serusalem, aira hi a tangaloi noi Jisas hinea rau lengaia kwara rana vai na kaimatai* lo siosio lo tangaloi tavalavarea tina gwaloana noi Isrel, rau kwaha luna 3ramo viti kwara, “?Kworoho komo vano komo hugu mana tangaloi vano hi rahe lai te kaimatai lo siosio, vake komo kanikani maira?” #Bol 10.28; Gal 2.12 4Hokinia i Pita mo viti savi na kinau lakwara hinea u vaiana tina tinatinakakiki vaki lo gweregwereki.

5Mo viti kwara, “I nau nu tiutangaroa lo gwatuivanua Sova, vae lolona hi nomo tagai na vakatabobo. Nu tagai na kinau mo hivo tegetano tina taetae aia hoki na gwana lakua a ngwahukuki kaivati, vae nu taga hokinia kwara te tangaloi rau kwiribibia lo ngwahukuki vano hi ramo hivokinia, mo hivo mo maravuti maiau. #Bol 10.9-20 6Nomo taga tabetabeki tilolona nu tagai na boboroa mataroi, aira hi a boboroa na vanua mana boboroa na bubu mana kinau vake hi rau tuku karakaraka, mana manu vatahae. 7Vunu nomo rongo na dilao mo kwaha maiau mo viti kwara, ‘!Pita, ko maraka ko ua ko kani!’ 8Vae nu viti ‘Hete vohoki, Hugwe*. A hinaka hinea rau hogora lo nakomu, diko rahe taritarisa te huri kanikani rahe kihi na kwakwagu te vohoki.’ 9A dilao mo daraki tina taetae mo viti kwara, ‘Ko hatu domi na kinau kwara rau hogora hinea i nau i God nu viti kwara rau ngwasara.’ 10A leo hi mo vanamai vakaitolu, vunu a kinau hi savia ramo revea hake taliku vaki lolo taetae. 11Lo taro aia hi vohoki, a tangaloi kaitolu i Konilias mo horara vaki maiau tina gwatuivanua lakua Sisaria, ramo maravuti lo ingwa hi nomo hugu eia. 12A Tanungwe Kokona mo viti lakweau kwara na hurira na hatu domi kairua. A ratua vake hi kaiono tina gwatuivanua Sova ramo huriau vaki Sisaria, i kami vunu kemo soro tilolo ingwa i Konilias. #Bol 10.23,45 13Hikani mo viti lakwakami kwara u tagai na kaihora tina taetae mo tu lolo ingwana mo viti lakwae kwara, ‘Ko hora te tangaloi vaki lo gwatuivanua Sova ne kware na tangaloi hi a hinana i Saemon Pita. #Bol 10.3-5,22,30-32 14Aia neri viti na leo lakwako vae kona ahi kinia mana nomu vakabela.’ #a Bol 10.22; b Bol 16.31 15Nomo tinakaki nomo kwaha, a Tanungwe Kokona mo hivo tiluga hokinia hi mo hivo tiluda lo tinatinakakiki. #a Bol 10.44; b Bol 2.4 16Vunu nomo domihagwe a havakinau hi a Hugwe mo viti tuai mo viti kwara, ‘I Sione u bavtaes na tangaloi kina kwai, vae i kamu tulu neri lai bavtaes kina Tanungwe Kokona.’ #Bol 1.5 17U matangwasara luna hi kwara i God u bete a hilehile lakwa na tangaloi tavalavarea tina gwaloana noi Isrel u taritarisa maia hi mo bete lakwakita lolona tamo hauhuri lo noda Hugwe i Jisas Kraes*. !Kwara i nau a hava tangaloi kwara na tu koro na boloki noi God!”

18Lolona ramo rongo na leo hi, rahe kwaha luna te taliku, ramo kaluhaki God ramo viti kwara, “Hikani i God u vai na hala, mo bete na taro lakwa na tangaloi tavalavarea tina gwaloana noi Isrel vake kwara rana halebohi tina noga hatiana, rana ahi.” #Bol 13.48; 14.27

A kwarelua noi Jisas lo gwatuivanua Antiok

19Lolona a tangaloi ramo kwohi matei i Steven, a tangaloi hauhuri ramo kwalao girigiri kina vaibulabula hi a noga tavaluivuro ramo vai. Ratuaki rau vano vaki lo vanua Vonisia mana vanua Saevras, vake mana gwatuivanua lakua Antiok, ramo viti na leo i God lakwa na gwaloana noi Isrel* kehekeheki. #Bol 8.1-4 20Vae a tangaloi hauhuri tuaki, a ngwera lo vanua Saevras maira hi lo gwatuivanua lakua Saerini, ramo vano vaki lo gwatuivanua lakua Antiok ramo viti na leo i God tivarea lakwa na tangaloi tavalavarea tina gwaloana noi Isrel vake. Ramo heretuvaki na Roro Karea lakwara huri na Hugwe* i Jisas. #Sione 7.35 21A huirana nona Hugwe aia maira, vae a tangaloi rusa haburu ramo hauhuri ramo halebohi vaki mana Hugwe. #Bol 2.41; 4.4; 5.14; 6.7; 11.24; 21.20

22A roro huri na kinau hika mo maravuti mana kwarelua* noi Jisas Serusalem, hokinia ramo hokaki Banabas vaki Antiok. 23Lolona mo maravuti mo taga kwara i God u vai tabetabeki na tangaloi rusa vano hi, u lagwa haburu, vake u rakati na domiga kwara rana karohuri kareaki lo Hugwe kina domiga savia. #Bol 13.43; 14.22 24I Banabas aia a tangaloi karea hinea u kukwere kina Tanungwe Kokona mana hauhuriana, vae a tangaloi rusa ramo huri na noda Hugwe. #a Bol 6.5; b Bol 2.41; 4.4; 5.14; 6.7; 11.21; 21.20

25Vunu i Banabas mo vano vaki lo gwatuivanua Tasas mo taga haro i Sol. #Bol 9.30 26Lolona mo hagwea mo lavia vaki lo gwatuivanua lakua Antiok. Hokinia raru mo bulu mana kwarelua noi Jisas a hukao katukwale lo vanua hi, raru mo toko huhui na tangaloi rusa hinea ramo vileki tabulutaki tigwaravu. Lo gwatuivanua lakua hi Antiok a tangaloi tavalavarea ramo tau na hina hika Tangaloi noi Kraes* tomua halaradu tilo ngwalagelo noi Jisas.

27Lo taro aia hi a tangaloi* duruduruki tuaki ramo duvule tegetano tina gwatuivanua lakua Serusalem vaki Antiok. #Bol 13.1; 15.32 28Katukwale tiura hi a hinana i Akavas mo tu hake, mo viti terekaki kina huirana na Tanungwe Kokona kwara vae nehe tuai tea vae ne gwakere doluaki na varamana. Mo mule luna lolona hi i Klotias aia a hugwe lakua nona ngwera Rom. #Bol 21.10 29A ngwalagelo noi Jisas rau domiki kwara vatavatahakinira rana hokaki te mane* hokinia rau vai lai kwara ne hago mana rabela hinea rau toka lo vanua Sutia. 30Rau vai luna hokinia hi, ramo bete na mane lakwai Banabas mai Sol raru mo kwalahaki lakwa na ngwarasea* na kwarelua* noi Jisas takwahinea. #Bol 12.25

Currently Selected:

A Bolokiana 11: HWT

Highlight

Copy