PAKI TEA NI ROMA 4

1Nalakena tea wanogoe tuga noa nasava nalo ni Abraham, tamagida vea pae nap̃okasi? 2Nalakena Abraham e pe vei tea marileanakiana ki nawosiana maga, e pe veani tea vakavakaeana; ma e da peani a narae ni Sup̃e mau. 3Nalakena navasaana midiriana e noa nasava? Go Abraham e saralomau navasaana ki Sup̃e, go e maneana pei tea midoakiana naga ega vei namarinaleoleanaana. 4Ma tea waina e p̃osiwosi, namoriana e da maneana pei tea midoakiana naga e pae nasaup̃iaana mau, ma e pae nateaoneana. 5Ma tea waina e da p̃osiwosi mau, ma e saralomau tea waina e mari leana ki tea sigisigileo, nasaralomauana aneana e maneana pei tea midoakiana naga ega vei namarinaleoleanaana. 6Dakiusi waina David ma e noa namaropaana ki naatam̃oli waina Sup̃e e maneana midoaki namarinaleoleanaana masale ki nawosiana maga, e naga.

7Ae namaropaana ki tea maga waina natapiriana adeada maga eu pei tea tapeluaana,

Go waina namarinaleosaana adeada maga eu pei tea tap̃augoroana!

8Ae namaropaana ki naatam̃oli waina Yehovah ega wo da midoaki dip̃a e namarinaleosaana mau!

9Ma namaropaana wanogoe e pei tea noaana naga e umai paki tea tovadaviviana maga, kite e paki tea maga waina eu da pei tea tovadaviviana mau? Nalakena tu naga, Nasaralomauana ki Abraham e maneana pei tea midoakiana naga ega vei namarinaleoleanaana. 10Ma e pei tea midoakiana asa ragi waina e dapale sava? Ragi waina e pei tea tovadaviviana sua, kite ragi waina e ko da pei tea tovadaviviana mau? E da pei ragi waina e pei tea tovadaviviana sua mau, ma e pei ragi waina e ko da pei tea tovadaviviana mau: 11go e dape navaivaiana ni natovadaviviana, wotu sikai ni namarinaleoleanaana ni nasaralomauana aneana ragi waina e ko da pei tea tovadaviviana mau: naga ega vei tama ni tea maga mamau puti waina eu saralomau, ragi waina eu da pei tea tovadaviviana mau, naga namarinaleoleanaana ega vei tea midoakiana naga ega vei adeada; 12go tama ni tea tovadaviviana maga, tea maga waina eu da pei tea ni natovadaviviana sikina mau, ma waina eu surata pae naatum̃eleana maga ni nasaralomauana ki tamagida Abraham waina e pei aneana ragi waina e ko da pei tea tovadaviviana mau. 13Nalakena nasaiana paki Abraham kite paki naworaworana, naga nae ega vei tea veani pioli ki maramana, e da pae nawotaeana mau, ma e pae namarinaleoleanaana ni nasaralomauana umai. 14Nalakena tea maga waina eu pei tea ni nawotaeana eu pe vei tea veani pioli maga, nasaralomauana e pe vei tea mariana e pe vei tea p̃alo, go nasaiana e pe vei tea mariana e pe vei tea m̃oli: 15nalakena nawotaeana e mari namaetoana; ma tokora waina nawotaeana e da doko asa mau, natapiriana ma e da doko asa mau. 16Nalakena tea waia e pei tea ni nasaralomauana, naga ega vae nasaup̃iaana; naga nasaiana ega magi naworaworana mamau puti pei tea lawosokiana; ega ta magi tea maga waina eu pei tea ni nawotaeana eu sikida mau, ma ega magi tea maga waina ma eu pei tea ni nasaralomauana ki Abraham, waina e pei tamagida mamau puti (dapala waina e pei tea midiriana, 17e naga, A po mari ko ku pei tama ni nalauna laapa) narae ni tea waina e saralomau asa, Sup̃e, waina e do pakamauri ki tea mate maga, po do soso naleo maga waina eu da doko mau, dapala waina eu pe toko. 18Waina ragi waina ero pano p̃ota ki naleogoroana e saralomau naleogoroana, naga ega vei tama ni nalauna laapa, ega tapala tea waina e pei tea noa‐sua‐ana, e naga, Naworaworam̃a euga tapalana. 19Go e da pei tea mariana e manainai nasaralomauana mau ragi waina e midoaki nap̃atokona naga e mate sua (e pei tea ni natau p̃onotia sikai), go ki namateana ni nasum̃a ni kanao ni Sarah: 20go nalo ni nasaiana ki Sup̃e e da midoakisara ki natikaana ni nasaralomauana mau, ma e pei tea mariana e kasua ki nasaralomauana, po do dua Sup̃e nasamasamaana; 21go e saralomau pakavuro naga e mari atae mari tea waina e sai a. 22Go nalakena tea wanogoe e maneana pei tea midoakiana naga ega vei namarinaleoleanaana. 23Ma e da pei tea midiriana nalakena nae e masikina mau, naga e maneana pei tea midoakiana; 24ma e pei tea midiriana nalakena nigida, waina ega wo manigida pei tea midoakiana, waina tu saralomau tea waina e sike Yesu Nawota anigida e duleana m̃elu dua ki tea mate maga, 25waina e pei tea vituakiana nalakena natapiriana anigida maga, go waina e pei teasikeana e duleana nalakena namarileana‐ki‐gida‐ana.

Currently Selected:

PAKI TEA NI ROMA 4: NTB

Highlight

Copy