PAKI TEA NI ROMA 11

1Nalakena tea wanogoe a naga, Sup̃e e dip̃adoa narei aneana kite? Ega ta dapala nogoe mau. Nalakena kinau ma a pei nawora ni Israel, ni nawora ni Abraham, ni naworawora ni Benyamin. 2Sup̃e e da dip̃adoa narei aneana mau waina e pea atae ra. Kite ku da atae tea waina navasaana midiriana e noa e nalo ni Eliyah? Dapala waina e pavarani Sup̃e dip̃a Israel, 3e naga, Yehovah, eu mari punue profeta anigo maga, eu kili dakai tagura ni naviriana anigo maga, go kinau a sikigu pei tea toropusiana doko, go eu laaga namauriana aginau. 4Ma navasadaraana ki Sup̃e e noa ki nia nasava? A dum̃agu maginau doropusi naatam̃oli manu larua, waina eu da ditip̃atua paki Baal mau. 5Go dapala nogoe ragi waia ma tea toropusiana sikai e doko pae namatadoaana ni nasaup̃iaana. 6Ma e pe vae nasaup̃iaana, e da moro pei tea ni nawosiana maga mau: nalakena e pe vei tea ni nawosiana maga, nasaup̃iaana e da pei nasaup̃iaana mau. 7Nalakena tea wanogoe nasava? Tea waina Israel e laaga asa, tea wanogoe e da pap̃ai a mau; ma tea matadoaana maga eu pap̃ai a, go tea p̃ota maga eu pei tea mariana eu kasua: 8dapala waina e pei tea midiriana, naga Sup̃e e dua ra naatana sikai ni namaturu‐darataraana, namata maga waina euga ta leosai mau, go nadaliga maga waina euga ta dorogo mau, pa pa paki naaleatia ni masoso. 9Go David e naga,

Wede adeada ega vei kup̃ena sikai, go vaivai sikai,

Go tea tapilagonaana sikai, go navituadip̃aana sikai paki‐da:

10Namatada euga maligo, naga euga ta leosai mau,

Go p̃a mari ra euga kolo ki nam̃aduda sara ragi.

11Nalakena tea wanogoe a naga, Eu dapilagona naga euga rowo kite? Ega ta dapala nogoe mau: ma ki natapiriana adeada namautipauriana e magi tea ni nalauna p̃ota maga umai, naga ega mari ra euga totowo kasua. 12Ma natapiriana adeada e pe vei nasogolapaana ni maramana, go navakitanoana adeada e pe vei nasogolapaana ni nalauna p̃ota maga; navakavuroana adeada e pe wo pei tea wanogoe e pe warua liu pa!

13Ma a do pasa ki mu waina ku pei tea ni nalauna p̃ota maga. Go nalakena kinau a pei apostolo sikai ki tea ni nalauna p̃ota maga a samasamani nasuasuaana aginau: 14mase a pe mari tea maga waina eu pei nap̃okasigu euga totowo kasua, go a pe mautipauri te seara kakada. 15Nalakena nanadikilua‐ra‐ana e pe vei nalakena naveip̃op̃o‐wia‐ana ni maramana, naviragi‐ra‐ana e pe wo pei nasava, ma namauriana m̃elu dua ki tea mate maga? 16Ma takavea e pe tapu, taua ma e pe tapu: go nakoa e pe tapu, ara maga ma eu pe tapu. 17Ma ara maga seara kakada eu pe vei tea p̃oriluaana, go nigo, waina ku pei oliva kau sikai, ku pe vei tea lawokiana doko m̃aleoputo kakada, po mamau saisai peani nakoa go nasua ni oliva; 18p̃a ta pakavakae dap̃au ara maga mau: ma ku pe vakavakae, nigo ku da silae nakoa mau, ma nakoa e silae ko. 19Nalakena tea wanogoe p̃a wo naga, Ara seara eu pei tea p̃oriluaana, naga kinau aga vei tea lawokiana doko asa. 20Ioro; eu pei tea p̃oriluaana ki nasarateap̃aloana adeada, go nigo ku lawodu ki nasaralomauana. Pa ta pei tea p̃op̃ovakilagi mau, ma p̃a mataku; 21nalakena Sup̃e e pe ta mauti ara maga waina eu pae navisouana mau, e pe wo da mauti ko mau. 22Nalakena tea wanogoe p̃a vunusi navakaleana go namakaliana ki Sup̃e: paki tea maga waina eu dowo, namakaliana; ma paki‐go, navakaleana ki Sup̃e, ku pe toko navakaleana aneana doko: ku pe ta doko asa mau, nigo ma ku pe wo pei tea taeluaana. 23Go nara ma, eu pe ta doko nasarateap̃aloana adeada doko mau, eu pe wo pei tea lawokiana asa: nalakena Sup̃e e mari atae moro lawo ki da asa. 24Nalakena nigo ku pe vei tea taeluaana m̃elu dua ki tea waina e pei oliva kau sikai pae navisouana, po pei tea lawokiana panop̃ota ki navisouana paki oliva wia sikai; nara, waina eu pei ara maga pae navisouana, eu pe wo pei tea lawokiana euga toko oliva adeada e pe warua liu pa!

25Nalakena a da masauna mau naga kuga vei sap̃o, tai maga, p̃aia waia, naga kuga ta dum̃amu midoaki mu mau naga ku pei tea manumatua, naga nakasuaana pae namagovai e pakilina ki Israel, pa pa navakavuroana ni nalauna p̃ota maga ega wo sili umai; 26go dapala nogoe Israel mamau puti euga wo pei tea mautipauriana: dapala waina e pei tea midiriana, e naga,

Tea Vualua ega wo pae Sion umai;

Ega wo pua doa nasigisigileoana maga euga m̃elu dua ki Yakob pano:

27Go tea waia e pei navasasokiana aginau paki da,

Ragi waina aga wo dape lua namarinaleosaana adeada maga.

28Nalo ni narogorogoana wia, eu pei tea kokona lomau nalakena nimu: ma nalo ni namatadoaana, eu pei tea dodomiana nalakena tamada maga. 29Nalakena navituam̃olikiana maga go nasosoana ki Sup̃e eu da pei tea waina euga vei tea midoakipiriana mau. 30Nalakena dakiusi waina nimu sala vea ku dogopiri navasaana ki Sup̃e, ma ragi waia ku pei tea dodomiana pae narogopiriana adeada, 31dapala nogoe nara ma eu dogopiri ragi waia, naga nara ma euga vei tea dodomiana ragi waia pae nadodomi‐mu‐ana. 32Nalakena Sup̃e e kokoro tea maga mamau puti paki narogopiriana, naga ega dodomi tea maga mamau puti.

33O navakipuaana ni nasogolapaana ni namanumatuaana go ni naataeana ki Sup̃e! Navasap̃otaeana aneana maga eu pei tea leousiusi‐sap̃o‐ana pa, go napua aneana maga eu mari sa pei tea va‐usiana! 34Nalakena sei e atae namidodoana ki Yehovah? Kite sei e pei tea vusum̃aki aneana? 35Kite sei e pea dua e go ega wo pei tea vituadip̃aana paki nia? 36Nalakena naleo maga mamau puti eu m̃elu asa, go eu pae asa, go eu maneana doko. Waina nasamasamaana ega vei aneana pa pa ega tu mau du. Amen.

Currently Selected:

PAKI TEA NI ROMA 11: NTB

Highlight

Copy