APOKALUPESI 22
22
1Go e piseiki nau noai sara sikai ni noai ni namauriana, e m̃aru dapala krustalo, e do dave m̃elu malo tasake ki Sup̃e go ki Arnio, m̃aleoputo ni napua lapa kakana. 2Go nakau ni namauriana e doko taleva waia ni noai sara go taleva kerua, e do dau ki nawana rualima sikai tamate dua, e do dau ki nawana sara atelagi: go naulu ni nakau eu pei agi namaripauriana ni nalauna maga. 3Go te navasasakiana ega wo da moro doko mau; go malo tasake ki Sup̃e go ki Arnio ega wo doko asa: go tea suasua aneana maga euga wo maneana suasua; go euga wo punusi naraena; 4go nagisana ega wo doko naraeda. 5Go p̃ogi ega wo da moro doko mau; go e da dapala waina euga masau namarama ni nasulu go namarama ni elo mau; nalakena Yehovah Sup̃e ega wo maramalaga paki da; go euga wo maramara pa pa ega tu du po du mau du.
6Go e noa ki nau, e naga, Navasaana maga wanogoe eu pei daleo atatu go lomau; go Yehovah, Sup̃e ki naatana ni profeta maga e dip̃aki lua agelo aneana paloti naga ega viseiki tea suasua aneana maga tea maga waina e one ara one naga euga vakilina m̃araverave. 7Go kuga leo, aga valoti m̃araverave. Tea waina e dogo paratiki navasaana maga ni naveanoasaiana ni tusi waia e maro pa.
8Go Kinau Yoane a pei tea waina a dogo po punusi tea maga wanogoe. Go ragi waina a dogo po punusi, a dowo pakitano naga aga lotu narae ni nam̃ele ni agelo waina e piseiki nau tea maga wanogoe. 9Go e noa ki nau, e naga, P̃a vunusi naga p̃a ta mari a mau: a pei tea suasua sikai sikoti ko go sikoti taim̃a maga profeta maga, go sikoti tea maga waina eu do dogo paratiki navasaana maga ni tusi waia: p̃a lotu ki Sup̃e.
10Go e noa ki nau, e naga, P̃a ta pulusoki navasaana maga ni naveanoasaiana ni tusi waia mau; nalakena ragi kakada e pei m̃aladigi, 11Tea waina e dagele, ega to mari naleo tagele: go tea waina e loa, ega to pei tea mariana ega loa: go tea waina e leana, ega to mari namarinaleoleanaana: go tea waina e dautau ega to pei tea mariana ega tautau. 12Kuga leo, aga valoti m̃araverave; go namoriana aginau ega sikoti au, naga aga lagatidua sara naatam̃oli euga sikasikai ega tapala waina nawosiana adeada eu doko. 13Kinau a pei Alfa go Omeca, tea vea go tea edaku, naatulakeana go nanopuana. 14Tea maga waina eu do sarue sugoro adeada maga eu maro pa, naga euga veani nasuasuakiana paki nakau ni namauriana, go naga euga sili pae namata‐pua maga paki natokoana. 15Etaku koria maga eu doko, go tea wosidoa maga, go tea maripele maga, go tea mari punue maga, go tea lotu ki nasup̃e maga, go sara naata waina eu masau nasorosoroana po mari a.
16Kinau Yesu a dip̃aki lua agelo aginau paloti naga ega noa sokisoki tea maga wanogoe paki mu nalo ni ekalesia maga. Kinau a pei nawasi go nawora ni David, m̃asoe lapa marama ni malip̃ogi.
17Go Naatana go nagoroi laki ero naga, P̃a umai. Go tea waina e dogo ega naga, P̃a umai. Go tea waina e madou, ega umai: tea waina e masauna, ega tape m̃oli ki noai ni namauriana.
18Kinau a noa sokisoki paki sara naatam̃oli waina eu dogo navasaana maga ni naveanoasaiana ni tusi waia, a naga, Te naata e pe sokari ra, Sup̃e ega wo sokari paki naata wanogoe nawokatiana maga waina eu pei tea midiriana tusi waia: 19go te naata e pe tape lua te navasaana maga seara ni tusi ni naveanoasaiana waia, Sup̃e ega wo dape lua matele aneana m̃elu dua ki nakau ni namauriana, go m̃elu dua ki natokoana tapu, waina ero pei tea midiriana tusi waia.
20Tea waina e noa sokisoki tea maga wanogoe e naga, Ioro: aga valoti m̃araverave. Amen: p̃a umai, Nawota Yesu.
21Nasaup̃iaana ki Nawota Yesu ega sikoti tea tautau maga. Amen.
E NOPU.
Currently Selected:
APOKALUPESI 22: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
