NUMBERS 31
31
1Go Yehovah e pasa paki Moses, po naga, 2P̃a kokonagoro Israel natuna maga m̃elu dua ki naworawora ni Midian: edaku ki tea wanogoe p̃a wo pei tea saisaikiana paki namatarau anigo. 3Go Moses e pasa paki narei, po naga, Nimu seara kakamu kuga vuati nalikau animu maga ni navakalo, naga kuga vano po mari dip̃a Midian, naga kuga magi Yehovah mari nasikoana paki Midian. 4Kuga tip̃aki lua pano paki navakalo wanogoe naatam̃oli manu sikai m̃elu sara naworawora sikasikai usuraki naworawora maga mamau puti ni Israel. 5Nalakena tea wanogoe naatam̃oli manu sikai eu pei tea vituakiana m̃elu manu maga ni Israel sikasikai, naatam̃oli tivilia sikai manu dua waina eu puati nalikau adeada maga ni navakalo. 6Go Moses e dip̃aki lua ra pano paki navakalo, naatam̃oli manu sikai m̃elu sara naworawora sikasikai, nara ma Finehas natu ni Eleasar tea viri, lasa maga ni tokora tapu go paiga tapu maga ni tokora tapu eu doko nam̃elearuna. 7Go eu mari navakalo dip̃a Midian, dapala waina Yehovah e dip̃aki Moses asa; go eu atugi naanoai maga mamau puti. 8Go eu atugi nawota maga ni Midian; Evi, go Rekem, go Sur, go Hur, go Reba, nawota lima ni Midian: go eu moro atugi Balaam natu ni Beor ki lova. 9Go Israel natuna maga eu piragi lua pavakoto nagoroi maga ni Midian go piakirikiri adeada maga; go katel adeada maga mamau puti, go navata ni shiip go ni naninani adeada maga mamau puti, go naloriki adeada maga mamau puti, eu dape pavakoto ara. 10Go natokoana adeada maga, tokora maga waina eu doko ara doko, go tokora ni nam̃enakiana adeada maga, eu dap̃ara ki puti ra ki nakapu. 11Go eu dape puti ki tea tape‐pavakotoana go ki tea vuti‐lua‐pavakotoana, tea ni naatam̃oli go ni nalo tuavati. 12Go eu dape tea viragi‐lua‐pavakotoana maga, go tea vuti‐lua‐pavakotoana, go tea tape‐pavakotoana umai paki narae ni Moses, go narae ni Eleasar tea viri, go narae ni nasaisaiana ni Israel natuna maga, doko tokora ni nam̃enakiana malo matemate maga ni Moab, nadigi ni Yordan, leana dip̃a Yeriko.
13Go Moses, go Eleasar tea viri, go tea maraki maga mamau puti ni nasaisaiana, eu dave pano naga euga sua ra etaku ni tokora ni nam̃enakiana. 14Go Moses e maeto ki tasiga maga ni taua navakalo, tea maraki maga ni manu maga go tea maraki maga ni p̃onotia maga, waina eu pae navakalo umai. 15Go Moses e noa ki da, e naga, Ku mauti nagoroi maga eu mamau puti mauri doko, kite? 16Kuga leo, nara eu mari Israel natuna maga, pae navusum̃akiana ki Balaam, naga eu mari natapiriana dip̃a Yehovah nalo ni naleo ki Peor, nalakena tea wanogoe nasasanaana sa e doko m̃aleoputo ni nasaisaiana ki Yehovah. 17Nalakena tea wanogoe kuga mari punue piakirikiri naanoai adeada maga mamau puti, go kuga mari punue sara nagoroi mamau puti waina eu atae naanoai waina eu one sikoti ra. 18Ma piakirikiri nagoroi maga waina eu ko da atae naanoai mau, waina eu ko da one sikoti ra, kuga mauti ra euga mauri doko naga euga vei tea animu. 19Go kuga m̃enaki doko etaku ni tokora ni nam̃enakiana naaleatia ega larua: nimu te naata sikai kakamu e pe mari punue te naatam̃oli, go te naata sikai kakamu e pe kisidogo tea maripunueana sikai, kuga tum̃amu mari mu kuga tautau naaleatia ketolu go naaleatia kelarua, nimu ma tea viragi‐lua‐pavakotoana animu maga. 20Go kuga mari dautau ki tea suniana maga, go ki sara navatuna waina eu pei tea mariana ki nawili, go ki sara navatuna waina eu pei tea mariana ki nam̃au ni naninani, go ki sara navatuna waina eu pei tea mariana ki nakau. 21Go Eleasar tea viri e noa ki naatam̃oli marimatua maga waina eu paki navakalo, e naga, Tea wanogoe e pei natawonakiana ni nawotaeana waina Yehovah e dip̃aki Moses asa: 22Ma kold, go silver, go brass, go airon, go tin, go led, 23Sara naleo waina nakapu e mari sa gani a mau, kuga mari dautau ki da ki nakapu, go euga wo dautau; ma euga moro pei tea mari‐dautau‐kiana ki noai ni natap̃augoroana: go sara naleo waina nakapu e mariatae gani ra, kuga mari dautau ki da ki noai. 24Go kuga sarue sugoro animu maga naaleatia kelarua, go kuga wo dautau, go edaku ki nia kuga umai paki tokora ni nam̃enakiana.
25Go Yehovah e pasa paki Moses, po naga, 26Kuga veve parati ki tea vuti‐lua‐pavakotoana maga mamau puti waina eu pei tea tape‐pavakotoana, naatam̃oli go nalo tuavati, nimu ma Eleasar tea viri, go nap̃au maga ni nasum̃a maga ni tamada maga ni nasaisaiana: 27Po dap̃otae tea vuti‐lua‐pavakotoana ega rua asa; namawota ni naatam̃oli atae maga ni navakalo, waina eu dave pano paki navivimariana, go ni nasaisaiana mamau; 28Po magi Yehovah dape lua nasautoga ki naatam̃oli maga ni navakalo waina eu dave pano paki navivimariana: tea sikai m̃elu p̃onotia lima, ni naatam̃oli go ni katel, go ni ass maga, go ni navata maga ni shiip: 29Go kuga tape lua e m̃elu namagovai adeada, po dua Eleasar tea viri asa, ega vei navituaana sikosikoviana paki Yehovah. 30Go ki namagovai ki Israel natuna maga, p̃a tape lua tea sikai m̃elu rualima lima ni naatam̃oli, ni katel, ni ass maga, go ni navata maga ni shiip, ni nalo tuavati visarasara maga, po dua naworawora ni Levi ara, waina eu do pavaigoro naleoparatikiana ni nasum̃atokoana ki Yehovah. 31Go Moses go Eleasar tea viri ero mari dapala waina Yehovah e dip̃aki Moses asa. 32Go tea vuti‐lua‐pavakotoana, masale ki tea waina naatam̃oli marimatua maga ni navakalo eu dape pavakoto asa, e pei shiip manu p̃onotia latesa, go tivilia larua, go manu lima, 33Go katel tivilia larua go manu dua, 34Go ass tivilia latesa go manu sikai, 35Go naatam̃oli tivilia dolu go manu dua, nagoroi atara maga waina eu ko da atae naanoai mau. 36Go namagovai kakada, waina e pei namagovai ki tea maga waina eu dave pano paki navakalo, e pei shiip manu p̃onotia dolu go tivilia dolu, go manu larua p̃onotia lima: 37Go nasautoga waina eu dua Yehovah asa ni shiip wanogoe, e pei p̃onotia latesa rualima takuna larua tamate lima. 38Go katel tivilia dolu go manu latesa; go nasautoga waina eu dua Yehovah asa, e pei rualima larua tamate dua. 39Go ass tivilia dolu go p̃onotia lima; go nasautoga waina eu dua Yehovah asa, e pei rualima latesa tamate sikai. 40Go naatam̃oli tivilia sikai go manu latesa; go nasautoga waina eu dua Yehovah asa, e pei naatam̃oli rualima dolu tamate dua. 41Go Moses e dua Eleasar tea viri nasautoga wanogoe, waina e pei navituaana sikosikoviana paki Yehovah, dapala waina Yehovah e dip̃aki Moses asa. 42Go namagovai ki Israel natuna maga, waina Moses e mari p̃otae a m̃elu naatam̃oli maga waina eu mari navakalo, 43(Go namagovai ni nasaisaiana e pei shiip manu p̃onotia dolu go tivilia dolu, manu larua go p̃onotia lima, 44Go katel tivilia dolu go manu latesa, 45Go ass tivilia dolu go p̃onotia lima, 46Go naatam̃oli tivilia sikai manu latesa;) 47Go ni namagovai wanogoe ki Israel natuna maga, Moses e dape lua sikai m̃elu rualima lima ni naatam̃oli go ni nalo tuavati, po pitua ki da paki naworawora ni Levi, waina eu pavaigoro naleoparatikiana ni nasum̃atokoana ki Yehovah; dapala waina Yehovah e dip̃aki Moses asa. 48Go tasiga maga waina eu dap̃au manu maga ni taua navakalo, tea maraki maga ni manu maga, go tea maraki maga ni p̃onotia maga, eu rumai paki m̃aladigi ki Moses: 49Go eu noa ki Moses, eu naga, Tea suasua anigo maga eu peve naatam̃oli maga ni navakalo waina eu doko etano ni naleoparatikiana aginami, go te naata sikai kakagami e da puoli mau. 50Go au po dape navituaana ki Yehovah umai, tea waina sara naata eu sikasikai pap̃ai a, vatu wia maga ni kold, sokisokitere maga, go lela maga, rig maga, vakadaliga maga, go napanipani maga, naga euga magi naatagami mari natap̃augoroana narae ni Yehovah. 51Go Moses go Eleasar tea viri ero dape kold wanogoe kiada, vatu wia maga mamau puti wanogoe. 52Go kold mamau puti ni navituaana sikosikoviana waina eu pitua ki nia paki Yehovah, ki tea maraki maga ni manu maga, go ki tea maraki maga ni p̃onotia maga, e pei shekel tivilia sikai manu latesa p̃onotia larua go rualima takuna lima. 53(Nalakena naatam̃oli maga ni navakalo eu dum̃ada dape pavakoto tea vuti‐lua‐pavakotoana, sara naata sikasikai.) 54Go Moses go Eleasar tea viri ero dape kold wanogoe ki tea maraki maga ni manu maga go ni p̃onotia maga, po dape a umai paki ekopu ni tap̃aup̃au ni nasaisaiana, naga ega magi Israel natuna maga pei namidoakilagatiana sikai narae ni Yehovah.
Currently Selected:
NUMBERS 31: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
