NUMBERS 1
1
1Go Yehovah e pasa paki Moses masop̃alo ni Sinai, doko tap̃aup̃au ni nasaisaiana, nakup̃a vea ni atelagi kerua ni natau kerua edaku ki waina eu m̃elu dua ki navanua ni Ityipt umai, e naga, 2Kuga midiri nagisa mamau puti ni Israel natuna maga, ega vae naworada maga, ega vae nasum̃a maga ni tamada maga, po dape naveveana ni nagisada maga, sara naanoai euga sikasikai. 3Tea maga waina eu pei tea ni natau rualima dua go do liu, ni Israel mamau puti waina eu mariatae paki navakalo, nimu ma Aaron koroga veve ra, ega vae taua adeada maga. 4Go koroga veani naatam̃oli ega sikasikai m̃elu naworada sikasikai sarasara ra euga sikoti mu doko; tea mamau puti euga sikasikai pei nap̃au ni nasum̃a ni tamada maga. 5Go naatam̃oli maga wanogoe waina kuga mamau doko, nagisada maga waia: ni Reuben; Elisur natu ni Shedeur. 6Ni Simeon; Shelumiel natu ni Surishaddai. 7Ni Yudah; Nahshon natu ni Amminadab. 8Ni Issakar; Nethanel natu ni Suar. 9Ni Sebulun; Eliab natu ni Helon. 10Ni Yosef natuna maga: ni Efraim; Elishama natu ni Ammihud: ni Manasseh; Camaliel natu ni Pedahsur. 11Ni Benyamin; Abidan natu ni Cideoni. 12Ni Dan; Ahieser natu ni Ammishaddai. 13Ni Asher; Pakiel natu ni Okran. 14Ni Cad; Eliasaf natu ni Deuel. 15Ni Naftali; Ahira natu ni Enan. 16Tea maga wanogoe nara eu pei tea matadoaana maga m̃elu nasaisaiana, tea maraki maga ni naworawora ni tamada maga, nap̃au maga ni manu maga ni Israel. 17Go Moses go Aaron ero piragi naatam̃oli maga wanogoe waina nagisada maga eu pei tea noasaiana: 18Go eu piragi saisai ki nasaisaiana mamau nakup̃a vea ni atelagi kerua, go eu noasai navakilinaana adeada pae naworada maga, pae nasum̃a maga ni tamada maga, eu dape naveveana ni nagisada maga, tea maga waina eu pei tea ni natau rualima dua go do liu, sara naata sikasikai. 19Dapala waina Yehovah e dip̃aki Moses asa, dapala nogoe ero peve parati ki da masop̃alo ni Sinai.
20Go Reuben natuna maga, tea takalapa ni Israel, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, sara naata sikasikai, sara naanoai kaka ni naatam̃oli maga waina eu pei tea ni natau rualima dua go do liu, tea mamau puti waina eu mariatae paki navakalo; 21Tea maga wanogoe ni naworawora ni Reuben, waina eu pei tea veveana, eu pei naatam̃oli tivilia pati, manu latesa, p̃onotia lima.
22Ni Simeon natuna maga, tagona adeada maga pae naworada maga, pae nasum̃a maga ni tamada maga, tea maga waina eu pei tea veveana pae naveveana ni nagisada maga, sara naata sikasikai, sara naanoai kaka ni naatam̃oli maga waina eu pei tea ni natau rualima dua go do liu, tea mamau puti waina eu mariatae paki navakalo; 23Tea maga wanogoe ni naworawora ni Simeon, waina eu pei tea veveana, eu pei naatam̃oli tivilia lima, manu loveti, p̃onotia dolu.
24Ni Cad natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 25Tea maga wanogoe ni naworawora ni Cad waina eu pei tea veveana, eu pei naatam̃oli tivilia pati, manu lima, p̃onotia latesa rualima takuna lima.
26Ni Yudah natuna maga pae tagona adeada maga, pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 27Tea maga wanogoe ni naworawora ni Yudah waina eu pei tea veveana, eu pei naatam̃oli tivilia larua, manu pati, p̃onotia latesa.
28Ni Issakar natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 29Tea maga wanogoe ni naworawora ni Issakar waina eu pei tea veveana, eu pei naatam̃oli tivilia lima, manu pati, p̃onotia pati.
30Ni Sebulun natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 31Tea maga wanogoe ni naworawora ni Sebulun waina eu pei tea veveana, eu pei naatam̃oli tivilia lima, manu larua, p̃onotia pati.
32Ni Yosef natuna maga, eu pei Efraim natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 33Tea maga wanogoe ni naworawora ni Efraim waina eu pei tea veveana, eu pei naatam̃oli tivilia pati p̃onotia lima.
34Ni Manasseh natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 35Tea maga wanogoe ni naworawora ni Manasseh waina eu pei tea veveana, eu pei naatam̃oli tivilia dolu, manu dua, p̃onotia dua.
36Ni Benyamin natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 37Tea maga wanogoe ni naworawora ni Benyamin, waina eu pei tea veveana, eu pei naatam̃oli tivilia dolu, manu lima, p̃onotia pati.
38Ni Dan natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 39Tea maga wanogoe ni naworawora ni Dan waina eu pei tea veveana, eu pei naatam̃oli tivilia latesa, manu dua, p̃onotia larua.
40Ni Asher natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 41Tea maga wanogoe ni naworawora ni Asher waina eu pei tea veveana, eu pei naatam̃oli tivilia pati, manu sikai, p̃onotia lima.
42Ni Naftali natuna maga, tagona adeada maga pae naworada maga, pae nasum̃a maga ni tamada maga, pae naveveana ni nagisada maga, tea maga waina eu pei tea ni natau rualima dua go do liu, tea mamau puti waina eu mariatae paki navakalo; 43Tea maga wanogoe ni naworawora ni Naftali waina eu pei tea veveana, eu pei naatam̃oli tivilia lima, manu dolu, p̃onotia pati. 44Tea maga wanogoe eu pei tea maga waina eu pei tea veveana, waina Moses go Aaron ero peve ra, nara ma tea maraki maga ni Israel, naatam̃oli rualima sikai tamate dua: eu sikasikai pei tea ni nasum̃a maga ni tamada maga. 45Dapala nogoe tea maga mamau puti ni Israel natuna maga waina eu pei tea veveana, pae nasum̃a maga ni tamada maga, tea maga waina eu pei tea ni natau rualima dua go do liu, tea mamau puti ni Israel waina eu mariatae paki navakalo: 46Tea mamau puti wanogoe waina eu pei tea veveana, eu pei naatam̃oli manu p̃onotia latesa go manu dolu, p̃onotia lima rualima takuna lima.
47Ma naworawora ni Levi pae naworawora ni tamada maga, eu da pei tea veveana sikoti ra mau. 48Nalakena Yehovah e noa ki Moses, e naga, 49Naworawora ni Levi ega sikina, p̃a ta peve ra mau, go p̃a ta midiri nagisada maga sikoti Israel natuna maga mau: 50Ma p̃a lawo ki naworawora ni Levi euga tap̃au nasum̃atokoana ni nanoasokisokiana, go euga tap̃au sara naleo kakana maga, go sara naleo waina eu doko asa: nara euga tapetape nasum̃atokoana, go sara naleo kakana maga; go euga suasua nawosiana ki tea viri, go euga m̃enaki dalivirigoro nasum̃atokoana. 51Go ragi waina nasum̃atokoana ega vei tea rakaiana, naworawora ni Levi euga rakai a: go ragi waina nasum̃atokoana ega vei tea sike‐lawo‐kiana, naworawora ni Levi euga sike lawo ki nia: go te naata p̃ota e pe umai paki m̃aladigi ki nia, e pe wo pei tea toropusiana paki namateana. 52Go Israel natuna maga euga sike tap̃aup̃au adeada maga, sara naatam̃oli euga sikasikai doko tokora ni nam̃enakiana adeada maga, go sara naatam̃oli euga sikasikai doko tokora ni manututu adeada maga, euga vae taua adeada maga. 53Ma naworawora ni Levi euga m̃enaki dalivirigoro nasum̃atokoana ni nanoasokisokiana, naga namaritausuana ega ta pavaga dip̃a nasaisaiana ni Israel natuna maga mau: go naworawora ni Levi euga vavaigoro nawosiana ni nasuasuaana ni nasum̃atokoana ni nanoasokisokiana. 54Go Israel natuna maga eu mari dapala nogoe; pataka ni tea mamau puti waina Yehovah e dip̃aki Moses asa, eu mari dapala nogoe.
Currently Selected:
NUMBERS 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
