MARKO 9
9
1Go edaku ki naaleatia latesa Yesu e piragi lua Petero, go Yakobo, go Yoane, po piragi ra sake pano paki tava varau pakilagi sikai, eu pei nara mau: 2go e panop̃ota naraeda: go sugoro aneana maga eu lidalida, 3eu dare p̃arua liu; dapala tea sarue maga waina eu doko maramana eu mari sa mari ra eu dare dakiusi ra. 4Go Eliyah e pakilina ki da nae go Moses: go ero pasa ki Yesu, nara go nae eu dum̃ada pasa paki da. 5Go Petero e pasa dara po noa ki Yesu, e naga, Rabbi, e p̃ia naga tuga toko nea: go auga mari tap̃aup̃au euga tolu; anigo sikai, go agi Moses sikai, go agi Eliyah sikai. 6Nalakena e da atae tea waina ega vasa dara asa mau; nalakena eu mataku p̃arua. 7Go napopouru sikai e umai po melugoro ra: go nadaleo sikai e dave pae napopouru wanogoe umai, e naga, Tea waia e pei Natugu tea dodomiana aginau; kuga to dogo e. 8Go m̃araverave, ragi waina eu leo pilialia, eu da punusi te naata mau, ma Yesu sikina e sikoti ra doko.
9Go ragi waina eu do pae tava siwo umai, e pasa parati ki da naga euga ta noa ki te naata tea maga waina eu punusi ra mau, ma ragi waina naatam̃oli Natuna ega wo duleana sua m̃elu dua ki tea mate maga euga wo noa e. 10Go eu mauti navasaana wanogoe, eu dum̃ada pusuusu paki da ki natuleanaana m̃elu dua ki tea mate maga naga e pei nasava. 11Go eu pusuusu paki nia, eu naga, Tea midiri maga eu noa naga e one Eliyah one naga ega vea umai. 12Go e noa ki da, e naga, Eliyah e pea umai lomau, po dape liliua ki naleo maga mamau puti: go ekasana e pei tea midiriana nalo ni naatam̃oli Natuna, naga ega sua narogokitesaana laapa po pei tea midoakidaoana? 13Ma a noa ki mu, naga Eliyah e umai sua, go eu mari paki nia dapala waina eu masauna, dapala waina e pei tea midiriana nalo kakana.
14Go ragi waina eu rumai punusi tea vasapiseikiana maga, eu punusi taua warua sikai ni naatam̃oli maga eu dalivirigoro ra, go tea midiri maga eu pululu ki da. 15Go m̃araverave taua mamau ni naatam̃oli maga, ragi waina eu punusi a, eu maga p̃arua, go eu sava umai punusi a po pasa dodomi a. 16Go e pususu paki da, e naga, Ku pululu ki da nasava? 17Go sikai ni taua ni naatam̃oli maga e pasa dara e, e naga, Tea Vasapiseiki, a piragi natugu naanoai umai punusi ko, waina e peani naatana pusa sikai; 18go tokora waina e pe vuati a asa, e nadi ki nia pakitano: go e lotalota, po alapatiori ki napatina, go e do m̃agura: go a pasa ki tea vasapiseikiana anigo maga naga euga mari a ega tave pano; go eu marisap̃ona. 19Go e pasa dara ra po naga, Ko tagona waina ku da saralomau mau, aga sikoti mu doko pa pa paki nagasa? Aga soki mu pa pa paki nagasa? 20Kuga viragi a umai punusi au. Go eu piragi a umai punusi a: go ragi waina e punusi a, naatana e puap̃orae p̃arua ki nia m̃araverave; go e dowo paki natano, po surasura po lotalota. 21Go e pusuusu paki tamana, e naga, Tea waia e pakilina ki nia pae seve ragi? Go e naga, E pae ragi waina e pei piakiki kiki. 22Go e paka laapa nadi ki nia paki nakapu go paki noai naga ega mari punue a: ma ku pe mari atae mari te navatuna, p̃a dodomi gami, po silae gami. 23Go Yesu e noa ki nia, e naga, Ku pe mari atae! Naleo maga mamau puti eu magi tea waina e saralomau mari atae pei tea mariana. 24Piakiki wanogoe tamana e m̃araverave pioso, po naga, A saralomau; p̃a silae au natikaana ni nasaralomauana aginau. 25Go ragi waina Yesu e punusi naga taua sikai ni naatam̃oli maga eu sava saisai umai, e pasa kasua ki naatana loa wanogoe, po noa ki nia, e naga, Naatana pusa go p̃aro, kinau a dip̃a ki‐go, p̃a tave m̃elu dua ki nia umai, po da moro sili paki asa mau. 26Go ragi waina e pioso sua, po puap̃orae p̃arua ki nia, e dave umai: go piakiki wanogoe e po dakiusi tea mate; dapala tea laapa eu naga, E mate. 27Ma Yesu e puati nam̃elearuna, po sike a; go e duleana. 28Go ragi waina e umai paki ekopu ni nasum̃a, tea vasapiseikiana aneana maga eu pusuusu paki nia eu pei nara mau, eu naga, Ekasana kinami au mari sa mari a e dave pano? 29Go e noa ki da, e naga, Ku pe ta dapasavasa mau, tea dapala waia eu pe ta dave pano mau.
30Go eu m̃elu dua ki tokora wanogoe pano, po surata duaduru Calilea; go e da masauna naga te naata ega atae a mau. 31Nalakena e pasapisei ki tea vasapiseikiana aneana maga, po noa ki da, e naga, Naatam̃oli Natuna e pei tea vituakiana paki nam̃elearu ni naatam̃oli maga, go euga wo mari punue a; go ragi waina ega wo pei tea maripunueana sua, ega wo moro duleana edaku ki naaleatia dolu. 32Ma eu da midoaki atae navasaana wanogoe mau, go eu mataku pusuusu paki nia asa.
33Go eu rumai paki Kapernaum: go ragi waina e doko ekopu ni nasum̃a e pusuusu paki da, e naga, Ku pusum̃aki nasava napua? 34Ma eu punuta: nalakena eu dum̃ada pululu ki da napua, sei kakada e p̃arua liu? 35Go e dasake, po soso tea rualima sikai tamate dua; go e noa ki da, e naga, Te naata e pe masauna naga ega vei tea vea, ega wo pei tea edaku ni tea mamau puti, go tea suasua ki tea mamau puti. 36Go e puati piakiki kiki sikai, po lawo ki nia m̃aleoputo kakada: go e dape a e doko naruna maga, 37po noa ki da, e naga, Naata waina e pe wo piragi piakirikiri kiki maga dapala waia sikai kakada pae nagisagu, e pe viragi au: go naata waina e pe viragi au, e pe ta piragi au mau, ma e pe viragi tea waina e dip̃aki lua au umai.
38Yoane e noa ki nia, e naga, Tea Vasapiseiki, au punusi naata sikai e mari dimon maga eu dave pano pae nagisam̃a: go au dip̃agoro e, nalakena e da dausi gida mau. 39Ma Yesu e naga, Kuga ta dip̃agoro e mau: nalakena te naata e da doko mau waina ega wo mari nawosiana kasua sikai pae nagisagu, po mari atae m̃araverave pasa sa ki nau. 40Nalakena naata waina e da pei walu sa ki gida e pei walu wia ki gida. 41Nalakena naata waina e pe wo dua mu lasa sikai ni noai naga kuga munugi a, nalakena ku pei tea ki Kristo, lomau a noa ki mu, naga ega wo da dape puoli ki namoriana aneana mau. 42Go tea kirikiri maga wanogoe waina eu saralomau au, te naata e pe mari sikai kakada e pe tapilagona, e pe wia ki naata wanogoe naga vatu parosi warua sikai ega vei tea sarakiana nanoana, go naga ega vei tea nadikiana paki natasi. 43Go nam̃elearum̃a e pe mari ko ku pe tapilagona, p̃a taekotovi a: e p̃ia ki‐go naga p̃a sili paki namauriana ku pei gole, ma e sa ki‐go naga p̃a veani nam̃elearum̃a dua po paki cehenna pano, paki nakapu waina e pe ta pei tea vuepunueana mau; 44tokora waina ula kakada e da mate asa mau, go nakapu e da pei tea vuepunueana mau. 45Go nam̃elem̃a e pe mari ko ku pe tapilagona, p̃a taekotovi a: e p̃ia ki‐go naga p̃a sili paki namauriana ku pei pito, ma e sa ki‐go naga p̃a veani nam̃elem̃a dua po pei tea nadikiana paki cehenna; 46tokora waina ula kakada e da mate asa mau, go nakapu e da pei tea vuepunueana mau. 47Go namatam̃a e pe mari ko ku pe tapilagona, p̃a vaku lua e ega vano: e p̃ia ki‐go naga p̃a sili paki namarakiana ki Sup̃e ku pei mata sikai, ma e sa ki‐go naga p̃a veani namatam̃a dua po pei tea nadikiana paki cehenna; 48tokora waina ula kakada e da mate asa mau, go nakapu e da pei tea vuepunueana mau. 49Nalakena sara naata ega wo pei tea tasimenakiana ki nakapu, go sara naviriana ega wo pei tea tasimenakiana ki natasimena. 50Natasimena e p̃ia: ma natasimena e pe m̃edam̃eda, ku pe wo mari a ega gagadi ega tapale sava? Kuga veani natasimena nap̃alaumu, go kuga tam̃ate dum̃amu paki mu.
Currently Selected:
MARKO 9: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
