MATAIO 21
21
1Go ragi waina eu rumai paki m̃aladigi ki Yerusalem, po umai paki Bethface, paki tava ni Oliva, ragi wanogoe Yesu e dip̃aki lua tea vasapiseikiana dua, 2po noa ki da, e naga, Koroga vaki natokoana kiki waina e doko kivea ki mu, go koroga wo m̃araverave pap̃ai ass sikai waina e pei tea likotiana, go natuna sikai e sikoti a doko: koroga veresi ra po piragi ra umai punusi au. 3Go te naata sikai e pe noa ki mu te navatuna, koroga naga, Nawota e masau ra; go ega wo dip̃aki lua ra m̃araverave. 4Go tea wanogoe e pakilina naga tea waina e pei tea noaana pae profeta ega lolomana, e naga,
5Kuga noa ki Sion natuna nagoroi,
P̃a leo, Nawota anigo e umai punusi ko,
E matemate, po sakesaake ass sikai.
Go ass tureai sikai natu ni ass.
6Go tea vasapiseikiana dua ero pano, po mari dapala waina Yesu e dip̃a ki da asa, 7ero piragi ass, go ass natuna umai, po sawa ki sugoro adeada maga ara; go e sakesaake asa. 8Go taua ni naatam̃oli maga tea laapa kakada eu p̃elesa ki sugoro adeada maga napua; go tea p̃ota seara eu daekotovi ara maga m̃elu dua ki nakau maga, po p̃elesa ki da napua. 9Go taua maga ni naatam̃oli maga waina eu pea ki nia, go waina eu dausi a, eu pioso, eu naga, Hosanna ki natu ni David: Tea waina e umai pae nagisa ni Yehovah e pei tea vasap̃iakiana. 10Hosanna tokoro ni elagi mau; Go ragi waina e umai sili Yerusalem, natokoana mamau eu pari asa, po naga, Tea waia e pei sei? 11Go taua maga ni naatam̃oli eu naga, Tea waia e pei profeta, Yesu, waina e pae Nasareth ni Calilea umai.
12Go Yesu e paki ekopu ni nasum̃a tapu ki Sup̃e, po kopasi paki etaku tea maga mamau puti waina eu do sorisori po pakokoto ekopu ni nasum̃a tapu, go e dap̃olosiwo ki wede maga ki tea maga waina eu surupioli ki m̃ane, go malo tasake maga ki tea maga waina eu sori tokopea maga; 13go e noa ki da, e naga, E pei tea midiriana, naga Nasum̃a aginau ega vei tea sosoana ki nasum̃a ni natapasavasaana: ma nimu ku do mari a e pei valea sikai ki tea tapepavakoto maga. 14Go tea kesa maga go tea vei pito maga eu rumai punusi a ekopu ni nasum̃a tapu: go e maripauri ra. 15Ma ragi waina tea viri warua maga go tea midiri maga eu punusi tea ni namagaana maga waina e mari ra, go piakirikiri maga waina eu do pioso ekopu ni nasum̃a tapu po naga, Hosanna ki natu ni David; eu maeto p̃arua, po noa ki nia eu naga, 16Ku dogo tea waina nara eu noa e, kite? Go Yesu e noa ki da, e naga, Ioro: ku ko da peve, naga Ku mari nasamasamaniana wia e dave nawoka ni pipia maga go tea susu maga kite? 17Go e doropusi ra eu madoko, po dave paki etaku ni natokoana paki Bethania pano, go e m̃enaki tokora wanogoe.
18Go malip̃ogi ki nia ragi waina e do liliu paki natokoana, e pitolo. 19Go e punusi napuliva sikai nadigi ni napua, po umai paki asa, po da pap̃ai te navatuna asa mau, ma nauluna m̃oli; go e noa ki nia, e naga, Te nawa ega ta moro pakilina ako mau pa pa ega tu mau du. Go napuliva wanogoe e kokolo m̃araverave. 20Go ragi waina tea vasapiseikiana maga eu punusi a, eu maga, po naga, Napuliva e kokolo m̃araverave dapale sava? 21Go Yesu e pasadara po noa ki da, e naga, Lomau a noa ki mu, naga Ku pe veani nasaralomauana, po da midoakisara mau, kuga wo da mari atae mari tea waina e pei tea mariana napuliva sikina mau, ma kuga wo noa ki tava waia, P̃a vei tea tapedakati‐ana po pei tea nadikiana paki natasi, e pe wo pei tea mariana. 22Go naleo maga mamau puti waina ku pe wo datago ara natapasavasaana, ku pe saralomau, ku pe wo dape ra.
23Go ragi waina e sili sua nasum̃a tapu, tea viri warua maga go tea matua maga ni narei eu rumai punusi a, ragi waina e do pasapiseiki, go eu naga, Ku mari tea maga waia ki seve naveinawotaana? Go sei e dua ko naveinawotaana? 24Go Yesu e pasadara po noa ki da, e naga, Kinau ma aga vusuusu ki mu navasaana sikai, waina ku pe noa ki nau asa, kinau ma a pe wo noa ki mu naveinawotaana waina a mari tea maga waia asa. 25Nabapetisoana ki Yoane, e pae esava umai? E pae nakoroatelagi, kite e pae naatam̃oli? Go eu dum̃ada pusum̃aki paki da, po naga, Tu pe naga, E pae nakoroatelagi; go nae ega wo noa ki gida, Ekasana ku da saralomau navasaana aneana? 26Ma tu pe naga, E pae naatam̃oli; tu matau ki narei; nalakena eu mamau puti midoa ki nia naga Yoane e pei profeta sikai. 27Go eu pasadara Yesu, po naga, Au da atae a mau. Nae ma e noa ki da, e naga, Go kinau aga ta noa ki mu naveinawotaana waina a mari tea maga waia asa. 28Ma ku midoa ki nasava? Naatam̃oli sikai e peani natuna dua; go e umai punusi tea vea, po naga, Koto, p̃a va p̃osiwosi masoso roara ni vaine. 29Go e pasadara po naga, A karai: ma e edaku midoakidoa, po pano. 30Go e umai punusi kerua, po noa dapala nogoe. Go e pasadara po naga, Kinau, nawota: go e da pano mau. 31Nara dua sei kakada e mari namasauana ki tamana? Eu naga, Tea vea. Yesu e noa ki da, e naga, Lomau a noa ki mu, naga tea tape nasautoga maga go nagoroi masausara maga eu pea ki mu sili paki namarakiana ki Sup̃e. 32Nalakena Yoane e pae napua ni namarinaleoleanaana umai punusi mu, go ku da saralomau navasaana aneana mau: ma tea tape nasautoga maga go nagoroi masausara maga eu saralomau asa: go nimu ku punusi a, ma ku da edaku midoakidoa mau naga kuga saralomau asa.
33Kuga rogo naluluakia p̃ota sikai: Naatam̃oli sikai e doko, talakea ni nasum̃a, waina e lawo roara ni vaine sikai, po marigoro e ki nakoro ulua sikai, po kili m̃oru ni nasua ni nawa ni vaine asa, po davagi nasum̃a varau pakilagi sikai, po suasua ki nia paki tea wosiwosi natano maga, po paki navanua p̃ota sikai pano. 34Go ragi waina p̃aunarago ni nawa ni nakau maga e pei m̃aladigi, e dip̃aki lua tea suasua aneana maga eu pano punusi tea wosiwosi natano maga, naga euga tape nawa ni nakau aneana maga. 35Go tea wosiwosi natano maga eu puati tea suasua aneana maga, po parati sikai, po maripunue sikai, po nadi sikai ki vatu. 36E moro dip̃aki lua tea suasua p̃ota maga eu laapa liu tea vea maga: go eu mari dapala nogoe paki da. 37Ma e edaku dip̃aki lua natuna e pano punusi ra, e naga, Euga wo dodomadagani natugu. 38Ma tea wosiwosi natano maga, ragi waina eu punusi natuna, eu dum̃ada noa ki da, eu naga, Tea waia e pei tea veanipioli ki p̃aumaso ni tamana; kuga umai, tuga maripunue a, go tuga veani tea veanipiolikiana aneana. 39Go eu puati a, po nadi ki nia paki etaku ni roara ni vaine, po maripunue a. 40Nalakena tea wanogoe ragi waina talakea ni roara ni vaine ega wo umai, ega wo mari nasava paki tea wosiwosi natano maga wanogoe? 41Eu noa ki nia, eu naga, Ega wo maripunue sa ki naatam̃oli sa maga wanogoe, go ega wo suasua ki roara ni vaine paki tea wosiwosi natano p̃ota maga, waina euga wo dua e nawa ni nakau maga ragi ni p̃aunarago kakada maga. 42Yesu e noa ki da, e naga, Ku ko da peve te naaleatia navasaana midiriana maga tea waia kakada kite?
Vatu waina tea tavagi maga eu leodoa e,
Nae e pei tea mariana e pei nap̃au ni naweluki:
Tea wanogoe e m̃elu Yehovah pakilina,
Go e pei tea ni namagaana namatagida.
43Nalakena tea wanogoe a noa ki mu, naga Namarakiana ki Sup̃e ega wo pei tea tapeluaana ki‐amu, go ega wo pei tea vituakiana paki nalauna sikai waina ega wo dau ki nawa kakana maga. 44Go tea waina e dowo paki vatu wanogoe ega wo maworawora: ma nae e pe rowo paki te naata sikai, ega wo marip̃oroworosi a ega vei nam̃otam̃ota. 45Go ragi waina tea viri warua maga go Farisi maga eu dogo naluluakia aneana maga, eu atae naga e noa ra. 46Go ragi waina eu laaga naga euga vuasoki a, eu matau ki taua maga ni naatam̃oli, nalakena nara eu midoa ki nia naga e pei profeta sikai.
Currently Selected:
MATAIO 21: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
