LUKA 2
2
1Go e pakilina naaleatia maga wanogoe, natawonakiana sikai e m̃elu Kaisar Aucusto pano, naga maramana mamau ega vei tea midiriana tusi. 2Namidiriana wanogoe e pea pei tea mariana ragi waina Kurenio e pei tea maramara ni Siria. 3Go eu pano puti naga euga vei tea midiriana, sara naatam̃oli eu paki natokoana adeada sarasara ra. 4Go Yosef ma e sake pae Calilea pano, m̃elu dua ki natokoana ni Nasareth, paki Yudea, paki natokoana ki David, waina e pei tea sosoana ki Bethlehem, nalakena nae e pei tea ni nasum̃a go nawora ni David; 5naga ega vei tea midiriana sikoti Maria, waina e maneana pei tea vasasokiana, go waina e diena. 6Go e pakilina, ragi waina ero doko tokora wanogoe, naga naaleatia maga eu pei tea vakavuroana naga nae ega visola. 7Go e piragi natuna naanoai takalapa; go e pivisi a ki nakulukulu, po lesi a e one siloa sikai ni horse, nalakena te tokora e da madeada doko nasum̃a ni nam̃enakiana mau.
8Go tea leo paratiki shiip seara eu doko navanua wanogoe eu doko namalasi, po do pavaigoro navata adeada p̃ogi. 9Go agelo ki Yehovah sikai e lawodu pisari ra, go nasamasamaana ni Yehovah e laga dalivirigoro ra: go eu mataku p̃arua. 10Go agelo e noa ki da, e naga, Kuga ta mataku mau; nalakena kuga leo, a manimu dape narogorogoana wia ni nalaelaeaana warua umai, waina ega wo pei agi narei mamau: 11nalakena Tea Maumau‐pauri sikai, waina e pei Kristo Yehovah, e po manimu pakilina masoso, natokoana ki David. 12Go tea waia e manimu pei navaivaiana kakana; Kuga wo pap̃ai pipia sikai waina e pei tea vivisiana ki nakulukulu, po one siloa sikai ni horse. 13Go m̃araverave taua sikai ni taua ni nakoroatelagi eu sikoti agelo wanogoe eu samasamani Sup̃e, po naga,
14Nasamasamaana agi Sup̃e tokora maga ni elagi mau,
Go natam̃ateana maramana m̃aleoputo ni naatam̃oli maga waina e midoaki m̃ata ki da.
15Go e pakilina, ragi waina agelo maga eu m̃elu dua ki da paki nakoroatelagi pano, tea leo paratiki shiip maga wanogoe eu dum̃ada noa ki da, eu naga, Tuga vaki Bethlehem pano ragi waia, po punusi naleo wanogoe waina e po pakilina, waina Yehovah e mari a e pei tea ataeana paki gida. 16Go eu rumai m̃araverave, po pap̃ai Maria go Yosef, go pipia e one siloa sikai ni horse one. 17Go ragi waina eu punusi sua e, eu noa sai navasaana waina e pei tea noaana paki da nalo ni piakiki wanogoe. 18Go tea maga mamau puti waina eu dogo e eu maga tea maga waina eu pei tea noaana paki da pae tea leo paratiki shiip maga. 19Ma Maria e midoakisoki navasaana maga wanogoe, po midoaki usiusi ra nap̃op̃ona. 20Go tea leo paratiki shiip maga eu liliu, eu do samasamani po do pasa p̃ia ki Sup̃e nalakena tea maga mamau puti waina eu dogo ra po punusi ra, dakiusi waina e pei tea noaana paki da.
21Go ragi waina naaleatia latolu eu pei tea vakavuroana naga euga tovadavivi asa, nagisana e pei tea sosoana ki YESU, waina e pei tea sosoana asa pae agelo e pea ki p̃ilana e diena ki nia.
22Go ragi waina naaleatia maga ni namari‐dautau‐ki‐da‐ana pae nawotaeana ki Moses eu pei tea vakavuroana, ero dape a sake paki Yerusalem, naga eroga lawo ki nia narae ni Yehovah (dakiusi waina e pei tea midiriana nawotaeana ki Yehovah, e naga, 23Sara naanoai waina eu pei takalapa euga wo pei tea sosoana ki tea tapu ki Yehovah), 24go naga eroga vitua ki naviriana sikai ega vae tea waina e pei tea noaana nawotaeana ki Yehovah, e naga, Taroa ega rua, kite tokopea vusavusa ega rua. 25Go kuga leo, naatam̃oli sikai e doko Yerusalem, waina nagisana Simeon, go naatam̃oli wanogoe e leana po matauki Sup̃e, e do leogoro navakavakaleana ni Israel: go Naatana Tapu e doko asa. 26Go e pei tea noasaiana paki nia pae Naatana Tapu, naga ega ta punusi namateana mau pa pa ega vea punusi Kristo ki Yehovah. 27Go e doko Naatana umai paki nasum̃a tapu: go ragi waina tea matua maga ero dape piakiki Yesu umai, naga eroga mari nalo kakana ega vae natomariana ni nawotaeana, 28nae e dape a paki naruna maga, go e pasa p̃ia ki Sup̃e, po naga,
29Ragi waia ku suasua ki tea suasua anigo naga ega m̃elu, Talakeagu O,
Pae navasaana anigo, doko natam̃ateana;
30Nalakena namatagu ero punusi namautipauriana anigo,
31Waina ku mari m̃ata ki nia narae ni narei maga mamau puti:
32Namarama sikai naga ega maramalagati nalauna p̃ota maga,
Go nasamasamaana ki narei anigo Israel.
33Go tamana go p̃ilana ero do maga nalakena tea maga waina eu pei tea noaana nalo kakana; 34go Simeon e pasa p̃ia ki da, po noa ki p̃ilana Maria, e naga, P̃a leo piakiki waia e pei tea lawokiana raki narowoana go natuleanaana ki tea laapa ni Israel; go naga ega vei navaivaiana sikai waina ega wo pei tea vasadugoroana; 35io go lova sikai ega wo puri sasama naatam̃a; naga namidodoana maga ni nap̃op̃o ni tea laapa euga vei tea maripakasakiana. 36Go Anna e doko, profeta nagoroi sikai, natu ni Fanuel, tea ni nawora ni Asher (nae e pei tea ni naaleatia laapa, nara ma anawota ero dua doko natau larua pae ragi ni naveinaataraana aneana, 37go e pei namalepu natau rualima latolu tamate pati), waina e da m̃elu dua ki nasum̃a tapu mau, e do magi Sup̃e suasua ki navaliana maga go navavaraniana maga p̃ogi go aleati. 38Go e lawodu pisari ra aura wanogoe, go nae ma e pasadodom̃ata ki Sup̃e, po pasa asa paki tea maga mamau puti waina eu do leogoro natauluaana ni Yerusalem. 39Go ragi waina ero mari sua naleo maga mamau puti waina eu pae nawotaeana ki Yehovah, eu liliu paki Calilea pano, paki natokoana adeada Nasareth.
40Go piakiki wanogoe e do atum̃aki, po do kasua, e do pei tea vakavuroana ki namanumatuaana: go nasaup̃iana ki Sup̃e e doko asa doko.
41Go tea matua aneana ero paki Yerusalem pano sara natau ragi ni nasaisaiana ni navakalauana. 42Go ragi waina e pei tea ni natau rualima sikai tamate dua, eu sake pano pae natomariana ni nasaisaiana wanogoe; 43go ragi waina eu pakavuro sua naaleatia maga kakana, go nara ero do liliu, piakiki Yesu e madoko Yerusalem; go tea matua aneana ero da atae a mau; 44ma nalakena ero midoa ki nia naga e sikoti taua ni naatam̃oli maga waina eu mamau surata, ero surata napua ni naaleatia sikai; go ero laaga asa m̃aleoputo ni namatarau adeada maga go ni tea maga waina ero atae ra: 45go ragi waina ero da pap̃ai a mau, ero liliu paki Yerusalem, po do laaga asa. 46Go e pakilina, edaku ki naaleatia dolu naga ero pap̃ai a nasum̃a tapu, e do natano m̃aleoputo ni tea vasapiseiki maga, e do dogo ra, po do pusuusu paki da: 47go tea maga mamau puti waina eu dogo e eu maga p̃arua nalakena namidoakiataeana aneana go navasadaraana aneana maga. 48Go ragi waina ero punusi a ero saram̃akoto: go p̃ilana e noa ki nia, e naga, Piakiki, ekasana ku mari dapalana paki gami? P̃a leo, tamam̃a go kinau aro laaga ako dogo kite sa. 49Go e noa ki da, e naga, Ekasana koro laaga au? Koro da atae mau naga e one au one naga aga toko nasum̃a ki Tamagu kite? 50Go ero da midoa ki atae navasaana waina e noa ki da asa mau. 51Go e siwo sikoti ra pano, po umai paki Nasareth; go e doko etano paki da: go p̃ilana e midoaki soki navasaana maga mamau puti wanogoe doko nap̃op̃ona. 52Go Yesu e do disu ki namanumatuaana go ki navarauana go ki nasaup̃iaana sikoti Sup̃e go naatam̃oli maga.
Currently Selected:
LUKA 2: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
