LEVITIKO 6
6
1Go Yehovah e pasa paki Moses, po naga, 2Waina te naata sikai e pe mari naleo sa, po mari natapiriana sikai dip̃a Yehovah, po mari malauweluki paki tea ni m̃aladigi ki nia nalo ni naleo sikai waina e maneana pavaigoro e, kite nalo ni nanadisokiana, kite nalo ni navanakoana, kite e pe riesoki tea ni m̃aladigi ki nia: 3Kite e pe vap̃ai tea waina e puoli, po pasagoro e, po pivisa sorosoro; doko te navatuna ni naleo maga wanogoe waina naatam̃oli sikai e pe mari a, po mari naleo sa asa: 4Ragi wanogoe ega wo doko, waina e pe mari naleo sa go sogi e liko asa, naga ega liliua ki tea waina e dape pavakoto asa, kite tea waina e dape a pae namari‐kasua‐ki‐ana, kite tea waina e pei tea vituakiana paki nia naga ega vavaigoro e, kite naleo waina e puoli go e pap̃ai a, 5Kite te naleo waina e pivisa sorosoro asa; ega liliua ki puti a, go ega sokari a ki namagovai kelima kakana: go ega vitua ki nia paki tea waina e pei talakeana, naaleatia wanogoe waina e pei tea ataeana naga sogi e liko asa. 6Go ega viragi navituaana ni natapiriana aneana umai paki Yehovah, shiip anoai sikai m̃elu navata, tea mamaau p̃ia, pataka ni nanoap̃otaeana anigo, ega vei navituaana sikai ni natapiriana paki tea viri: 7Go tea viri ega maneana mari natap̃augoroana narae ni Yehovah, go ega maneana pei tea midoakikorokoroana; nalo ni te naleo sikai waina e mari a go pae asa sogi e liko asa.
8Go Yehovah e pasa paki Moses, po naga, 9P̃a tip̃aki Aaron go natuna maga, po naga, Tea waia e pei nawotaeana ni navituaana tap̃arakiana: navituaana tap̃arakiana ega one nakapu doko wede ni naviriana p̃ogi mamau pa pa paki malip̃ogi; go nakapu ega to pavaga doko wede ni naviriana. 10Go tea viri ega suni sugoro ni linen aneana, go ega kovagoro nawilina ki tea vasiana vuru ni linen aneana; go ega tape lua natanoapu maga ni nakapu waina e pei tea kani‐puoli‐kiana pilake navituaana tap̃arakiana doko wede ni naviriana, go ega toropusi ra nadigi ni wede ni naviriana. 11Go ega sawo lua sugoro aneana maga, po suni oli ra ki sugoro p̃ota maga, po dape lua natanoapu maga pano paki etaku ni tokora ni nam̃enakiana, paki tokora tautau sikai. 12Go nakapu waina e doko wede ni naviriana ega to pavaga asa, ega ta mate mau; go tea viri ega to dap̃ara ki nakau kokolo asa sara malip̃ogi: go ega toropusi navituaana tap̃arakiana asa, go ega tap̃ara ki nap̃eletia ni navituaana maga ni natam̃ateana asa. 13Nakapu ega to pavaga wede ni naviriana pitip̃atip̃a; go ega ta mate mau.
14Go tea waia e pei nawotaeana ni navituaana ni flaur: Aaron natuna maga euga vitua ki nia narae ni Yehovah, kivea ki wede ni naviriana. 15Go ega tape lua aneana kiana nam̃elearuna ega vura, ki flaur wia ni navituaana ni flaur, pilake naroro kakana, go libano mamau puti waina e doko elagi ni navituaana ni flaur, go ega tap̃ara ki nia wede ni naviriana, tea ni nap̃o lolo, e pei namidoaki‐parati‐kiana kakana paki Yehovah. 16Go tea tupele, Aaron ma natuna maga euga kani a: leven ega tika asa, go ega vei tea kaniana tokora tapu sikai; doko roara ni tap̃aup̃au ni nasaisaiana, euga kani a asa. 17Ega vei tea taoniana leven ega tika asa. A po pitua ki nia e pei namagovai adeada ni navituaana aginau maga pae nakapu: e pei tea tapu warua liu, e dakiusi navituaana ni namarinaleosaana, go navituaana ni natapiriana. 18Aaron natuna naanoai maga mamau puti euga kani a, ega vei natawonakiana sikai waina ega tu mau du usuraki tagona animu maga, m̃elu navituaana maga paki Yehovah pae nakapu: sara naata waina eu kisidogo ra, euga tapu.
19Go Yehovah e pasa paki Moses, po naga, 20Tea waia e pei naviriana ni navinaga ki Aaron go ki natuna maga, waina euga vitua ki nia paki Yehovah naaleatia waina ega vei tea vuvuraikiana; namagovai kerualima ni efah ni flaur wia ega vei navituaana ni flaur ni sara naaleatia, namagovai sikai malip̃ogi, go namagovai kerua ragi melu. 21Ega vei tea veniana pilake naroro doko vatu; ragi waina ega maso, p̃a tape a umai: tea mateletele veniana maga p̃a vitua ki da euga vei navituaana ni navinaga, tea ni nap̃o lolo paki Yehovah. 22Go tea viri natuna sikai waina e pei tea vuvuraikiana doko oli a, ega vitua ki nia: e pei natawonakiana doko mau doko paki Yehovah; ega vei tea tap̃ara‐ki‐puti‐ana. 23Go sara navituaana ni flaur ki tea viri ega vei tea tap̃ara‐ki‐puti‐ana: ega ta pei tea kaniana mau.
24Go Yehovah e pasa paki Moses, po naga, 25P̃a vasa paki Aaron go paki natuna maga, po naga, Tea waia e pei nawotaeana ni navituaana ni namarinaleosaana: tokora waina navituaana tap̃arakiana e pei tea maripunueana asa, tokora wanogoe navituaana ni namarinaleosaana ega vei tea maripunueana asa narae ni Yehovah: e pei tea tapu warua liu. 26Tea viri waina ega vitua ki nia dip̃a namarinaleosaana, ega kani a: ega vei tea kaniana tokora tapu sikai, roara ni tap̃aup̃au ni nasaisaiana. 27Tea mamau puti waina eu kisidogo nap̃okasina, euga tapu: go waina te nada e pe siri ki te sugoro, p̃a sarue lua tea waina e siri ki nia tokora tapu sikai. 28Go lasa ni naruku waina e pei tea veniana asa, ega vei tea marip̃oraworaeana: go waina e pe vei tea veniana lasa ni brass, ega vei tea soro‐kasua‐kiana, po pei tea sarue‐lua‐ana ki noai. 29Sara tea viri naanoai maga euga kani a: e pei tea tapu warua liu. 30Go te navituaana ni namarinaleosaana sikai, waina nadana e pei tea viragiana umai paki ekopu ni tap̃aup̃au ni nasaisaiana, naga ega vei natap̃augoroana tokora tapu, ega ta pei tea kaniana mau: ega vei tea tap̃arakiana ki nakapu.
Currently Selected:
LEVITIKO 6: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
