JENESIS 47
47
1Go Yosef e paki ekopu po noakisai Faraoh, po naga, Tamagu go taigu maga, go navata ni shiip go ni naninani adeada maga, go navata ni kau adeada maga, go tea mamau puti waina eu peani ra, eu po pae navanua ni Kanaan umai: go p̃a leo, eu doko navanua ni Coshen. 2Go e pila lua naatam̃oli lima ni taina maga, po lawo ki da narae ni Faraoh. 3Go Faraoh e noa ki taina maga, e naga, Nawosiana animu e pei nasava? Go eu noa ki Faraoh, eu naga, Tea suasua anigo maga au pei tea leoparati ki shiip, kinami go tamagami maga. 4Go eu noa ki Faraoh, eu naga, Au po umai naga auga m̃enaki‐atatoko navanua; nalakena nam̃enau agi navata ni shiip go ni naninani maga ki tea suasua anigo maga e dika; nalakena navitoloana e p̃arua navanua ni Kanaan: go tea wanogoe, p̃a suasua, au pavara ni ko asa, naga tea suasua anigo maga auga toko navanua ni Coshen doko. 5Go Faraoh e pasa ki Yosef, po naga, Tamam̃a go taim̃a maga eu po umai punusi ko: 6Navanua ni Ityipt e doko naraem̃a; p̃a mari tamam̃a go taim̃a maga euga toko tokora ni navanua waina e p̃ia liu; euga toko navanua ni Coshen: go ku pe atae, go seara kakada eu pe vei naatam̃oli ni namarimatuaana, p̃a mari ra euga vei tea maramara dap̃au katel aginau maga. 7Go Yosef e piragi tamana Yakob paki ekopu, po lawo ki nia narae ni Faraoh: go Yakob e pasa m̃ata ki Faraoh. 8Go Faraoh e noa ki Yakob, e naga, Naaleatia maga ni natau maga ni namauriana anigo eu pisa? 9Go Yakob e noa ki Faraoh, e naga, Naaleatia maga ni natau maga ni nam̃enaki‐atatokoana aginau maga eu pei natau p̃onotia sikai rualima takuna dolu: naaleatia maga ni natau maga ni namauriana aginau eu pisa maau go eu sa, go eu ko da pa parati ki naaleatia maga ni natau maga ki tamagu maga naaleatia maga ni nam̃enaki‐atatokoana adeada maga. 10Go Yakob e pasa m̃ata ki Faraoh, po dave m̃elu dua ki narae ni Faraoh pano. 11Go Yosef e lawo ki tamana go taina maga, po dua ra naveaniana sikai navanua ni Ityipt, tokora ni navanua waina e p̃ia liu, navanua ni Rameses, dakiusi waina Faraoh e dip̃aki nia asa. 12Go Yosef e pakale tamana, go taina maga, go tea mamau puti ni nasum̃a ki tamana, ki navinaga waina e pataka ni nawoka ni piakirikiri maga.
13Go navinaga e dika navanua mamau; nalakena navitoloana e p̃arua sa, dapala navanua ni Ityipt go navanua ni Kanaan eu pa mate nalakena navitoloana. 14Go Yosef e pila daua ki m̃ane mamau puti waina e pei tea vap̃aiana navanua ni Ityipt, go navanua ni Kanaan, raki korn waina eu pakotovi a: go Yosef e dape m̃ane paki ekopu ni nasum̃a ki Faraoh. 15Go m̃ane e nopu navanua ni Ityipt, go navanua ni Kanaan, go naka ni Ityipt eu pano puti umai punusi Yosef, po noa, P̃a tua gami navinaga: go ekasana auga mate naraem̃a? Nalakena m̃ane e nopu. 16Go Yosef e noa, Kuga vitua ki katel animu maga; go m̃ane e pe nopu, a pe wo dua mu raki katel animu. 17Go eu piragi katel adeada maga umai punusi Yosef: go Yosef e dua ra navinaga raki horse maga, go raki navata ni shiip go ni naninani maga, go raki katel ni navata ni kau maga, go raki ass maga: go e pakale ra ki navinaga raki katel mamau puti adeada natau wanogoe. 18Go ragi waina natau wanogoe e nopu, eu rumai punusi a natau kerua, po noa ki nia, eu naga, Auga wo da pasagoro e paki nawota aginau mau naga m̃ane aginami e nopu puti; go navata ni katel maga eu pei tea ki nawota aginau; te navatuna sikai e da doko narae ni nawota aginau, ma nap̃atokogami go natano aginami maga sikai maau e doko: 19Ekasana auga mate narae ni namatam̃a, kinami go natano aginami? P̃a vakotovi gami go natano aginami ki navinaga, go kinami go natano aginami auga wo pei tea suasua ki Faraoh: go p̃a tua gami navinaga lawoana, naga auga mauri, po da mate mau, go naga natano ega ta maladi mau. 20Go Yosef e magi Faraoh pakotovi natano mamau puti ni Ityipt; nalakena naka ni Ityipt sara naatam̃oli eu sori vanua adeada sarasara ra, nalakena navitoloana e p̃arua ara: go navanua e po pei tea ki Faraoh. 21Go narei, e piragi lua ra paki natokoana maga pae namatap̃agona sikai ni navanua ni Ityipt pa pa paki namatap̃agona kerua kakana. 22Ma natano ki tea viri maga sikai maau e da pakotovi a mau: nalakena tea viri maga eu peani namagovai ni navinaga ki Faraoh, po gani namagovai waina Faraoh e dua ra asa; nalakena tea wanogoe eu da sori natano adeada mau. 23Go Yosef e noa ki narei, e naga, Kuga leo, a po magi Faraoh pakotovi mu ma natano animu masoso: kuga leo, navinaga lawoana animu nea, go kuga wo lalawo natano. 24Go ragi ni nalolovaeana maga, kuga wo dua Faraoh kelima kakana, go namagovai pati euga wo pei tea animu, ega vei tea lawoana ni vanua, go ega vei navinaga kaniana animu, go ega vei navinaga kaniana agi piakirikiri animu maga. 25Go eu noa, Ku po mauti gami au mauri doko: auga vap̃ai nasaup̃iaana namata ni nawota aginau, go auga wo pei tea suasua ki Faraoh. 26Go Yosef e mari a e pei natawonakiana sikai nalo ni natano ni Ityipt pa pa paki naaleatia waia, naga Faraoh ega veani kelima kakana; ma natano ki tea viri maga sikai maau e da pei tea ki Faraoh mau. 27Go Israel e doko navanua ni Ityipt, navanua ni Coshen; go eu dalua naveaniana maga asa, po pavakawora, po laapa p̃arua sa.
28Go Yakob e mauri doko navanua ni Ityipt natau rualima sikai tamate larua: go naaleatia maga ki Yakob, natau ni namauriana aneana maga, eu pei natau p̃onotia sikai rualima takuna pati tamate larua. 29Go naaleatia ki Israel naga ega mate e po pei m̃aladigi: go e soso natuna Yosef, po noa ki nia, e naga, A pe wo pap̃ai nasaup̃iaana namatam̃a, p̃a toropusi nam̃elearum̃a etano ni namaogu, a pavara ni ko asa, po mari nadodomiana go nalomauana paki nau; p̃a ta ova ki nau Ityipt mau, a pavara ni ko asa: 30Ma ragi waina aga wo maturu sikoti tamagu maga, p̃a wo dape au m̃elu dua ki Ityipt pano po ova ki nau taikesa adeada. Go e noa, Aga wo mari ega tapala navasaana anigo. 31Go e noa, P̃a vivisa paki nau: go e pivisa paki nia. Go Israel e kolo nap̃au ni nawewele aneana.
Currently Selected:
JENESIS 47: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
