JENESIS 44
44
1Go e dip̃aki tea waina e dap̃au nasum̃a aneana, po noa, P̃a vakavuro sak maga ki naatam̃oli maga waina ki navinaga, ega tapala waina eu mariatae dape a, go p̃a toropusi m̃ane ki sara naatam̃oli nawoka ni sak adeada sarasara ra. 2Go p̃a toropusi lasa munu aginau, lasa munu ni silver, nawoka ni sak ki tea takariki, go m̃ane ni korn aneana. Go e mari dapala navasaana waina Yosef e noa e. 3Ragi waina e po marama malip̃ogi, naatam̃oli maga wanogoe eu pei tea tip̃akiluaana, nara ma ass adeada maga. 4Nara eu m̃elu dua ki natokoana pano, eu ko da paki uvea mau, go Yosef e noa ki tea waina e dap̃au nasum̃a aneana, e naga, P̃a tuleana, p̃a rausi naatam̃oli maga waina pano; go ragi waina p̃a wo pa parati ki da, p̃a noa ki da, Ekasana ku po pitua ki tea sa dip̃a tea wia? 5Tea waia e da pei tea waina nawota aginau e munu asa, go waina e kikita lomau asa kite? Ku po mari tea sa tea waina ku po mari a. 6Go e pa parati ki da, go e pasa ki da navasaana maga wanogoe. 7Go eu noa ki nia, eu naga, Ekasana nawota aginau e pasa navasaana maga dapala nogoe? E madu uvea ki tea suasua anigo maga naga euga mari naleo dapala nogoe. 8P̃a leo, m̃ane waina au pap̃ai a nawoka ni sak aginami maga, au dape a liliu pae navanua ni Kanaan umai punusi ko: go auga vanako silver kite kold m̃elu dua ki nasum̃a ki nawota anigo dapale sava? 9Naata ni tea suasua anigo maga waina tea wanogoe e pe vei tea vap̃aiana sikoti a, ega mate, go kinami ma auga vei naviti maga ki nawota aginau. 10Go e noa, Ega moro dapala navasaana animu ragi waia: naata waina tea wanogoe e pe vei tea vap̃aiana sikoti a, nae ega vei naviti aginau; go nimu kuga wo dautau asa. 11Go eu mari m̃araverave, po mamau puti dape sak adeada maga paki natano, po mamau puti peresi sak adeada maga. 12Go e laaga, e atulake asa ki takalapa, po makoto ki nia ki takariki; go lasa munu e pei tea vap̃aiana sak ki Benyamin. 13Go eu puap̃orae sugoro adeada maga, po mamau puti duatua ass adeada sarasara ra, po liliu paki natokoana pano. 14Go Yudah go taina maga eu rumai paki nasum̃a ki Yosef; go e ko doko asa doko: go eu dowo paki natano naraena. 15Go Yosef e noa ki da, e naga, Seve namariana waia waina ku po mari a? Ku da atae naga naatam̃oli waina e dapala au, e mariatae kikita lomau kite? 16Go Yudah e noa, Auga noa ki nawota aginau nasava? Auga vasa nasava? Auga tum̃agami pasa leana ki gami dapale sava? Sup̃e e po pap̃ai namarinaleotageleana ki tea suasua anigo maga: p̃a leo, au pei naviti ki nawota aginau, kinami go tea waina lasa munu e pei tea vap̃aiana nam̃elearuna. 17Go e noa, Ega madu uvea ki nau naga aga mari dapala nogoe: naatam̃oli waina lasa munu e pei tea vap̃aiana nam̃elearuna, nae ega vei naviti aginau; go nimu kuga sake natam̃ateana pano punusi tamamu.
18Go Yudah e umai paki m̃aladigi ki nia, po noa, A pavara, nawota aginau O, tea suasua anigo, a pavara ni ko asa, ega vasa navasaana sikai nadaliga ni nawota aginau, go namaetoana anigo ega ta pavaga dip̃a tea suasua anigo mau: nalakena nigo ku dakiusi Faraoh. 19Nawota aginau e pusuusu paki tea suasua aneana maga, po noa, Ku peani tamamu sikai, kite taimu sikai kite? 20Go au noa ki nawota aginau, au naga, Au peani tamagami sikai, tea matua, go natu ni navei‐tea‐matua‐ana aneana, tea kiki; go taina e mate, go nae e sikina doko natu ni p̃ilana, go tamana e dodomi a. 21Go ku noa ki tea suasua anigo maga, ku naga, Kuga viragi a siwo umai punusi au, naga aga leo punusi a. 22Go au noa ki nawota aginau, au naga, Natureai wanogoe e marisa doropusi tamana: nalakena e pe toropusi tamana, tamana e pe mate. 23Go ku noa ki tea suasua anigo maga, ku naga, Taimu takariki e pe ta siwo sikoti mu umai mau, ku pe ta moro punusi naraegu mau. 24Go ragi waina au sake pano punusi tea suasua anigo tamagu, au noakisai a navasaana maga ki nawota aginau. 25Go tamagami e noa, Kuga moro pano, po manigida pakotovi navinaga kiki seara. 26Go au noa, Au marisa siwo pano: taigami takariki e pe sikoti gami doko, au pe wo siwo pano: nalakena taigami takariki e pe ta sikoti gami doko mau, au pe marisa punusi narae ni naatam̃oli waina. 27Go tea suasua anigo tamagu e noa ki gami, e naga, Nimu ku atae naga nagoroi aginau e maginau dape natugu dua: 28Go sikai e dave m̃elu dua ki nau pano, go a noa, E pei tea katip̃oraworaeana lomau; go a da moro punusi a mau: 29Go ku pe moro dape lua tea waia kiagu, go namarisakiana e pe vakilina ki nia, ku pe wo piragi nalolugu tare e pe siwo ki nasusueana paki Sheol pano. 30Go tea wanogoe ragi waina a pe wo umai punusi tea suasua anigo tamagu, go natureai e pe ta sikoti gami doko mau; go naatana e pei tea otisokiana doko naatana; 31Go ragi waina e pe wo punusi naga natureai e puoli, e pe wo mate: go tea suasua anigo maga eu pe wo piragi nalolu tare ni tea suasua anigo tamagami e pe wo siwo ki nasusueana paki Sheol pano. 32Nalakena tea suasua anigo e magi natureai pei tea tapegoro paki tamagu, po noa, A pe ta piragi a umai punusi ko mau, a pe vei tea marinaleosa paki tamagu asa naaleatia mamau puti. 33Go tea wanogoe, tea suasua anigo, a pavara ni ko asa, ega toko oli natureai ega vei naviti ki nawota aginau; go natureai ega sake sikoti taina maga pano. 34Nalakena natureai e pe ta sikoti au doko mau, a pe wo sake pano punusi tamagu dapale sava? A pe wo punusi nasaana waina e pe wo pakilina ki tamagu.
Currently Selected:
JENESIS 44: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
