ESEKIEL 41
41
1Go e piragi au paki nasum̃a tapu, go e dowogi nakautu maga, nawele weleana kakada kubit latesa taleva sikai, go kubit latesa taleva kerua; e pataka sikai ma naweleweleana ni tokora tapu. 2Go naweleweleana ni tokora ni nasiliana kubit rualima sikai; go nadigi ni tokora ni nasiliana kubit lima taleva sikai, go kubit lima taleva kerua: go e dowogi navarauana kakana, kubit rualima pati, go naweleweleana kakana kubit rualima dua. 3Go e paki ekopu, po dowogi nakautu sikasikai ni tokorani nasiliana, kubit dua: go tokora ni nasiliana kubit latesa; go naweleweleana ni tokora ni nasiliana kubit larua. 4Go e dowogi em̃ago wanogoe navarauana kakana kubit rualima dua, go naweleweleana kakana kubit rualima dua, kivea ki nasum̃a tapu: go e noa ki nau, e naga, tokora waia e pei tokora tapu liu. 5Go e dowogi paaka ni nasum̃a tapu, namatoluana kakana kubit latesa; go naweleweleana ni em̃ago maga ni nadigina kubit pativati sikasikai sarasara ra, dalivirigoro nasum̃a tapu. 6Go em̃ago maga ni nadigina eu pei tagona dolu, eu dumada doko elagi ki da, em̃ago rualima dolutolu sikasikai sarasara ra; em̃ago magani nadigina eu dip̃a soki p̃aaka ni nasum̃a tapu, ma eu da pei tea turisokiana doko asa mau. 7Go naweleweleana ni emago maga ni tagona kerua e parua liu tea ni tagona vea, go naweleweleana ni tagona ketolu e moro p̃arua liu tea ni tagona kerua; go napua vavadu sikai e doko taleva sikai ni nasum̃a tapu, e sake paki tagona kerua po moro paki tagona ketolu. 8Go a punusi naga napara ni vatu sikai e doko dalivirigoro nasum̃a tapu pakilagi: laketano maga ni em̃ago maga narowogiana kakada kubit latesa, e pei napati nau totowo mamau sikai. 9Namatoluana ni paaka ni em̃ago maga paki katama e pei kubit lima: go namalopa paki katama dalivirigoro nasum̃a tapu, naweleweleana kakana kubit lima. 10Go namawota ni em̃ago maga, namalopa sikai naweleweleana kakana kubit rualima dua e dalivirigoro nasum̃a tapu. 11Go namata duaduru maga ni em̃ago maga eu leo paki tokora wanogoe katama, namata duaduru sikai e doko taleva ni north, go namata duaduru kerua e doko taleva ni sauth: naweleweleana ni namalopa paki katama kubit lima daliviri. 12Go nasum̃a waina e leo paki roara ni nasum̃a tapu taleva ni elo musu kakana, naweleweleana kakana kubit rualima larua; go p̃aaka ni nasum̃a namatoluana kakana kubit lima daliviri, go navarauana kakana kubit rualima loveti. 13Go e dowogi nasum̃a tapu, navarauana kakana kubit p̃onotia sikai; go roara, go nasum̃a, go p̃aaka kakana maga, navarauana kakana kubit ponotia sikai; 14Go naweleweleana kivea ni nasum̃a tapu, go ni roara paki taleva ni elo sake, kubit p̃onotia sikai. 15Go e dowogi navarauana ni nasum̃a waina e leo paki roara taleva ni elo musu, go p̃aaka kakana maga taleva dua kakana, kubit p̃onotia sikai; go nasum̃a tapu ni m̃aleoputo, go natarataup̃a maga ni roara; 16Ekopu ni nasum̃a tapu, go natarataup̃a maga ni roara, tea tuasila kakada maga, namata leoduru turuturua maga, namata duaduru dolu kakada, eu pei tea kovagoroanaki napapa, pae etano pakilagi pa pa liliu namata leoduru maga. 17Pae namata duaduru pano paki ekopu ni nasum̃a tapu, go doko p̃aaka ni em̃ago ni m̃aleoputo dalivirigoro e, ekopu go katama, kerub maga go paama maga eu pei tea taemidimidiria doko asa; 18Kerub sikai go paama sikai, kerub sikai go paama sikai, go kerub maga eu peani naraeda duarua sikasikai sarasara ra: 19Narae ni naatam̃oli sikai e leo paki nakau paama doko taleva sikai kakana, go narae ni laion tureai sikai e leo paki nakau paama taleva kerua kakana. Eu pei tea taemidimidiria doko nasum̃a tapu mamau daliviri; 20Kerub maga go nakau paama maga eu pei tea taemidimidiria doko p̃aaka kakana pae etano pakilagi pa pa liliu elagi ni namata duaduru. 21Tip̃a maga ni nasum̃a tapu eu pei palapati. 22Go tea waina e dakiusi wede sikai ni nakau e doko narae ni tokora tapu, navakilagiana kakana kubit dolu, navarauana kakana kubit dua, naweleweleana kakana kubit dua; naweluki kakana maga, go laketano kakana, go taleva kakana maga, eu pei tea ni nakau: go e noa ki nau, e naga, tea waia e pei wede waina e doko narae ni Yehovah. 23Go nasum̃a tapu go tokora tapu ero peani namata duaduru duarua. 24Go namata duaduru maga wanogoe ero dua asa, ero pei tea lugiposaeana; namata sikai e dua asa, go namata kerua e dua asa. 25Go kerub maga go nakau paama maga eu pei tea taemidimidiria doko namata duaduru maga ni nasum̃a tapu, dakiusi tea magawaina eu pei tea taemidimidiria doko p̃aaka kakana maga; go napapa matolu maga eu doko kivea ki narae ri natuataup̃a katama. 26Go namata leoduru turuturua maga go nakau paama maga eu doko p̃aaka kakana taleva sikai go taleva kerua ni natarataup̃a.
Currently Selected:
ESEKIEL 41: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
