EKSODAS 7
7
1Go Yehovah e noa ki Moses, e naga, P̃a vunusi, a po mari ko ku magi Faraoh pei sup̃e sikai: go taim̃a Aaron ega wo pei profeta anigo. 2Nigo p̃a wo pasa tea mamau puti waina aga wo dip̃aki‐go asa: go taim̃a Aaron ega wo pasa ki Faraoh, naga ega suasua ki Israel natuna maga naga euga m̃elu dua ki navanua aneana pano. 3Go kinau aga wo mari nap̃op̃o ni Faraoh ega wo kasua, go aga wo mari navaivaiana aginau maga go tea ni namagaana aginau maga euga wo laapa navanua ni Ityipt. 4Ma Faraoh ega wo da dogo parati ki mu mau, go aga wo lawo ki nam̃elearugu Ityipt, po piragi lua taua aginau maga, narei aginau Israel natuna maga, m̃elu dua ki navanua ni Ityipt umai ki navasap̃otaeana warua maga. 5Go naka ni Ityipt euga wo atae naga kinau a pei Yehovah, ragi waina aga wo sai ki nam̃elearugu paki Ityipt, po piragi lua Israel natuna maga m̃elu dua ki m̃aleoputo kakada umai. 6Go Moses go Aaron ero mari dapala waina Yehovah e dip̃aki da asa, ero mari dapala nogoe. 7Go Moses e pei tea ni natau rualima latolu, go Aaron e pei tea ni natau rualima latolu tamate dolu, ragi waina ero pasa ki Faraoh.
8Go Yehovah e noa ki Moses go ki Aaron, 9e naga, Ragi waina Faraoh ega wo pasa ki mu, po naga, Koroga manimu pitua ki tea ni namagaana sikai: ragi wanogoe p̃a noa ki Aaron, p̃a naga, P̃a vuati tiko anigo, po nadi ki nia paki natano narae ni Faraoh, naga ega vei m̃aata sikai. 10Go Moses go Aaron ero paki ekopu punusi Faraoh, go ero mari dapala waina Yehovah e dip̃aki da asa: go Aaron e nadi ki tiko aneana paki natano narae ni Faraoh go narae ni tea suasua aneana maga, go e po pei m̃aata sikai. 11Go Faraoh e pioso raki naatam̃oli manumatua maga go tea wosidoa maga: go nara ma, tea midiri tapu maga ni Ityipt, eu mari dapala nogoe ki nakikita adeada maga. 12Go eu nadi ki tiko adeada sikasikai sarasara puti ra paki natano, go eu po pei m̃aata maga: ma tiko ki Aaron e dinomi tiko adeada maga. 13Go nap̃op̃o ni Faraoh e kasua, go e da dogo parati ki da mau; dakiusi waina Yehovah e noa e.
14Go Yehovah e noa ki Moses, e naga, Nap̃op̃o ni Faraoh e madaga, e karai suasua ki narei naga euga vano. 15P̃a va punusi Faraoh malip̃ogi; p̃a leo, e dave paki noai pano; go p̃a lawodu nadigi ni noai sara naga p̃a sua e; go tiko waina e panop̃ota po pei m̃aata sikai, p̃a vuati a ega toko nam̃elearum̃a. 16Go p̃a noa ki nia, p̃a naga, Yehovah, Sup̃e ki naworawora ni Heberu, e po dip̃aki lua au umai punusi ko, e naga, P̃a suasua ki narei aginau naga euga vano, naga euga maginau suasua masop̃alo: go p̃a leo, ku ko da dogo parati ki mau. 17Yehovah noa dapala waia, e naga, Tea waia p̃a wo atae asa naga kinau a pei Yehovah: p̃a leo, kinau aga wo p̃okati noai maga waina eu doko noaisara ki tiko waina e doko nam̃elearugu, go euga wo pano p̃ota po pei nada. 18Go naika waina eu doko noaisara euga wo mate, go noaisara ega wo p̃oa; go naka ni Ityipt euga wo karai naga euga munu noai ni noaisara. 19Go Yehovah e noa ki Moses, e naga, P̃a noa ki Aaron, p̃a naga, P̃a vuati tiko anigo, po sai ki nam̃elearum̃a elagi ni noai maga ni Ityipt, elagi ni noaisara adeada maga, elagi ni nasalenoai adeada maga, go elagi ni namarourou adeada maga, go elagi ni lukunoai mamau puti adeada, naga euga vei nada; go nada ega wo doko usuraki navanua mamau ni Ityipt, ega wo doko lasa ni nakau maga, go lasa ni vatu maga. 20Go Moses go Aaron ero mari dapala nogoe, dakiusi waina Yehovah e pitip̃aki; go e sila ki tiko, po p̃okati noai maga waina eu doko noaisara, namata ni Faraoh, go namata ni tea suasua aneana maga; go noai mamau puti waina eu doko noaisara eu panop̃ota po pei nada. 21Go naika maga waina eu doko noaisara eu mate; go noaisara e p̃oa, go naka ni Ityipt eu mari sa munu noai ni noaisara; go nada wanogoe e doko usuraki navanua mamau ni Ityipt. 22Go tea midiri tapu ni Ityipt maga eu mari dapala nogoe ki nakikita adeada maga: go nap̃op̃o ni Faraoh e kasua, go e da dogo parati ki da mau; dakiusi waina Yehovah e noa e. 23Go Faraoh e dum̃ana doa e po paki ekopu ni nasum̃a aneana, go e da lawo ki nap̃op̃ona tea wanogoe mau. 24Go naka ni Ityipt eu mamau puti kilikili daliviri noaisara raki noai naga euga munu; nalakena eu mari sa munu noai ni noaisara. 25Go naaleatia larua eu nopu, edaku ki Yehovah e p̃okati noaisara.
Currently Selected:
EKSODAS 7: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
