EKSODAS 33
33
1Go Yehovah e pasa paki Moses, e naga, P̃a vano, p̃a m̃elu dua ki tokora waia sake pano, nimu ma narei waina ku piragi lua ra m̃elu dua ki navanua ni Ityipt sake umai, kuga vaki navanua waina a pivisa paki Abraham, paki Isaak, go paki Yakob asa, po naga, Aga wo dua naworaworam̃a asa: 2Go aga wo dip̃aki lua agelo sikai ega wo pea ki‐go; go aga wo kopasi lua naworawora ni Kanaan, go naworawora ni Amor, go naworawora ni Heth, go naworawora ni Peris, go naworawora ni Hivah, go naworawora ni Yebus: 3Kuga vaki navanua sikai waina e sara ki milk go honi: nalakena aga wo da sake pano m̃aleoputo kakamu mau, nalakena ku pei narei ni noa kasua: a pe mari ko ku pe mavunuvunu napua. 4Go ragi waina narei eu dogo narogorogoana sa wanogoe, eu susue: go te naata e da pilake nalo ni narekeiana aneana maga mau. 5Go Yehovah e noa ki Moses, e naga, P̃a noa ki Israel natuna maga, p̃a naga, Nimu ku pei narei ni noa kasua; a pe sake pano m̃aleoputo kakam̃a ragi kiki sa, a pe mari ko ku pe mavunuvunu: go ragi waia p̃a mari nalo ni narekeiana anigo maga euga vei tea toroana m̃elu dua ki‐go pano, naga aga atae tea waina aga mari a paki‐go. 6Go Israel natuna maga eu dum̃ada pualua nalo ni narekeiana adeada maga kiada pae tava Horeb pa pa pa.
7Go Moses e dape tap̃aup̃au po sike a etaku ni tokora ni nam̃enakiana, e madu uvea ki tokora ni nam̃enakiana; go e soso e ki Tap̃aup̃au ni nasaisaiana. Go e pakilina, naga tea mamau puti waina eu laaga Yehovah eu dave paki tap̃aup̃au ni nasaisaiana, waina e doko etaku ni tokora ni nam̃enakiana. 8Go e pakilina, ragi waina Moses e dave paki Tap̃aup̃au pano, naga narei mamau eu duleana, po lawodu, sara naatam̃oli eu lawodu pisari namata ni tap̃aup̃au adeada, po leousi Moses, pa pa e paki ekopu ni Tap̃aup̃au. 9Go e pakilina, ragi waina Moses e paki ekopu ni Tap̃aup̃au, naga napopouru lawodu e siwo, po lawodu pisari namata ni Tap̃aup̃au: go Yehovah e pasa sikoti Moses. 10Go narei mamau eu punusi napopouru lawodu e lawodu pisari namata ni Tap̃aup̃au: go narei mamau eu duleana po suai natano, sara naatam̃oli pisari namata ni tap̃aup̃au adeada. 11Go Yehovah e pasa paki Moses naraena paki naraena, dapala waina naatam̃oli sikai e pasa paki tana ri. Go e moro liliu paki tokora ni nam̃enakiana: ma tea suasua aneana Yoshua, natu ni Nun, natureai sikai, e da dave m̃elu dua ki Tap̃aup̃au mau.
12Go Moses e noa ki Yehovah, e naga, P̃a vunusi, nigo ku noa ki nau, ku naga, P̃a viragi narei waia sake pano: go nigo ku da mari au a atae naata waina p̃a wo dip̃aki lua e sikoti au mau. Go nigo ku naga, A atae ko pae nagisam̃a, go naga ku pap̃ai nasaup̃iaana namatagu. 13Go tea wanogoe, a pavara ni ko asa, a pe vap̃ai nasaup̃iaana namatam̃a, p̃a mari au aga atae napua anigo maga, go aga wo atae ko, naga aga vap̃ai nasaup̃iaana namatam̃a: go p̃a midoa ki nia naga nalauna waia e pei narei anigo. 14Go e naga, Naraegu ega wo pano sikoti ko, go aga wo dua ko namaromaroana. 15Go e noa ki nia, e naga, Naraem̃a e pe ta pano sikoti au mau, p̃a ta piragi gami pae tokora waia sake pano mau. 16Go ega wo pei tea ataeana dapale sava naga au pap̃ai nasaup̃iaana namatam̃a, kinami ma narei anigo? E da dapala waina ku do pano sikoti gami, go au pei tea wotaeluaana, kinami ma narei anigo, pa dua ki narei mamau puti waina eu doko narae ni maramana, kite?
17Go Yehovah e noa ki Moses, e naga, Aga wo moro mari naleo wanogoe, waina ku po pasa asa: nalakena ku pap̃ai nasaup̃iaana namatagu, go a atae ko pae nagisam̃a. 18Go e naga, P̃a visei ki nau nasamasamaana anigo, a pavara ni ko asa. 19Go e naga, Kinau aga wo mari nawiaana aginau mamau ega wo liu naraem̃a, go aga wo dogorogo ki nagisa ni Yehovah naraem̃a; go aga wo saup̃ia ki tea waina aga wo saup̃ia ki nia, go aga wo maritadodomi tea waina aga wo maritadodomi a. 20Go e naga, Ku mari sa punusi naraegu: nalakena naatam̃oli ega wo da punusi au po mauri mau. 21Go Yehovah e naga, P̃a leo, tokora sikai e doko pisari au, go p̃a wo lawodu vatu laketoko; 22Go ragi waina nasamasamaana aginau ega wo do liu, aga wo doropusi ko masap̃ala sikai ni vatu laketoko, go aga wo kovagoro ko ki nam̃elearugu, pa pa aga wo liu sua pano, go aga wo dape lua nam̃elearugu, go p̃a wo punusi nam̃adugu: 23Ma naraegu ega wo da pei tea vunusiana mau.
Currently Selected:
EKSODAS 33: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
