EKSODAS 25
25
1Go Yehovah e pasa paki Moses, po naga, 2P̃a vasa paki Israel natuna maga naga euga maginau dape navituaana sikai umai: kuga tape navituaana aginau ki sara naatam̃oli waina nap̃op̃oda e sai ki da asa. 3Go tea waia e pei navituaana waina kuga tape a kiada; kold, go silver, go brass; 4Go tea kesakesa, go tea miala‐kesakesa, go tea miala‐kalakala, go linen wia, go nam̃au ni naninani; 5Go nawili maga ni shiip anoai maga tea pupugiana miala, go nawili maga ni siil maga, go nakau akasia maga; 6Naroro agi namarama, go tea ni nap̃o wia maga agi naroro ni navuvuraiana, go agi natap̃arakiana ni nasei lolo maga; 7Vatu maga ni natap̃alakisi, go vatu maga ni navakavuroana agi efod, go agi tea taurum̃a. 8Go euga maginau mari tokora tapu sikai naga aga toko m̃aleoputo kakada. 9Ega tapala tea mamau puti waina kinau aga visei ki‐go ara, naleodawonakiana ni nasum̃atokoana, go naleodawonakiana ni sara naleo kakana mamau puti, go kuga mari a ega tapala nogoe.
10Go euga mari areka sikai ni nakau akasia: kubit dua go namagovai ega vei navarauana kakana, go kubit sikai go namagovai naweleweleana kakana, go kubit sikai go namagovai navakilagiana kakana. 11Go p̃a vulutigoro e ki kold tautau. P̃a vulutigoro nawokana go natakuna, go p̃a mari navivina sikai ni kold ega toko asa daliviri. 12Go p̃a maneana da ki rig ni kold ega vati, po doropusi ra euga toko natuana pati; go rig dua eroga toko navidina sikai, go rig dua eroga toko navidina kerua. 13Go p̃a mari tea vavau dua ni nakau akasia, po pulutigoro ra ki kold. 14Go p̃a sai ki tea vavau dua wanogoe paki rig maga waina eu doko navidi dua ni areka, naga euga vausi areka ara. 15Tea vavau dua wanogoe eroga toko rig maga ni areka: eroga ta pei tea sailuaana m̃elu dua ki nia mau. 16Go p̃a toropusi ega toko nawoka ni areka nanoasokisokiana waina aga wo dua ko asa. 17Go p̃a mari tea tap̃augoro sikai ni kold tautau: kubit dua go namagovai ega vei navarauana kakana, go kubit sikai go namagovai naweleweleana kakana. 18Go p̃a mari kerub ega rua ni kold; p̃a mari ra eroga vei nawosiana malo wono, eroga tu namatap̃ago dua ni tea tap̃augoro. 19Go p̃a mari kerub sikai ega tu namatap̃agona sikai, go kerub sikai ega tu namatap̃agona kerua: kuga mari kerub dua wanogoe eroga vei tea sikai maau ma tea tap̃augoro elagi ni namatap̃agona dua. 20Go kerub dua wanogoe eroga to darasike nalivaruda dua pakilagi, po do kovagoro tea tap̃augoro ki nalivaruda maga, go naraeda eroga tum̃ada paki naraeda, narae ni kerub dua wanogoe eroga to leo paki tea tap̃augoro. 21Go p̃a toropusi tea tap̃augoro ega toko elagi ni areka, go p̃a toropusi nanoasokisokiana waina aga wo dua ko asa ega toko nawoka ni areka. 22Go toroga wo saisai tokora wanogoe, go aga wo pasa pusum̃aki paki‐go, pae elagi ni tea tap̃augoro, pae namawota ni kerub dua waina ero du elagi ni areka ni nanoasokisokiana, noa naleo mamau puti waina aga wo dip̃aki mu ma Israel natuna maga ara.
23Go p̃a mari wede sikai ni nakau akasia: kubit dua ega vei navarauana kakana, go kubit sikai naweleweleana kakana, go kubit sikai go namagovai navakilagiana kakana. 24Go p̃a vulutigoro e ki kold tautau, po maneana mari navivina sikai ni kold daliviri. 25Go p̃a maneana mari kelu sikai ni naweleweleana ni nam̃elearu sikai daliviri, go p̃a magi kelu kakana mari navivina sikai ni kold daliviri. 26Go p̃a maneana mari rig ni kold ega vati, go p̃a toropusi rig maga wanogoe euga toko naweluki pati waina eu doko natuana pati. 27Rig maga wanogoe euga toko m̃aladigi ki kelu, euga vei nalia maga agi tea vavau dua naga euga vausi wede ara. 28Go p̃a mari tea vavau dua ni nakau akasia, go p̃a vulutigoro ra ki kold, go wede ega vei tea vausiana ara. 29Go p̃a mari dish kakana maga go spun kakana maga, go flakon kakana maga, go boul kakana maga, waina euga tataki ara: p̃a mari ra euga vei tea ni kold tautau. 30Go p̃a toropusi ega toko wede bred tokorae ega toko naraegu sara ragi.
31Go p̃a mari nakau ni nasulu sikai ni kold tautau: nawosiana malo wono nakau ni nasulu ega vei tea mariana asa, nalakena go nakauna; lasa kakana maga, kolopuna maga, go napum̃ana maga, euga vei tea sikai maau ma nae: 32Go ara latesa euga vae taleva dua kakana; ara dolu ni nakau ni nasulu euga vae taleva sikai kakana, go ara dolu ni nakau ni nasulu euga vae taleva kerua kakana: 33Lasa dolu tea mariana dakiusi napum̃a ni amond maga euga toko ara sikai, kolopu go napum̃a sikai; go lasa dolu tea mariana dakiusi napum̃a ni amond maga euga toko ara kerua, kolopu sikai go napum̃a sikai: ega tapala nogoe agi ara latesa waina eu pae nakau ni nasulu: 34Go lasa pati tea mariana dakiusi napum̃a ni amond maga euga toko nakau ni nasulu, kolopuna maga go napum̃ana maga: 35Go kolopu sikai ega toko etano ni ara dua ega vei tea sikai maau ma nae, go kolopu sikai ega toko etano ni ara dua ega vei tea sikai maau ma nae, go kolopu sikai ega toko etano ni ara dua ega vei tea sikai maau ma nae, agi ara latesa waina eu pae nakau ni nasulu. 36Kolopuda maga go arada maga euga vei tea sikai maau ma nae: tea mamau kakana ega vei nawosiana malo wono sikai ni kold tautau. 37Go p̃a mari nasulu kakana maga euga larua; go euga sawa ki tokoni nasulu kakana maga naga euga maramalaga paki kivea ni naraena. 38Go odaki kakana maga, go siloa ni meru kakana maga, euga vei tea ni kold tautau. 39Talenta sikai ni kold tautau ega vei tea mariana asa, nae go naloriki mamau puti wanogoe. 40Go p̃a vunusi naga p̃a mari ra euga vae naleodawonakiana kakada waina e pei tea viseikiana paki‐go tava.
Currently Selected:
EKSODAS 25: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
