EKSODAS 12
12
1Go Yehovah e pasa paki Moses go Aaron navanua ni Ityipt, po naga, 2Atelagi waia ega vei atelagi vea animu: ega vei atelagi vea ni natau animu. 3Koroga vasa paki navata mamau ni Israel, po naga, Naaleatia kerualima ni atelagi waia sara naatam̃oli euga tape shiip natuna ega sikasikai sarasara ra, ega vae nasum̃a ki tamada maga, shiip natuna ega sikai agi nasum̃a sikai: 4Go nasum̃a e pe kiki ki shiip natuna sikai, nae go tea waina e doko m̃aladigi ki nasum̃a aneana eroga rua dape sikai ega vae naveveana ni naatam̃oli maga; kuga midoaki p̃otae shiip natuna wanogoe ega vae nakaniana ki sara naatam̃oli. 5Shiip natuna animu ega mamaau p̃ia, ega vei tea anoai ni natau sikai: kuga tape a ega vei shiip sikai kakada, kite naninani sikai kakada: 6Go ega vei tea vavaigoroana animu pa pa paki naaleatia kerualima sikai tamate pati ni atelagi wanogoe: go nasaisaiana mamau ni navata ni Israel euga mari punue a ragi melu. 7Go euga tape nadana seara, po mari a ega toko nakau tu dua ni namata go nakau valadagoto kakana ni nasum̃a maga waina euga wo gani a ekopu kakada. 8Go euga kani nap̃okasina nap̃ogiana wanogoe, ega vei tea veniana ki nakapu, go bred waina leven e dika asa; go euga kani a ega vilake naulu ni nakau kokona maga. 9Kuga ta gani tea mata mau, go ega ta pei tea veniana ki noai mau, ma ega vei tea veniana ki nakapu; nap̃auna go natuana maga go tea ni nap̃alauna maga. 10Go kuga ta doropusi seara kakana ega ta doko pa pa paki malip̃ogi mau; ma tea kakana waina e doko pa pa paki malip̃ogi kuga tap̃ara ki nia ki nakapu. 11Go kuga kani a ega tapala waia; namalomu ega vei tea tasokiana, nam̃elevasiana animu eroga toko nam̃elemu, go tiko animu ega toko nam̃elearumu: go kuga kani a m̃araverave: e pei navakalauana ki Yehovah. 12Nalakena aga wo pa duaduru navanua ni Ityipt nap̃ogiana wanogoe, go aga wo atugi tea takalapa mamau puti ni navanua ni Ityipt, tea ni naatam̃oli go tea ni nalo tuavati maga; go aga wo mari navasap̃otaeana maga dip̃a sup̃e ni Ityipt mamau puti: kinau a pei Yehovah. 13Go nada wanogoe ega wo manimu pei navaivaiana sikai doko nasum̃a maga waina nimu ku doko ara: go aga wo punusis nada, po pakalau mu, go te naatugiana sikai ega wo da doko mu mau naga ega mari sa ki mu, ragi waina aga wo atugi navanua ni Ityipt. 14Go naaleatia waia ega manimu pei namidoaki‐lagati‐ana sikai, go kuga mari nasaisaiana asa nasaisaiana ki Yehovah: kuga mari nasaisaiana asa usuraki tagona animu maga, ega vei natawonakiana sikai waina ega wo du du po du mau du. 15Naaleatia larua kuga kani bred waina leven e dika asa; naaleatia vea kuga mari leven ega vuoli ki nasum̃a animu maga; nalakena naata waina ega wo gani bred waina leven e doko asa pae naaleatia vea pa pa paki naaleatia kelarua, naatam̃oli wanogoe ega vei tea taeluaana m̃elu dua ki Israel. 16Go naaleatia vea kuga veani nasososaisai‐kiana tapu sikai, go naaleatia kelarua nasoso‐saisai‐kiana tapu sikai; te nawosiana seara euga ta pei tea mariana ara mau, ma tea waina sara naatam̃oli euga kani a, tea wanogoe sikai maau kuga mari a. 17Go kuga vavaigoro nasaisaiana ni bred waina leven e dika asa; nalakena naaleatia sikai maau waia a po piragi taua animu maga m̃elu dua ki navanua ni Ityipt umai: go kuga vavaigoro naaleatia waia usuraki tagona animu maga ega vei natawonakiana sikai waina ega wo du du po du mau du. 18Atelagi vea, naaleatia kerualima sikai tamate pati ni atelagi ragi melu kakana, kuga kani bred waina leven e dika asa, pa pa paki naaleatia kerualima dua tamate sikai ni atelagi ragi melu kakana. 19Naaleatia larua leven seara ega ta pei tea vap̃aiana nasum̃a animu maga mau: nalakena naata waina ega wo gani tea waina e pei leven, naatam̃oli wanogoe ega vei tea taeluaana m̃elu dua ki nasaisaiana ki Israel, tea waina e pei nam̃enaki‐atatoko, go tea waina e pei naatatoko ni navanua. 20Kuga ta gani te navatuna waina e pei leven mau; natokoana animu mamau puti kuga kani bred waina leven e dika asa.
21Go Moses e pioso raki tea matua mamau puti ni Israel, po noa ki da, e naga, Kuga vuati lua, po manimu dape shiip natuda maga ega vae naworamu maga, go kuga mari punue navakalauana. 22Go kuga tape napu ni hussop sikai, po pupugi a nada waina e doko besin, po p̃okati nakau valadagoto ni namata go nakautu dua kakana ki nada waina e doko besin; go nimu te naata kakamu ega ta dave pae namata ni nasum̃a aneana pa pa paki malip̃ogi mau. 23Nalakena Yehovah ega wo pa duaduru naga ega atugi naka ni Ityipt; go ega wo punusi nada nakau valadagoto ni namata, go nakautu dua kakana, go Yehovah ega wo pakalau namata, go ega wo da suasua ki tea marisaki mau naga ega umai paki ekopu ni nasum̃a animu maga naga ega atugi mu. 24Go kuga vavaigoro naleo waia ega manimu ma natum̃a maga pei natawonakiana sikai pa pa ega tu du po du mau du. 25Go ega wo pakilina, ragi waina kuga wo umai paki navanua waina Yehovah ega wo dua mu asa, dakiusi waina e noa e, naga kuga wo pavaigoro nawosiana waia. 26Go ega wo pakilina, ragi waina natumu maga euga wo noa ki mu, po naga, Nawosiana waia e manimu pei nasava? 27Naga kuga wo noa naga, E pei naviriana ni navakalauana ki Yehovah, waina e pakalau nasum̃a maga ki Israel natuna maga Ityipt, ragi waina e atugi naka ni Ityipt, po pualua nasum̃a anigida maga. Go narei eu kolo po lotu. 28Go Israel natuna maga eu pano po mari a; dakiusi waina Yehovah e dip̃aki Moses go Aaron asa, eu mari dapala nogoe.
29Go e pakilina p̃ogi matua, naga Yehovah e atugi tea takalapa mamau puti ni navanua ni Ityipt, e pae tea takalapa ni Faraoh waina e doko malo tasake aneana pa pa paki tea takalapa ni tea viragi‐luapavakotoana waina e doko nasum̃a ni m̃oru; go tea takalapa mamau puti ni katel maga. 30Go Faraoh e duleana p̃ogi, nara ma tea suasua aneana mamau puti, go naka ni Ityipt mamau puti; go nakua‐pioso‐ana warua e doko Ityipt; nalakena nasum̃a sikai e da doko mau waina tea mate sikai e da doko asa mau. 31Go e pioso raki Moses go Aaron p̃ogi, po naga, Koroga tuleana, koroga tave m̃elu dua ki m̃aleoputo ni narei aginau, nimu ma Israel natuna maga; go kuga vano, kuga magi Yehovah suasua, ega takiusi waina koro po noa e. 32Kuga viragi navata ni shiip go ni naninani animu maga go navata ni kau animu maga, ega takiusi waina koro po noa e, go kuga vano; go kuga vasa m̃ata kinau ma. 33Go naka ni Ityipt eu suatoro ki narei, naga euga tip̃aki lua ra m̃elu dua ki navanua m̃araverave; nalakena eu naga, Tu mate puti. 34Go narei eu dape flaur memeu adeada, ragi waina e ko da pei leven mau, siloa adeada maga eu pei tea kalutiana ki sugoro adeada maga eu doko napauda. 35Go Israel natuna maga eu mari pataka ni navasaana ki Moses; go eu datagovi naka ni Ityipt ki naloriki wia maga ni silver, go ki naloriki wia maga ni kold, go ki tea suniana maga: 36Go Yehovah e dua narei nasaup̃iaana namata maga ni naka ni Ityipt, go eu suasua paki da ki naleo maga waina eu datago ara. Go eu puti lua ki naka ni Ityipt.
37Go Israel natuna maga eu surata pae Rameses paki Sukkoth, eu elagoro pei manu p̃onotia latesa waina eu surata ki natuada, waina eu pei naanoai, go piakirikiri maga eu sokari ra. 38Go taua sikai ni naatam̃oli sarisari eu mamau sake sikoti ra pano; go navata ni shiip go ni naninani maga, go navata ni kau maga, katel laapa p̃arua sa. 39Go eu daoni flaur memeu waina eu dape e pae Ityipt, e pei bred waina leven e dika asa, nalakena eu da mari a e pei leven mau; nalakena eu pei tea kopasi‐lua‐ana m̃elu dua ki Ityipt pano, po mari sa mari daliali, go eu da dum̃ada madeada mari m̃ata ki navinaga seara mau. 40Go nam̃enaki‐atatokoana ki Israel natuna maga, waina eu m̃enaki atatoko Ityipt, e pei natau p̃onotia pati rualima takuna dolu. 41Go e pakilina ragi waina natau p̃onotia pati rualima takuna dolu eu nopu, e pakilina naaleatia sikai maau wanogoe, naga taua mamau puti ki Yehovah eu m̃elu dua ki navanua ni Ityipt pano. 42E pei nap̃ogiana ni navavaigoroana ki Yehovah nalakena e piragi lua ra m̃elu dua ki navanua ni Ityipt umai: nap̃ogiana wanogoe e pei nap̃ogiana ni navavaigoroana ki Yehovah agi Israel natuna mamau puti usuraki tagona adeada maga. 43Go Yehovah e noa ki Moses go Aaron, e naga, Tea waia e pei natawonakiana ni navakalauana: tea ni nalauna p̃ota sikai ega ta gani a mau: 44Ma tea suasua ki sara naatam̃oli waina e pei tea vakotoviana ki m̃ane, go waina ku po dovadavivi asa, nae ega kani a. 45Nam̃enaki‐atatoko go tea suasua raki namoriana eroga ta gani a mau. 46Ega vei tea kaniana nasum̃a sikai maau; p̃a ta dape nap̃okasina seara pae ekopu paki katama mau; go kuga ta marip̃ori te navatuna sikai mau. 47Navata mamau ni Israel euga mari a. 48Go ragi waina nam̃enaki sikai ega wo m̃enaki atatoko sikoti ko, po mari navakalauana paki Yehovah, naanoai aneana maga euga vei tea tovadaviviana puti ega vea, go ega edaku umai paki m̃aladigi po mari a; go ega wo dakiusi naatatoko sikai ni navanua: ma te naata sikai waina e da pei tea tovadaviviana mau ega ta gani a mau. 49Nawotaeana sikai maau ega vei agi naatatoko, go agi nam̃enaki waina e m̃enaki atatoko m̃aleoputo kakamu. 50Go Israel natuna mamau puti eu mari dapala nogoe; dakiusi waina Yehovah e dip̃aki Moses go Aaron asa, eu mari a. 51Go e pakilina naaleatia sikai maau wanogoe, naga Yehovah e piragi lua Israel natuna maga m̃elu dua ki navanua ni Ityipt umai pae taua adeada maga.
Currently Selected:
EKSODAS 12: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
