DEUTERONOMY 3
3
1Go ragi wanogoe tu maradoa po sake pae napua paki Bashan pano: go Ok, nawota ni Bashan, e dave umai dip̃a gida, nara ma narei aneana mamau, po mari navakalo Edrei. 2Go Yehovah e noa ki nau, e naga, P̃a ta matau ki nia mau: nalakena a pitua ki nia go narei aneana mamau, go navanua aneana, paki nam̃elearum̃a; go p̃a mari paki nia dapala waina ku mari a paki Sihon, nawota ni naworawora ni Amor, waina eu doko Heshbon doko. 3Go Yehovah Sup̃e anigida e moro pitua ki Ok nawota ni Bashan, go narei aneana mamau paki nam̃elearugida: go tu atugi a pa pa te sikai maau sa e da maneana doko mau. 4Go ragi wanogoe tu puati puti natokoana aneana maga; te natokoana sikai e da doko mau, waina tu da puati a kiada; tu puati natokoana rualima latesa, tokora mamau ni Arkob namarakiana ki Ok doko Bashan. 5Natokoana maga mamau puti waia eu pei tea p̃aakagoroana eu pei p̃aaka vakilagi maga, go namata‐pua maga, go tea walagoto maga; go sokari ra natokoana maga waina eu da pei p̃aaka maga eu laapa sa. 6Go tu mari puoli ki da dapala waina tu mari a paki Sihon, nawota ni Heshbon, doko po mari puoli ki puti natokoana maga, pilake nagoroi maga, go pilake piakirikiri kiki maga. 7Ma katel mamau puti, go naleo vutiluapavakotoana ni natokoana maga, tu dum̃agida manigida dape pavakoto ara. 8Go doko ragi wanogoe tu puati navanua m̃elu dua ki nam̃elearu ni nawota dua ki naworawora ni Amor waina eu doko taleva kerua ni Yordan, pae nap̃aloa ni Arnon pa pa paki tava Hermon; 9(Hermon wanogoe naworawora ni Sidon eu soso e ki Sirion, go naworawora ni Amor eu soso e ki Senir;) 10Tu puati natokoana maga mamau puti ni malo matemate, go Cilead mamau, go Bashan mamau, pa pa paki Salekah go Edrei, natokoana maga ni namarakiana ki Ok doko Bashan. 11(Nalakena Ok nawota ni Bashan, e sikina pei tea toropusiana ni namagovai ni Refaim; kuga leo, nawewele aneana e pei nawewele ni airon; e da doko Rabbah ki Ammon natuna maga kite:? Navarauana kakana e pei kubit loveti, go naweleweleana kakana e pei kubit pati, dapala kubit ki naatam̃oli.) 12Go navanua waia tu dape a po peani a ragi wanogoe: pae Aroer waina e pisari nap̃aloa ni Arnon, go namagovai ni navanua ni tava ni Cilead, go natokoana kakana maga, a dua naworawora ni Reuben, go naworawora ni Cad asa: 13Go namagovai kerua ni Cilead go Bashan mamau, namarakiana ki Ok, a dua naworawora ni Manasseh namagovai kakada asa; io navanua mamau ni Arkob, go Bashan mamau. (Tea waina e pei tea sosoana ki navanua ni Refaim. 14Yair natu ni Manasseh e dape po peani navanua mamau ni Arkob, pa pa paki kokoi ki naworawora ni Ceshur, go ki naworawora ni Maakah; go e salagisa da nara ma Bashan ki aneana nagisana, Hafoth‐yair, pa pa paki masoso.) 15Go Cilead a dua Makir asa. 16Go pae Cilead pa pa paki nap̃aloa ni Arnon, go m̃aleoputo ni nap̃aloa, e pei kokoi kakana, a dua naworawora ni Reuben go naworawora ni Cad asa; go pa pa paki noaisara Yabbok waina e pei kokoi ki Ammon natuna maga; 17Go Arabah ma, go Yordan e pei kokoi kakana, pae Kinnereth pa pa paki natasi ni Arabah, natasi ni Natasimena, nalake ni tava ni Piskah paki taleva ni elo sake.
18Go ragi wanogoe a dip̃aki mu, po naga, Yehovah Sup̃e animu e dua mu navanua waia naga kuga veani a: nimu naatam̃oli maga mamau puti ni namarimatuaana, kuga tuagoto pua nalikau maga pea ki taimu Israel natuna maga. 19Ma nagoroi animu maga, go piakirikiri animu maga, go katel animu, (a atae naga ku peani katel laapa) euga wo doko natokoana maga waina a dua mu ara; 20Pa pa Yehovah ega tua taimu maga go nimu namaromaroana, go nara ma euga wo peani navanua waina Yehovah Sup̃e animu e dua ra asa taleva kerua ni Yordan: go ragi wanogoe kuga liliu, sara naata sikasikai paki naveaniana aneana, waina a dua mu asa. 21Go ragi wanogoe a dip̃aki Yoshua, po naga, Namatam̃a ero punusi tea mamau puti waina Yehovah Sup̃e anigo e mari a paki nawota dua waia: go dapala nogoe Yehovah ega wo mari a paki namarakiana maga mamau puti waina p̃a wo duagoto ara. 22Kuga ta matau ki da mau: nalakena e pei Yehovah Sup̃e animu waina e do manimu marimari.
23Go ragi wanogoe a pavara ni Yehovah, 24po naga, Yehovah Sup̃e O, ku po atulake po pisei ki tea suasua anigo nawaruaana anigo go nam̃elearu kasua anigo: go seve sup̃e waina e doko nakoroatelagi kite e doko maramana, waina e mariatae mari pataka ni nawosiana anigo maga, go pataka ni natomariana kasua anigo maga? 25P̃a suasua a pavara ni ko asa naga aga tuagoto pano po punusi navanua wia waina e doko taleva kerua ni Yordan, tava wia waina go Lebanon. 26Ma Yehovah e maeto ki nau nalakena nimu, go e da daki dorogo paki nau mau: go Yehovah e noa ki nau, e naga, Te nopu; p̃a ta moro pasa paki nau nalo kakana mau. 27P̃a sake paki nam̃asua ni Piskah pano, po sike namatam̃a paki taleva ni elo musu, go paki north, go paki sauth, go paki taleva ni elo sake, go namatam̃a eroga leo punusi a: nalakena p̃a wo da duagoto Yordan waia mau. 28Ma p̃a vasa parati ki Yoshua po silae a, po mari a ega kasua: nalakena nae ega wo duagoto pano pea ki narei waia, go ega wo mari ra euga wo peanipioli ki navanua waina p̃a wo punusi a. 29Go dapala nogoe tu doko nap̃aloa pisari Beth‐peor doko.
Currently Selected:
DEUTERONOMY 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
