APOSTOLO MAGA 26

1Go Acrippa e noa ki Paulo, e naga, Ku pei tea suasuakiana naga p̃a tum̃am̃a manigo pasa. Ragi wanogoe Paulo e sai ki nam̃elearuna, po dum̃ana pasa korokoro e, e naga.

2A midoa ki nia naga a maro pa, nawota Acrippa, nalakena aga tum̃agu pasa korokoro au naraem̃a masoso nalo ni tea maga mamau puti waina a pei tea vasadip̃aana ara pae tea ni Yudea maga: 3p̃arua liu ki nia nalakena nigo ku atae m̃ata ki natomariana maga go navusuusuana maga waina eu doko m̃aleoputo ni naka ni Yudea: nalakena tea wanogoe a pavarani ko naga p̃a rogo au ki naveimaritasokiana. 4Namariana ni namauriana aginau pae ragi ni naveipiakikiana aginau pa pa pa, waina a mari a nalauna aginau go Yerusalem, pae naatulakeana pa pa pa, 5naka ni Yudea eu mamau puti atae a; waina eu pea atae au pae ragi vea mau, eu pe suasua naga euga noa sokisoki, naga a mauri pae tagona ni nalotuana anigida waina e leana parati ki liu po pei Farisi sikai. 6Go ragi waia a lawodu naga aga vei tea vasap̃otaeana nalakena naleogoroana ni nasaiana waina e pei tea saiana pae Sup̃e paki tamagida maga; 7nasaiana wanogoe naworawora rualima sikai tamate dua anigida, waina eu do magi Sup̃e suasua kasua p̃ogi go aleati, eu do leogoro asa naga euga va parati ki nia. Go nalo ni naleogoroana wanogoe a pei tea vasadip̃aana asa pae naka ni Yudea, nawota O! 8Ekasana ku midoaki nia naga e mari sa pei tea saralomauana, naga Sup̃e e sike tea mate? 9Kinau a dum̃agu midoa ki nia lomau naga e one au one naga aga mari tea laapa waina e dip̃a nagisa ni Yesu ni Nasareth. 10Go a mari tea wanogoe Yerusalem: go tea tautau maga tea laapa kakada kinau a kokoro ra ekopu ni nasum̃a ni navavaiana maga, a pea dape naveinawotaana kakana ki tea viri warua maga, go ragi waina eu pei tea maripunueana, a pitua ki gole dip̃a ra. 11Go a paka laapa parati ra ekopu ni nasum̃a ni nasaisaiana maga mamau puti, po do mari dogo naga aga mari ra euga vasa sa ki; go a maritausu ki p̃arua ki da, po kopalele ara pa pa paki natokoana ni navanua p̃ota maga. 12Ragi waina a do mari tea maga wanogoe, po surata paki Damaseko pano po pilake naveinawotaana go nasuakiana ki tea viri warua maga, 13aleati matua, nawota O, a pae napua po punusi namarama sikai waina e pae nakoroatelagi umai, e p̃arua liu nalagaana ni elo, e maramalaga dalivirigoro gami ma tea maga waina eu surata sikoti au. 14Go ragi waina au mamau puti dowo paki natano, a dogo nadaleo sikai waina e noa ki nau pae navasaana ni Heberu, e naga, Saul, Saul, ekasana ku kopalele au? E kasua ki‐go naga p̃a kup̃e dip̃a tea vivitip̃a maga. 15Go kinau a naga, Ku pei sei, Nawota? Go Nawota e naga, Kinau a pei Yesu waina nigo ku kopalele asa. 16Ma p̃a tuleana, po lawodu ki nam̃elem̃a maga: nalakena a po pakilina ki‐go nalakena tea waia, naga aga tawona ki‐go p̃a vei tea suasua go tea noasokisoki ni tea maga waina ku po punusi au ara, go ni tea maga waina aga wo pakilina ki‐go ara; 17aga wo do pua lua ko ki narei, go ki tea ni nalauna p̃ota maga, waina kinau a dip̃aki lua ko pa punusi ra, 18naga p̃a wolagati namatada, naga euga maradoa m̃elu dua ki namaligo paki namarama, go ki nakasuaana ki Satan umai paki Sup̃e, naga euga tape namidoakikorokoroana ni namarinaleosaana maga, go naveaniana sikai m̃aleoputo ni tea maga waina eu pei tea maridautaukiana ki nasaralomau‐au‐ana. 19Nalakena tea wanogoe, nawota Acrippa O, a da dogopiri navunusiana ni nakoroatelagi mau: 20ma a pea dogorogo paki tea ni Damaseko eu pea, go Yerusalem, go navanua ni Yudea mamau, go paki tea ni nalauna p̃ota maga, naga euga midoakidoa po maradoa umai paki Sup̃e, doko do mari nawosiana maga waina eu p̃ia ki namidoakidoaana. 21Nalakena tea maga wanogoe tea ni Yudea eu pua soki au roara ni nasum̃a tapu, po mari dogo naga euga mari punue au. 22Nalakena tea wanogoe go nalakena a dape nasilaeana waina e pae Sup̃e umai, a lawodu pa pa paki naaleatia waia a do noa sokisoki paki tea kiki go tea warua, po do noa tea sikai maau maga waina profeta maga go Moses eu noa naga euga wo umai; 23naga e one Kristo one naga ega sua navitinumateana, po pei tea vea ni namoroduleanaana ni tea mate maga po dogorogo ki namarama paki narei go paki tea ni nalauna p̃ota maga.

24Go ragi waina e do dum̃ana pasakorokoro e tea maga wanogoe, Festo e noa ki nadaleo kasua sikai, e naga, Ku daratara, Paulo; namidiriana laapa e pua doa ko paki nadarataraana. 25Ma Paulo e naga, A da daratara mau, Festo wia liu; ma e pasa lagi navasaana ni nalomauana go ni namidodoap̃iaana. 26Nalakena nawota, waina a pasa piviari paki nia, e atae nalo ni tea maga wanogoe: nalakena a saralomau kasua naga tea maga wanogoe sikai kakada e da doko loku ki nia mau; nalakena tea wanogoe e da pei tea mariana naweluki mau. 27Nawota Acrippa, ku saralomau profeta maga kite? 28A atae naga ku saralomau. Go Acrippa e noa ki Paulo, e naga, Ku masauna naga p̃a mari au aga vei Kristiano ki navasadie‐kiki‐kiana. 29Go Paulo e naga, A masau paki Sup̃e, naga e pe vei ki tea kiki kite e pe vei ki tea warua, nigo p̃a ta sikim̃a asa mau, ma naga tea maga mamau puti waina eu dogo au masoso, kuga mamau pei tea mariana kuga tapala waina kinau a doko, masale ki natali solisoli maga waia.

30Go nawota e duleana, nara ma tea maramara, go Bernike, go tea maga waina eu dasake sikoti ra, eu mamau duleana: 31go ragi waina eu paki malo daki eu dum̃ada pasa paki da, po naga, Naatam̃oli waia e da mari te navatuna waina e p̃ia ki namateana kite ki natali solisoli mau. 32Go Acrippa e noa ki Festo, e naga, Naatam̃oli waia e pe ta pavarani Kaisar mau, e pe mari atae pei tea veresiana.

Currently Selected:

APOSTOLO MAGA 26: NTB

Highlight

Copy