APOSTOLO MAGA 24

1Go edaku ki naaleatia lima tea viri warua liu Anania e siwo nara ma tea matua seara, go tea vasap̃ia sikai, nagisana Tertullo; go eu dapusukao ki Paulo paki tea maramara. 2Go ragi waina e pei tea sosoana umai, Tertullo e pae asa pasa dip̃a e, po naga.

3Nalakena au do sua natam̃ateana warua pae ako, go tea sa maga eu do magi nalauna waia pei tea marileanakiana pae naveamidoakiana anigo, au dape a sara ragi go sara tokora, Felix wia liu, pilake sara nadodom̃atakiana. 4Ma naga aga ta dugoro ko ragi varau mau, a pavarani ko naga p̃a rogo gami ega vuru pae namarimatemateana anigo. 5Nalakena au pap̃ai naatam̃oli waia e pei nasasanaana sa, go tea sike natuleanaana maga m̃aleoputo ni tea ni Yudea mamau puti usuraki maramana mamau, go tea maraki sikai ni tagona ni tea ni Nasareth maga: 6go waina e maridogo naga ega mari nasum̃a tapu ega vei tea m̃oli: go waina au pua soki a, po masauna naga auga vasa p̃otae a pae nawotaeana aginami. 7Ma Lisia Kiliareko e umai, po piragi lua e m̃elu dua ki nam̃elearugami maga ki namarikasuaana warua, po dip̃a ki tea vasa dip̃a e maga naga euga umai punusi ko: 8waina ragi waina p̃a wo dum̃am̃a puausi a, p̃a wo mariatae atae m̃ataki nalo ni tea maga mamau puti waina kinami au pasa dip̃a e ara. 9Go tea ni Yudea ma eu mamau pasa dip̃a e, po noa sokisoki naga tea maga wanogoe eu dapala nogoe.

10Go ragi waina tea maramara e ligivasu ki nia naga ega vasa, Paulo e pasa dara, e naga.

Nalakena a atae naga nigo ku magi nalauna waia pei tea vasap̃otae natau laapa, a marasike dum̃agu maginau pasa korokoro: 11nalakena ku mari atae, naga naaleatia waina a sake asa pano naga aga lotu Yerusalem, e ko da liu nam̃ogi rualima sikai tamate dua mau: 12go eu da pap̃ai au a pululu ki te naata nasum̃a tapu kite a mari taua ni naatam̃oli maga eu duleana mau, go eu da pap̃ai au a mari a ekopu ni nasum̃a ni nasaisaiana maga mau, go te tokora ni natokoana mau. 13Go eu mari sa noa sokisoki paki‐go naleo maga waina eu pasa dip̃a au ara ragi waia. 14Ma a noa sai tea waia paki‐go, naga pae Napua waina eu soso e ki tagona p̃ota, a dapala nogoe magi Sup̃e ki tamagami maga suasua, po saralomau tea maga mamau puti waina eu pae nawotaeana, go waina eu pei tea midiriana profeta maga: 15go a peani naleogoroana paki Sup̃e, waina nara maga waia ma eu do leogoro e, naga namoroduleanaana ni tea leana maga go ni tea tagele maga ega wo doko. 16Go a do mari dogo tea waia naga waina aga veani natum̃aguataeana ega tautau narae ni Sup̃e go naatam̃oli maga sara ragi. 17Go ragi waina natau laapa eu nopu a umai naga aga mari navituam̃olikiana maga paki nalauna aginau, go naviriana maga: 18go ragi waina a do mari tea maga wanogoe eu pap̃ai au a pei tea maridautaukiana ekopu ni nasum̃a tapu, taua ni naatam̃oli maga e dika, go navasap̃araiana e dika: ma tea ni Yudea seara waina eu pae Asia umai eu doko 19waina eu pe veani te navatuna dip̃a au, e one ara one naga euga toko nea naraem̃a, po pasa dip̃a au. 20Kite nara maga waia euga tum̃ada noa seve namarisakiana eu pap̃ai a, ragi waina a lawodu narae ni nasaisaiana ni navasap̃otaeana, 21e pe ta pei nalo ni nadaleo sikai maau waia, waina a pioso asa ragi waina a lawodu m̃aleoputo kakada, po naga, Nalo ni namoroduleanaana ni tea mate maga kinau a pei tea vasap̃otaeana asa naraemu masoso.

22Ma Felix, waina e atae paratiki naleo maga nalo ni Napua, e pasa paarua ki da, po naga, Ragi waina Lisia kiliareko ega siwo umai, aga wo puausi paratiki atae naleo animu maga. 23Go e dip̃aki senturio naga ega vei tea vavaigoroana, go naga ega vei tea veresiana; go naga ega ta dip̃agoro tea aneana seara kakada naga euga ta maneana suasua mau.

24Ma edaku ki naaleatia seara, Felix e umai nara ma nagoroi aneana Drusilla, waina e pei nagoroi ni Yudea, go e dip̃aki lua paraki Paulo umai punusi a, po dogo e nalo ni nasaralomauana paki Kristo Yesu, 25Go ragi waina nae e do pasa piseiki nalo ni namarinaleoleanaana, go natum̃anasokiana, go navasap̃otaeana waina ega wo umai, Felix e mataku, po pasa dara, e naga, P̃a vano ragi waia; go ragi waina aga veani ragi wia, aga wo soso ko umai. 26Go e leogoro naga m̃ane ega vei tea vituakiana paki nia pae Paulo: nalakena tea wanogoe e dip̃aki lua paraki nia paka laapa umai, po pusum̃aki paki nia. 27Ma ragi waina natau dua ero nopu, Porkio Festo e umai du oli Felix; go nalakena e masauna naga ega talua nasaup̃iaana ki naka ni Yudea, Felix e doropusi Paulo e pei tea soliana doko.

Currently Selected:

APOSTOLO MAGA 24: NTB

Highlight

Copy