1 KI YOANE 3
3
1Kuga leo nadodomiana waina Tamana e po dua gida asa e dapale sava, naga tuga vei tea sosoana ki Sup̃e natuna maga: go tu pei tea wanogoe. Nalakena tea wanogoe maramana e da atae gida mau, nalakena e da atae a mau. 2Tea dodomiana maga, ragi waia tu pei Sup̃e natuna maga, go tuga wo pei nasava? E ko da doko lina mau. Tu atae naga e pe vakilina, tuga wo dakiusi a; nalakena tuga wo punusi a dapala waina e doko. 3Go sara naata waina eu peani naleogoroana wanogoe paki nia eu dum̃ada mari ra eu dautau, dakiusi waina nae e dautau. 4Sara naata waina e mari namarinaleosaana e moro mari natapiriana ni nawotaeana: go namarinaleosaana e pei natapiriana ni nawotaeana. 5Go ku atae naga nae e pakilina naga ega tape lua namarinaleosaana maga; go namarinaleosaana e da doko asa mau. 6Sara naata waina e doko asa doko e da mari naleo sa mau: sara naata waina e mari naleo sa e ko da punusi a mau, go e da atae a mau. 7Piakirikiri, te naata ega ta piragi sasap̃o ki mu mau: tea waina e mari namarinaleoleanaana e leana, dakiusi waina nae e leana: 8tea waina e mari namarinaleosaana e pei tea ni diabolo; nalakena diabolo e mari naleo sa pae ragi ni naatulakeana pa pa pa. Sup̃e Natuna e pakilina raki tea waia, naga ega rakai nawosiana maga ki diabolo. 9Sara naata waina e pei tea vesiana m̃elu Sup̃e e da mari namarinaleosaana mau, nalakena tea lawoana aneana e doko asa doko: go e mari sa mari naleo sa, nalakena e pei tea vesiana m̃elu Sup̃e. 10Tea waia Sup̃e natuna maga eu doko lina pae asa, go diabolo natuna maga: sara naata waina e da mari namarinaleoleanaana mau e da pei tea ni Sup̃e mau, go tea waina e da dodomi taina mau. 11Nalakena tea waia e pei navitaua waina ku dogo e pae ragi ni naatulakeana pa pa pa, naga tuga tum̃agida dodomi gida. 12Ega ta dakiusi waina Kain e pei tea ni tea sigisigileo, po mari punue taina. Go e mari punue a nalakena navasa? Nalakena nawosiana aneana maga eu sa, go nawosiana ki taina eu leana.
13Tai maga, maramana e pe vilosi mu, kuga ta maga asa mau. 14Nigida tu atae naga tu po m̃elu dua ki namateana pano po paki namauriana, nalakena tu dodomi taigida maga. Tea waina e da dodomi mau e doko namateana doko. 15Sara naata waina e pilosi taina e pei tea mari punue naatam̃oli: go ku atae naga tea mari punue naatam̃oli e da peani namauriana waina e du mau du doko asa doko mau. 16Tea waia tu atae nadodomiana pae asa, nalakena nae e manigida doropusi namauriana aneana: go e one gida one naga tuga magi taigida maga doropusi namauriana anigida. 17Ma naata waina e pe veani naloriki maga ni maramana, po leo punusi taina e pei tea tika, po p̃ogoro namaritana kiana, nadodomi‐Sup̃e‐ana e doko asa dapala sava? 18Piakirikiri, tuga ta dodomi ki navasaana kite ki namena mau; ma tuga dodomi ki namariana go nalomauana. 19Tea wanogoe tuga wo atae pae asa naga tu pei tea ni nalomauana, go tuga wo mari nap̃op̃ogida ega midoakilomau asa naraena. 20Nalakena nap̃op̃ogida e pe tip̃akotovi gida, e dapala nogoe nalakena Sup̃e e p̃arua liu nap̃op̃ogida, po atae naleo maga mamau puti. 21Tea dodomiana maga, nap̃op̃ogida e pe ta dip̃akotovi gida mau, tu peani naviviariana paki Sup̃e, 22go tea waina tu datago asa, tu dape a kiana, nalakena tu dogo paratiki natip̃akiana aneana maga, po mari tea maga waina eu pei tea midoakim̃atakiana namatana. 23Go tea waia e pei natip̃akiana aneana, naga tuga saralomau nagisa ni Natuna, Yesu Kristo, po dum̃agida dodomi gida, ega tapala waina e dua gida natip̃akiana. 24Go tea waina e dogo paratiki natip̃akiana aneana maga e doko asa doko, go nae e doko naata wanogoe doko. Go tea waia tu atae pae asa naga e doko gida doko, pae Naatana waina e dua gida asa.
Currently Selected:
1 KI YOANE 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
