मत्ती रचित सुसमाचार 4
4
ईसू क परिच्छा
(मरकुस 1:12-13; लूका 4:1-13)
1फिन आतिमा ईसू क उसरे मँ लइ गइ, काहेकि सइतान क जारिये ओका परखा जाइ सकइ। 2चालीस दिन अउर चालीस रात भुखिया क पाछे जब ओका भूख तड़पावइ लाग। 3तउ ओका ललचावइ वाला ओकरे लगे आवा अउर कहेस, “जदि तू परमेस्सर क पूत बाट्या तउ इ सबइ पथरन स कहा कि इ सब रोटी बन जाईं।”
4ईसू जवाब दिहस, “पवित्तर सास्तरन मँ लिखा वाटइ:
‘मनई सिरिफ रोटी स नाहीं जिअत मुला
उ हर एक सब्द स जिअत ह जउन परमेस्सर क मुँहे स निकरत ह।’” #व्यवस्था 8:3
5फिन सइतान ओका यरूसलेम क पवित्तर सहर मँ लइ गवा। हुआँ मंदिर क सब स ऊँचे बुर्ज प खड़ा होइके 6उ ओसे कहेस, “जदि तू परमेस्सर क पूत बाट्या, तउ नीचे कूदि जा काहेकि पवित्तर सास्तरन मँ लिखा बाटइ:
‘उ तोहरे रखवारी बरे आपन दूतन क हुकुम देइ
अउर उ पचे तोहका हाथन स उठाइहीं
जेह बरे तोहरे गोड़े मँ कउनो पाथर ताईं न लगई।’” #भ. सं. 91:11-12
7ईसू जवाब दिहेस, “मुला पवित्तर सास्तरन इहइ कहत ह, ‘अपने पर्भू परमेस्सर क परीच्छा मँ जिन डावा।’” #व्यवस्था 6:16
8फिन सइतान ईसू क बहुतइ ऊँच पहाड़े प लइ गवा। अउर ओका इ संसार क सब राज्य अउर ओनकइ माया वैभव देखाएस। 9सइतान तब ओसे कहेस, “इ सब चीजन्क मइँ तोहका दइ देब जदि तू मोरे अगवा दण्डवत करा अउर मोर आराधना करा।”
10फिन ईसू ओसे कहेस, “सइतान! दूर होइ जा। पवित्तर सास्त्र कहत ह:
‘आपन पर्भू परमेस्सर क आराधना अउर सिरिफ
ओकर सेवा करा।’” #व्यवस्था 6:13
11फिन सइतान ओका छाँड़ि के चला गवा। अउर सरगदूतन आइके ओकर सेवा करइ लागेन।
ईसू गलील मँ काम सुरू करेस
(मरकुस 1:14-15; लूका 4:14-15)
12जब ईसू सुनेस कि यूहन्ना पकड़ लीन्ह गवा ह, तउ उ गलील लौटि आवा। 13मुला उ नासरत मँ नाहीं रुका अउर जाइके कफरनहूम मँ रहइ लाग जउन जबूलून अउर नप्ताली क पहटा मँ गलील झीले के नगिचे रहा। 14इ एह बरे भवा कि परमेस्सर क नबी यसायाह जउन कहेस ह, उ पूरा होइ जाइ:
15“जबूलून अउर नप्ताली क देस
सागर क राहे प, यरदन नदी क पच्छिम मँ
गैर यहूदियन क देस गलील मँ
16जउन मनई आँधियारे मँ जिअत रहेन
उ सबइ एक भारी जोति देखेन
अउर जउन मउत क परिछाइँ क देस मँ रहत रहेन,
ओन प ज्योति क भिन्सारे क रोसनी फैलि गइ।” #यसा. 9:1-2
17उ समई स ईसू सुसमाचार क प्रचार सुरू कइ दिहस, “मनफिराव करा काहेकि सरगे क राज्य नगिचे बाटइ।”
ईसू चेलन्क चुनेस
(मरकुस 1:16-20; लूका 5:1-11)
18जब ईसू गलील झिलिया क नगिचे स जात रहा, उ दुइनउँ भाइयन क निहारेस समौन (जउन पतरस कहा गवा।) अउर ओकर भाइ आन्द्रियास। उ पचे झिलिया मँ जाल डारत रहेन। उ पचे मछुवारा रहेन। 19ईसू ओनसे कहेस, “मोरे पाछे आवा, मइँ तोहका सिखाउब कि लोगन्क बरे मछरी पकड़इ क बजाय मनई रूप मँ मछरी कइसे बटोरी जात हीं?” 20उ सबइ तुरतहिं आपन जाल छाँड़ि दिहन अउर ओकरे पाछे होइ गएन।
21फिन उ हुवाँ स आगे चला गवा। उ देखेस कि जब्दी क बेटवा याकूब अउर ओकर भाई यूहन्ना आपन बाप क संग नाउँ मँ बैठिके आपन जालन्क मरम्मत करत रहेन। ईसू ओनका बोलाएस। 22अउर उ पचे फउरन नाउ अउर बाप क छाँड़िके ओकरे पाछे चल दिहन।
ईसू क मनइयन क उपदेस अउर ओनका चंगा करब
(लूका 6:17-19)
23ईसू समुच्चइ गलील पहँटा मँ यहूदी आराधनालय मँ सरगे क राज्य क सुसमाचार क उपदेस देत अउर हर तरह के बेरामी अउर घोर कस्टन क दूर करत घूमइ लाग। 24समुच्चइ सीरिया देस मँ ओकरे बारे मँ खबर संचर गइ। यह बरे लोग अइसे मनइयन जउन खुब बेरमिया रहेन या जउन तरह के बेरामी अउर भारी बेदनन स पीड़ित रहेन। जेह प दुस्ट आतिमान सवार रहीं जेका मिर्गी आवत रही अउर जउन सुखंडी रहेन, ओनका ओकर पास लिआवइ लागेन। ईसू ओनका चंगा किहेस। 25एह बरे गलील, दिकापुलिस,#4:25 दिकापुलिस यूनानी भाखा मँ कहा जाता ह, जेकर अरथ अहइ दस सहर यरूसलेम, यहूदिया अउर यरदन नदी क उ पार मनइयन क भारी भीड़ पाछे पाछे होइ लाग।
Awadhi Holy Bible: Easy-to-Read Version
All rights reserved.
© 2005 Bible League International