SEFELA SA DIFELA 8
8
1Nke nkabe o le kgaetšedi ya ka ye e nyantšego letswele la mma.
Gona ke be nka re ge ke kopana nago,
ka go atla mme ka se solwe ke motho.
2Ke be ke tla go iša lapeng la mma,
mo o bego o tla nthuta tša lerato.
Ke be ke tla go fa beine ya leno,
le matutu a digarenate tša ka,
gore o nwe.
3O nthekgile hlogo ka la nngele,
gomme ka la go ja o nkgokere.
4Nkaneleng, lena makgarebe a Jerusalema,
gore le ka se re tutuetše go ratana –
rena re tla ratana ka borena.
Kopelo ya boselela
Makgarebe
5Ke mang yo wa go tšwa lešokeng
a ithekgile ka moratiwa wa gagwe?
Kgarebe
Ke go tsošitše o le ka fase ga moapola
moo mmago, yena motswadi wa gago,
a ilego a thoma go šokwa a le gona.
6Nkapare molaleng goba monwaneng
bjalo ka papetlana ya go šupetša gore ke wa gago,
gobane lerato le ne maatla, le etša lehu;
tumo ga e ne kwelobohloko, e swana le bodulabahu.
Lerato ke mollo wo o laumago kgabo,
le tuka bjalo ka mollo wo o galefilego.
7Maphaaphaa a meetse a ka se le time,
le tšona dinoka di ka se le tšee.
Le ge motho a ka re o le reka ka mahumo ohle a gagwe,
o tla nyatšwa kudu.
Dikgaetšedi tša kgarebe
8Re na le kgaetšedinyana,
ke gona e thoka matswele.
Na re mo direle eng mohla a gokwa ke masogana?
9Ge a ka ikageletša ka morako,
re tla o hlomela sekgabišo sa silibera;
eupša ge a ka etša lesoro le le ahlamego,
re tla le pheka ka diphaphathi tša mesedere.
Kgarebe
10Nna ke morako,
matswele a ka ke ditora tša wona;
ka gona moratiwa wa ka o mpona
ke le wa go mo kgotsofatša.
Lesogana
11Solomone o be a na le serapa sa merara kua Baale-Hamone.
A se hirišetša bahlokomedi,
mohiri ka hlogwana a lefa papetlana tše sekete tša silibera, a lefela tše a di bunnego.
12Serapa sa ka, sa ka tiitii, se re nna wee!
Wena, Solomone, o ka no itshwarela dipapetlana tšeo tša gago tše sekete,
le bahlokomedi ba itshwarela tša bona tše makgolo a mabedi.
13Wena, modulakaserapeng,
bagwera ba ka ba nyaka go go kwa o bolela;
a ke kwe lentšu la gago!
Kgarebe
14Kitima, moratiwa, o etše tshephe,
o swane le kgamana dithabeng tša dinoko.
Currently Selected:
SEFELA SA DIFELA 8: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.