LUKASE 6
6
Jesu le Bafarisei ba phegišana mabapi le Sabatha
(Mat. 12:1-8; Mar. 2:23-28)
1 Ka tšatši le lengwe la Sabatha Jesu o be a putla ka mašemong a korong. Barutiwa ba gagwe ba tšama ba ekga diako ba di fogohlela ka diatleng, ba eja dithoro. 2Bafarisei ba bangwe ba ba botšiša ba re: “Le reng le dira se se sego sa dumelelwa ka letšatši la Sabatha?”
3 Jesu a ba fetola a re: “Na ga se la bala se Dafida a kilego a se dira mohla wola yena le banna ba ba bego ba na le yena ba swerwe ke tlala – 4 ka mo a ilego a tsena ka ngwakong wa Modimo, a tšea dinkgwa tše di bego di abetšwe Modimo, a di ja, a di ngwathela le bao ba bego ba na le yena? Etse bona ba be ba se ba dumelelwa go di ja; go be go dumeletšwe baprista fela.”
5A fetša ka go re: “Morwamotho o na le tokelo ya go laetša ge eba melao ya Sabatha e swanetše go phethwa.”
Tša monna wa go repha letsogo
(Mat. 12:9-14; Mar. 3:1-6)
6Ka le lengwe letšatši la Sabatha Jesu a tsena ka sinagogeng a ruta batho. Go be go na le monna wa go repha letsogo la go ja. 7Boramangwalo le Bafarisei ba be ba beile Jesu leihlo gore ba bone ge a ka mo fodiša ka letšatši la Sabatha, gore ba tle ba mmee molato. 8Fela Jesu o be a tseba tše di lego ka dipelong tša bona, gomme a re go morephaletsogo: “Etla o eme mono pele.” Monna yoo a emelela a ya go ema ka pele. 9Ke moka Jesu a re go bona: “Ke a le botšiša ke re ke eng se se dumeletšwego ka tšatši la Sabatha, ke se sebotse goba ke se sebe, ke go phološa motho goba ke go mmolaya?” 10A ba gadima bohle, a napa a re go morephaletsogo: “Otlolla letsogo la gago!” A le otlolla, gomme la fola, la swana le lela le lengwe.
11Bona ba galefa mme ba rerišana ka se ba ka se dirago Jesu.
Jesu o kgetha baapostola ba lesome le metšo ye mebedi
(Mat. 10:1-4; Mar. 3:13-19)
12Matšatšing ona ao Jesu a rotogela thabeng go yo rapela. A lala a rapela Modimo moo bošego ka moka. 13Ge go esa a bitša barutiwa ba gagwe ba tla go yena, gomme a kgetha ba lesome le ba babedi mo go bona a ba bitša baapostola. 14Ke Simone, yo a mo theilego Petrose, le Andrease, ngwanabo, le Jakobose le Johanese, le Filipi le Bartolomeose, 15le Mateu le Thomase, le Jakobose, morwa wa Alfeose, le Simone, yo a bego a bitšwa Mollelatokologo, 16le Judase, morwa wa Jakobose, le Judase Iskariote, yo a ilego a tla a mo eka.
Tša Jesu ge a ruta batho a bile a ba fodiša
(Mat. 4:23-25)
17Ge Jesu a seno theoga thabeng le baapostola ba gagwe, o ile a ema mo e lego lebala a na le barutiwa ba gagwe ba bantši. Lešaba le lentši la batho ba go tšwa gohle nageng ya Judea le Jerusalema le seleteng sa lebopong la lewatle, mo go lego Tirose le Sidone, la tla go yena. 18Ba be ba tlile go mo kwa le go fodišwa malwetši a bona. Bao ba bego ba tshwenywa ke meoya ye mebe le bona ba ile ba fodišwa. 19Batho ka moka ba be ba leka go mo kgwatha, ka gobane go yena go be go etšwa maatla mme a ba fodiša bohle.
Mahlogonolo le madimabe
(Mat. 5:1-12)
20Jesu a lebelela barutiwa ba gagwe a re:
“Ba lehlogonolo ke lena le diilago,
gobane mmušo wa Modimo ke wa lena.
21Ba lehlogonolo ke lena ba bjale le swerwego ke tlala,
gobane le tla khorišwa.
Ba lehlogonolo ke lena ba bjale le llago,
gobane le tla sega.
22 “Ba lehlogonolo ke lena ge le hloilwe ke batho, ba le tšwa, ba le roga, ba le šišingwa, e le ka lebaka la Morwamotho. 23 Ge tšeo di le hlagela, le bine le thabile, ka gobane moputso wa lena ke wo mogolo legodimong. Gape borakgolokhukhu ba bona le bona ba be ba dira baprofeta tšona tšeo ba le dirago tšona.
24“Fela ba madimabe ke lena bahumi,
gobane bja lena boiketlo le šetše le bo hweditše.
25Ba madimabe ke lena bao bjale le khorago,
gobane le tla bolawa ke tlala.
Ba madimabe ke lena bao bjale le segago,
gobane le tla lla la golola.
26“Ba madimabe ke lena ge le retwa ke bohle, gobane seo ke sona se borakgolokhukhu ba bona ba bego ba se dira baprofeta ba maaka.”
Go rata manaba
(Mat. 5:38-48; 7:12a)
27“Lena ba le nkwago, ke a le botša ke re: Le rate manaba a lena, ba ba le hloilego le ba direle tše di lokilego, 28ba ba le rogago le ba šegofatše, gomme ba ba le swerego gampe le ba rapelele. 29Ge motho a ka go betha thama, o mo retollele le ye nngwe. Ge motho a ka go amoga seaparo sa ka ntle, o mo lese a tšee le sa ka gare. 30Ge motho a ka go kgopela selo, o mo fe sona, le ge motho a ka tšea selo sa gago, o se ke wa re a se buše. 31 Le direle batho tše le lena le ratago gore ba le direle tšona.
32“Ge le rata fela ba ba le ratago, le tla be le sa tlilo putsetšwang? Gape seo ke se se dirwago le ke badiradibe. 33Le ge le hola fela ba ba le holago, le tla be le sa tlilo putsetšwang? Etse seo ke se se dirwago le ke badiradibe. 34Le ge le adima bao le holofelago gore ba tla buša, le tla be le sa tlilo putsetšwang? Ga ke re le badiradibe ba a adimana, ba tle ba buše sa go lekana le se ba se adimilego? 35Sa lena a e be go rata manaba a lena le go ba hola, le go adima batho le sa lebelele go bušetšwa. Ke mo Modimo a tlago le putsa kudu, le gona la ba bana ba Modimo yoo Yogodimodimo. Gobane bahlokatebogo le bakgopo le bona o ba loketše. 36Le gaugele bjalo ka ge Tatagolena le yena a gaugela.”
Go bona ba bangwe diphošo
(Mat. 7:1-5)
37“Le se ke la bona ba bangwe diphošo, gomme le lena Modimo a ka se tlo le bona diphošo; le se ke la tšwa motho, gomme le lena Modimo a ka se tlo le tšwa; le swarele ba ba le fošeditšego, gomme Modimo o tla le swarela. 38Le fe ba bangwe, gomme Modimo le yena o tla le fa. Le tla fiwa ka kelo ya mmapaale ye e katetšwego ya ba ya ntšhwa mohlopha. Gape kelo ye le elelago ba bangwe ka yona, ke yona ye Modimo a tlago le elela ka yona.”
39 Jesu a ba botša le ka seswantšho a re: “Kgane sefofu se ka hlahla se sengwe? Ga ke re bobedi bja bona ba tla wela ka leopeng? 40 Morutiwa ga a fete morutiši wa gagwe; morutiwa yo mongwe le yo mongwe ge a feditše dithuto tša gagwe o lekana le morutiši wa gagwe.
41“O reng o bona phatšana ye e fahlilego ngwaneno, etšwe o sa bone kota ye e fahlilego wena? 42Na o ka botša ngwaneno wa re: ‘Ngwanešo, a ke go fahlolle phatšana yeo e go fahlilego,’ mola wena kota ye e go fahlilego le go e bona o sa e bone? Moikaketši tena! Pele iphahlolle kota yeo e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego.”
Mohlare o tsebja ka dikenywa tša wona
(Mat. 7:16-20; 12:33-35)
43“Mohlare wo mobotse ga o enywe dikenywa tše e sego tše dibotse, le wo e sego wo mobotse ga o enywe dikenywa tše dibotse. 44 Mohlare wo mongwe le wo mongwe o tsebja ka dikenywa tša wona. Motho ga a fule mago mehlareng ya meetlwa, le diterebe ga a di fule monganeng. 45 Motho wa go loka o nagana tše di lokilego ka pelong ya gagwe, ka gona o bolela tše di lokilego; yo mobe le yena o nagana tše mpe, ka fao o bolela tše mpe. Ga ke re se motho a se bolelago ke se se tšwago ka pelong ya gagwe?”
Baagi ba mehuta ye mebedi
(Mat. 7:24-27)
46“Le mpiletšang ‘Morena, Morena,’ le sa dire tše ke le botšago tšona? 47Yo a tlago go nna a kwa tše ke di bolelago mme a di phetha, ke tla le botša gore o swana le mang. 48O swana le monna yo e rilego ge a aga ntlo ya gagwe a epa go iša fase, a aga motheo godimo ga letlapa. Ya re ge lefula le etla mme moela o tšhologela godimo ga yona, meetse a se ke a e šikinya, ka gobane e agilwe gabotse. 49Eupša yo a kwago tše ke di bolelago gomme a se di phethe, yena o swana le monna yo a agilego ntlo ya gagwe mabung a se a e agela motheo; ya re ge moela o tšhologela godimo ga yona, ya wa le semeetseng – gomme go pšhatlagana ga yona ya ba mo go šiišago.”
Currently Selected:
LUKASE 6: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.