ZEFANAAYA 3
3
Jerusalɛm sɩ jaŋ nagɛ ŋɩɩ maachie
1Wɩaa puu Jerusalɛm, ʋ nyagɛ nɩaa bil nɛ,
a vɩa dagɩŋ aŋ ŋaa wɩaa a kɛŋ disiniŋ.
2Ʋ bɩ nʋʋkala niiŋ ka nɩɩ.
Ʋ bɩ sɛyɛ ba dɩdagʋ.
Ʋ bɩ La TƖƖNA laa dii.
Ʋ bɩ sɛyɛ a mʋ kpɩkpagɛ ʋ Wɩa.
3Ʋ tɩntɩnnɩ-hɩasɩŋ ka ŋaa goŋ nɛ a nagɛ naachigee sɩɩ yel,
ʋ sɩpaalaaraa ma nagɛ losuŋ sɩ kɛŋ guŋgurusuŋ dɩdaanɩŋ,
ba bɩ kʋŋ die aŋ kɩka taŋ pʋpʋl.
4Wɩa wʋlaabʋlla-la sɩ hɛ ʋ lɛ kɛŋ babii-ballɩŋ,
ba ŋaa zɛmbɛ tɩmma nɛ.
Ʋ Wɩɩsʋllɩ sɩpaalaaraa ŋaa disiniŋ hɛ Wɩa dɩɩ-bal-la lɛ nɛ
aŋ kɛŋ wombii-la ma ʋ sɩ bile dɩ la tuto kaa bɩrɩmɛ ŋɩɩ ba sɩ cho.
5La TƖƖNA ŋaa tʋɔpʋl Tɩɩna nɛ a hɛ tabal-la lɛ,
ʋ bɩ wʋbɔŋ kala ka ŋaa.
Tapʋlɩɩ na-kala ʋ yie dagɛ ŋɩɩ ʋ sɩ kɛŋ wʋtɩtɩɩ nɛ,
ʋ bɩ giri,
ka nɩalɩŋ sɩ kɛŋ tʋɔbɔmʋŋ ha bɩ hɩɩsɩŋ jɩŋ.
6La TƖƖNA sɩ,
“Mɩ kpʋ tinteyee nɩaa nɛ
a ŋmoo ba dɩɩ-duoruŋ lo.
Mɩ leŋe ba womporunuŋ pɩŋ hoi nɛ,
nʋʋkala bɩ ba ka to.
Mɩ chei ba tabalaa nɛ,
nʋʋkala bɩ ka nɩmɛ, nɩbala ma bɩ ka.
7Mɩ fa bɩɩna mɩ nɩaa jaŋ fámɛ,
a sɛɩ mɩ dagɩŋ,
dɩ mɩ bɩra sɩ́ ba taŋ chei a dɔgɩsɛba.
Ama ba haa ŋaa wʋbɔmɔ-la ba fa sɩɩ ŋaa nɛ.”
8Ŋɩɩ wɩaa La TƖƖNA bɩra bʋl,
“Má gbɛrɛ tapʋlɩɩ-la mɩ sɩ jaŋ dagɛ tinteyee nɩaa wʋcheelee pɩba.
Mɩ kɛŋ mɩ tʋɔŋ dɩ mɩ yɩrɛ tinteyee arɩ kuoru tinteyee nɩaa hilimi nɛ,
a kɛŋ baanɩŋ dɔgɩsɛba.
Mɩ baanɩŋ chaasa sii ba nyuŋ nɛ.
Mɩ baanɩŋ sɩ sie mɩ yaraa bibieri ŋɩɩ,
ʋ jaŋ nagɛ nyiniŋ a joŋ dʋnɩa kala dii.
9Ŋɩɩ lɛ nɛ mɩ jaŋ kɛŋ nɩaa deemba niiree bɩrɩmɛ,
dɩ ba kala yɩyɩrɛ mɩ-na ba TƖƖNA yɩrɩŋ,
a tɩma pɩpɩmɛ arɩ nii-bala.
10Mɩ nɩalɩŋ sɩɩ chʋɔlɛmɛ aŋ pɩsɛ
a kieli Kus fuonu-la leriŋ a mʋ,
jaŋ kɛŋ kɩaa kʋ ŋaa Wɩɩsʋlʋŋ pɩmɛ.
11Tapʋlɩɩ-la mɩ bɩ jaŋ tɩŋ wʋbɔmɔ-la ma sɩ ŋaa mɩ lɛ wɩaa
a joŋ hɩɩsɩŋ hɛ ma lɛ,
bɛɛ wɩaa tabalɩŋ deeŋ lɛ,
mɩ jaŋ lɩɩsɛ nɩalɩŋ sɩɩ jʋɔsɛ ba babiibal wɩaa lɛ ta.
Ma bɩra bɩ jaŋ kɔ dɩ ma kɛŋ babii-ballɩŋ
mɩ dundolo-la sɩ bɩ disiniŋ kɛnɛ lɛ.
12Mɩ-na ma TƖƖNA jaŋ leŋ
nɩalɩŋ sɩ kɛŋ ba tɩtɩa muuri arɩ nɩalɩŋ sɩaa sɩ fɩɛla tabal-la lɛ,
nɩalɩŋ sɩ laamɛ dii.
13Iziral nɩkaana-la sɩ bɩ sʋba bɩ jaŋ ŋaa wʋbɔŋ,
ba bɩ jaŋ nyɩnyɩɛ wɩaa,
ba bɩ jaŋ nyɩnyɩsɛ nɩaa ma.
Ba jaŋ dii kɩaa aŋ pɩŋ sɔm,
nʋʋkala bɩ jaŋ ŋaa dɩ fawʋllʋŋ kɛmba.
14Zaayɔŋ nɩaa, má yɩɩ yɩɩlaa,
Iziral tɩmma, má kpɩa wɩaa.
Jerusalɛm nɩaa,
má leŋ dɩ ma tʋɔŋ faasa tɔrɛ, dɩ ma jʋjʋɔsɛ.”
15La TƖƖNA leŋ ma dɔgʋsʋŋ nɛ,
ʋ kiri ma dʋndɔŋŋɔɔ ba mɩɩrɛ nɛ.
La TƖƖNA, Iziral tɩŋŋaa Kuoru-balɩŋ hɛ ma teeŋ nɛ,
ma bɩra bɩ jaŋ fɩfá wʋwalɩmɩɩ kala.
16Tapʋlɩɩ-la ba jaŋ bʋla pɩ Jerusalɛm tɩŋŋaa,
“Má sɩ́ fawʋllʋŋ fá, Zaayɔŋ nɩaa,
má sɩ́ leŋe dɩ ma nandaasɩŋ yʋɔrɛ.
17Ma TƖƖNA Wɩa hɛ ma teeŋ nɛ,
ʋ kɛŋ doluŋ nɛ dɩ ʋ laama ta.
Ʋ tʋɔŋ jaŋ faasa tɔrɛ ma nyuŋ,
ʋ chonuŋ jaŋ leŋ dɩ ma hɔŋ sɔm,
dɩ ʋ yɩɩ tʋɔtɔrɛ yɩɩlaa a jʋɔsɛ ma wɩaa.”
18La TƖƖNA bʋla,
“Mɩ jaŋ lɩɩsɛ tʋɔ-chei-la ma sɩ kɛnɛ
a tɩŋ ma bɩra sɩ́ bɩ gbiele-la
ma sɩ yie vɛnɛɛ gbieli ka gbieli wɩaa.
Ʋ ŋɩɩ fa ŋaa chʋga arɩ hɩɩsɛ nɛ ma lɛ.
19Bʋa-la nɛ yie, mɩ jaŋ dɔgɩsɛ
nɩalɩŋ kala sɩ wʋrʋgʋma.
Mɩ jaŋ laa gbɛrɩgɛɛ ta,
aŋ kɛŋ nɩalɩŋ sɩ pɩsa kʋ hɛ dɔŋɔ.
Mɩ jaŋ leŋ dɩ ma kɛŋ yɩrɩŋ dɩ nɩaa zizilma
tinteye-la kala lɛ ba sɩ hɩɩsɛma.
20Bʋa-la lɛ, mɩ jaŋ kɛsɛma kʋ hilimi.
Bʋa-la nɛ yie, mɩ jaŋ kɛsɛma kɔ dɩa.
Mɩ jaŋ leŋ dɩ dʋnɩa nɩaa kala bɩbɛsɛ ma lɛ a zizilma
dɩ mɩ nɛ leŋe dɩ ma bɩra dʋa ba sɩɩŋ lɛ.”
La TƖƖNA nɛ bʋla.
Currently Selected:
ZEFANAAYA 3: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
