Rom Tɩŋŋaa 15

Má sɩ́ ma dʋndʋŋa tʋɔtɔrɛ wɩaa harɩŋ to

1La nɩalɩŋ sɩ laa Wɩa dii woruŋ, ʋ maga dɩ la pɛ nɩalɩŋ sɩ bɩ ʋ laa dii woruŋ lɛ arɩ wɩalɩŋ ba sɩ bɩ doluŋ kɛnɛ lɛ. Ʋ bɩ maga dɩ la ŋɩŋaa wɩalɩŋ sɩɩ tɔrɛ la dʋndʋŋa tʋɔŋ. 2Má leŋ dɩ la kʋŋkala ŋaa dɩ ʋ dɔŋɔ tɩɩna tʋɔŋ tɔrɛ, dɩ la pɛ ʋ lɛ ŋɩɩ dɩ ʋ kɛŋ doluŋ a chɩŋ ʋ wɩalɩŋ ʋ sɩ laa dii lɛ. 3Kirisito ma bɩ ʋ tɩtɩa tʋɔtɔrɛ wɩaa ŋaa. Ba fa ŋmʋnsɛ Wɩa teniŋ tʋɔŋ a bʋl ŋ-la nɛ a tɩgɛ ʋ lɛ:

“Jomo-la kala nɩalɩŋ sɩ tʋʋsɛ ŋ-na Wɩa,

ba nɛ ba joŋoo tʋʋsɛ mɩ ma.”

4Wɩalɩŋ kala ba fa sɩ ŋmʋnsa Wɩa teniŋ tʋɔŋ, ba ŋmʋnsa dɩ ba dagɛla nɛ, Wɩa teŋ-la nɛ dagɛla ŋɩɩ la sɩ jaŋ ŋaa a kɛŋ kenyiri, a ŋaa la nyuŋ nyaasɛ, dɩ la wuo yɩyɩɛlɛ kɩalɩŋ sɩ hɛ la sɩpaaŋ. 5Wɩa nɩɩ pɩ nɩaa kenyiri a leŋ ba nyuŋ nyɩnyaasɛ. Mɩɩ sʋlʋ dɩ ʋ pɛ ma lɛ dɩ ma kɛŋ nii-bala a wuo tuto Yesu Kirisito naabʋɔsʋŋ, 6dɩ ma kala wuo kɛŋ nii-bala arɩ tʋɔ-bala a dɛnnɛ Wɩa. Ʋ nɛ ŋaa La Tɩɩna Yesu Kirisito Nyɩmma.

Ʋ maga dɩ nɩalɩŋ sɩ bɩ Juu tɩŋŋaa ŋaa ma nɩɩ Wɩa wɩaa

7Ŋɩɩ wɩaa, má sɛɩ a kɛŋ dɔŋɔ woruŋ, arɩ Kirisito ma sɩ kɛmma woruŋ ŋɩɩ, dɩ Wɩa yɩrɩŋ yɩrɛ. 8Mɩ jaŋ bʋla pɩma arɩ Kirisito kʋ tɩŋ tɩntɩŋŋaa a pɩ Juu tɩŋŋaa nɛ, a dagɛ ŋɩɩ Wɩa sɩ kɛŋ wʋtɩtɩɩ a ŋaa wɩalɩŋ kala ʋ fa sɩ bʋla pɩ la naabalɩmaba arɩ ʋ jaŋ ŋaa, 9a wuo leŋ dɩ nɩalɩŋ sɩ bɩ Juu tɩŋŋaa ŋaa, dɩ ba dɛnnɛ Wɩa a tɩŋ ʋ sɩ fá ba nenige ŋɩɩ. Ba ŋmʋnsɛ ŋ-la nɛ Wɩa teniŋ tʋɔŋ a bʋl,

“Ŋɩɩ wɩaa mɩ jaŋ dɛnnɩŋ nɩalɩŋ sɩ bɩ Juu tɩŋŋaa ŋaa tʋɔŋ.

Mɩ jaŋ yɩɩ yɩɩlaa a dɛnnɩŋ.”

10Ba bɩra ŋmʋnsa a bʋl ŋ-la nɛ:

“Ma nɩalɩŋ sɩ bɩ Juu tɩŋŋaa ŋaa, ma dɩ nɩalɩŋ kala Wɩa sɩ lɩɩsa, má jʋɔsɛ.”

11Ba bɩra bʋl ŋ-la nɛ:

“Ma nɩalɩŋ kala sɩ bɩ Juu tɩŋŋaa ŋaa,

má dɛnnɛ ma Tɩɩna Wɩa,

ma kala yɩɩ yɩɩlaa dɛnnʋ.”

12Azaaya bɩra bʋl ŋ-la nɛ:

“Jesi doho nɩaa dɔŋɔ jaŋ kɔ.

Ʋ nɛ jaŋ sii a beŋ nɩalɩŋ sɩ bɩ Juu tɩŋŋaa ŋaa.

Ba jaŋ joŋ ba yɩɛlaa hɛ ʋ lɛ.”

13Wɩa nɛ yie leŋ la kɛŋ yɩɛlaa. Mɩɩ sʋlʋ dɩ ʋ leŋ dɩ ma kɛŋ tʋɔtɔrʋŋ arɩ yarɩfɩɛlaa a tɩŋ ma sɩ laaʋ dii, dɩ ŋɩɩ leŋ dɩ ma yɩɛlaa wasa yʋgɛ Wɩa Dɩŋ-zɔmʋŋ doluŋ lɛ.

Wɩɩ-la sɩ tɩɩ Pɔɔl tɩŋ tɩntɩŋŋaa nɩalɩŋ sɩ bɩ Juu tɩŋŋaa ŋaa tʋɔŋ

14Mɩ naambiiriŋ, mɩ chaasa laa dii arɩ maa ŋaa wʋzɔŋŋɔɔ nɛ woruŋ, a jɩŋ wɩaa ma woruŋ, a wuo dɩdagɛ dɔŋɔ. 15Ama teniŋ deeŋ tʋɔŋ mɩ kɛŋ nyuduoŋ nɛ dɩ mɩ wuo liisima wɩaa dɔnsʋŋ lɛ a tɩŋ dol-la Wɩa sɩ pɩmɛ wɩaa, 16dɩ mɩ tɩŋ Yesu Kirisito tɩntɩŋŋaa nɩalɩŋ sɩ bɩ Juu tɩŋŋaa ŋaa tʋɔŋ. Mɩ tɩŋ ba tʋɔŋ a nagɛ Wɩɩsʋllɩ sɩpaalaara nɛ, a bʋl Wɩa wʋzɔmɔ-la pɩba. Mɩ ŋaa ŋɩɩ dɩ Wɩa wuo laa nɩalɩŋ sɩ bɩ Juu tɩŋŋaa ŋaa, a nagɛ Wɩɩsʋlʋŋ kɩaa Wɩa Dɩŋ-zɔŋ-la sɩ ŋaa ba bɩ disiniŋ kɛnɛ dɩ mɩ joŋo pɩ Wɩa dɩ ʋ tʋɔtɔrɛ ba nyuŋ. 17Yesu Kirisito doluŋ lɛ mɩ kɛŋ wombiiŋ dɩ mɩ dagɛ mɩ tɩtɩa a tɩŋ tɩntɩmɩɩ-la mɩ sɩ tɩma pɩ Wɩa. 18Mɩ bɩ nyuduoŋ kɛnɛ dɩ mɩ bʋl wɩɩ dɔŋ kala, see tɩntɩmɩɩ-la Kirisito sɩ pɛ mɩ lɛ mɩ tɩŋ, a wuo leŋ nɩalɩŋ sɩ bɩ Juu tɩŋŋaa ŋaa kʋ to Wɩa niiŋ. Wɩalɩŋ mɩ sɩ bʋla arɩ wɩalɩŋ mɩ sɩ ŋaa, 19wʋkpuŋkperisi-la arɩ wʋmagɩla-la mɩ sɩ ŋaa Wɩa Dɩŋ-zɔŋ-la doluŋ lɛ. Mɩ chaasa bʋl Kirisito wʋzɔmɔ-la, a suomi Jerusalɛm lɛ a gɔllɛ ŋɩɩ a mʋ yi Iliirikam. 20Mɩ kɛŋ mɩ tʋɔŋ lɛ bʋa na-kala dɩ mɩ mʋ bʋl Wɩa wʋzɔmɔ-la lee-na kala nɩaa ha sɩ bɩ Kirisito wɩaa nɩa. Mɩ bɩ chɛ dɩ mɩ mʋ lee-la nɩaa sɩ laa sɩpaaŋ mʋ a bʋl Wɩa wɩaa. 21Ba ŋmʋnsɛ ŋ-la nɛ Wɩa teniŋ tʋɔŋ a bʋl,

“Nɩalɩŋ ba ha sɩ bɩ ʋ wɩaa bʋla pa jaŋ naʋ.

Nɩalɩŋ ha sɩ bɩ ʋ wɩaa nɩa, ba jaŋ nɩɩ a jɩŋ ba bʋbʋɔŋ.”

Pɔɔl chɛ dɩ ʋ mʋ na Rom tɩŋŋaa

22Mɩ sɩɩ bʋl Wɩa wɩaa leree dɔnsʋŋ nɛ tɩɩ mɩ bɩ ma leriŋ wuo kɔ. 23Ama lɛɛlɛ mɩ bɩra bɩ tɩntɩmɩɩ kɛnɛ leree deemba lɛ dɩ mɩ tɩŋ, ka mɩ ma paala cho dɩ mɩ kʋ nama faafaa kala. 24Mɩɩ chɛ dɩ mɩ kʋ nama bʋa-la lɛ dɩ mɩ nɩɩ mʋ Sipeeŋ tinteeŋ. Dɩ mɩ nɛ hɔŋ ma teeŋ a dieni mʋa, mɩɩ chɛ dɩ ma pɛ mɩ lɛ dɩ mɩ vɛŋ mɩ wombiiŋ. 25Ama lɛɛlɛ-na mɩɩ mʋ Jerusalɛm nɛ dɩ mɩ pɛ Wɩa nɩaa lɛ nɩmɛ. 26Nɩalɩŋ sɩ laa Wɩa wɩaa dii Masidoonia arɩ Akaaya tinteeŋ lɛ, ba tʋɔŋ tɔrɔ nɛ ba sɩ kɩɛsɛ moribiee dɩ ba pɛ summo-la sɩ hɛ Wɩa nɩaa tʋɔŋ Jerusalɛm lɛ. 27Ba tʋɔŋ tɔrɔ nɛ ba sɩ ŋaa ŋɩɩ. Ama ŋɩɩ fa paala ŋaa wɩɩ nɛ sɩ maga dɩ ba ŋaa. Wʋzɔmɔ-la kala sɩ lɩɩ Wɩa teeŋ, Juu tɩŋŋaa nɛ leŋe nɩalɩŋ sɩ bɩ Juu tɩŋŋaa ŋaa ma naba. Ŋɩɩ wɩaa ʋ maga dɩ ba ma pɛ Juu tɩŋŋaa lɛ arɩ dʋnɩa kɩalɩŋ ba sɩ kɛnɛ. 28Dɩ mɩ nɛ tɩŋ tɩntɩmɩŋ deeŋ dɛrɛ, a kɛŋ moribie-la kala ba sɩ kɩɛsa a kaa mʋ pɩba, mɩ jaŋ sii nɩmɛ a mʋ Sipeeŋ tinteeŋ. Dɩ mɩ nɩɩ mʋ nɩmɛ, mɩ jaŋ kʋ to nama. 29Mɩ jɩma, dɩ mɩ nɛ kɔ, mɩ jaŋ wuo pɛ ma lɛ woruŋ, arɩ Kirisito sɩ pɛ mɩ lɛ ŋɩɩ.

30Mɩ naambiiriŋ, mɩɩ sʋlma La Tɩɩna Yesu Kirisito yɩrɩŋ lɛ, arɩ chono-la Wɩa Dɩŋ-zɔŋ-la sɩ joŋo pɩla, dɩ ma pɛ mɩ lɛ a chaasa chʋɔlɛ Wɩa pɩmɛ, 31dɩ Wɩa lɩɩsɛmɛ nɩalɩŋ sɩ vɩa Wɩa wɩaa nɩsɩŋ lɛ a hɛ Judiya tinteeŋ lɛ. Má bɩra sʋl Wɩa dɩ ʋ nɩalɩŋ sɩ hɛ Jerusalɛm lɛ, dɩ ba tʋɔŋ tɔrɛ kɩalɩŋ mɩ sɩ jaŋ kaa mʋ pɩba nyuŋ. 32Ka dɩ Wɩa nɛ sɛyɛ, mɩ jaŋ kɔ ma teeŋ arɩ tʋɔtɔrʋŋ, a kʋ wiesi mʋa ma teeŋ. 33Wɩa sɩɩ pɩ nuhuobiine fɩɛlɩŋ, ʋ jaŋ hɛ ma teeŋ. Amɩɩ.

Currently Selected:

Rom Tɩŋŋaa 15: SIS

Highlight

Copy