NAMBABA 7
7
Sɩpaalaaraa Wɩɩsʋlʋŋ kɩaa
1Tapʋlɩɩ-la Mosis sɩ pɛ Wɩa dɩ-zɔŋ-la dɛrɛ, ʋ joŋ Wɩɩsʋllɩ nʋʋŋ tɩsɛ ʋ dɩ ʋ tʋɔŋ kpɩɛraa kala, a joŋo hɛ Wɩa nɩsɩŋ lɛ. Ʋ bɩra joŋ Wɩɩsʋllɩ nʋʋŋ a sʋl Wɩa hɛ koru-la arɩ ʋ nyuŋ tɩntɩnnɩ kɩaa kala ma lɛ, a joŋo hɛ Wɩa nɩsɩŋ lɛ. 2Ŋɩɩ nɛ Iziral tɩŋŋaa sɩpaalaaraa, ba dɩa dɩa nɩhɩasɩ-la sɩ ŋaa ba doho doho sɩpaalaaraa sɩ beŋ nɩalɩŋ ba dɩɩsɛ, kɛŋ Wɩɩsʋllɩ kɩaa kɔ. 3Ba Wɩɩsʋllɩ kɩaa ba sɩ kaa kɔ La TƖƖNA teeŋ ŋaa nɛsɩŋ torukoba balɩdʋ ba sɩ kpaasa tɔ nyuŋ arɩ nɛ-ferisiŋ fii arɩ balɩa nɛ. Sɩpaalaarʋ kala kɛŋ nɛ-fere nɛ kɔ, aŋ pɛ dɔŋɔ balɩa balɩa a chɛ nɛsɩŋ toruko. Ba kɛŋ kɩalɩŋ kala kɔ Wɩa dɩ-zɔŋ-la leriŋ.
4Ŋɩɩ nɛ La TƖƖNA bʋla pɩ Mosis, 5“Laa kɩalɩŋ ba teeŋ a kaa tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa. Laa a joŋo pɩ Levi doho nɩaa a magɛ ŋɩɩ nʋʋkala sɩɩ chɛ ʋ kaa tɩŋ.”
6Ŋɩɩ nɛ Mosis laa nɛ-ferisi-la arɩ torukoba-la, a joŋo pɩ Levi doho nɩalɩŋ. 7Ʋ joŋ nɛ-ferisi-la banɛsɛ arɩ torukoba balɩa a pɩ Gɛsɔŋ doho nɩaa a magɛ ba tɩntɩŋŋaa, 8a bɩra joŋ nɛ-ferisi-la chori arɩ torukoba banɛsɛ a pɩ Mɛrarɩ doho nɩaa a magɛ ba ma tɩntɩŋŋaa. Arɔŋ sɩ ŋaa Wɩɩsʋllɩ sɩpaalaara nanʋala Ɩtama nɛ faa beŋ ba kala. 9Ama Mosis bɩ kɩalɩŋ kʋŋkala joŋo pɩ Kohaf doho nɩaa, bɛɛ wɩaa ba tɩntɩmɩŋ nɛ ba chʋchʋŋ Wɩa dɩa kʋzɔmɔ-la.
10Mosis sɩ joŋ Wɩɩsʋllɩ nʋʋŋ taa koru-la lɛ, sɩpaalaara-la kɛŋ ba Wɩɩsʋllɩ kɩaa kɔ koru-la sɩpaaŋ dɩ ba sʋl Wɩa a joŋ koru-la pɩ Wɩa. 11La TƖƖNA fa bʋla pɩ Mosis, “Tapʋlɩɩ-kala, sɩpaalaara-la fii arɩ balɩa tʋɔŋ kʋbala nɛ maga dɩ ʋ kɛŋ ʋ Wɩɩsʋlʋŋ kɩaa kɔ dɩ ma joŋ koru-la pɩmɛ.” 12Amɩnadab sɩ ŋaa Juda doho nʋʋ, ʋ nanʋala Nasɔŋ nɛ laa sɩpaaŋ kɛŋ ʋ Wɩɩsʋlʋŋ kɩaa kɔ.
13Nasɔŋ Wɩɩsʋlʋŋ kɩaa ʋ sɩ kaa kɔ nɛ ŋ-la: Hɔpʋla ba sɩ kaa ŋaa pɩrata, ʋ yuŋuŋ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ ma sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala ba kaa ŋaa mɩaa Wɩɩsʋlʋŋ, 14a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 15arɩ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna, dɩ ba kaa sʋl kʋnyɩgaa Wɩɩsʋlʋŋ, 16a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ, 17arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ sɩ yi jɩna jɩna kɩaa banɔŋ, dɩ ba kpʋ a ŋaa nii-magɛ dɔŋɔ Wɩɩsʋlʋŋ. Amɩnadab nanʋala Nasɔŋ sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 18Chɛ lɩa chɛɛŋ, Nɛtanɛl nanʋala Zʋaa sɩ ŋaa Ɩsaka doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ.
19Wɩɩsʋllɩ kɩalɩŋ ʋ sɩ kaa kɔ nɛ ŋ-la: hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala dɩ ba kaa ŋaa mɩaa Wɩɩsʋlʋŋ, 20a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ ʋ hɛ kʋsʋɔrʋsʋŋ a su, 21nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 22a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ 23arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna, dɩ ba kpʋ a sʋl nii-magɛ dɔŋɔ Wɩɩsʋlʋŋ. Nɛtanɛl nanʋala Zʋaa sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 24Tapʋl-torimuŋ chɛɛŋ, Heloŋ nanʋala Ɛlɩab sɩ ŋaa Zebuluŋ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 25Wɩɩsʋllɩ kɩalɩŋ ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala, dɩ ba kaa sʋl mɩaa Wɩɩsʋlʋŋ, 26a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 27nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 28a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 29arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna, dɩ ba kpʋ a ŋaa nii-magɛ dɔŋɔ Wɩɩsʋlʋŋ. Heloŋ nanʋala Ɛlɩab sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 30Tapʋl nɛsɛ chɛɛŋ Sediu nanʋala Elizu sɩ ŋaa Rubiŋ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 31Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala, dɩ ba kaa ŋaa mɩaa Wɩɩsʋlʋŋ, 32a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 33a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 34a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 35arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna, dɩ ba kpʋ a sʋl nii-magɛ dɔŋɔ Wɩɩsʋlʋŋ. Sediu nanʋala Elizu sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 36Tapʋl-nɔŋ chɛɛŋ, Zurisadai nanʋala Sɛlʋmɩɛl sɩ ŋaa Simioŋ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 37Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala, dɩ ba kaa ŋaa mɩaa Wɩɩsʋlʋŋ, 38a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 39a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 40a pɛ gbuŋgbogo lɛ dɩ ba kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ, 41arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna, dɩ ba kpʋ a sʋl nii-magɛ dɔŋɔ Wɩɩsʋlʋŋ. Zurisadai nanʋala Sɛlʋmɩɛl sɩ kɛŋ Wɩɩsʋllɩ kɩaa kaa kɔ nɛ ŋɩɩ. 42Tapʋl-dʋ chɛɛŋ, Dʋɛl nanʋala Ɛlɩasaf sɩ ŋaa Gad doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 43Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala, dɩ ba kaa ŋaa mɩaa Wɩɩsʋlʋŋ, 44a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 45a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 46a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 47arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna lɛ, dɩ ba kpʋ a ŋaa nii-magɛ dɔŋɔ Wɩɩsʋlʋŋ. Dʋɛl nanʋala Ɛlɩasaf sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 48Tapʋl-pɛɩ chɛɛŋ, Amihud nanʋala Ɛlɩsama sɩ ŋaa Efirem doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 49Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala dɩ ba kaa sʋl mɩaa Wɩɩsʋlʋŋ, 50a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 51a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 52a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 53arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna lɛ, dɩ ba kpʋ a sʋl nii-magɛ dɔŋɔ Wɩɩsʋlʋŋ. Amihud nanʋala Ɛlɩsama sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 54Tapʋl-chori chɛɛŋ, Pedazu nanʋala Gamalɩɛl sɩ ŋaa Manasɛ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 55Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ, arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala dɩ ba kaa sʋl mɩaa Wɩɩsʋlʋŋ, 56a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie, ʋ hɛ kʋsʋɔrʋsʋŋ a su, 57a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 58a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 59arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna lɛ, dɩ ba kpʋ a ŋaa nii-magɛ dɔŋɔ Wɩɩsʋlʋŋ. Pedazu nanʋala Gamalɩɛl sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 60Tapʋl-nibi chɛɛŋ, Gidioni nanʋala Abɩdaŋ sɩ ŋaa Bɛnjamɩŋ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 61Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su kɩalɩŋ kʋŋkala dɩ ba kaa sʋl mɩaa Wɩɩsʋlʋŋ, 62a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 63nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 64a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 65arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna lɛ dɩ ba kpʋ a sʋl nii-magɛ dɔŋɔ Wɩɩsʋlʋŋ. Gidioni nanʋala Abɩdaŋ sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 66Tapʋl-fii chɛɛŋ, Amɩsadaɩ nanʋala Ahieza sɩ ŋaa Daŋ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 67Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su ba kʋŋkala dɩ ba kaa sʋl mɩaa Wɩɩsʋlʋŋ, 68a pɛ sɛlɩmɛ gbaŋa yuŋuŋ bɩ kilo kpaa magɛ dɔŋɔ yie, ʋ hɛ kʋsʋɔrʋsʋŋ a su, 69nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna dɩ ba kaa sʋl kʋnyɩgaa Wɩɩsʋlʋŋ, 70a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 71arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna dɩ ba kpʋ a sʋl nii-magɛ dɔŋɔ Wɩɩsʋlʋŋ. Amɩsadaɩ nanʋala Ahieza sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 72Tapʋl-fii arɩ kʋbala chɛɛŋ, Ɔkɩraŋ nanʋala Pagɩɛl sɩ ŋaa Asa doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 73Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su ba kʋŋkala, dɩ ba kaa sʋl mɩaa Wɩɩsʋlʋŋ, 74a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 75a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna lɛ dɩ ba kaa sʋl kʋnyɩgaa Wɩɩsʋlʋŋ, 76a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ, 77arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna dɩ ba kpʋ a sʋl nii-magɛ dɔŋɔ Wɩɩsʋlʋŋ. Ɔkɩraŋ nanʋala Pagɩɛl sɩ kɛŋ Wɩɩsʋllɩ kɩalɩŋ kɔ nɛ ŋɩɩ. 78Tapʋl-fii arɩ balɩa chɛɛŋ, Ɛnaŋ nanʋala Ahɩra sɩ ŋaa Nafɩtalɩ doho nɩaa sɩpaalaara nɛ kɛŋ ʋ Wɩɩsʋlʋŋ kɩaa kɔ. 79Ʋ Wɩɩsʋllɩ kɩaa ʋ sɩ kaa kɔ nɛ ŋ-la: Hɔpʋla pɩrata yuŋuŋ sɩ ŋaa kilo bala arɩ kpaa magɛ dɔŋɔ arɩ hɔpʋla gbaŋa ba sɩ kaa mɩmɩsɛ kɩaa yuŋuŋ sɩ ŋaa mʋa tuo kilo bala. Ba magɩsɛ ba kʋŋkala arɩ ŋɩɩ ba sɩɩ magɩsɛ Wɩa dɩa lɛ nɛ. Ʋ hɛ nʋʋŋ munuŋ sɩ bɩɩ nʋgʋgʋ lɛ a hɛ su ba kʋŋkala dɩ ba kaa sʋl mɩaa Wɩɩsʋlʋŋ, 80a pɛ sɛlɩmɛ gbaŋa yuŋuŋ sɩ bɩ kilo kpaa magɛ dɔŋɔ yie lɛ, ʋ hɛ kʋsʋɔrʋsʋŋ a su, 81a pɛ nɛ-bel-pɔrʋŋ, pie-bele arɩ pie-bel-pɔrʋŋ sɩ yi jɩna lɛ dɩ ba kaa sʋl kʋnyɩgaa Wɩɩsʋlʋŋ, 82a pɛ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ 83arɩ nɛ-belliŋ balɩa, pie-belliŋ banɔŋ, gbuŋgbogusuŋ banɔŋ arɩ pie-bel-pɔrɔɔ banɔŋ sɩ yi jɩna jɩna, dɩ ba kaa sʋl nii-magɛ dɔŋɔ Wɩɩsʋlʋŋ. Ɛnaŋ nanʋala Ahɩra sɩ kɛŋ ʋ Wɩɩsʋllɩ kɩalɩŋ kɔ nɛ ŋɩɩ.
84Mosis sɩ joŋ Wɩɩsʋllɩ nʋʋŋ taa koru-la a sʋl Wɩa hɛ ka Iziral tɩŋŋaa sɩpaalaaraa kɛŋ Wɩɩsʋlʋŋ kɩalɩŋ kɔ ba sʋl Wɩa aŋ joŋ koru-la pɩ Wɩa nɛ ŋ-la: Hɔpʋla pɩrataba fii arɩ balɩa, hɔpʋla gbansɩŋ ba sɩ kaa mɩmɩsɛ kɩaa ma fii arɩ balɩa. Sɛlɩmɛ gbansɩŋ ma fii arɩ balɩa. 85Hɔpʋla pɩrataba-la kʋŋkala yuŋuŋ ŋaa kilo bala arɩ kpaa magɛ dɔŋɔ nɛ, hɔpʋla gbansɩ-la ma kʋŋkala yuŋuŋ ŋaa mʋa tuo kilo bala nɛ. Hɔpʋla pɩrataba-la arɩ gbansɩ-la, dɩ ŋ nɛ kɛŋ ba kala yuŋuŋ pɛ dɔŋɔ, ba ŋaa kilo mara arɩ fii nɛ, arɩ ŋɩɩ ba sɩɩ magɩsɛ Wɩa dɩa lɛ. 86Sɛlɩmɛ gbansɩ-la fii arɩ balɩa ba sɩ hɛ kʋsʋɔrʋsʋŋ su, kʋŋkala yuŋuŋ bɩ kilo kpaa magɛ dɔŋɔ yie. Dɩ ŋ nɛ kɛŋ sɛlɩmɛ gbansɩ-la kala yuŋuŋ pɛ dɔŋɔ, ba bɩ kilo banɔŋ kɩɩ, arɩ ŋɩɩ ba sɩɩ magɩsɛ Wɩa dɩa lɛ. 87Pʋsʋ-la kala ba sɩ kaa ŋaa kʋnyɩgaa Wɩɩsʋlʋŋ ŋaa nɛ-bel-pɔrɔɔ fii arɩ balɩa nɛ, pie-belliŋ ma fii arɩ balɩa, pie-bel-pɔrɔɔ ma sɩ yi jɩna fii arɩ balɩa a saa pɛ ba mɩaa Wɩɩsʋlʋŋ kɩaa lɛ. Wʋbɔŋŋɔɔ Wɩɩsʋlʋŋ gbuŋgbogusuŋ ma ŋaa fii arɩ balɩa nɛ. 88Pʋsʋ-la kala ba sɩ kaa ŋaa nii-magɛ dɔŋɔ Wɩɩsʋlʋŋ, ŋaa nɛ-belliŋ mara arɩ banɛsɛ, pie-belliŋ mahɩŋ batori, gbuŋgbogusuŋ ma mahɩŋ batori arɩ pie-bel-pɔrɔɔ sɩ yi jɩna jɩna ma mahɩŋ batori. Mosis sɩ joŋ Wɩɩsʋllɩ nʋʋŋ tɩsɛ koru-la a sʋl Wɩa hɛ ka ba kɛŋ Wɩɩsʋlʋŋ kɩalɩŋ kɔ dɩ ba joŋ koru-la pɩ Wɩa nɛ ŋɩɩ. 89Mosis sɩ jʋʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ dɩ ʋ bʋl wɩaa La TƖƖNA teeŋ, ʋ nɩɩ La TƖƖNA yikoro Wɩa niiriŋ daga-la nii-tɔlɔ nyuŋ, kɩalɩŋ balɩa sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ. Ŋɩɩ nɛ ʋ dɩ La TƖƖNA bʋl wɩaa.
Currently Selected:
NAMBABA 7: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
