NAMBABA 5
5
Nɩalɩŋ sɩ kɛŋ disiniŋ bɩ maga dɩ ba hɛ lee-la Iziral tɩŋŋaa sɩ hɔnɔ
1La TƖƖNA bʋla pɩ Mosis, 2“Bʋla pɩ Iziral tɩŋŋaa dɩ ba chaarɛ nɩalɩŋ kala sɩ kɛŋ nyanyal choloo ta ma dɩhɔnʋŋ arɩ nɩalɩŋ lɩɩŋ sɩɩ lɩɩ ba faagaa lɛ, koo ba yaraa lee-kala, koo dɩ nʋʋ nɛ digi sʋʋŋ ŋɩɩ leŋ ʋ kɛŋ disiniŋ mɩ teeŋ. 3Dɩ nɩalɩŋ ŋaa baalaa nɛ koo haalaa nɛ, ma sɩ leŋe dɩ ba hɛ ma tʋɔŋ, dɩ ŋɩɩ leŋ dɩ ma dɩhɔnʋŋ kɛŋ disiniŋ, lee-la mɩ sɩ hɛ ma tʋɔŋ.” 4Ŋɩɩ nɛ Iziral tɩŋŋaa chaarɛ nɩdosunu-la ta ba dɩhɔnʋŋ, arɩ ŋɩɩ tɩtɩa La TƖƖNA sɩ dagɛ Mosis.
Dɩ nʋʋ nɛ ŋaa wɩɩ chei ʋ dɔŋɔ, ʋ maga dɩ ʋ tiŋ kʋŋ nɛ
5La TƖƖNA bɩra bʋla pɩ Mosis, 6“Bʋla pɩ Iziral tɩŋŋaa, dɩ baal koo haal nɛ vɩa La TƖƖNA niiŋ, aŋ ŋaa wɩɩ a chei ʋ dɔŋɔ, nɩɩ-la laa cheeriŋ nɛ. 7Ʋ maga dɩ ʋ sɛɩ aŋ suri ʋ niiŋ a bʋl arɩ ʋ cheye nɛ. Ʋ maga dɩ ʋ tiŋ kʋ-la ʋ sɩ maga dɩ ʋ tiŋ nɛ a pɩ nɩɩ-la ʋ sɩ ŋaa wɩɩ-la chei, aŋ ha time daŋ a magɛ time-la ba sɩ kpaa leree banɔŋ a joŋ dɔŋɔ daŋ. 8Ama dɩ nɩɩ-la lɛ ʋ sɩ ŋaa wɩɩ-la chei nɛ sʋba, aŋ bɩ naambii kɛnɛ ʋ sɩ jaŋ tiŋ kɩalɩŋ pa, ʋ maga dɩ ʋ time pɩ mɩ-na ma TƖƖNA nɛ. Ba jaŋ ŋaa Wɩɩsʋllɩ sɩpaalaara kɩaa. Tɩɩna jaŋ pɛ kɛŋ pie-bele kɔ dɩ ba kaa pɩɩsɛ ʋ wʋbɔŋŋɔɔ ta. 9Wɩɩsʋlʋŋ kʋzɔmɔ-la kala Iziral tɩŋŋaa sɩ kaa kʋ pɩmɛ, jaŋ ŋaa Wɩɩsʋllɩ sɩpaalaara kɩaa. 10Wɩɩsʋllɩ sɩpaalaaraa tʋɔŋ kʋŋ na-kala nɛ laa Wɩɩsʋlʋŋ kʋzɔŋŋɔɔ, ba ŋaa ʋ kɩaa nɛ.”
Dɩ baal nɛ bɩɩna arɩ ʋ haala ŋaa hachɔrʋŋ nɛ, ŋɩɩ ʋ sɩ jaŋ ŋaa
11Ŋɩɩ nɛ La TƖƖNA bʋla pɩ Mosis, 12“Bʋla pɩ Iziral tɩŋŋaa, dɩ ba kʋŋ nɛ bɩɩna arɩ ʋ haala berime nɛ a ŋɩŋaa hachɔrʋŋ wɩaa ʋ harɩŋ, 13a bɩɩnɛ arɩ nʋʋ dɔŋ kɛnʋ pɩŋ nɛ ka ʋ bɩ na, nʋʋ ma bɩ pɛ na wɩɩ-la ʋ sɩ ŋaa, nʋʋ ma bɩ ʋ kɛnɛ, 14dɩ baal-la nɛ bɩɩnɛ ŋɩɩ dɩ ʋ yaraa bibieri ʋ haala nyuŋ, ka haal-la bɩ wɩɩ jɩŋ, 15ŋɩɩ-na, ʋ maga dɩ ʋ kɛŋ ʋ haal-la kaa mʋ Wɩɩsʋllɩ sɩpaalaara teeŋ. Ʋ jaŋ pɛ kɛŋ munuŋ gbaŋa kpaa magɛ dɔŋɔ a kaa mʋ a ŋaa Wɩɩsʋlʋŋ haal-la wɩaa. Baal-la bɩ maga dɩ ʋ joŋ nʋʋŋ koo kʋsʋɔrʋsʋŋ a guoli muŋ-la lɛ, bɛɛ wɩaa ʋ ŋaa yarɩ-bieriŋ mɩaa Wɩɩsʋlʋŋ nɛ ʋ chɩchɛ dɩ ʋ ŋaa a pɩa na wʋtɩtɩɩ. 16Wɩɩsʋllɩ sɩpaalaara jaŋ kɛŋ haal-la kɔ dɩ ʋ chɩŋ mɩ-na ma TƖƖNA sɩpaaŋ. 17Ʋ jaŋ joŋ taka a ŋaa mɩ lɩɩzɔmʋŋ hɛ a ŋaa Wɩa dɩ-zɔŋ-la tinteeŋ hagɩla a hɛ lɩɩ-la lɛ. 18Haal-la sɩ chɩŋ mɩ sɩpaaŋ ŋɩɩ, dɩ ʋ nɛ vɔɔ ʋ nyuŋ, Wɩɩsʋllɩ sɩpaalaara jaŋ kaa puri, aŋ joŋ yarɩ-bieriŋ mɩaa Wɩɩsʋlʋŋ muŋ-la a hɛ ʋ nɩsɩŋ lɛ, ka dɩ ʋ tɩtɩa kori lɩɩ-la ba sɩ jaŋ kaa kalɩbɛ. 19Wɩɩsʋllɩ sɩpaalaara jaŋ bʋla pɩ haal-la, ‘La jaŋ kalɩbɛ, dɩ baal dɔŋ nɛ bɩŋ jɩŋ, lɩɩŋ deeŋ bɩ jaŋ ŋaaŋ wʋbɔŋ kala, 20ama dɩ ŋ nɛ lɩɩ ŋ bala harɩŋ a ŋaa disiniŋ, wɩɩ jaŋ ŋaa ŋ lɛ.’ 21Wɩɩsʋllɩ sɩpaalaara jaŋ kalɩbɛ ŋ-la a hɛ haal-la lɛ: ‘La TƖƖNA jaŋ leŋ dɩ kalɩbɩŋ deeŋ diiŋ ŋ nɩaa sɩɩŋ lɛ, ŋ lʋla jaŋ kʋʋrɛ, dɩ ŋ luoruŋ su.’ 22Dɩ lɩɩŋ deeŋ la sɩ kaa kalɩbɛ nɛ tuu ŋ tʋɔŋ dɩ ŋ nɛ jɩŋ wɩɩ, wɩalɩŋ sɩ jaŋ ŋaa ŋ lɛ nɛ ŋɩɩ. Dɩ haal-la laa hɛ a bʋl, ‘A leŋ dɩ ŋɩɩ ŋaa, a leŋ dɩ ŋɩɩ ŋaa.’
23Wɩɩsʋllɩ sɩpaalaara jaŋ ŋmʋnsɛ wɩalɩŋ ʋ sɩ kaa kalɩbɛ a hɛ daboro lɛ a chɛsɛ hɛ lɩɩ-la lɛ. 24Ʋ jaŋ leŋ dɩ haal-la joŋ lɩɩ-la a nyʋa. Dɩ ʋ nɛ jɩŋ wɩɩ, kalɩbɩ-na-la jaŋ diiu dɩ ʋ chaasa na hɛɛŋ. 25Wɩɩsʋllɩ sɩpaalaara jaŋ laa yarɩ-bieriŋ mɩaa Wɩɩsʋlʋŋ muŋ-la haal-la teeŋ, a kaa zaarɛ mɩ-na ma TƖƖNA sɩpaaŋ, aŋ kaa mʋ koru-la teeŋ. 26Ʋ jaŋ ŋaa mɩaa Wɩɩsʋlʋŋ muŋ-la nɩsɩŋ sɩɩŋ, mɩ-na ma TƖƖNA dɩ-diiliŋ a nyɩgɛ koru-la nyuŋ. Ʋ ŋɩɩ harɩŋ lɛ ʋ jaŋ leŋ dɩ haal-la nyʋa lɩɩ-la. 27Dɩ ʋ nɛ bɩ wʋtɩtɩɩ kɛnɛ ʋ bala teeŋ, aŋ ŋaa disiniŋ, ʋ sɩ nyʋa lɩɩ-la ba sɩ kaa kalɩbɛ ŋɩɩ, kalɩbɩ-na-la jaŋ diiu ʋ nɩaa sɩɩŋ lɛ, dɩ ʋ chaasa na hɛɛŋ, ʋ luoruŋ jaŋ su, dɩ ʋ lʋla kʋʋrɛ. 28Ama dɩ haal-la nɛ bɩ disiniŋ kɛnɛ, wɩɩkala bɩ jaŋ ŋaa ʋ lɛ, ʋ ha jaŋ wuo lʋlʋl biiriŋ.
29Wombii-la sɩ maga dɩ ba to dɩ haal nɛ kɛŋ bala dɩ ʋ bala bɩɩnɛ arɩ ʋ haal-la lɩɩ ʋ harɩŋ a ŋɩŋaa disiniŋ nɛ, 30koo dɩ ʋ yaraa nɩɩ bieri ʋ haala nyuŋ a tɩŋ ʋ sɩ bɩɩna arɩ ʋ haala bɩ tɛŋɛ lɛ chɩna, ʋ jaŋ kɛnʋ mʋ Wɩɩsʋllɩ sɩpaalaara teeŋ dɩ ʋ leŋ dɩ haal-la chɩŋ mɩ-na ma TƖƖNA sɩpaaŋ dɩ ʋ joŋ wombiiŋ deeŋ to ʋ lɛ. 31Baal-la bɩ wɩɩkala cheye dɩ ʋ nɛ ŋaa ŋɩɩ, ama haal-la nɛ jaŋ laa cheeriŋ dɩ ʋ nɛ jɩŋ wɩɩ. Ʋ jaŋ na hɛɛŋ ʋ wʋbɔŋ-la bʋbʋɔŋ lɛ.”
Currently Selected:
NAMBABA 5: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
