NAMBABA 3
3
Levi doho nɩaa
1Bʋa-la lɛ La TƖƖNA sɩ bʋl wɩaa pɩ Mosis Sɩnaɩ peel-la nyuŋ, dɩ Arɔŋ arɩ Mosis dɩa nɩaa nɛ ŋ-la: 2Arɔŋ hambolibiisiŋ yɩraa nɛ fa: Nadab, ʋ bii-hɩaŋ, Abihu, Elieza arɩ Ɩtama. 3Arɔŋ hambolibiisiŋ deemba nɛ ba joŋ Wɩɩsʋllɩ nʋʋŋ tɩsɛ a jomba hɛ Wɩa nɩsɩŋ lɛ dɩ baa tɩŋ Wɩɩsʋllɩ sɩpaalaaraa tɩntɩŋŋaa. 4Ama Nadab arɩ Abihu-na tel La TƖƖNA sɩpaaŋ nɛ a sʋʋ Sɩnaɩ tintee-hɩlɩɩ-la lɛ, bʋa-la ba sɩ nyɩgɛ Wɩɩsʋlʋŋ kɩaa pɩ La TƖƖNA, ka ʋ bɩ ba ŋɩɩ daga. Nadab arɩ Abihu fa bɩ biiriŋ lʋla, ŋɩɩ wɩaa ba nyɩmma Arɔŋ mɩɩsɩŋ lɛ Elieza arɩ Ɩtama dʋndʋŋa nɛ faa tɩŋ Wɩɩsʋllɩ sɩpaalaaraa tɩntɩŋŋaa.
5Ŋɩɩ nɛ La TƖƖNA bʋla pɩ Mosis, 6“Lɩɩsɛ Levi doho nɩaa dɩ ba pɛ Wɩɩsʋllɩ sɩpaalaara Arɔŋ lɛ dɩ ba tɩtɩŋ. 7Ba nɛ jaŋ tɩtɩŋ Wɩa dɩ-zɔŋ-la tɩntɩŋŋaa lɛbɩ-la lɛ mɩ sɩ yie kɔ Iziral tɩŋŋaa teeŋ aa pɩ Arɔŋ arɩ Iziral tɩŋŋaa kala. 8Ba nɛ maga dɩ ba bibeŋ lɛbɩ-la lɛ mɩ sɩ yie kɔ Iziral tɩŋŋaa teeŋ kpɩɛraa kala, a tɩtɩŋ tɩntɩmɩa-la kala Iziral tɩŋŋaa fa sɩ maga dɩ ba tɩtɩŋ Wɩa dɩ-zɔŋ-la lɛ. 9Joŋ Levi tɩmma-la a hɛ Arɔŋ arɩ ʋ hambolibiisiŋ nɩsɩŋ lɛ. Ba nɛ ŋaa Iziral tɩmma-la ŋ sɩ jaŋ jomba arɩ ba wɩɩkala hɛ Arɔŋ nɩsɩŋ lɛ. 10Lɩɩsɛ Arɔŋ arɩ ʋ hambolibiisiŋ dɩ ba nɛ tɩtɩŋ Wɩɩsʋllɩ sɩpaalaaraa tɩntɩŋŋaa. Dɩ nɩwogo nɛ chɛbɛ a chɩchɛ ʋ tɩŋ tɩntɩmɩa-la ba sɩɩ tɩŋ, ʋ maga dɩ ma kpʋʋ nɛ.”
11La TƖƖNA bɩra bʋla pɩ Mosis, 12“Mɩ lɩɩsɛ Levi doho nɩaa nɛ Iziral tɩŋŋaa tʋɔŋ dɩ ba nɛ chɩŋ Iziral tɩŋŋaa haal na-kala hambolibii bumbuŋ nyuŋ. Mɩ nɛ tɩɩ Levi doho nɩaa, 13bɛɛ wɩaa hambolibii bumbumba kala ŋaa mɩ kɩaa nɛ. Bʋa-la lɛ mɩ sɩ kpʋ Ijipiti tɩŋŋaa hambolibii bumbumba, mɩ lɩɩsɛ Iziral tɩŋŋaa hambolibii bumbumba nɛ dɩ ba ŋaa mɩ kɩaa, nuhuobiinee arɩ pʋsʋŋ kala. Mɩ nɛ ma TƖƖNA.”
14La TƖƖNA bɩra bʋla pɩ Mosis Sɩnaɩ tintee-hɩlɩɩ-la lɛ, 15“Dɩɩsɛ Levi doho nɩaa doho doho arɩ dɩa dɩa. Dɩɩsɛ baal na-kala sɩ yi chɛnɛ koo a kɩɩ ŋɩɩ.” 16Ŋɩɩ nɛ Mosis dɩɩsɛba arɩ La TƖƖNA sɩ dagʋ ŋɩɩ. 17Levi hambolibiisiŋ yɩraa nɛ ŋ-la: Gɛsɔŋ, Kohaf arɩ Mɛrarɩ. 18Gɛsɔŋ doho nɩaa nɛ ŋ-la: Libini arɩ Sɩmɛɩ. 19Kohaf doho nɩaa nɛ: Amɩram, Ɩzɩha, Hɛbʋrɔŋ arɩ Ʋzɩɛl. 20Mɛrarɩ tɩŋŋaa doho nɩaa nɛ: Mali arɩ Musi. Levi doho nɩaa dɩa dɩa nɛ ŋɩɩ.
21Gɛsɔŋ doho nɩaa nɛ ŋaa Libini tɩŋŋaa arɩ Sɩmɛɩ tɩŋŋaa. 22Baala-la kala ba sɩ dɩɩsa sɩ yi chɛnɛ koo a kɩɩ ŋɩɩ, ba ŋaa nɩaa bʋɩ balɩpɛ arɩ zɔɔ-banɔŋ nɛ. 23Gɛsɔŋ doho nɩaa nɛ maga dɩ ba ŋmoo ba buguŋ Wɩa dɩ-zɔŋ-la harɩŋ wɩɩjʋʋlʋŋ dɩɩrɩŋ. 24Gɛsɔŋ tɩŋŋaa doho nɩalɩŋ sɩpaalaara nɛ ŋaa Laal nanʋala Ɛlɩasaf. 25Lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, Gɛsɔŋ tɩmma-la nɩɩ beŋ Wɩa dɩ-zɔŋ-la arɩ ʋ lɛbɩŋ arɩ kɩalɩŋ kala sɩɩ tɔ lɛbɩ-la nyuŋ, a pɛ patɩɩsaŋ-la sɩ kɛrɛ ʋ boiŋ niiŋ lɛ, 26arɩ lɩga-la sɩ golli Wɩa dɩ-zɔŋ-la patɩɩsamba arɩ patɩɩsaŋ-la sɩ kɛrɛ lɩga-la boiŋ niiŋ, arɩ koru-la, ŋmɛsɩŋ, arɩ kɩalɩŋ kala sɩ pɛ kɩaa deemba lɛ ba kaa tɩtɩŋ.
27Kohaf doho nɩaa nɛ ŋaa Amɩram tɩŋŋaa, Iziha tɩŋŋaa, Hɛbʋrɔŋ tɩŋŋaa arɩ Ʋzɩɛl tɩŋŋaa. 28Ba sɩ dɩɩsɛ ba baala-la kala sɩ yi chɛnɛ koo a kɩɩ ŋɩɩ, ba ŋaa nɩaa bʋɩ chori arɩ zɔɔ-balɩdʋ nɛ. Kohaf tɩmma-la nɩɩ beŋ Wɩa dɩ-zɔŋ-la dɩ-zɔmʋŋ. 29Kohaf tɩŋŋaa doho nɩalɩŋ nɛ maga dɩ ba ŋmoo ba buguŋ Wɩa dɩ-zɔŋ-la wɩɩpɔsʋŋ nadiiŋ dɩɩrɩŋ. 30Ba sɩpaalaara nɛ ŋaa Ʋzɩɛl nanʋala Elizafaŋ. 31Ba nɩɩ beŋ Wɩa niiriŋ daga-la, teebʋl, chaaŋ daaŋ, korunu-la, Wɩa dɩa tɩntɩnnɩ kɩaa, patɩɩsaŋ-la sɩ kɛrɛ Wɩa dɩ-zɔŋ-la, lee-la zɔmʋŋ sɩ bɩ magɩa kɛnɛ arɩ kɩalɩŋ kala sɩ pɛ kɩaa deemba lɛ ba kaa tɩtɩŋ. 32Levi doho nɩaa sɩpaalaarɩ-hɩaŋ nɛ ŋaa Elieza, Wɩɩsʋllɩ sɩpaalaara Arɔŋ nanʋala. Ʋ nɛ ba lɩɩsɛ ʋ ŋaa nɩalɩŋ sɩɩ beŋ Wɩa dɩ-zɔŋ-la dɩ-zɔmʋŋ kʋhɩaŋ.
33Mɛrarɩ doho nɩaa nɛ ŋaa Mali tɩŋŋaa, arɩ Musi tɩŋŋaa. 34Ba sɩ dɩɩsɛ ba baala-la kala sɩ yi chɛnɛ koo a kɩɩ, ba ŋaa nɩaa bʋɩ balɩdʋ arɩ zɔɔ-balɩa nɛ. 35Ba sɩpaalaara nɛ fa ŋaa Abɩhɛɛl nanʋala Zʋrɩɛl. Ba nɛ maga dɩ ba ŋmoo ba buguŋ Wɩa dɩ-zɔŋ-la wɩɩpɔsʋŋ nagʋa. 36Mɛrarɩ tɩmma-la nɛ ba lɩɩsɛ ba bibeŋ Wɩa dɩ-zɔŋ-la daapɛsɩŋ, daa-gɛsɛɛ, daaterigeba, hɔ-taalɩŋ arɩ ba tɩntɩnnɩ kʋŋ na-kala, 37a saa pɛ lɩga-la sɩ golli Wɩa dɩ-zɔŋ-la daapɛsɩŋ, hɔ-taalɩŋ, lɛbɩ-la daapɛ-biisiŋ arɩ ŋmɛsɩŋ lɛ.
38Mosis arɩ Arɔŋ arɩ ʋ hambolibiisiŋ nɛ jaŋ ŋmoo ba buguŋ Wɩa dɩ-zɔŋ-la wɩɩpɔsʋŋ dɩɩrɩŋ, lɛbɩ-la lɛ La TƖƖNA sɩ yie kɔ Iziral tɩŋŋaa teeŋ sɩpaaŋ. Ba nɛ jaŋ tɩtɩŋ Wɩa dɩ-zɔŋ-la dɩ-zɔmʋŋ tɩntɩŋŋaa a pɩpɩ Iziral tɩŋŋaa. Dɩ nɩwogo nɛ mʋ kpagɛ lee-la, ʋ maga dɩ ma kpʋʋ nɛ.
39La TƖƖNA sɩ leŋe Mosis arɩ Arɔŋ dɩɩsɛ Levi doho nɩaa doho doho, baala-la kala sɩ yi chɛnɛ koo a kɩɩ ŋɩɩ, ba ŋaa nɩaa bʋɩ mara arɩ balɩa nɛ.
40Ŋɩɩ nɛ La TƖƖNA bʋla pɩ Mosis, “Dɩɩsɛ Iziral tɩŋŋaa hambolibii bumbumba kala sɩ yi chɛnɛ koo a kɩɩ ŋɩɩ, a ŋmʋnsɛ ba yɩraa. 41Joŋ Levi doho nɩaa pɩmɛ dɩ ba nɛ chɩŋ Iziral tɩŋŋaa hambolibii bumbumba nyuŋ, aŋ joŋ Levi doho nɩaa pʋsʋŋ ma pɩmɛ dɩ ba ma chɩŋ Iziral tɩŋŋaa pʋsʋŋ bii-bumbumba nyuŋ. Mɩ-na nɛ ma TƖƖNA.”
42Ŋɩɩ nɛ Mosis dɩɩsɛ Iziral tɩŋŋaa hambolibii bumbumba kala arɩ La TƖƖNA sɩ dagʋ ŋɩɩ. 43Hambolibiisi-la sɩ yi chɛnɛ koo a kɩɩ ŋɩɩ kala nɛ ba dɩɩsɛ a ŋmʋnsɛ ba yɩraa. Ba fa ŋaa nɩaa bʋɩ mara arɩ balɩa arɩ zɔɔ-balɩa arɩ mahɩŋ batori arɩ fii arɩ batori nɛ.
44La TƖƖNA bɩra bʋla pɩ Mosis, 45“Joŋ Levi doho nɩaa hɛ Iziral tɩŋŋaa hambolibii bumbumba nyuŋ, aŋ joŋ ba pʋsʋŋ ma hɛ Iziral tɩŋŋaa pʋsʋŋ bii-bumbumba nyuŋ. Levi doho nɩaa maga ba ŋaa mɩ nɩaa nɛ. Mɩ nɛ ma TƖƖNA. 46Iziral tɩŋŋaa hambolibii bumbumba sɩ kɩɩ Levi doho nɩaa arɩ nɩaa zɔɔ-balɩa arɩ mahɩŋ batori arɩ fii arɩ batori ŋɩɩ, dɩ ŋ nɩɩ chɛ ŋ time laaba, 47ʋ maga dɩ ŋ laa nʋʋkala nyuŋ warɩpʋla banɔŋ nɛ, a magɛ ŋɩɩ ba sɩɩ laa Wɩa dɩa lɛ. 48Joŋ moribie-la ba sɩ joŋo time laa Iziral tɩŋŋaa hambolibii bumbumba-la sɩ daŋa, a pɩ Arɔŋ arɩ ʋ hambolibiisiŋ.” 49Ŋɩɩ nɛ Mosis laa moribie-la Iziral tɩŋŋaa hambolibii bumbumba-la sɩ daŋa nyuŋ. 50Moribie-la kala ŋaa warɩpʋla bʋɩ arɩ zɔɔ-batori arɩ mahɩŋ batori arɩ banɔŋ nɛ a magɛ ŋɩɩ ba sɩɩ laa Wɩa dɩa lɛ. 51Ŋɩɩ nɛ Mosis joŋ moribie-la kala a pɩ Arɔŋ arɩ ʋ hambolibiisiŋ arɩ La TƖƖNA sɩ dagʋ ŋɩɩ.
Currently Selected:
NAMBABA 3: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
