Matiu 22

Yesu magɛ namaga a tɩgɛ hajaarɩ gbiele kʋdiilee lɛ

Luuk 14.15-24

1Ŋɩɩ nɛ Yesu bɩra magɛ namaga dɔŋɔ a dɩdagɛ nɩaa. 2Ʋ sɩ, “Wɩa kuorii-la nagɛ kuoru kʋbala bie sɩ jaa haala nɛ. Ŋɩɩ nɛ ʋ ŋaa ba gbigbieli hajaarɩ gbiele a ŋaa ba yɩrɛ nɩaa dɩ ba kɔ gbiele-la. 3Ba sɩ ŋaa kʋdiile-la dɛrɛ, ʋ tɩŋ ʋ tɩntɩnnaa dɩ ba mʋ yɩrɛ nɩalɩŋ ʋ sɩ yɩra arɩ ba ŋaa siri nɛ dɩ ba gbieli gbiele-la. Ba sɩ mʋ yɩrɛba, ba vɩa.

4Ŋɩɩ nɛ ʋ bɩra tɩŋ ʋ tɩntɩnnaa dɔnsʋŋ dɩ ba mʋ bʋla pɩ nɩalɩŋ ʋ sɩ yɩra arɩ ba kpʋ nɛ-belliŋ arɩ nɛ-nɩɩnɩŋ kala nɛ a ŋaa kʋdiile-la dɛrɛ, dɩ ba kɔ hajaarɩ gbiele-la. 5Ŋɩɩ nɛ nɩalɩŋ ʋ sɩ yɩra bɩra vɩa dɩ ba mʋ aŋ tɩtɩŋ ba tɩntɩŋŋaa. Dɔŋɔ sii mʋ ʋ baga, dɔŋɔ ma sii mʋ ʋ kɩaa dɩ-yallɩŋ. 6Ka dɔnsʋŋ ma kɛsɛ kuoro dɩa tɩntɩnna-la a ŋmooba aŋ kpʋba. 7Ŋɩɩ nɛ kuoru-la na baanɩŋ a ta ʋ laalɩyuoroo, ba mʋ kpʋ nɩalɩŋ sɩ kpʋ ʋ dɩa tɩntɩnna-la aŋ nyɩgɛ ba tabalɩŋ kala.

8Ŋɩɩ nɛ ʋ yɩrɛ ʋ tɩntɩnnaa dɔnsʋŋ a bɩra bʋla pɩba, ‘Mɩ gbiele kʋdiile-la ŋaa siri nɛ, ama nɩalɩŋ mɩ sɩ yɩra bɩ maga dɩ ba kɔ gbiele-la. 9Má saa lɩɩ mʋ womporunuŋ a yɩrɛ nɩalɩŋ kala ma sɩ na nɩmɛ a bʋla pɩba dɩ ba kɔ a dii kʋdiile-la.’ 10Ŋɩɩ nɛ tɩntɩnna-la lɩɩ womporunu-la a yɩrɛ nɩalɩŋ kala ba sɩ na lee-la, nɩzɔŋŋɔɔ arɩ nɩbɔŋŋɔɔ kala. Ŋɩɩ nɛ ba kala kʋ jʋʋ su dɩa-la lɛ ba fa sɩɩ gbieli gbiele-la.

11Ŋɩɩ nɛ kuoru-la jʋʋ dɩ ʋ na nɩalɩŋ sɩ kɔ a na baal kʋbala dɩ ʋ bɩ hajaarɩ gbiele gɛrɩŋ laala. 12Ʋ pɩɛsʋ, ‘Mɩ nandɔŋ, ɛɛ nɛ ŋ ŋaa kʋ jʋʋ daha aŋ bɩ hajaarɩ gbiele gɛrɩŋ laala?’ Baal-la bɩ wɩɩ kɛnɛ dɩ ʋ bʋl.

13Ŋɩɩ nɛ kuoru-la bʋla pɩ ʋ tɩntɩnnaa, ‘Má kɛŋ baala deeŋ a vɔɔ ʋ nɩsaa arɩ ʋ naasɩŋ a joŋu yuo ta jeeŋ harɩŋ birimiŋ tʋɔŋ dɩ ʋ pɩna yiyel aŋ chɩchaŋ ʋ nyɩlaa.’ ” 14Ŋɩɩ nɛ Yesu bʋl, “Ba yie yɩrɛ nɩaa yʋgɛ nɛ, ama ba tʋɔŋ ba yie tʋɔsɛ nɩaa baŋmɛnɛ nɛ.”

Ba bʋl lampoo timiŋ wɩaa

Maak 12.13-17; Luuk 20.20-26

15Ŋɩɩ nɛ Farisii tɩŋŋaa sii lɩɩ a vʋʋrɛ ŋɩɩ ba sɩ jaŋ magɩsɛ Yesu a bɛrɛ kɛnʋ arɩ wʋpɩɛsaa. 16Ŋɩɩ nɛ ba tɩŋ ba harɩ-tooroo dɔnsʋŋ arɩ Hɛrɔd ma harɩ-tooroo dɔnsʋŋ dɩ ba mʋ Yesu teeŋ. Ŋɩɩ nɛ ba kɔ ʋ teeŋ a pɩɛsʋ, “La kʋhɩaŋ, la jɩma dɩ ŋ kɛŋ wʋtɩtɩɩ nɛ a dɩdagɛ Wɩa tonuŋ wombii-tɩtɩɩ-la. Ŋ sɩpaaŋ tuo nʋʋ lɛ. Ŋ bɩ nɩbal sɩɩ ka fá. 17Saa bʋla pɩla, ʋ ŋaa wombii nɛ a magɛ la tiŋ lampoo a pɩ Rom tinteeŋ kuoru-balɩŋ ba sɩɩ yɩrɛ Siiza? Ɛɛ nɛ ŋ ma bɩɩnɛ?” 18Yesu fa jɩŋ ba tʋɔbɩɩŋ bɔmɔ-la nɛ a bʋla pɩba, “Ma kanfugi tɩmma! Bɛɛ nɛ tɩɩ maa magɩsɛmɛ? 19Má kɛŋ moribii-la ma sɩ kaa titiŋ lampoo kɔ dɩ mɩ bee na.” 20Ba kɛŋ dɔŋɔ kaa kɔ. Ŋɩɩ nɛ ʋ pɩɛsɛba, “Kʋbɛɛ nyuŋ nɛ hɛ nɩmɛ? Kʋbɛɛ yɩrɩŋ ma nɛ ba tuuro hɛ moribii-la lɛ?” 21Ŋɩɩ nɛ ba bʋl dɩ Siiza yɩrɩŋ nɛ. Ʋ bʋla pɩba, “Tɔɔ, má joŋ Rom tinteeŋ kuori-bal-la kɩaa pʋ aŋ joŋ Wɩa ma kɩaa pʋ.” 22Yesu sɩ bʋl ŋɩɩ, ʋ ŋaaba wʋkpuŋkpere ba sii viiri.

Ba pɩɛsɛ Yesu a tɩgɛ nɩalɩŋ sɩ sʋba lɛ

Maak 12.18-27; Luuk 20.27-40

23Chɛɛ-la tɩtɩa nɩalɩŋ dɔnsʋŋ ba sɩɩ yɩrɛ Saduusi tɩŋŋaa, ba kɔ ʋ teeŋ. Saduusi tɩŋŋaa yie bʋl dɩ nʋʋ nɛ sʋba, ʋ bɩra bɩ jaŋ sii. Ba kɔ a pɩɛsʋ wɩaa, 24“La kʋhɩaŋ, Mosis fa sɩ dɩ baala nɛ jaa haala, dɩ haal-la arɩ baal-la nɛ bɩ bii lʋla, aŋ ka dɩ baal-la sʋʋ, ʋ maga dɩ ʋ ŋaana joŋ yo-haal-la jaa nɛ. Dɩ ʋ lʋl biiriŋ pɩ ʋ maala-la sɩ sʋba, biiri-la jaŋ chɩŋ ʋ nyuŋ lɛ. 25Naambiiriŋ balɩpɛ nɛ fa hɛ la tʋɔŋ, ba kala ŋaa baalaa nɛ. Ba kʋhɩaŋ jaa haala. Ʋ dɩ haal-la bɩ bii lʋla, aŋ ka ʋ sʋʋ. Ʋ sɩ sʋba, ʋ ŋaana dɔŋɔ joŋ haal-la jaa. 26Lɩamɩŋ ma sʋʋ. Torimuŋ tɩɩna ma joŋ haal-la jaa. Ʋ ma ŋɩɩ tɩtɩa nɛ. Naambiiri-la balɩpɛ kala nɛ jaa haal-la. Ʋ bɩ lʋla. 27Ŋɩɩ harɩŋ lɛ nɛ haal-la ma tɩtɩa sʋʋ. 28Tapʋlɩɩ-la nɩaa sɩ jaŋ sii sʋʋŋ lɛ, baalaa deemba balɩpɛ tʋɔŋ, kʋbɛɛ nɛ jaŋ tɩɩ haal-la? Ba kala balɩpɛ nɛ jaaʋ.”

29Ŋɩɩ nɛ Yesu bʋla pɩba, “Ma bɩ Wɩa teniŋ jɩŋ. Ma bɩ Wɩa doluŋ jɩŋ. Ŋɩɩ nɛ tɩɩ ma yeŋŋi. 30Tapʋlɩɩ-la nɩaa sɩ jaŋ sii sʋʋŋ lɛ, baalaa bɩra bɩ jaŋ jaa haalaa, haalaa ma bɩra bɩ jaŋ jaa balaba. Ba kala jaŋ nagɛ Wɩa tɩndaaraa sɩ hɛ Wɩa-jaŋ lɛ.” 31Ŋɩɩ nɛ Yesu bʋla pɩba, “Na ma pɩɛsɛmɛ nɩalɩŋ sɩ jaŋ sii sʋʋŋ lɛ wɩaa nɛ. Ma bɩ wɩalɩŋ Wɩa fa sɩ bʋla pɩ nɩaa ʋ teniŋ lɛ karɩmaa? Abɩraham arɩ Aɩzɩk arɩ Jekɔb sʋʋŋ harɩŋ lɛ, Wɩa fa sɩ, 32‘Mɩ nɛ ŋaa Abɩraham, Aɩzɩk arɩ Jekɔb Wɩa.’ Wɩa ŋaa nɩweyee Wɩa nɛ, ʋ bɩ nɩsʋʋnʋŋ Wɩa ŋaa.” 33Nɩ-daŋ-la sɩ nɩɩ ŋɩɩ ʋ sɩɩ dagɛ wɩaa, ʋ ŋaaba wʋkpuŋkpere.

Wɩalɩŋ sɩ maga dɩ la ŋɩŋaa, ba tʋɔŋ wʋbalɩŋ

Maak 12.28-34; Luuk 10.25-28

34Farisii tɩŋŋaa sɩ nɩa arɩ Yesu bʋl wɩaa lo Saduusi tɩŋŋaa ba ŋaa fʋɩɩ, ba kala kʋ pɛ dɔŋɔ lɛ. 35Ŋɩɩ nɛ Wɩa teniŋ kerichiba dɔŋɔ wʋwalɩmɛ dɩ ʋ magɩsɛ Yesu a pɩpɩɛsʋ wɩaa. 36Ʋ pɩɛsɛ Yesu a bʋl, “Kʋhɩaŋ, wɩalɩŋ Wɩa sɩ dagɛ nɩaa baa to, wʋbɛɛ nɛ ŋaa ba tʋɔŋ sɩɩfɩaŋ wɩɩŋ?” 37Ŋɩɩ nɛ Yesu bʋl, “Kɛŋ ŋ tʋɔŋ arɩ ŋ wɩɩ-wɩɩkala a cho ŋ Tɩɩna Wɩa. 38Wɩalɩŋ Wɩa sɩ dagɛ nɩaa baa to, ba tʋɔŋ wʋbalɩŋ arɩ ba tʋɔŋ bumbuŋ nɛ ŋɩɩ arɩ ba tʋɔŋ sɩɩfɩaŋ wɩɩŋ nɛ ŋɩɩ. 39Wʋlɩamɩŋ ma nɛ ŋ-la: ‘Cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.’ 40Wɩalɩŋ Mosis fa sɩ ŋmʋnsa bil dɩ nɩaa tuto arɩ wɩalɩŋ kala Wɩa wʋlaabʋllaa sɩɩ bʋl, ba kala lɩɩ wɩaa deemba balɩamɩŋ tʋɔŋ nɛ.”

Ba pɩɛsɛ Kirisito wɩaa

Maak 12.35-37; Luuk 20.41-44

41Farisii tɩŋŋaa ha sɩ hilimi ŋɩɩ, Yesu ma pɩɛsɛba, 42“Bɛɛ nɛ maa bɩɩnɛ a mʋʋ tɩgɛ Kirisito, nɩɩ-la Wɩa sɩ lɩɩsa wɩaa? Kʋbɛɛ doho nʋʋ nɛ ʋ ŋaa?” Ŋɩɩ nɛ ba bʋl dɩ ʋ ŋaa Devit doho nʋʋ nɛ. 43Ŋɩɩ nɛ Yesu bɩra pɩɛsɛba, “Bɛɛ nɛ saa tɩɩ Wɩa Dɩŋ-zɔmʋŋ fa dagɛ Devit dɩ ʋ kɛnʋ yɩrɛ ʋ Tɩɩna? 44Ŋ-la nɛ ʋ bʋl:

‘La Tɩɩna bʋla pɩ mɩ Tɩɩna

dɩ ʋ hɔŋ ʋ nadiiŋ, nɩduoŋ dɩhɔnʋŋ,

see dɩ ʋ yuo dii ʋ dʋndɔŋŋɔɔ kala dɛrɛ.’

45Devit tɩtɩa sɩ yɩrɛ nɩa deeŋ ʋ Tɩɩna, ɛɛ nɛ saa ʋ jaŋ wuo ŋaa ʋ nihii dʋndʋŋ?” 46Yesu sɩ bʋl ŋɩɩ, nʋʋkala bɩra bɩ wɩɩ wuo bʋl. A chɩŋ tapʋlɩɩ-la kala a kaa mʋ, nʋʋkala bɩra bɩ nyuduoŋ kɛnɛ dɩ ʋ pɩɛsʋ wɩɩkala.

Currently Selected:

Matiu 22: SIS

Highlight

Copy