Matiu 19

Yesu dagɛ nɩaa dɩ ba sɩ́ ba haalaa vɩa

Maak 10.1-12

1Yesu sɩ bʋl wɩaa deemba dɛrɛ, ʋ lɩɩ Galilii tinteeŋ a mʋ Judiya tinteeŋ a chol Jɔdaŋ fuo-la. 2Nɩ-daŋ bɩra to ʋ harɩŋ. Ŋɩɩ nɛ ʋ vaarɛ nɩalɩŋ sɩɩ wɩɩlʋ nɩmɛ.

3Ŋɩɩ nɛ Farisii tɩŋŋaa dɔnsʋŋ ma sii kɔ ʋ teeŋ a chɩchɛ dɩ ba magɩsʋ a pɩɛsʋ, “Dɩ ŋ kɛŋ wɩɩ a tɩgɛ ŋ haala lɛ a chɩchɛ ŋ vɩaʋ, ʋ ŋaa wombii nɛɛ?” 4Yesu mɩɩra pɩɛsɛba, “Ma bɩ karɩma arɩ bʋa-la lɛ Wɩa sɩ bugumo ŋaa dʋnɩa, nɩalɩŋ ʋ sɩ ŋaa, ba fa ŋaa baal arɩ haal nɛɛ? 5Ŋɩɩ nɛ tɩɩ baala jaŋ leŋ ʋ nyɩmma arɩ ʋ naaŋ aŋ ka ʋ dɩ ʋ haala mɛrɛ dɔŋɔ lɛ. Nɩaa deemba balɩa jaŋ kɛŋ chal-bala. 6Ba bɩra bɩ jaŋ ŋaa nɩaa balɩa, see kʋbala. Nɩalɩŋ saa Wɩa sɩ kaa mɛrɛ dɔŋɔ lɛ, ʋ bɩ maga dɩ nuhuobiine kɛmba pɔrɛ dɔŋɔ lɛ.” 7Ŋɩɩ nɛ ʋ harɩ-tooro-la bɩra pɩɛsʋ wɩɩŋ deeŋ, “Bɛɛ nɛ saa tɩɩ Mosis fa sɩ dɩ baala nɩɩ chɛ ʋ vɩa ʋ haala, dɩ ʋ laa sɩpaaŋ a ŋmʋnsɛ teniŋ a pɩ haal-la aŋ-na vɩaʋ?” 8Ŋɩɩ nɛ Yesu bɩra bʋla pɩba, “Ma tʋɔŋ dolie. Ŋɩɩ nɛ tɩɩ Mosis fa sɛɩ dɩ ma vɩa ma haalaa. Ama dʋnɩa dɩ-suomuŋ, ba fa bɩ ŋɩɩ ŋaa. 9Mɩ bʋlaa pɩma, baal-na kala sɩ vɩa ʋ haala aŋ bɩra jaa dɔŋɔ, baal-la ŋaa bachɔrʋŋ nɛ, see dɩ haal-la ka ŋaa hachɔrʋŋ wɩaa.”

10Ŋɩɩ nɛ Yesu harɩ-tooro-la bʋla pʋ arɩ ŋɩɩ-na nɛ, ʋ bɩ maga dɩ nʋʋ jaa haal. 11Yesu mɩɩra bʋla pɩba, “Wɩɩŋ deeŋ bɩ naga arɩ nʋʋkala jaŋ wuo ŋaa. Nɩalɩŋ Wɩa sɩ joŋ doluŋ pa, ba dʋndʋŋa nɛ jaŋ wuo ŋaa ŋɩɩ. 12Wɩɩ-la sɩ tɩɩ baalaa bɩ haalaa ka jaa, ba yʋga nɛ. Ba lʋl dɔnsʋŋ ba paala bɩ haalaa wuo pɩŋ. Dɔnsʋŋ ma, nuhuobiinee nɛ ŋaaba ŋɩɩ, dɔnsʋŋ ma bɩ haalaa jaa a tɩŋ Wɩa kuorii-la wɩaa. Nɩɩ-la sɩ jaŋ wuo laa wɩɩŋ deeŋ dii, ʋ sɛɩ.”

Yesu joŋ ʋ nɩsɩŋ daŋ hambiisiŋ lɛ

Maak 10.13-16; Luuk 18.15-17

13Ŋɩɩ nɛ nɩaa sii kɔ Yesu teeŋ a kɛŋ ba hambiisiŋ kaa kɔ dɩ ʋ joŋ ʋ nɩsɩŋ daŋ ba lɛ a chʋɔlɛ Wɩa pɩba. Ŋɩɩ nɛ ʋ harɩ-tooroo kpɩa nɩalɩŋ lɛ. 14Yesu sɩ na ŋɩɩ, ʋ bʋla pɩba, “Má leŋ dɩ hambiisi-la kɔ mɩ teeŋ, má sɩ́ ba kiru! Nɩaa deemba doho nɛ jaŋ jʋʋ Wɩa kuorii-la tʋɔŋ.” 15Ŋɩɩ nɛ ʋ joŋ ʋ nɩsɩŋ daŋ ba lɛ aŋ viiri.

Kɩaa tɩɩna kɔ Yesu teeŋ

Maak 10.17-31; Luuk 18.18-30

16Baal kʋbala ma nɛ sie a kɔ Yesu teeŋ. Ŋɩɩ nɛ ʋ pɩɛsɛ Yesu, “Mɩ kʋhɩaŋ, wʋzɔŋ bɛɛ nɛ mɩ jaŋ ŋaa a kɛŋ mɩɩsɩ-la sɩ bɩ dɛrɛ?” 17Ŋɩɩ nɛ Yesu pɩɛsʋ, “Bɛɛ nɛ tɩɩ ŋ pɩɛsɛmɛ wʋzɔmɔ-la ŋ sɩ jaŋ ŋɩŋaa wɩaa? Nɩbala dʋndʋŋa nɛ zɔmɔ. Dɩ ŋ nɩɩ chɛ dɩ ŋ kɛŋ mɩɩsɩ-la sɩ bɩ dɛrɛ, tuto wɩalɩŋ Wɩa sɩ daga.” 18Ŋɩɩ nɛ baal-la pɩɛsʋ, “Wʋbɛɛba nɛ?” Yesu sɩ, “Sɩ́ nɩaa kpʋ, sɩ́ ŋ dɔŋɔ tɩɩna haala chɛ, sɩ́ gaa, dɩ ŋ nɛ ŋaa pɛ-naarʋ wɩɩ lɛ, sɩ́ wɩaa nyɩɛ pɛ. 19Zizil ŋ nyɩmma arɩ ŋ naaŋ, a cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.” 20Baal-la bʋla pɩ Yesu, “Mɩ kʋhɩaŋ, mɩ to wɩaa deemba kala nɛ. Bɛɛ nɛ saa ka?” 21Yesu bʋla pʋ, “Dɩ ŋ nɩɩ chɛ ŋ ŋaa nɩzɔŋ a sɩ́ wɩɩkala kɛŋ, joŋ ŋ kɩaa kala yallɛ a joŋ moribie-la a pɩ summoo aŋ kʋ tomi. Ŋ nɛ ŋaa ŋɩɩ, ŋ jaŋ kɛŋ kɩaa Wɩa-jaŋ lɛ.” 22Yesu sɩ bʋl ŋɩɩ, baal-la tʋɔŋ chei, ʋ sii viiri, bɛɛ wɩaa ʋ kɛŋ kɩaa nɛ woruŋ.

23Ŋɩɩ nɛ Yesu bʋla pɩ ʋ harɩ-tooroo, “Wʋtɩtɩɩ, mɩ bʋlaa pɩma, ʋ ŋaa wʋduo nɛ arɩ nɩɩ-la sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ. 24Mɩ bɩra bʋlaa pɩma, ʋ bɩ hɛɩ arɩ bʋntaŋŋa sɩ jaŋ wuo to gɛrɩ-hɛmɩŋ bʋa lɩɩ arɩ ʋ sɩ hɛyɛ ŋɩɩ nɩɩ-la sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ.” 25Ʋ harɩ-tooro-la sɩ nɩɩ wɩaa deemba, ba faasa hirigi a pɩɛsɛ Yesu, “Dɩ ʋ nɛ nagɛ ŋ-la, kʋbɛɛ nɛ saa Wɩa jaŋ laa ta?” 26Yesu mɩɩra bemba aŋ bʋl, “Wɩɩ-la sɩ jaŋ kperi nuhuobiine, ʋ bɩ Wɩa wuo kperi. Wɩa wuo wɩɩkala ŋaa nɛ.” 27Ŋɩɩ nɛ Pɩɩta bʋla pʋ, “Na, la-na leŋ la kʋŋkala nɛ aŋ tuto ŋ harɩŋ. Bɛɛ nɛ saa la jaŋ na?” 28Ŋɩɩ nɛ Yesu bʋla pɩ ʋ harɩ-tooro-la, “Wʋtɩtɩɩ nɛ mɩ bʋlaa pɩma, dɩ dʋnɩa falɩɩ-la nɛ yie, mɩ-na Nuhuobiine Bie jaŋ hɔŋ mɩ kuoru kpasa nyuŋ Wɩa pʋlʋmʋŋ tʋɔŋ. Bʋa-la lɛ, ma harɩ-tooroo deemba fii arɩ balɩa-la sɩ to mɩ harɩŋ, ma ma jaŋ hɔŋ kuoru kpasɩnɩŋ fii arɩ balɩa nyuŋ a bibeŋ Iziral tinteyee fii arɩ balɩa-la a dii ba sarɩya. 29Bɩra, nɩɩ-la kala sɩ leŋ ʋ dɩɩsɩŋ koo ʋ naambiiriŋ koo ʋ nyɩmma koo ʋ naaŋ koo ʋ biiriŋ koo ʋ bagɩsɩŋ a tɩŋ mɩ wɩaa, ʋ tɩɩna jaŋ bɩra na kɩaa deemba naansɩɩŋ zɔlɔ, aŋ pɛ kɛŋ mɩɩsɩ-la sɩ bɩ dɛrɛ. 30Ama sɩpaalaaraa yʋga sɩ jaŋ bɩrɩmɛ harɩ-tooroo. Harɩ-tooroo ma yʋga sɩ jaŋ kʋ bɩrɩmɛ sɩpaalaaraa.”

Currently Selected:

Matiu 19: SIS

Highlight

Copy