Matiu 17

Yesu bɩrɩma

Maak 9.2-13; Luuk 9.28-36

1Tapʋlaa balɩdʋ sɩ bala, Yesu kɛŋ Pɩɩta arɩ Jeems arɩ ʋ naambie Jɔɔŋ, ba mʋ peel-bal kʋbala nyuŋ a hɛ nɩmɛ ba dʋndʋŋa. 2Nɩmɛ nɛ Yesu bɩrɩmɛ ba sɩpaaŋ. Ʋ sɩaa kala tʋtʋl a nagɛ wɩɩpɔsʋŋ sɩɩ tʋl ŋɩɩ. Ʋ gɛnnɩŋ ma pʋllɛ a tʋtʋl. 3Ŋɩɩ nɛ Mosis arɩ Ɩlaaja kʋ lɩɩ ba sɩpaaŋ, a bʋbʋl wɩaa Yesu teeŋ. 4Ŋɩɩ nɛ Pɩɩta bʋla pɩ Yesu, “La Tɩɩna, ʋ ŋaa wʋzɔŋ nɛ arɩ la sɩ hɛ daha. Dɩ ŋ nɩɩ chɛ la jaŋ hɛ lɛŋŋɛɛ batori daha, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.” 5Pɩɩta fa ha sɩɩ bʋl wɩaa ŋɩɩ, dɩ duoŋ-bɩlɩmbaanɩŋ kʋ tɔba, ka yikoro kʋbala lɩɩ duoŋ-bɩlɩmbaaŋ-la tʋɔŋ a bʋbʋl, “Mɩ Bii-chooluŋ nɛ ŋ-la. Mɩ tʋɔŋ tɔrɛ ʋ nyuŋ. Má jegile nɩɩ ʋ teeŋ.” 6Yesu harɩ-tooro-la sɩ nɩɩ nɩɩ-la yikoro, fawʋllʋŋ kɛmba, ba tuu tel tinteeŋ. 7Ŋɩɩ nɛ Yesu kɔ ba teeŋ a digiba aŋ bʋla pɩba dɩ ba sii aŋ sɩ́ fawʋllʋŋ fá. 8Ba sɩ sie a beŋ, ba bɩ nʋʋkala na see Yesu dʋndʋŋa.

9Ba sɩ lɩɩ peel-la nyuŋ kʋ tuu, Yesu bʋla pɩba, “Mɩ bɩ chɛ dɩ ma bʋl wɩɩ-la ma sɩ na a pɩ nʋʋkala, see tapʋlɩɩ-la mɩ-na Nuhuobiine Bie sɩ sii sʋʋŋ lɛ.” 10Ŋɩɩ nɛ Yesu harɩ-tooro-la pɩɛsʋ, “Bɛɛ nɛ tɩɩ Wɩa teniŋ kerichiba bʋl dɩ Ɩlaaja nɛ maga ʋ laa sɩpaaŋ kɔ, aŋ ka dɩ Wɩa Bie-na kɔ?” 11Yesu bʋl, “Wʋtɩtɩɩ, Ɩlaaja jaŋ sɛnɛ laa sɩpaaŋ kɔ a kɛŋ kʋŋkala wasa bil. 12Ama mɩ bʋlaa pɩma arɩ Ɩlaaja paala kɔ nɛ, ama nɩaa bɩ wuo jɩmʋ. Ba ŋaaʋ ŋɩɩ kala ba sɩɩ chɛ nɛ. Ŋɩɩ tɩtɩa nɛ ba jaŋ dɔgɩsɛ mɩ-na Nuhuobiine Bie.” 13Ŋɩɩ nɛ ʋ harɩ-tooro-la jɩŋ arɩ Jɔɔŋ Wɩa lɩɩ-fooru-la wɩaa nɛ ʋ bʋl ŋɩɩ.

Yesu kiri jɩŋ-bɔmʋŋ bie lɛ

Maak 9.14-29; Luuk 9.37-43

14Ŋɩɩ nɛ Yesu arɩ ʋ harɩ-tooroo batori-la sii lɩɩ peel-la nyuŋ a kʋ tuu nɩ-daŋ-la teeŋ. Dɩ baal kʋbala kɔ Yesu teeŋ a kpirimi ʋ sɩpaaŋ 15aŋ bʋla pʋ, “Mɩ Tɩɩna, fá mɩ bie nenige, ʋʋ tel kuŋkunsuŋ nɛ. Nyanyalɩɩ-la jʋʋ-ʋ lɛ nɛ woruŋ ʋ nɩna hɛɛŋ, ʋ yie titel nyiniŋ koo lɩɩŋ lɛ. 16Mɩ kɛnʋ kaa kɔ ŋ harɩ-tooroo teeŋ, ama ba bɩ wuo vaarʋ.”

17Ŋɩɩ nɛ Yesu bʋl, “Ma lɛɛlɛ nɩaa deemba, ma bɩ Wɩa laa dii, ma ŋaa nɩbɔmɔ nɛ. Ɛɛ nɛ mɩ jaŋ nyalɩmɛ a diene magɛ ma teeŋ? Kɛŋ bile kaa kɔ mɩ teeŋ.” 18Ŋɩɩ nɛ Yesu bʋl jɩŋ-bɔŋ-la lɛ dɩ ʋ lɩɩ bile lɛ, ʋ lɩɩ. Bile guu duori. 19Ŋɩɩ nɛ Yesu harɩ-tooro-la kɔ ʋ teeŋ a lʋara pɩɛsʋ, “Bɛɛ nɛ tɩɩ la-na bɩ jɩŋ-bɔŋ-la wuo kiri?” 20Ŋɩɩ nɛ Yesu bʋla pɩba, “Ma Wɩa laa diiniŋ bɩ yʋgɛ, ŋɩɩ nɛ tɩɩ. Wʋtɩtɩɩ, mɩ bʋlaa pɩma, dɩ ma Wɩa laa diiniŋ nɛ paala muuri a magɛ kʋ-la ba sɩɩ yɩrɛ masɩtad biiŋ ma, ma fa jaŋ wuo bʋl peeliŋ lɛ dɩ ʋ sii daha a mʋ sɛmɛ dɔŋɔ, ʋ jaŋ sɛnɛ mʋ. Wɩɩkala tuo ma fa bɩ jaŋ wuo ŋaa. [ 21Ama Wɩa bɩ jaŋ pɩma doluŋ dɩ ma wuo kikiri jɩŋ-dosunuŋ deemba, see ma vɔɔ niiŋ aŋ pɛ chʋchʋɔlɛ Wɩa.]”

Yesu bɩra bʋl ʋ sʋʋŋ wɩaa

Maak 9.30-32; Luuk 9.43-45

22Ŋɩɩ nɛ Yesu arɩ ʋ harɩ-tooroo kala kʋ hilimi Galilii lɛ, ʋ bʋla pɩba, “Ba jaŋ kɛŋ mɩ-na Nuhuobiine Bie a hɛ nɩaa nɩsɩŋ lɛ 23dɩ ba kpʋmɛ, ama ŋɩɩ harɩŋ lɛ mɩ jaŋ sii sʋʋŋ lɛ tapʋlaa batori chɛɛŋ a kɛŋ mɩɩsɩŋ.” Ʋ sɩ bʋl ŋɩɩ, ʋ harɩ-tooroo tʋɔŋ chei.

Wɩa dɩa lampoo

24Yesu arɩ ʋ harɩ-tooroo sɩ kɔ Kapɛnam, nɩalɩŋ sɩɩ laa Wɩa dɩa lampoo kɔ Pɩɩta teeŋ a pɩɛsʋ, “Ma kʋhɩaŋ ka tiŋ Wɩa dɩa time nɛɛ?” 25Ŋɩɩ nɛ Pɩɩta bʋl dɩ ʋʋ tiŋ nɛ. Pɩɩta sɩ bʋl ŋɩɩ aŋ mɩɩra jʋʋ dɩa, Yesu laa sɩpaaŋ a pɩɛsʋ, “Kʋbɛɛ nɛ tiŋ lampoo a pɩpɩ dʋnɩa deeŋ kuoroo? Ba taŋ nɩaa koo nʋhʋɔraa? Bɛɛ nɛ ŋ bɩɩnɛ?” 26Ŋɩɩ nɛ Pɩɩta bʋl dɩ nʋhʋɔraa nɛ. Yesu bɩra bʋl, “Ŋɩɩ-na taŋ-la nɩaa bɩ maga ba tiŋ kʋŋkala. 27Ama la-na bɩ chɛ dɩ la ŋaa wɩɩ a chei nɩaa deemba tʋɔŋ, ŋɩɩ wɩaa kɛŋ gbɩaŋ tuu hɛ fuoŋ lɛ a kɛsɛ chenfilee. Gbɩaŋ-la sɩ jaŋ kɛŋ chenfil-bumbuŋ-la, kɛŋ ʋ niiŋ suri, ŋ jaŋ na moribiiŋ ʋ niiŋ lɛ. Lɩɩsɛ moribii-la a tiŋ mɩ dɩ ŋ nyʋŋ lampoo.”

Currently Selected:

Matiu 17: SIS

Highlight

Copy