Matiu 14

Jɔɔŋ Wɩa lɩɩ-fooru-la sʋba

Maak 6.14-29; Luuk 9.7-9

1Bʋa-la lɛ nɛ Galilii kuoro Hɛrɔd nɩɩ Yesu wɩaa. 2Ʋ bʋla pɩ ʋ nanzɔɔba arɩ Jɔɔŋ Wɩa lɩɩ-fooru-la nɛ ŋɩɩ. Wɩa nɛ chɩsʋ sʋʋŋ lɛ, ŋɩɩ nɛ tɩɩ ʋ kɛŋ doluŋ a wuo ŋɩŋaa wʋmagɩlaa deemba. 3Hɛrɔd-la fa sie a mʋ jaa haal kʋbala nɛ. Ʋ yɩrɩŋ nɛ Hɛrɔdɩas. Ʋ fa ŋaa ʋ ŋaana Fɩlɩp haala nɛ, ʋ laa jaa. 4Ŋɩɩ nɛ Jɔɔŋ bʋla pɩ Hɛrɔd, “Ŋ sɩ kɛŋ ŋ ŋaana haala laa jaa ŋɩɩ, ʋ bɩ wombiiŋ ŋaa.” 5Ŋɩɩ nɛ Hɛrɔd faa chɛ dɩ ʋ kpʋ Jɔɔŋ, ama ʋ faa fá Juu tɩŋŋaa nɛ. Ŋɩɩ wɩaa ʋ ŋaa ba kɛnʋ tɔ dɩa. Juu tɩŋŋaa fa sɩ dɩ Jɔɔŋ ŋaa Wɩa wʋlaabʋllʋ nɛ. 6Ŋɩɩ nɛ Hɛrɔd chɛ-lʋlʋŋ tapʋlʋŋ bɩra yi. Ʋ yɩrɛ ʋ nɩaa dɩ ba kʋ gbieli. Hɛrɔdɩas tolo kʋ gʋa ba kala sɩpaaŋ, Hɛrɔd tʋɔŋ tɔrɛ ʋ nyuŋ. 7Ŋɩɩ nɛ ʋ bʋla pɩ tolo-la, “Mɩ ŋmɩɛsa, mɩ jaŋ pɩŋ kʋŋkala ŋ sɩɩ chɛ.” 8Ŋɩɩ nɛ tolo-la mʋ bʋl wɩɩŋ deeŋ a pɩ ʋ naaŋ aŋ pɩɛsʋ, “Mɩ bʋl mɩɩ chɛ bɛɛ kʋŋ nɛ?” Ŋɩɩ nɛ ʋ naaŋ bʋla pʋ arɩ ʋ bʋl ʋʋ chɛ dɩ ʋ keri Jɔɔŋ Wɩa lɩɩ-fooru-la nyuŋ a hɛ pɩrata lɛ nɛ a pʋ. Tolo-la bʋl ŋɩɩ. 9Kuoro sɩ nɩɩ wɩɩ-la, ʋ tʋɔŋ kala chei. Ama ʋ sɩ ŋmɩɛsa ŋɩɩ, nɩaa kala nɩɩ, ŋɩɩ nɛ ʋ bʋl dɩ ba ŋaa ŋɩɩ tolo-la sɩɩ chɛ a pʋ. 10Ʋ ŋaa ba mʋ keri Jɔɔŋ nyuŋ bɩnɩŋ dɩa lɛ 11a hɛ pɩrata lɛ a kaa kʋ pɩ tolo-la. Ŋɩɩ nɛ ʋ laa a kaa mʋ pɩ ʋ naaŋ. 12Jɔɔŋ harɩ-tooro-la sɩ nɩɩ wɩɩ-la, ba sii kʋ laa ʋ kʋsʋʋŋ a kaa mʋ hugi. Ŋɩɩ nɛ ba mʋ bʋla pɩ Yesu wɩalɩŋ sɩ ŋaa.

Yesu pɩ nɩaa bʋɩ banɔŋ kʋdiilee

Maak 6.30-44; Luuk 9.10-17; Jɔɔŋ 6.1-14

13Yesu sɩ nɩɩ Jɔɔŋ wɩaa, ʋ sii lee-la ʋ fa sɩ hɛ a jʋʋ lɩɩŋ daboro a mʋmʋ nɩaa sɩ tuo lee-la, ʋ dʋndʋŋa. Ama nɩaa nɩɩ Yesu wɩaa a lɩɩ ba jaŋ lɛ a vɛŋ naasɩŋ lɛ a kiri ʋ harɩŋ. 14Yesu sɩ mʋ lɩɩ lɩɩŋ daboro-la lɛ, ʋ na nɩ-daŋ dɩ ba hɔnɔ gbɛrʋ. Nenige kala kɛnʋ. Ŋɩɩ nɛ ʋ vaarɛ nɩalɩŋ sɩɩ wɩɩlʋ.

15Dɩdaanɩŋ kʋ yi, ʋ harɩ-tooroo kɔ ʋ teeŋ a bʋla pʋ, “Taŋ bire nɛ. Leriŋ deeŋ ŋaa gɩrɩŋ nɛ. Ta nɩalɩŋ dɩ ba mʋ tasɩ-la sɩ kpagɛ daha a yɔɔ kʋdiilee a dii.”

16Ŋɩɩ nɛ Yesu bʋl, “Má sɩ́ leŋe dɩ ba viiri. Má-na mʋ chɛ kʋdiilee pɩba dɩ ba dii.” 17Ŋɩɩ nɛ ʋ harɩ-tooro-la bʋl, “Kʋ-la kala la sɩ kɛnɛ nɛ boroboroba banɔŋ arɩ chenfilee balɩa.”

18Ŋɩɩ nɛ Yesu bʋl, “Má kaa kʋ pɩmɛ.” 19Ʋ ŋaa nɩalɩŋ tuu hɔŋ yaŋ nyuŋ. Ŋɩɩ nɛ ʋ laa boroboroba banɔŋ-la arɩ chenfile-la balɩa a wʋla beŋ wɩa-nyuŋ aŋ lɔllɛ Wɩa aŋ kaa chɔgɛ chɔgɛ a pɩ ʋ harɩ-tooroo. Ʋ harɩ-tooroo laa kpaa nɩalɩŋ. 20Nʋʋkala dii a vɔgɛ. Ka ʋ harɩ-tooro-la paa kʋkaaŋ-biisiŋ a su sinsiŋ fii arɩ balɩa. 21Nɩalɩŋ fa sɩ dii boroboro-la, ba tʋɔŋ baalaa fa ŋaa bʋɩ banɔŋ nɛ, haalaa arɩ hambiisiŋ-na bɩ pɛ.

Yesu vɛŋ lɩɩŋ nyuŋ

Maak 6.45-52; Jɔɔŋ 6.15-21

22Ŋɩɩ nɛ Yesu leŋ ʋ harɩ-tooroo laa sɩpaaŋ mʋ jʋʋ lɩɩŋ daboro a duoro chol mʋga cholo, aŋ ka dɩ ʋ ta nɩ-daŋ-la dɩ ba viiri. 23Ʋ sɩ ta nɩ-daŋ-la ba viiri, ʋ mʋ jɩl peeliŋ nyuŋ dɩ ʋ chʋɔlɛ Wɩa. Ŋɩɩ nɛ wɩa tuu jʋʋ, dɩ ʋ dʋndʋŋa nɛ ha hɛ peel-la nyuŋ. 24Bʋa-la lɛ dɩ lɩɩŋ daboro-la yi lɩɩŋ tʋtʋɔbaanɩŋ. Lɩɩ-peliŋ kaa viviisi, ba fa chaasɛ pel-la nɛ. 25Sɩɩpʋʋraa, Yesu sii vɛŋ lɩɩŋ nyuŋ a mʋmʋ ʋ harɩ-tooro-la teeŋ. 26Ba sɩ naʋ dɩ ʋʋ vɛŋ lɩɩŋ nyuŋ, fawʋllʋŋ kɛmba. Ba bʋl dɩ nɩdɩma nɛ aŋ ŋmuŋmoo niiŋ. 27Ŋɩɩ nɛ Yesu guu bʋla pɩba, “Má nyɩrɛ bɔyɛ. Mɩ-na nɛ. Má sɩ́ leŋe dɩ fawʋllʋŋ kɛmma.”

28Ŋɩɩ nɛ Pɩɩta bʋl, “Mɩ Tɩɩna, dɩ ŋ nɛ, bʋl dɩ mɩ lɩɩ kɔ ŋ teeŋ lɩɩ-la nyuŋ.” 29Ŋɩɩ nɛ Yesu bʋl dɩ ʋ kɔ. Ʋ sɩ bʋl ŋɩɩ, Pɩɩta lɩɩ lɩɩŋ daboro-la tʋɔŋ a vɛŋ lɩɩŋ nyuŋ a mʋmʋ Yesu teeŋ. 30Ama Pɩɩta sɩ bee na lɩɩ-pel-la, fawʋllʋŋ kɛnʋ. Ʋ suomo tutuu lɩɩ-la bʋbʋɔŋ. Ŋɩɩ nɛ ʋ faasa ŋmoo niiŋ a bʋl, “Mɩ Tɩɩna, laamɛ ta.” 31Yesu guu lɩɩsɛ ʋ nɩsɩŋ a yɩa a kɛnʋ aŋ bʋla pʋ, “Ŋ Wɩa laa diiniŋ bɩ yʋgɛ. Bɛɛ nɛ tɩɩ ŋ bɩ mɩ wɩaa laa dii?”

32Ba sɩ mʋ jʋʋ lɩɩŋ daboro-la dɛrɛ, pel-la kɛrɛ. 33Nɩalɩŋ kala sɩ hɛ lɩɩŋ daboro-la tʋɔŋ chʋɔlɛ Yesu aŋ bʋl, “Wʋtɩtɩɩ, ŋ nɛ ŋaa Wɩa Bie.”

Yesu vaarɛ nyanyal tɩɩna Gɛnɛzarɛt lɛ

Maak 6.53-56

34Ŋɩɩ nɛ ba chol a kʋ yi taŋ kʋbala baa yɩrɛ Gɛnɛzarɛt. 35Nɩalɩŋ sɩ hɛ lee-la na Yesu a jɩŋ arɩ ʋ nɛ. Ba tɩŋ tɩndaarɩŋ pɩ tintee-la sɩ golliba nɩaa ba paa ba nyanyal tɩŋŋaa kala a kaa kɔ Yesu teeŋ. 36Ba sʋlʋ dɩ ʋ leŋ dɩ nɩalɩŋ sɩɩ wɩɩlʋ digi ʋ gɛrɩŋ niipiniŋ lɛ. Dɩ ba nɛ dige, ba yie duori nɛ.

Currently Selected:

Matiu 14: SIS

Highlight

Copy