Matiu 10
10
Yesu harɩ-tooroo fii arɩ balɩa-la
Maak 3.13-19; Luuk 6.12-16
1Ŋɩɩ nɛ Yesu yɩrɛ ʋ harɩ-tooroo fii arɩ balɩa a hɛ dɔŋɔ lɛ a pɩba doluŋ dɩ ba wuo kikiri jɩŋ-bɔŋŋɔɔ aŋ pɛ vɩvaarɛ nɩaa nyanyal dosunuŋ. 2Nɩalɩŋ ʋ sɩ lɩɩsa yɩraa nɛ ŋ-la: Saamɔŋ, ba fa kɛnʋ yɩyɩrɛ Pɩɩta ma nɛ, arɩ ʋ naambie Anduru, arɩ Jeems sɩ ŋaa Zebidi nanʋala, arɩ Jɔɔŋ. Jɔɔŋ fa ŋaa Jeems ŋaana nɛ. 3Ʋ bɩra lɩɩsɛ Fɩlɩp, arɩ Batolomi, arɩ Tɔmas, arɩ Matiu lampoo laarʋ-la, arɩ Alɩfɩyas nanʋala Jeems, arɩ Tadɩyas, 4arɩ Saamɔŋ Zɛlɔt, arɩ Judas Ɩsɩkarɔt, nɩɩ-la sɩ kʋ ŋaa zɛmbɛ tɩɩna a yallɛ Yesu.
Yesu tɩŋ ʋ harɩ-tooroo fii arɩ balɩa
Maak 6.7-13; Luuk 9.1-6
5Nɩaa deemba fii arɩ balɩa, Yesu nɛ tɩmba ba lɩɩ. Ŋ-la nɛ ʋ bʋla pɩba aŋ ka ba lɩɩ: “Má sɩ́ nɩalɩŋ sɩ bɩ Juu tɩŋŋaa ŋaa tinteeŋ mʋ. Má sɩ́ Samarɩa tinteeŋ ma mʋ. 6Ama má mʋ Iziral tɩŋŋaa teeŋ, nɩaa deemba nagɛ piesee sɩ lɛlɛ nɛ a bɩra bɩ dɩa wɛnɩŋ jɩŋ. 7Má mʋ a bʋla pɩba arɩ Wɩa kuorii-la kpaga nɛ. 8Má vaarɛ nyanyal tɩŋŋaa a chɩsɛ sʋʋnʋŋ a vaarɛ gbegisiŋ a kiri jɩŋ-bɔŋŋɔɔ nɩaa lɛ. Dɩ ma nɛ ŋaa ŋɩɩ, má sɩ́ time kala laa, bɛɛ wɩaa ma ma bɩ kʋŋkala time aŋ laa. 9Má sɩ́ moribiee koru. 10Má sɩ́ sʋllɩ-gbansɩŋ koru a kaa vɛŋ wombii-la, a sɩ́ gɛnnɩŋ tʋŋ-bʋlɩa koo nɛntɛŋŋɛɛ tʋŋ-bʋlɩa koru, ma sɩ́ dantɩga ma koru. Dɩ tɩntɩnna nɛ tɩma, ʋ maga dɩ ba timu nɛ. 11Dɩ ma nɛ mʋ yi tabal koo tabie, má jʋʋ taŋ-la tʋɔŋ a bee chɛ nɩɩ-la sɩ jaŋ wuo laama bil a chʋchʋa dɩɩ-bala-la lɛ halɩɩ dɩ bʋa-la ma sɩ jaŋ lɩɩ taŋ-la lɛ yi. 12Dɩ ma nɛ mʋ jʋʋ dɩa kala, má laa sɩpaaŋ chʋɔlɛ dɩa-la nɩaa a bʋl, ‘Dɩa deeŋ nɩaa jaŋ hɔŋ arɩ yarɩfɩɛlaa.’ 13Dɩ ba nɛ laama, ba jaŋ kɛŋ yarɩfɩɛlaa. Dɩ ba nɛ bɩ ma laa, yarɩfɩɛla-la jaŋ mɩɩra kɔ ma teeŋ. 14Dɩ ma nɛ mʋ nʋʋkala teeŋ, dɩ ʋ pɔ dɩ ma sɩ́ jʋʋ a bɩ ma wɩaa ma jegilee nɩɩ, má lɩɩ dɩa-la lɛ koo taŋ-la lɛ a kpesi ma naasɩŋ hagɩla ta. Ba jaŋ jɩŋ arɩ ba ŋaa wɩɩ nɛ a chei ma lɛ. 15Mɩ bʋlaa pɩma arɩ sarɩya chɛ-diiliŋ, Wɩa jaŋ dɔgɩsɛ taŋ-la nɩaa a kɩɩ bʋa-la lɛ ʋ sɩ dɔgɩsɛ Sodom arɩ Gomora nɩaa ŋɩɩ.”
Hɛɛ-la sɩ jaŋ kɔ
Maak 13.9-13; Luuk 21.12-17
16Ŋɩɩ nɛ Yesu bɩra bʋl, “Má jegile nɩɩ, ma nagɛ piesee nɛ, mɩɩ tɩmma dɩ ma mʋ guoli guŋgurusuŋ tʋɔŋ. Má saa kɛŋ wʋjɩmɩŋ a nagɛ dɩŋŋaa sɩ kɛŋ wʋjɩmɩŋ ŋɩɩ, aŋ leŋ dɩ ma sɩaa fɩɛlɛ a nagɛ kokosuŋ sɩaa sɩ fɩɛla ŋɩɩ.
17Má kɛŋ ma tɩtɩa woruŋ nɩbɔŋŋɔɔ deemba teeŋ. Ba jaŋ kɛmma kaa mʋ nɩalɩŋ sɩ yie hilime vʋvʋʋrɛ wɩaa teeŋ dɩ ba dii ma sarɩya. Ba jaŋ vɩɩrɛma Wɩɩchʋɔlɛ dɩɩsɩŋ lɛ. 18A tɩŋ mɩ wɩaa, ba jaŋ kɛmma kaa mʋ kuoroo arɩ taŋ nɩhɩasɩŋ sɩpaaŋ dɩ ma ŋaa mɩ pɛ-naaraa. Ba jaŋ kɛmma kaa mʋ nɩalɩŋ sɩ bɩ Juu tɩŋŋaa ŋaa ma sɩpaaŋ. 19Dɩ ba nɛ kɛmma kaa mʋ dɩ ba dii ma sarɩya, má sɩ́ leŋe dɩ ma bɔɩsɩŋ joŋ wɩalɩŋ ma sɩ jaŋ bʋl lɛ a laa ma tɩtɩa. Bʋa-la lɛ Wɩa jaŋ joŋ wʋjɩmɩŋ a hɛ ma nyuŋ lɛ. 20Wɩalɩŋ ma sɩ jaŋ bʋl, ma dee bɩ jaŋ bʋl. Ma Nyɩmma Wɩa jaŋ leŋ dɩ ʋ Dɩŋ-zɔmʋŋ to ma lɛ a bʋl wɩaa. 21Naambiiriŋ jaŋ kɛŋ dɔŋɔ a kaa mʋ pa dɩ ba kpʋ. Nyɩmmaba ma jaŋ ŋaa ŋɩɩ ba biiriŋ lɛ. Biiriŋ ma jaŋ ŋaa ŋɩɩ a kɛsɛ ba nyɩmmaba arɩ ba naamba a kaa mʋ pa dɩ ba kpʋ. 22Nʋʋkala jaŋ bɛrɛma a tɩŋ mɩ wɩaa. Ama nɩɩ-la kala sɩ nyalɩma a mʋ dɛrɛ, Wɩa jaŋ laaʋ ta. 23Dɩ ba nɩɩ dɔgɩsɛma taŋ lɛ, má lɩɩ a fá mʋ taŋ dɔŋɔ. Mɩ bʋlaa pɩma arɩ ma bɩ jaŋ wuo tɩŋ tɩntɩmɩɩ-la dɛrɛ Iziral tasɩŋ kala lɛ, ka dɩ mɩ-na Nuhuobiine Bie-na kɔ.
24Sikuuri bie bɩ nɩɩ-la sɩɩ dagʋ ka kɩɩ, nɩɩ-la sɩɩ tɩŋ tɩntɩŋŋaa nʋʋ dɔŋ teeŋ ma bɩ yʋga kɩɩ nɩɩ-la teeŋ ʋ sɩɩ tɩŋ. Tɩntɩnna bɩ ʋ kʋhɩaŋ ka kɩɩ. 25Ama dɩ sikuuri bile nɛ gʋnnɛ woruŋ, ʋ dɩ nɩɩ-la sɩ dagʋ jaŋ magɛ dɔŋɔ. Dɩ tɩntɩnnʋ-la ma nɛ gʋnnɛ tɩntɩmɩɩ-la dɛrɛ, ʋ dɩ nɩɩ-la sɩ dagʋ kala magɛ dɔŋɔ nɛ. Dɩ ba nɛ saa kɛŋ dɩa tɩɩna kaa yɩrɛ Bɛlizibul (Sɩtaanɩ yɩrɩŋ dɔŋɔ nɛ ŋɩɩ), ŋɩɩ-na ba jaŋ hɛ yɩrɩ-bɔŋŋɔɔ a kɩɩ ŋɩɩ a pɩ ʋ dɩa nɩaa kala.
Nɩɩ-la sɩ maga dɩ la fá
Luuk 12.2-9
26Ŋɩɩ wɩaa, ma sɩ́ nuhuobiinee fá. Wɩɩkala sɩ faa jaŋ kʋ lɩɩ pʋlʋmʋŋ, nɩaa ma jaŋ nɩɩ wɩɩ-la sɩ ŋaa wʋfaalɩɩ. 27Wɩɩkala mɩ sɩ bʋla pɩma birimiŋ tʋɔŋ, ʋ maga dɩ ma bʋlʋ pʋlʋmʋŋ tʋɔŋ. Wɩɩkala mɩ sɩ munso bʋla pɩma birimiŋ tʋɔŋ, má heele bʋlʋ lusuŋ nyuŋ.” 28Ŋɩɩ nɛ Yesu bɩra bʋl, “Má sɩ́ nɩalɩŋ sɩ jaŋ wuo kpʋ ma yaraa fá, nɩaa deemba bɩ ma dɩma wuo kpʋ. Ama má fá Wɩa. Ʋ nɛ kɛŋ doluŋ dɩ ʋ wuo joŋ ma yaraa arɩ ma dɩnsɩŋ kala a hɛ Wɩa nyiniŋ tʋɔŋ. Mɩ bʋlaa pɩma, má fɩfáʋ. 29Zaarɩ-kokobiisiŋ balɩa dee ba yie joŋo yallɛ kɔbʋʋ? Ama ba tʋɔŋ kʋbala ma bɩ jaŋ lɛl, see ma Nyɩmma Wɩa sɛyɛ. 30Wɩa paala jɩŋ ma nyu-pʋnaa kala ma niiŋ nɛ. 31Ŋɩɩ wɩaa, má sɩ́ leŋe dɩ fawʋllʋŋ kɛmma. Ma nɛ paala kɩɩ zaarɩ-kokobii laalɩŋ. 32Nɩɩ-la kala sɩ jaŋ wuo bʋl nɩaa tʋɔŋ arɩ ʋ ŋaa mɩ nʋʋ nɛ, mɩ ma jaŋ bʋl ŋɩɩ a tɩgɛ ʋ lɛ mɩ Nyɩmma Wɩa sɩ hɛ Wɩa-jaŋ lɛ sɩpaaŋ. 33Ama nɩɩ-la kala sɩ vɩamɛ nɩaa tʋɔŋ, mɩ ma jaŋ vɩaʋ mɩ Nyɩmma Wɩa sɩ hɛ Wɩa-jaŋ lɛ sɩpaaŋ.
Yesu sɩ ʋ bɩ dʋnɩa kɔ dɩ nɩaa sɩŋ, ama dɩ ba yuo dɔŋɔ
Luuk 12.51-53; 14.26-27
34Ma fa bɩɩna mɩ kɔ dʋnɩa dɩ nɩaa sɩŋ nɛɛ? Aɩ, yuosuŋ nɛ mɩ kaa kɔ. 35Mɩ kɔ dɩ nɩaa pɔrɛ dɔŋɔ lɛ nɛ. Bie jaŋ kɛŋ ʋ nyɩmma dɩ ba yuo dɔŋɔ. Tolo ma jaŋ kɛŋ ʋ naaŋ dɩ ba yuyuo dɔŋɔ. Bii-haala ma jaŋ kɛŋ ʋ bala naaŋ dɩ ba yuyuo dɔŋɔ. 36Nuhuobiine dʋndɔŋŋɔɔ nɛ ŋaa ʋ tɩtɩa dɩa nɩaa. 37Nɩɩ-la kala sɩ cho ʋ nyɩmma arɩ ʋ naaŋ a kɩɩmɛ, ʋ bɩ maga dɩ ʋ ŋaa mɩ harɩ-tooru. Nɩɩ-la kala ma sɩ cho ʋ bie koo ʋ tolo a kɩɩmɛ, ʋ bɩ maga dɩ ʋ ŋaa mɩ harɩ-tooru. 38Nɩɩ-la kala sɩ bɩ ʋ tɩtɩa daagɛsɛ baasa a to mɩ harɩŋ, ʋ bɩ maga dɩ ʋ ŋaa mɩ harɩ-tooru. 39Nɩɩ-la kala sɩɩ chɛ ʋ tɩtɩa mɩɩsɩŋ, ʋ jaŋ joŋ ʋ mɩɩsɩŋ ta. Ama nɩɩ-la kala sɩ vɩa ʋ mɩɩsɩŋ ta a tɩŋ mɩ wɩaa, ʋ jaŋ kɛŋ mɩɩsɩŋ.
Time-la Wɩa sɩ jaŋ joŋo tinla
Maak 9.41
40Nɩɩ-la kala sɩ kɛmma woruŋ, ʋ tɩɩna kɛŋ mɩ ma woruŋ nɛ. Nɩɩ-la ma kala sɩ kɛmmɛ woruŋ, ʋ kɛŋ Tɩɩna ma sɩ tɩmmɛ woruŋ nɛ. 41Nɩɩ-la kala sɩ laa Wɩa tɩntɩnnʋ a kɛnʋ woruŋ ʋ dɩa lɛ a tɩŋ ʋ sɩ ŋaa Wɩa tɩntɩnnʋ, ʋ jaŋ laa ʋ time. Time-la Wɩa sɩ jaŋ joŋo timu, ʋ jaŋ magɛ time-la Wɩa sɩ jaŋ tiŋ ʋ tɩntɩnnʋ-la. Nɩɩ-la kala ma sɩ laa tʋɔpʋl tɩɩna bil a tɩŋ ʋ sɩ ŋaa tʋɔpʋl tɩɩna wɩaa, time-la Wɩa sɩ jaŋ joŋo timu, ʋ jaŋ magɛ time-la ʋ sɩ jaŋ joŋo tiŋ tʋɔpʋl tɩɩna-la. 42Nɩɩ-la ma kala sɩ ŋaa lɩɩ-fɩɛla pɩ mɩ harɩ-tooroo deemba tʋɔŋ kʋbie a tɩŋ ʋ sɩɩ to mɩ harɩŋ wɩaa, ʋ tɩɩna ma jaŋ laa ʋ time.”
Currently Selected:
Matiu 10: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
Matiu 10
10
Yesu harɩ-tooroo fii arɩ balɩa-la
Maak 3.13-19; Luuk 6.12-16
1Ŋɩɩ nɛ Yesu yɩrɛ ʋ harɩ-tooroo fii arɩ balɩa a hɛ dɔŋɔ lɛ a pɩba doluŋ dɩ ba wuo kikiri jɩŋ-bɔŋŋɔɔ aŋ pɛ vɩvaarɛ nɩaa nyanyal dosunuŋ. 2Nɩalɩŋ ʋ sɩ lɩɩsa yɩraa nɛ ŋ-la: Saamɔŋ, ba fa kɛnʋ yɩyɩrɛ Pɩɩta ma nɛ, arɩ ʋ naambie Anduru, arɩ Jeems sɩ ŋaa Zebidi nanʋala, arɩ Jɔɔŋ. Jɔɔŋ fa ŋaa Jeems ŋaana nɛ. 3Ʋ bɩra lɩɩsɛ Fɩlɩp, arɩ Batolomi, arɩ Tɔmas, arɩ Matiu lampoo laarʋ-la, arɩ Alɩfɩyas nanʋala Jeems, arɩ Tadɩyas, 4arɩ Saamɔŋ Zɛlɔt, arɩ Judas Ɩsɩkarɔt, nɩɩ-la sɩ kʋ ŋaa zɛmbɛ tɩɩna a yallɛ Yesu.
Yesu tɩŋ ʋ harɩ-tooroo fii arɩ balɩa
Maak 6.7-13; Luuk 9.1-6
5Nɩaa deemba fii arɩ balɩa, Yesu nɛ tɩmba ba lɩɩ. Ŋ-la nɛ ʋ bʋla pɩba aŋ ka ba lɩɩ: “Má sɩ́ nɩalɩŋ sɩ bɩ Juu tɩŋŋaa ŋaa tinteeŋ mʋ. Má sɩ́ Samarɩa tinteeŋ ma mʋ. 6Ama má mʋ Iziral tɩŋŋaa teeŋ, nɩaa deemba nagɛ piesee sɩ lɛlɛ nɛ a bɩra bɩ dɩa wɛnɩŋ jɩŋ. 7Má mʋ a bʋla pɩba arɩ Wɩa kuorii-la kpaga nɛ. 8Má vaarɛ nyanyal tɩŋŋaa a chɩsɛ sʋʋnʋŋ a vaarɛ gbegisiŋ a kiri jɩŋ-bɔŋŋɔɔ nɩaa lɛ. Dɩ ma nɛ ŋaa ŋɩɩ, má sɩ́ time kala laa, bɛɛ wɩaa ma ma bɩ kʋŋkala time aŋ laa. 9Má sɩ́ moribiee koru. 10Má sɩ́ sʋllɩ-gbansɩŋ koru a kaa vɛŋ wombii-la, a sɩ́ gɛnnɩŋ tʋŋ-bʋlɩa koo nɛntɛŋŋɛɛ tʋŋ-bʋlɩa koru, ma sɩ́ dantɩga ma koru. Dɩ tɩntɩnna nɛ tɩma, ʋ maga dɩ ba timu nɛ. 11Dɩ ma nɛ mʋ yi tabal koo tabie, má jʋʋ taŋ-la tʋɔŋ a bee chɛ nɩɩ-la sɩ jaŋ wuo laama bil a chʋchʋa dɩɩ-bala-la lɛ halɩɩ dɩ bʋa-la ma sɩ jaŋ lɩɩ taŋ-la lɛ yi. 12Dɩ ma nɛ mʋ jʋʋ dɩa kala, má laa sɩpaaŋ chʋɔlɛ dɩa-la nɩaa a bʋl, ‘Dɩa deeŋ nɩaa jaŋ hɔŋ arɩ yarɩfɩɛlaa.’ 13Dɩ ba nɛ laama, ba jaŋ kɛŋ yarɩfɩɛlaa. Dɩ ba nɛ bɩ ma laa, yarɩfɩɛla-la jaŋ mɩɩra kɔ ma teeŋ. 14Dɩ ma nɛ mʋ nʋʋkala teeŋ, dɩ ʋ pɔ dɩ ma sɩ́ jʋʋ a bɩ ma wɩaa ma jegilee nɩɩ, má lɩɩ dɩa-la lɛ koo taŋ-la lɛ a kpesi ma naasɩŋ hagɩla ta. Ba jaŋ jɩŋ arɩ ba ŋaa wɩɩ nɛ a chei ma lɛ. 15Mɩ bʋlaa pɩma arɩ sarɩya chɛ-diiliŋ, Wɩa jaŋ dɔgɩsɛ taŋ-la nɩaa a kɩɩ bʋa-la lɛ ʋ sɩ dɔgɩsɛ Sodom arɩ Gomora nɩaa ŋɩɩ.”
Hɛɛ-la sɩ jaŋ kɔ
Maak 13.9-13; Luuk 21.12-17
16Ŋɩɩ nɛ Yesu bɩra bʋl, “Má jegile nɩɩ, ma nagɛ piesee nɛ, mɩɩ tɩmma dɩ ma mʋ guoli guŋgurusuŋ tʋɔŋ. Má saa kɛŋ wʋjɩmɩŋ a nagɛ dɩŋŋaa sɩ kɛŋ wʋjɩmɩŋ ŋɩɩ, aŋ leŋ dɩ ma sɩaa fɩɛlɛ a nagɛ kokosuŋ sɩaa sɩ fɩɛla ŋɩɩ.
17Má kɛŋ ma tɩtɩa woruŋ nɩbɔŋŋɔɔ deemba teeŋ. Ba jaŋ kɛmma kaa mʋ nɩalɩŋ sɩ yie hilime vʋvʋʋrɛ wɩaa teeŋ dɩ ba dii ma sarɩya. Ba jaŋ vɩɩrɛma Wɩɩchʋɔlɛ dɩɩsɩŋ lɛ. 18A tɩŋ mɩ wɩaa, ba jaŋ kɛmma kaa mʋ kuoroo arɩ taŋ nɩhɩasɩŋ sɩpaaŋ dɩ ma ŋaa mɩ pɛ-naaraa. Ba jaŋ kɛmma kaa mʋ nɩalɩŋ sɩ bɩ Juu tɩŋŋaa ŋaa ma sɩpaaŋ. 19Dɩ ba nɛ kɛmma kaa mʋ dɩ ba dii ma sarɩya, má sɩ́ leŋe dɩ ma bɔɩsɩŋ joŋ wɩalɩŋ ma sɩ jaŋ bʋl lɛ a laa ma tɩtɩa. Bʋa-la lɛ Wɩa jaŋ joŋ wʋjɩmɩŋ a hɛ ma nyuŋ lɛ. 20Wɩalɩŋ ma sɩ jaŋ bʋl, ma dee bɩ jaŋ bʋl. Ma Nyɩmma Wɩa jaŋ leŋ dɩ ʋ Dɩŋ-zɔmʋŋ to ma lɛ a bʋl wɩaa. 21Naambiiriŋ jaŋ kɛŋ dɔŋɔ a kaa mʋ pa dɩ ba kpʋ. Nyɩmmaba ma jaŋ ŋaa ŋɩɩ ba biiriŋ lɛ. Biiriŋ ma jaŋ ŋaa ŋɩɩ a kɛsɛ ba nyɩmmaba arɩ ba naamba a kaa mʋ pa dɩ ba kpʋ. 22Nʋʋkala jaŋ bɛrɛma a tɩŋ mɩ wɩaa. Ama nɩɩ-la kala sɩ nyalɩma a mʋ dɛrɛ, Wɩa jaŋ laaʋ ta. 23Dɩ ba nɩɩ dɔgɩsɛma taŋ lɛ, má lɩɩ a fá mʋ taŋ dɔŋɔ. Mɩ bʋlaa pɩma arɩ ma bɩ jaŋ wuo tɩŋ tɩntɩmɩɩ-la dɛrɛ Iziral tasɩŋ kala lɛ, ka dɩ mɩ-na Nuhuobiine Bie-na kɔ.
24Sikuuri bie bɩ nɩɩ-la sɩɩ dagʋ ka kɩɩ, nɩɩ-la sɩɩ tɩŋ tɩntɩŋŋaa nʋʋ dɔŋ teeŋ ma bɩ yʋga kɩɩ nɩɩ-la teeŋ ʋ sɩɩ tɩŋ. Tɩntɩnna bɩ ʋ kʋhɩaŋ ka kɩɩ. 25Ama dɩ sikuuri bile nɛ gʋnnɛ woruŋ, ʋ dɩ nɩɩ-la sɩ dagʋ jaŋ magɛ dɔŋɔ. Dɩ tɩntɩnnʋ-la ma nɛ gʋnnɛ tɩntɩmɩɩ-la dɛrɛ, ʋ dɩ nɩɩ-la sɩ dagʋ kala magɛ dɔŋɔ nɛ. Dɩ ba nɛ saa kɛŋ dɩa tɩɩna kaa yɩrɛ Bɛlizibul (Sɩtaanɩ yɩrɩŋ dɔŋɔ nɛ ŋɩɩ), ŋɩɩ-na ba jaŋ hɛ yɩrɩ-bɔŋŋɔɔ a kɩɩ ŋɩɩ a pɩ ʋ dɩa nɩaa kala.
Nɩɩ-la sɩ maga dɩ la fá
Luuk 12.2-9
26Ŋɩɩ wɩaa, ma sɩ́ nuhuobiinee fá. Wɩɩkala sɩ faa jaŋ kʋ lɩɩ pʋlʋmʋŋ, nɩaa ma jaŋ nɩɩ wɩɩ-la sɩ ŋaa wʋfaalɩɩ. 27Wɩɩkala mɩ sɩ bʋla pɩma birimiŋ tʋɔŋ, ʋ maga dɩ ma bʋlʋ pʋlʋmʋŋ tʋɔŋ. Wɩɩkala mɩ sɩ munso bʋla pɩma birimiŋ tʋɔŋ, má heele bʋlʋ lusuŋ nyuŋ.” 28Ŋɩɩ nɛ Yesu bɩra bʋl, “Má sɩ́ nɩalɩŋ sɩ jaŋ wuo kpʋ ma yaraa fá, nɩaa deemba bɩ ma dɩma wuo kpʋ. Ama má fá Wɩa. Ʋ nɛ kɛŋ doluŋ dɩ ʋ wuo joŋ ma yaraa arɩ ma dɩnsɩŋ kala a hɛ Wɩa nyiniŋ tʋɔŋ. Mɩ bʋlaa pɩma, má fɩfáʋ. 29Zaarɩ-kokobiisiŋ balɩa dee ba yie joŋo yallɛ kɔbʋʋ? Ama ba tʋɔŋ kʋbala ma bɩ jaŋ lɛl, see ma Nyɩmma Wɩa sɛyɛ. 30Wɩa paala jɩŋ ma nyu-pʋnaa kala ma niiŋ nɛ. 31Ŋɩɩ wɩaa, má sɩ́ leŋe dɩ fawʋllʋŋ kɛmma. Ma nɛ paala kɩɩ zaarɩ-kokobii laalɩŋ. 32Nɩɩ-la kala sɩ jaŋ wuo bʋl nɩaa tʋɔŋ arɩ ʋ ŋaa mɩ nʋʋ nɛ, mɩ ma jaŋ bʋl ŋɩɩ a tɩgɛ ʋ lɛ mɩ Nyɩmma Wɩa sɩ hɛ Wɩa-jaŋ lɛ sɩpaaŋ. 33Ama nɩɩ-la kala sɩ vɩamɛ nɩaa tʋɔŋ, mɩ ma jaŋ vɩaʋ mɩ Nyɩmma Wɩa sɩ hɛ Wɩa-jaŋ lɛ sɩpaaŋ.
Yesu sɩ ʋ bɩ dʋnɩa kɔ dɩ nɩaa sɩŋ, ama dɩ ba yuo dɔŋɔ
Luuk 12.51-53; 14.26-27
34Ma fa bɩɩna mɩ kɔ dʋnɩa dɩ nɩaa sɩŋ nɛɛ? Aɩ, yuosuŋ nɛ mɩ kaa kɔ. 35Mɩ kɔ dɩ nɩaa pɔrɛ dɔŋɔ lɛ nɛ. Bie jaŋ kɛŋ ʋ nyɩmma dɩ ba yuo dɔŋɔ. Tolo ma jaŋ kɛŋ ʋ naaŋ dɩ ba yuyuo dɔŋɔ. Bii-haala ma jaŋ kɛŋ ʋ bala naaŋ dɩ ba yuyuo dɔŋɔ. 36Nuhuobiine dʋndɔŋŋɔɔ nɛ ŋaa ʋ tɩtɩa dɩa nɩaa. 37Nɩɩ-la kala sɩ cho ʋ nyɩmma arɩ ʋ naaŋ a kɩɩmɛ, ʋ bɩ maga dɩ ʋ ŋaa mɩ harɩ-tooru. Nɩɩ-la kala ma sɩ cho ʋ bie koo ʋ tolo a kɩɩmɛ, ʋ bɩ maga dɩ ʋ ŋaa mɩ harɩ-tooru. 38Nɩɩ-la kala sɩ bɩ ʋ tɩtɩa daagɛsɛ baasa a to mɩ harɩŋ, ʋ bɩ maga dɩ ʋ ŋaa mɩ harɩ-tooru. 39Nɩɩ-la kala sɩɩ chɛ ʋ tɩtɩa mɩɩsɩŋ, ʋ jaŋ joŋ ʋ mɩɩsɩŋ ta. Ama nɩɩ-la kala sɩ vɩa ʋ mɩɩsɩŋ ta a tɩŋ mɩ wɩaa, ʋ jaŋ kɛŋ mɩɩsɩŋ.
Time-la Wɩa sɩ jaŋ joŋo tinla
Maak 9.41
40Nɩɩ-la kala sɩ kɛmma woruŋ, ʋ tɩɩna kɛŋ mɩ ma woruŋ nɛ. Nɩɩ-la ma kala sɩ kɛmmɛ woruŋ, ʋ kɛŋ Tɩɩna ma sɩ tɩmmɛ woruŋ nɛ. 41Nɩɩ-la kala sɩ laa Wɩa tɩntɩnnʋ a kɛnʋ woruŋ ʋ dɩa lɛ a tɩŋ ʋ sɩ ŋaa Wɩa tɩntɩnnʋ, ʋ jaŋ laa ʋ time. Time-la Wɩa sɩ jaŋ joŋo timu, ʋ jaŋ magɛ time-la Wɩa sɩ jaŋ tiŋ ʋ tɩntɩnnʋ-la. Nɩɩ-la kala ma sɩ laa tʋɔpʋl tɩɩna bil a tɩŋ ʋ sɩ ŋaa tʋɔpʋl tɩɩna wɩaa, time-la Wɩa sɩ jaŋ joŋo timu, ʋ jaŋ magɛ time-la ʋ sɩ jaŋ joŋo tiŋ tʋɔpʋl tɩɩna-la. 42Nɩɩ-la ma kala sɩ ŋaa lɩɩ-fɩɛla pɩ mɩ harɩ-tooroo deemba tʋɔŋ kʋbie a tɩŋ ʋ sɩɩ to mɩ harɩŋ wɩaa, ʋ tɩɩna ma jaŋ laa ʋ time.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014