Luuk 2
2
Ba lʋl Yesu
Mat. 1.18-25
1Baal kʋbala nɛ fa hɛ nɩmɛ, baa yɩrɛ Ɔgasɩtʋs. Ʋ nɛ fa ŋaa Rom tɩŋŋaa kuoru-balɩŋ. Bʋa-la lɛ ʋ bʋl dɩ ba dɩɩsɛ ʋ tinteeŋ nɩaa. 2Ba sɩ bugumo dɩɩsɛ nɩaa ŋɩɩ, baal kʋbala nɛ fa chɩŋ kuoru-balɩŋ nyuŋ Siiria tinteeŋ lɛ, baa yɩrɛ Kiriinias.
3Ŋɩɩ nɛ nʋʋkala mʋ ʋ jaŋ dɩ ba dɩɩsʋ nɩmɛ. 4Josɛf ma sii Nazarɛt Galilii tinteeŋ lɛ a mʋ Judiya tinteeŋ, a mʋ jʋʋ taŋ kʋbala baa yɩrɛ Bɛtɩlɛhɛm. Lee-la nɛ ba fa lʋl kuoro Devit. Josɛf fa ŋaa kuoro Devit doho nʋʋ nɛ. Ŋɩɩ nɛ tɩɩ ʋ mʋ nɩmɛ. 5Ʋ dɩ Mɛɛrɩ kala nɛ mʋ nɩmɛ. Mɛɛrɩ fa sɛyɛ arɩ ʋ jaŋ jaaʋ, aŋ kɛŋ luoruŋ.
6Ba sɩ yi Bɛtɩlɛhɛm, ba hɔŋ nɩmɛ. Ŋɩɩ nɛ Mɛɛrɩ lʋlʋŋ yi, 7aŋ ka ba bɩ leriŋ na nʋhʋɔraa dɩa lɛ dɩ ba jʋʋ. Ŋɩɩ nɛ tɩɩ ba mʋ jʋʋ ja-dɩa. Nɩmɛ nɛ Mɛɛrɩ lʋl ʋ bii-bumbuŋ, hambolibie, a kɛŋ gɛrɩŋ bɛʋ a joŋu bil yaŋ nyuŋ.
Pie-daaraa nɩɩ bile lʋlʋŋ wɩaa
8Bʋa-la lɛ pie-daaraa nɛ fa hɛ tintee-la sɛmɛ dɔŋɔ a hɛ yaŋ tʋɔŋ a chʋa nɩmɛ tɩtaŋɩŋ aa beŋ ba piesee.
9Ŋɩɩ nɛ Wɩa tɩndaarʋ kʋbala kɔ ba teeŋ. Ʋ sɩ kɔ ŋɩɩ, Wɩa pʋlʋmʋŋ chaana hɛ ba lɛ. Fawʋllʋŋ kɛmba. 10Ŋɩɩ nɛ Wɩa tɩndaarʋ-la bʋla pɩba, “Má sɩ́ leŋe dɩ fawʋllʋŋ kɛmma. Mɩ kɛŋ wʋzɔŋŋɔɔ nɛ kɔ dɩ mɩ bʋla pɩma. Nɩɩ-la kala sɩ nɩɩ wʋzɔmɔ-la, ʋ tʋɔŋ jaŋ tɔrɛ. 11Tɩtaŋɩŋ deeŋ ba lʋl ma Laataara nɛ Devit jaŋ lɛ. Baa yɩrʋ La Tɩɩna Kirisito, Nɩɩ-la Wɩa sɩ lɩɩsa. 12Ŋ-la nɛ ma jaŋ wuo to jɩmʋ. Dɩ ma nɛ mʋ nɩmɛ, ma jaŋ na bile dɩ ba kɛŋ gɛnnɩŋ bɛʋ a joŋu bil yaŋ nyuŋ.”
13Ŋɩɩ nɛ Wɩa tɩndaaraa yʋgɛ a guu lɩɩ a pɛ Wɩa tɩndaarʋ-la lɛ, ba yɩɩ yɩɩlaa a dɛnnɛ Wɩa a bʋl,
14“Má leŋ dɩ la dɛnnɛ Wɩa sɩ hɛ Wɩa-jaŋ lɛ.
Nɩalɩŋ nyuŋ Wɩa tʋɔŋ sɩ tɔrɔ tinteeŋ lɛ jaŋ na fɩɛlɩŋ.”
15Ŋɩɩ nɛ Wɩa tɩndaara-la mɩɩra mʋ Wɩa-jaŋ. Ka pie-daara-la bʋla pɩ dɔŋɔ, “Má leŋ dɩ la mʋ Bɛtɩlɛhɛm a na wɩɩ-la La Tɩɩna sɩ to ʋ tɩndaaraa lɛ a bʋla pɩla.”
16Ba sii fá lɩma lɩma a mʋ na Mɛɛrɩ arɩ Josɛf. Ba naba aŋ na bile ma dɩ ʋ pɩŋ yaŋ nyuŋ. 17Ŋɩɩ nɛ piedaara-la bʋl wɩɩ-la Wɩa tɩndaara-la sɩ bʋla pɩba a tɩgɛ bile lɛ a pɩ bile naaŋ arɩ ʋ nyɩmma arɩ nɩaa dɔnsʋŋ. 18Nɩalɩŋ kala sɩ nɩɩ wɩalɩŋ, ʋ ŋaaba wʋkpuŋkpere. 19Mɛɛrɩ laa wɩaa deemba kala hɛ ʋ nyuŋ lɛ a kaa bɩbɩɩnɛ.
20Ŋɩɩ nɛ pie-daara-la mɩɩra mʋmʋ, aŋ yɩɩ yɩɩlaa a dɩdɛnne Wɩa a tɩŋ ba sɩ na wɩalɩŋ kala Wɩa tɩndaarʋ-la sɩ bʋla pɩba.
Ba hɛ Yesu yɩrɩŋ
21Bile sɩ yi tapʋlaa chori, ba keri ʋ peniŋ aŋ hɛ ʋ yɩrɩŋ. Ba hɛ Yesu pʋ, yɩrɩ-la Wɩa tɩndaarʋ-la fa sɩ daga bʋa-la lɛ Mɛɛrɩ fa ha sɩ bɩ luoruŋ kɛnɛ.
Ba kɛŋ Yesu jʋʋ Wɩa dɩa
22-23Wɩalɩŋ Mosis fa sɩ ŋmʋnsa bil dɩ nɩaa tuto dɔŋɔ nɛ ŋ-la: “Dɩ baal arɩ ʋ haal nɛ lʋl ba bii-bumbuŋ, dɩ ʋ nɛ ŋaa baal, ʋ maga dɩ ba mʋ pɩɩsɛ ba disiniŋ ta nɛ.” Mosis fa bɩra ŋmʋnsa bil Wɩa teniŋ tʋɔŋ dɩ nʋʋ na-kala nɛ lʋl ʋ bii-bumbuŋ, dɩ bile nɛ ŋaa baal, dɩ ʋ joŋo pɩ Wɩa. Ŋɩɩ nɛ Josɛf arɩ Mɛɛrɩ ŋaa ŋɩɩ. Ba sii joŋ bile a kaa mʋ Jerusalɛm dɩ ba joŋu pɩ Wɩa. 24Ba bɩra ŋmʋnsa dɩ ba kpʋ kokosuŋ balɩa maa a pɩ Wɩa. Ŋɩɩ nɛ Josɛf arɩ Mɛɛrɩ sii mʋ Wɩa dɩa dɩ ba ŋaa ŋɩɩ.
25Bʋa-la lɛ baal kʋbala nɛ fa hɛ Jerusalɛm lɛ, baa yɩrɛ Simioŋ. Ʋ fa ŋaa nɩzɔŋ nɛ a fɩfá Wɩa a fa gbɩgbɛrɛ dɩ Wɩa laa Iziral tɩŋŋaa ta. Wɩa Dɩŋ-zɔmʋŋ ma hɛ ʋ lɛ woruŋ. 26Wɩa Dɩŋ-zɔmʋŋ fa bʋla pʋ arɩ ʋ bɩ jaŋ sʋʋ see dɩ ʋ na Kirisito, Nɩɩ-la Wɩa sɩ jaŋ lɩɩsɛ dɩ ʋ kɔ. 27Ŋɩɩ nɛ Yesu nyɩmma arɩ ʋ naaŋ jʋʋ Wɩa dɩɩ-balɩŋ a joŋu pɩ Wɩa aŋ pɛ ŋaa ŋɩɩ Wɩa niiŋ wɩaa sɩ daga. Dɩ Wɩa Dɩŋ-zɔmʋŋ kɛŋ Simioŋ ma kʋ jʋʋ Wɩa dɩa. 28Simioŋ na bile a laaʋ hɛ ʋ nɩsaa lɛ aŋ dɛnnɛ Wɩa a bʋl,
29“Mɩ Tɩɩna Wɩɩjarɩbakɔ, leŋ dɩ wɩalɩŋ ŋ sɩ bʋla pɩmɛ sɛnɛ kʋ ŋaa.
Leŋ dɩ mɩ-na ŋ tɩntɩnna na wombiiŋ a sʋʋ arɩ yarɩfɩɛlaa.
30Mɩ sɛnɛ na nɩɩ-la sɩ kɔ dɩ ʋ laa dʋnɩa nɩaa ta nɛ.
31Ŋ tɩmʋ dɩ ʋ kɔ nʋʋkala teeŋ nɛ, dɩ nʋʋkala naʋ.
32Bie deeŋ jaŋ nagɛ pʋlʋmʋŋ a dagɛ nɩalɩŋ sɩ bɩ Juu tɩŋŋaa ŋaa wombiiŋ,
ka dɩ ŋ nɩaa Iziral tɩŋŋaa ma na.”
33Simioŋ sɩ bʋl ŋɩɩ dɛrɛ, wɩalɩŋ ʋ fa sɩ bʋla a tɩgɛ bile lɛ ŋaa bile nyɩmma arɩ ʋ naaŋ wʋkpuŋkpere.
34Ŋɩɩ nɛ Simioŋ chʋɔlɛ Wɩa pɩba dɩ ʋ pɛ ba lɛ aŋ bʋla pɩ ʋ naaŋ Mɛɛrɩ, “Wɩa lɩɩsɛ ŋ bie deeŋ dɩ ʋ kʋ dɔgɩsɛ nɩalɩŋ sɩ bɩ ʋ wɩaa laa dii nɛ, aŋ laa nɩalɩŋ sɩ laa ʋ wɩaa dii ta Iziral tɩŋŋaa tʋɔŋ. Wɩa ta bie deeŋ dɩ ʋ ŋaa magɩl nɛ. Nɩaa yʋga sɩ jaŋ joŋ ba harɩŋ yɩaʋ, 35ama ba tʋɔbɩɩnaa jaŋ lɩɩ dɩ-jalɩŋ.” Ŋɩɩ nɛ ʋ bɩra bʋla pɩ Mɛɛrɩ, “Ŋ tɩtɩa tʋɔŋ jaŋ chei woruŋ ŋ bile wɩaa a nagɛ ba sɩ joŋ sɩa tɔbʋŋ.”
36Haal kʋbala ma nɛ fa hɛ nɩmɛ, ʋ yɩrɩŋ nɛ Ana. Ʋ fa ŋaa Wɩa wʋlaabʋllʋ nɛ. Ʋ nyɩmma ma yɩrɩŋ nɛ fa Fanʋɛl a lɩɩ Asa doho nɩaa tʋɔŋ. Ʋ fa ŋaa hanɩhɩaŋ nɛ. Ʋ fa jaa bala jɩsɩŋ balɩpɛ nɛ ka ʋ sʋʋ, 37ka ʋ ŋaa yo-haal a kaa mʋ yi ʋ jɩsɩŋ mahɩŋ banɛsɛ arɩ banɛsɛ lɛ. Ʋ fa yie hɛ Wɩa dɩɩ-balɩŋ lɛ nɛ wɩɩhɛyɛ arɩ tɩtaŋɩŋ kala, ʋ bɩ lɩɩ. Ʋ yie vɔɔ niiŋ nɩmɛ aŋ pɛ chʋchʋɔlɛ Wɩa. 38Simioŋ fa sɩ bʋl wɩaa pɩpɩ Mɛɛrɩ ŋɩɩ, dɩ Ana ma kʋ jʋʋ. Ʋ na bile a dɛnnɛ Wɩa aŋ bʋl wɩaa a tɩgɛ bile lɛ a pɩ nɩalɩŋ kala fa sɩ gbɛrɛ dɩ Wɩa laa Jerusalɛm nɩaa ta.
Ba mɩɩra mʋ Nazarɛt
39Mɛɛrɩ arɩ Josɛf sɩ ŋaa wɩalɩŋ kala Wɩa sɩ sɩ dɩ ba ŋaa Jerusalɛm lɛ a dɛrɛ, ba mɩɩra mʋ Galilii tinteeŋ a mʋ ba jaŋ Nazarɛt. 40Bile waa a kɛŋ doluŋ a kala ŋaa wʋjɩmɩɩ. Wɩa pɛ ʋ lɛ.
Yesu hɔŋ Wɩa dɩɩ-balɩŋ lɛ
41Jɩna-kala Yesu nyɩmma arɩ ʋ naaŋ yie mʋ Jerusalɛm dɩ ba gbieli dɩɩsɩŋ kiele bal gbiele. 42Yesu sɩ ŋaa jɩsɩŋ fii arɩ balɩa, ʋ dɩ ʋ nyɩmma arɩ ʋ naaŋ mʋ dɩɩsɩŋ kiele bal gbiele-la Jerusalɛm lɛ, arɩ ba sɩ vɛnɛɛ ŋaa ŋɩɩ. 43Gbiele-la sɩ dɛrɛ, ba mɩɩraa mʋ dɩa, ka Yesu ha hɛ Jerusalɛm lɛ. Ama ʋ naaŋ arɩ ʋ nyɩmma bɩ jɩŋ. 44Ba fa bɩɩna arɩ ʋ hɛ ba nɩalɩŋ sɩ mɩɩra mʋ ba jaŋ tʋɔŋ nɛ. Ba suomo chɩchɛʋ ba naambiiriŋ arɩ ba nandɔnsʋŋ tʋɔŋ. Ba vɛŋ deeŋ deeŋ wɩa tuu jʋʋ a chɛʋ ka. 45Ba sɩ chɛʋ ka, ba mɩɩra mʋ Jerusalɛm a bee chɩchɛʋ nɩmɛ.
46Ʋ tapʋlaa batori chɛɛŋ nɛ ba naʋ Wɩa-dɩɩ-balɩŋ lɛ, dɩ ʋ dɩ Wɩa teniŋ kerichiba hɔnɔ. Ʋʋ jegili wɩalɩŋ ba sɩɩ bʋl aŋ pɛ pɩpɩɛsɛba wɩaa ma. 47Nɩalɩŋ kala sɩ hɛ nɩmɛ a nɩɩ ʋ sɩɩ chaarɛ wɩaa sɩaa arɩ wʋjɩmɩŋ ŋɩɩ, ʋ ŋaaba wʋkpuŋkpere. 48Ʋ nyɩmma arɩ ʋ naaŋ sɩ naʋ, ʋ ŋaaba ma wʋkpuŋkpere. Ŋɩɩ nɛ ʋ naaŋ pɩɛsʋ, “Mɩ bii, bɛɛ nɛ tɩɩ ŋ ŋaala ŋ-la? Mɩ dɩ ŋ nyɩmma gɔllɔ chɛŋ ka nɛ.” 49Ŋɩɩ nɛ ʋ pɩɛsɛba, “Bɛɛ nɛ tɩɩ ma gɔllɔɔ chɛmɛ? Ma bɩ jɩŋ arɩ mɩ jaŋ hɛ mɩ Nyɩmma dɩa lɛɛ?” 50Ama ba fa bɩ wɩɩ-la ʋ sɩ bʋla pɩba bʋbʋɔŋ jɩŋ.
51Ŋɩɩ nɛ Yesu arɩ ʋ nyɩmma arɩ ʋ naaŋ mɩɩra mʋ Nazarɛt a hɔŋ nɩmɛ. Ba sɩ hɛ nɩmɛ, ʋ to ba niiŋ woruŋ. Ʋ naaŋ laa wɩalɩŋ kala sɩ ŋaa a hɛ ʋ tʋɔŋ lɛ aa bɩɩnɛ.
52Ŋɩɩ nɛ Yesu waa, ʋ wʋjɩmɩŋ ma pʋŋa pɛ. Wɩa chou, nɩaa ma zizilu woruŋ.
Currently Selected:
Luuk 2: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014