JOSUA 17

1Josɛf bii-hɩaŋ Manasɛ doho nɩaa ma laa tinteeŋ kpaalɩŋ nɛ. Manasɛ bii-hɩaŋ nɛ fa ŋaa Makɩɩ. Makɩɩ nɛ fa ŋaa Gɩlɩad tɩŋŋaa naabalɩma. Ʋ doho nɩaa nɛ laa Gɩlɩad arɩ Basaŋ tinteeŋ sɩ hɛ Jɔdaŋ wɩɩpɔsʋŋ, bɛɛ wɩaa Makɩɩ doho nɩaa fa ŋaa laalɩyuori babiibala nɛ. 2Manasɛ doho nɩkaanaa deemba ma fa kɛŋ kpaalɩŋ nɛ Jɔdaŋ fuo-la wɩɩjʋʋlʋŋ dɩɩrɩŋ: Abieza nyɩŋ-nɩaa, Hɛlɛk nyɩŋ-nɩaa, Asɩrɩɛl nyɩŋ-nɩaa, Sɛkɛm nyɩŋ-nɩaa, Hefa nyɩŋ-nɩaa arɩ Sɛmɩda nyɩŋ-nɩaa. Baala-la sɩ ŋaa Josɛf nanʋala Manasɛ doho nɩaa dɔnsʋŋ nɛ ŋɩɩ.

3Baal kʋbala nɛ fa hɛ nɩmɛ, ʋ yɩrɩŋ nɛ Zelofihad, ʋ nyɩmma nɛ Hefa, Hefa ma nyɩmma nɛ Gɩlɩad, Gɩlɩad ma nyɩmma nɛ Makɩɩ, Makɩɩ ma nyɩmma nɛ Manasɛ. Zelofihad fa bɩ hambolibie lʋla, hantolibiisiŋ dʋndʋŋa nɛ ʋ lʋl. Ba yɩraa nɛ, Mala, Nowa, Hogila, Mɩlɩka arɩ Tɩɩza. 4Toloo deemba nɛ sii a kɔ Elieza, Wɩɩsʋllɩ sɩpaalaara, arɩ Nuŋ nanʋala Josua arɩ Iziral tɩŋŋaa sɩpaalaaraa teeŋ a bʋl, “La TƖƖNA fa bʋla pɩ Mosis dɩ la dɩbaalaa tinteeŋ tʋɔŋ ʋ pɩla ma kpaalɩŋ.” Ŋɩɩ nɛ Josua keri ba dɩbaala-la tinteeŋ pɩba, arɩ La TƖƖNA sɩ dagɛ ŋɩɩ. 5Manasɛ laa tinteeŋ kpaalɩŋ lere fii nɛ, a pɛ Gɩlɩad arɩ Basaŋ sɩ hɛ Jɔdaŋ fuo-la cholo wɩɩpɔsʋŋ dɩɩrɩŋ, 6bɛɛ wɩaa Manasɛ doho nɩaa toloo ma fa laa tinteeŋ kpaalɩŋ nɛ ba hambolibiisiŋ tʋɔŋ. Gɩlɩad tinteeŋ nɛ ŋaa Manasɛ doho nɩaa nɩkaana-la ma kʋa. 7Manasɛ tinteeŋ bʋa chɩŋ Asa lɛ nɛ, a kaa mʋ yi Mɩkɩmɛtaf sɩ hɛ Sɛkɛm wɩɩpɔsʋŋ dɩɩrɩŋ, a gɛbɛ wɩɩpɔsʋŋ nadiiŋ, a mʋ kɛŋ nɩalɩŋ kala sɩ hɔŋ Ɛŋ-Tapʋa tinteeŋ a pɛ. 8Lɛɛlɛ Manasɛ nɛ tɩɩ Tapʋa tinteeŋ, ama Tapʋa taŋ-la tɩtɩa sɩ hɛ Manasɛ tinteeŋ bʋa lɛ, Efirem tɩŋŋaa nɛ tɩɩʋ. 9Bʋa-la to wɩɩpɔsʋŋ nadiiŋ dɩɩrɩŋ ŋɩɩ nɛ a mʋmʋ Kana fuo-bie-la. Efirem tasɩ-la fa guoli Manasɛ tasɩŋ nɛ, ama Manasɛ tinteeŋ bʋa nɛ pɩŋ fuo-bie-la wɩɩpɔsʋŋ nagʋa ŋɩɩ a mʋ dɛrɛ Mediterenia mʋga-la niiŋ. 10Wɩɩpɔsʋŋ nadiiŋ tinteeŋ ŋaa Efirem kʋa nɛ, ka wɩɩpɔsʋŋ nagʋa tinteeŋ ma ŋaa Manasɛ kʋa. Manasɛ tinteeŋ mʋ a yagɛ mʋga-la lɛ nɛ, a lɩɩsɛ Asa doho nɩaa tinteeŋ ta wɩɩpɔsʋŋ nagʋa, ka Ɩsaka doho nɩaa tinteeŋ ma hɛ wɩɩpɔsʋŋ dɩɩrɩŋ.

11Ɩsaka arɩ Asa tinteyee lɛ, Manasɛ nɛ ha tɩɩ Bɛf Saŋ, Ibɩlɩam arɩ nɩalɩŋ sɩ hɛ Doo lɛ, a kɛŋ Ɛndɔ, Taanak arɩ Megido arɩ tasɩ-la kala sɩ golliba chu. (Doo nɛ ha baa yɩrɛ Nafɔf.)

12Manasɛ doho nɩalɩŋ fa bɩ wuo yuo kiri nɩalɩŋ sɩ hɔŋ tasɩ-la lɛ, bɛɛ wɩaa Kɛnaŋ tɩmma-la chaasa kɛŋ ba tʋɔŋ nɛ dɩ ba hɔŋ lee-la. 13Ama Iziral tɩmma-la sɩ kʋ kɛŋ doluŋ a yʋgɛ, ba fʋgɛ Kɛnaŋ tɩmma-la hɛ nɛ ba tɩŋ tɩntɩŋŋaa a pɩpɩba, ama ba bɩ ba kala kiri ba tasɩŋ lɛ.

14Josɛf doho nɩalɩŋ pɩɛsɛ Josua, “Bɛɛ nɛ tɩɩ ŋ joŋ tinteeŋ sɛmɛ kʋbala dʋndʋŋ a pɩla, la kpaalɩŋ ŋaa kʋbala? La TƖƖNA pɛ la lɛ nɛ woruŋ la pʋŋ a yʋgɛ.”

15Ŋɩɩ nɛ Josua bʋl, “Dɩ ma nɩaa nɛ yʋga a kɩɩ Efirem tintee-la peelee sɩ yʋga, ŋɩɩ-na ma jaŋ wuo sii a mʋ duuŋ tʋɔŋ, a kpʋ leriŋ a pɩ ma tɩtɩa Pɛrɛs tɩŋŋaa arɩ Refem tɩmma-la tinteeŋ lɛ.”

16Ŋɩɩ nɛ Josɛf doho nɩalɩŋ ma bʋl, “Efirem tintee-la peelee sɩ yʋga bɩ yʋgɛ a pɩla, Kɛnaŋ tɩmma-la sɩ hɛ tintee-taalɩsɩ-la lɛ, ba kɛŋ hɔɔŋ janɩŋ torukoba nɛ, ba dɩ nɩalɩŋ sɩ hɛ Bɛf Saŋ lɛ arɩ tasɩ-la kala sɩ golliba a chu arɩ nɩalɩŋ sɩ hɛ Jɛzɩrɛl fuonaa-la lɛ kala.” 17Josua ma bɩra bʋla pɩ Josɛf doho nɩalɩŋ Efirem arɩ Manasɛ, “Tɛŋɛ, ma yʋga nɛ woruŋ, a kɛŋ doluŋ ma. Ma bɩ kpaalɩŋ kʋbala wuo kɛŋ, 18ama ma jaŋ tɩɩ tintee-la peelee sɩ yʋga duu-la kala ma a pɛ. Má kpʋ duu-la kala a mʋ yi ʋ dɩdɛrɩŋ, dɩ ʋ ŋaa ma kʋŋ. Kɛnaŋ tɩŋŋaa magɩla kɛŋ hɔɔŋ janɩŋ torukoba nɛ a kɛŋ doluŋ ma, ama ma jaŋ wuo kiriba ta dɩ ba lɩɩ nɩmɛ.”

Currently Selected:

JOSUA 17: SIS

Highlight

Copy

Compare