JONA 1
1
Wɩa tɩŋ Jona dɩ ʋ mʋ Nɩnɩvɛ
1Wɩa bʋl wɩaa pɩ Amɩta nanʋala Jona. Ʋ sɩ, 2“Sii mʋ tabal-la ba sɩɩ yɩrɛ Nɩnɩvɛ a bʋl wɩaa chagɩlɛba a mʋ tɩgɛ wʋbɔmɔ-la ba sɩɩ ŋaa lɛ. Mɩ na ba wʋbɔmɔ-la nɛ.”
3Jona vɩa Wɩa niiŋ aŋ mɩɩra fá mʋmʋ lee-la ba sɩɩ yɩrɛ Taasɩs. Ʋ sɩ mʋ yi Jopa, ʋ na lɩɩŋ daboro sɩɩ mʋ nɩmɛ. Ʋ tiŋ moribiiŋ aŋ jʋʋ, dɩ ʋ duoro mʋ Taasɩs a fá lɛl La TƖƖNA teeŋ.
4Ŋɩɩ nɛ La TƖƖNA leŋ pel-bal lu mʋgʋ-bal-la lɛ. Lɩɩ-pel-bal sii a chɩchɛ dɩ ʋ yɛrɛ lɩɩŋ daboro-la. 5Ŋɩɩ nɛ fawʋllʋŋ jʋʋ lɩɩŋ daboro-la tɩntɩnnaa kala. Nʋʋkala bunso pɩpɩ ʋ vene. Ba chaarɛ kɩalɩŋ kala sɩ hɛ lɩɩŋ daboro-la tʋɔŋ a hɛ mʋgʋ-bal-la lɛ, dɩ daboro-la bɩra sɩ́ yuŋ.
Bʋa-la lɛ dɩ Jona-na tuu lɩɩŋ daboro-la bʋbʋɔŋ a pɩŋ doŋ a yuo naaŋ. 6Daboro-la kʋhɩaŋ tuu pɩɛsʋ, “Ɛɛ nɛ ŋ jaŋ wuo pɩŋ doŋ ŋ-la? Ŋ ma sii bunso pɩ ŋ vene, kapo ʋ jaŋ nɩɩ a fá la nenige dɩ la sɩ́ sʋʋ.”
7Ŋɩɩ nɛ lɩɩŋ daboro-la tɩntɩnnaa bʋla pɩ dɔŋɔ, “Má leŋ dɩ la tɔnsɔ na nɩɩ-la sɩ leŋe wʋbɔmʋŋ deeŋ puula.” Ŋɩɩ nɛ ba tɔnsɛ, ʋ kɛŋ Jona. 8Ba pɩɛsʋ, “Kʋbɛɛ nɛ maga la nyaŋ? Tɩntɩŋ bɛɛ nɛ ŋ tɩtɩŋ? Tabɛɛ nɛ ŋ lɩɩ? Tintee bɛɛ nɛ ŋ lɩɩ? Do bɛɛ nʋʋ nɛ ŋ ŋaa? Dagɛla.” 9Ŋɩɩ nɛ Jona bʋla pɩba, “Mɩ ŋaa Hiburu tɩɩna nɛ, mɩɩ chʋɔlɛ mɩ Tɩɩna Wɩa nɛ, ʋ nɛ ŋaa wɩa-nyuŋ, mʋgʋ-balɩŋ arɩ tinteeŋ.”
10Ŋɩɩ nɛ Jona bɩra bʋl, “Mɩ fáa lɛl La TƖƖNA teeŋ nɛ.” Ʋ sɩ bʋl ŋɩɩ, fawʋllʋŋ kɛmba kɩŋkɛŋ. Ŋɩɩ nɛ ba pɩɛsʋ, “Bɛɛ nɛ ŋ ŋaa ŋ-la?”
11Ŋɩɩ nɛ lɩɩ-pel-la faasa nyɛsɛ. Ba pɩɛsʋ, “Ɛɛ nɛ la jaŋ ŋaaŋ dɩ lɩɩ-peliŋ deeŋ sigile pɩla?”
12Jona bʋl, “Má jommi yuo hɛ lɩɩ-la tʋɔŋ, dɩ ma nɛ ŋaa ŋɩɩ, pel-la jaŋ sigili. Mɩ jɩma mɩ nɛ tɩɩ lɩɩ-pel-balɩŋ deeŋ kɔ ma lɛ.”
13Ba vɩa dɩ ba joŋu yuo hɛ mʋgʋ-bal-la tʋɔŋ aŋ nɩnɛrɩgɛ dɩ ba kɛŋ lɩɩŋ daboro-la mɩɩra mʋ yi dundolo. Ba walɩma lɔl, bɛɛ wɩaa lɩɩ-pel-la pʋŋaa pɛ nɛ. 14Ŋɩɩ nɛ ba bunso pɩ La TƖƖNA, “Ou, La TƖƖNA, jaaŋ jaaŋ, joŋo chɛla la sɩɩ chɛ dɩ la kpʋ baala deeŋ sɩ bɩ wɩɩ cheye. Sɩ́ la dɔgɩsʋ, bɛɛ wɩaa ŋ ŋaa wɩɩ-la ŋ sɩ cho nɛ.” 15Ŋɩɩ nɛ ka ba joŋ Jona yuo hɛ mʋgʋ-bal-la lɛ, lɩɩ-pel-la guu sigili. 16Lɩɩ-pel-la sɩ guu sigili ŋɩɩ, nɩalɩŋ faasa fá La TƖƖNA. Ba kpʋ pʋsʋŋ a ŋaa Wɩɩsʋlʋŋ pɩ La TƖƖNA aŋ ta niiree ʋ teeŋ.
17Ba sɩ joŋ Jona yuo hɛ mʋgʋ-bal-la tʋɔŋ ŋɩɩ, La TƖƖNA leŋ chenfil-bal joŋ Jona liŋ, ʋ hɛ ʋ tʋɔŋ tapʋlaa batori, wɩɩhɛyɛ arɩ tɩtaŋɩŋ kala.
Currently Selected:
JONA 1: SIS
Highlight
Share
Copy

Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014