SƖPAALAARAA 7
7
Gɩdɩɔŋ yuo dii Midiaŋ tɩŋŋaa
1Taŋ sɩ pʋla chʋchʋɔ-fɩɛla, Jerub-Baal (Gɩdɩɔŋ nɛ ŋɩɩ) arɩ ʋ laalɩyuoroo kala sii a mʋ ŋmoo buguŋ Harɔd lɩɩ-bulo leriŋ. Ka Midiaŋ tɩŋŋaa ma hɛ wɩɩpɔsʋŋ nagʋa fuonaaŋ lɛ a kpagɛ Mɔrɛ dundolo-la. 2La TƖƖNA bʋla pɩ Gɩdɩɔŋ, “Ŋ laalɩyuoro-la yʋga nɛ arɩ mɩ sɩ jaŋ leŋ dɩ ma yuo dii Midiaŋ tɩŋŋaa. Dɩ ŋ nɛ ŋaa ŋɩɩ, Iziral tɩŋŋaa jaŋ bɩɩnɛ arɩ ba tɩtɩa nɛ yuo dii laal-la. Ba bɩ jaŋ joŋ yɩrɩŋ pɩmɛ. 3Ŋɩɩ wɩaa, heele bʋla pɩ laalɩyuoroo kala, ‘Nɩɩ-la kala fawʋllʋŋ sɩ kɛnɛ, ʋ jaŋ wuo chɩŋ Gɩlɩad peel-la lɛ a mɩɩra mʋ dɩa.’ ” Ŋɩɩ nɛ nɩaa bʋɩ mara arɩ balɩa mɩɩrɛ, aŋ ka nɩaa bʋɩ fii.
4La TƖƖNA bɩra bʋla pɩ Gɩdɩɔŋ, “Ŋ nɩalɩŋ ha yʋga nɛ. Kɛmba tuu lɩɩŋ leriŋ, mɩ jaŋ kɛmba pɔrɔ pɩŋ nɩmɛ. Dɩ mɩ nɛ sɩ, ‘Nɩa deeŋ jaŋ to ŋ harɩŋ mʋ,’ ʋ jaŋ mʋ, ama dɩ mɩ nɛ sɩ, ‘Nɩa deeŋ bɩ jaŋ to ŋ harɩŋ mʋ,’ ʋ bɩ jaŋ mʋ.”
5Ŋɩɩ nɛ Gɩdɩɔŋ kɛŋ laalɩyuoro-la kala ba tuu lɩɩ-la leriŋ. Nɩmɛ nɛ La TƖƖNA bʋla pʋ, “Kɛŋ nɩalɩŋ sɩ chu nyʋnyʋa lɩɩ-la a nagɛ vaha, a pɔrɛ nɩalɩŋ sɩ kpirime a kɛŋ nɩsɩŋ ŋaa nyʋnyʋa lɛ.” 6Nɩaa zɔɔ-batori nɛ fa kɛŋ nɩsaa a ŋaa lɩɩ-la nyʋnyʋa. Ka nɩkaanaa ma kala kpirimi a chu nyʋnyʋa.
7La TƖƖNA bʋla pɩ Gɩdɩɔŋ, “Nɩalɩŋ zɔɔ-batori sɩ kɛŋ nɩsaa ŋaa lɩɩ-la nyʋa, ŋ dɩ ba nɛ mɩ jaŋ kaa laa Iziral tɩŋŋaa ta Midiaŋ tɩŋŋaa nɩsɩŋ lɛ. Mɩ jaŋ leŋ dɩ ma yuo diiba. Leŋ dɩ nɩkaana-la kala mɩɩra mʋ ba dɩɩsɩŋ.” 8Ŋɩɩ nɛ Gɩdɩɔŋ arɩ laalɩyuoro-la zɔɔ-batori laa Iziral nɩkaana-la kʋdiilee a laa ba banyilliŋ ma pɛ. Ka ʋ leŋ ba mɩɩra mʋ ba dɩɩsɩŋ.
Dɩ Midiaŋ tɩŋŋaa tuu hɔŋ fuonaaŋ lɛ, ka ba ma hɔŋ dundolo nyuŋ. 9Tɩtaŋɩŋ La TƖƖNA bʋla pɩ Gɩdɩɔŋ, “Má sii tuu yuo Midiaŋ tɩmma-la ba dɩhɔnʋŋ. Mɩ jaŋ jomba hɛ ma nɩsɩŋ lɛ. 10Dɩ fawʋllʋŋ nɛ kɛnɩŋ arɩ ŋ sɩ jaŋ mʋ yuoba, kɛŋ ŋ tɩntɩnna ba sɩɩ yɩrɛ Pʋra dɩ ma lʋara mʋ ba buguŋ, 11a nɩɩ wɩalɩŋ ba sɩɩ bʋl. Dɩ ŋ nɛ nɩɩ wɩalɩŋ, ŋ nyuŋ jaŋ duori dɩ ŋ wuo yuoba.” Ŋɩɩ nɛ Gɩdɩɔŋ sii kɛŋ ʋ tɩntɩnna Pʋra ba mʋ ba dʋndɔmɔ-la dɩhɔnʋŋ niiŋ. 12Dɩ Midiaŋ tɩŋŋaa, Amalɛk tɩŋŋaa arɩ nɩalɩŋ dɔnsʋŋ kala sɩ lɩɩ wɩɩpɔsʋŋ dɩɩrɩŋ hɔnɔ su fuonaa-la kala a nagɛ hɔbɔ sɩ su leriŋ. Ba bʋntaŋŋaba ma yʋgɛ woruŋ a nagɛ hagɩlɩ-bumbugulo sɩ pɩŋ mʋgʋ-balɩŋ niiŋ, ŋ bɩ ba wuo dɩɩsɛ.
13Gɩdɩɔŋ sɩ mʋ yi Midiaŋ laalɩyuoro-la buguŋ, ʋ nɩa dɩ ba dɔŋɔ bʋl ʋ sɩ duoso wɩaa a pɩpɩ ʋ nandɔŋɔ. Ʋ sɩ, “Mɩ duoso na boroboro gulumuŋ ba sɩ kɛŋ mɩaa ŋaa dɩ ʋ bilime kʋ jʋʋ la buguŋ arɩ doluŋ a yɩ lɛbɩŋ, ʋ tel a bɩrɩma chu.”
14Ʋ nandɔŋ-la bʋla pʋ, “Ŋ duoso-la mʋ tɩgɛ Jʋas nanʋala Gɩdɩɔŋ lɛ nɛ, Iziral tɩŋŋaa laalɩyuoroo nɩhɩaŋ-la. Wɩa joŋ la Midiaŋ tɩŋŋaa arɩ la laalɩyuoroo kala a hɛ ʋ nɩsɩŋ lɛ nɛ.”
15Gɩdɩɔŋ sɩ nɩɩ duoso-la arɩ ŋɩɩ ba sɩ dagɛ ʋ bʋbʋɔŋ, ʋ dɛnnɛ Wɩa. Ŋɩɩ nɛ aŋ mɩɩra mʋ ba Iziral tɩŋŋaa buguŋ aŋ kpɩa, “Má sii la mʋ! La TƖƖNA joŋ Midiaŋ tɩŋŋaa laalɩyuoroo kala a hɛ la nɩsɩŋ lɛ nɛ.” 16Gɩdɩɔŋ kɛŋ ʋ laalɩyuoro-la zɔɔ-batori a kpaa leree batori, a joŋ banyilliŋ arɩ tagɩ-wuoloo a joŋ tʋʋ-diiri kapɩlaa arɩ nyiniŋ hɛ ba tʋɔŋ a pɩ ba kʋŋkala.
17Ŋɩɩ nɛ ʋ bʋla pɩba, “Máa beŋ mɩ lɛ, máa to mɩ harɩŋ. Dɩ mɩ nɛ mʋ yi Midiaŋ tɩmma-la dɩhɔnʋŋ niiŋ, a ŋaa wɩɩ, má ma ŋaa ŋɩɩ tɩtɩa. 18Dɩ mɩ dɩ nɩalɩŋ kala sɩɩ to mɩ harɩŋ nɛ ŋmʋʋ la banyilliŋ, ma nɩkaana-la sɩ golli ba dɩhɔnʋŋ chu, má ma ŋmʋʋ ma kɩaa, aŋ ŋaa goŋ a bʋl, ‘Má yuo laalɩŋ pɩ La TƖƖNA, má yuo laalɩŋ pɩ Gɩdɩɔŋ.’ ”
19Gɩdɩɔŋ arɩ nɩalɩŋ zɔlɔ sɩɩ to ʋ harɩŋ mʋ yi Midiaŋ tɩmma-la buguŋ niiŋ tɩta-siesee nɛ, dɩ nɩaa dɔnsʋŋ kʋ laa nɩalɩŋ sɩɩ pɔba lɛ, a pɔ. Ŋɩɩ nɛ ba ŋmʋʋ banyilliŋ aŋ joŋ ba tagɩsɩ-la ba sɩ koro a yaga yɛrɛ. 20Gɩdɩɔŋ laalɩyuori-kaana-la bʋbʋɔ-bugoo balɩa ma ŋmʋʋ banyilli-la ba sɩ koro ba nadiiŋ nɩsaa lɛ. Ŋɩɩ nɛ aŋ joŋ tagɩsɩ-la ba ma sɩ koro yaga yɛrɛ, aŋ kori tʋʋ-diiri kapɩla-la arɩ nyiniŋ ba nagʋa nɩsaa lɛ, aŋ kala ŋaa goŋ a bʋl, “Má yuo laalɩŋ pɩ La TƖƖNA, má yuo laalɩŋ pɩ Gɩdɩɔŋ.” 21Ka ba kʋŋkala chɩŋ ʋ dɩchɩnɩŋ a golli Midiaŋ tɩŋŋaa buguŋ a chu, Midiaŋ tɩmma-la kala fá, aŋ ŋmuŋmoo niiŋ.
22Bʋa-la lɛ ba sɩ ŋmʋʋ banyilli-la kala zɔɔ-batori, La TƖƖNA leŋ Midiaŋ tɩŋŋaa laalɩyuoroo chaarɛ tokobiee a gʋra yuyuo dɔŋɔ ba buguŋ lɛ. Laalɩyuoro-la fá mʋ taŋ-la ba sɩɩ yɩrɛ Bɛf Sɩta a tʋʋlɛ Zɛrɛra fuonaaŋ a mʋ yi taŋ-la ba sɩɩ yɩrɛ Abɛl Mehola sɩ kpagɛ lee-la ba sɩɩ yɩrɛ Tabaf. 23Ʋ ŋɩɩ harɩŋ, ba yɩrɛ Iziral laalɩyuoro-la kala sɩ lɩɩ Nafɩtalɩ, Asa arɩ Manasɛ doho doho, ba kʋ kire to Midiaŋ tɩmma-la harɩŋ. 24Ka Gɩdɩɔŋ tɩŋ nɩaa ba mʋ laalɩyuoroo sɩ hɛ Efirem tintee-la peelee sɩ yʋga lɛ teeŋ a bʋl, “Má sii kʋ tuu a yuo Midiaŋ tɩmma-la, má pɔ Jɔdaŋ fuo-la arɩ fuonu-la kala a kɛŋ ŋɩɩ mʋ yi lee-la ba sɩɩ yɩrɛ Bɛf Bara dɩ Midiaŋ tɩmma-la sɩ chol.” Ŋɩɩ nɛ Efirem laalɩyuoro-la kala ba fa sɩ yɩra kɔ, a chɩna pɔ fuonu-la kala a kaa mʋ yi Bɛf Bara. 25Ba ha bɩra yuo kɛŋ Midiaŋ tɩŋŋaa sɩpaalaaraa ma balɩa nɛ baa yɩrɛ, Ɔrɛb arɩ Zɛɛb. Ba kpʋ Ɔrɛb bʋŋ-la ba lɛɛlɛ sɩɩ yɩrɛ Ɔrɛb lɛ nɛ, aŋ kpʋ Zɛɛb ma lee-la ba sɩɩ chagɛ tɩɩnɛnɛɛ sɩnɩŋ ba lɛɛlɛ sɩɩ yɩrɛ Zɛɛb. Ba ha kire to Midiaŋ tɩmma-la harɩŋ nɛ, aŋ kɛŋ Ɔrɛb arɩ Zɛɛb nyusuŋ kaa kʋ pɩ Gɩdɩɔŋ, dɩ ʋ fa hɛ Jɔdaŋ fuo-la wɩɩpɔsʋŋ dɩɩrɩŋ.
Currently Selected:
SƖPAALAARAA 7: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
