SƖPAALAARAA 20
20
Iziral tɩŋŋaa yuo Bɛnjamɩŋ doho nɩaa
1Ŋɩɩ nɛ Iziral tɩŋŋaa kala, a chɩŋ Daŋ doho nɩaa sɩ hɛ wɩɩ-pɔnʋŋ nagʋa a kaa mʋ Bɛɛsɩba wɩɩpɔsʋŋ nadiiŋ, arɩ Gɩlɩad tinteeŋ nɩaa, ba kala lɩɩ hɛ dɔŋɔ a ŋaa nii-bala a hilimi La TƖƖNA sɩpaaŋ Mɩzɩpa lɛ. 2Iziral doho doho-la kala sɩpaalaaraa nɛ fa hɛ Wɩa nɩaa hilime deeŋ lɛ. Ba laalɩyuoroo fa ŋaa bʋɩ banɛsɛ nɛ a kɛŋ ba tokobiee. 3(Ŋɩɩ nɛ Bɛnjamɩŋ doho nɩalɩŋ nɩɩ arɩ Iziral tɩmma-la dɔnsʋŋ mʋ a hilimi Mɩzɩpa lɛ nɛ.) Iziral tɩmma-la pɩɛsɛ Levi doho nɩɩ-la, “Bʋla pɩla ŋɩɩ wʋbɔmʋŋ deeŋ sɩ to ŋaa.”
4Ŋɩɩ nɛ Levi doho nɩɩ-la haala ba sɩ kpʋa bʋl, “Mɩ dɩ mɩ haala mɩ sɩ bile aŋ bɩ jaa nɛ mʋ Gɩbɩa sɩ hɛ Bɛnjamɩŋ tinteeŋ lɛ dɩ la chʋa nɩmɛ. 5Tɩtaŋɩŋ Gɩbɩa baalaa kʋ golli dɩa-la lɛ la sɩ pɩna a chu, a chɩchɛ dɩ ba kpʋmɛ. Ŋɩɩ nɛ ba mɩɩra gurigi haal-la mɩ sɩ bile aŋ bɩ jaa a pɩnʋ, ʋ sʋʋ. 6Mɩ joŋu kaa keri muno muno a kpaa Iziral doho doho-la kala, bɛɛ wɩaa nɩalɩŋ ŋaa wʋbɔŋ nɛ arɩ hɩɩsɩ wɩɩ Iziral tinteeŋ lɛ. 7Lɛɛlɛ ma Iziral tɩŋŋaa kala, má ma bʋl wɩɩ-la ma sɩ kɛnɛ a mʋ tɩgɛ wɩɩŋ deeŋ lɛ.”
8Ŋɩɩ nɛ nɩalɩŋ kala sii chɩŋ a bʋl, “La kʋŋkala bɩ jaŋ mɩɩra mʋ dɩa da. 9Ama wɩɩ-la la sɩ jaŋ ŋaa Gɩbɩa lɛ nɛ ŋ-la: La jaŋ tɔnsɛ a lɩɩsɛ nɩaa dɩ ba mʋ yuoba. 10Baalaa zɔlɔ tʋɔŋ la jaŋ lɩɩsɛ nɩaa fii Iziral doho doho-la kala lɛ, baalaa bʋɩ ma tʋɔŋ la jaŋ lɩɩsɛ nɩaa zɔlɔ. Nɩaa bʋɩ fii ma tʋɔŋ la jaŋ lɩɩsɛ nɩaa bʋɩ, dɩ ba kɛŋ kʋdiilee mʋ pɩ laalɩyuoro-la sɩɩ mʋ Gɩbɩa. Dɩ laalɩyuoro-la nɛ mʋ yi Gɩbɩa sɩ hɛ Bɛnjamɩŋ tinteeŋ lɛ, ba jaŋ dɔgɩsɛba a tɩŋ wʋbɔŋ-la ba sɩ ŋaa Iziral tinteeŋ lɛ.” 11Ŋɩɩ nɛ Iziral tɩŋŋaa kala kʋ hɛ dɔŋɔ a ŋaa nii-bala dɩ ba yuo taŋ-la.
12Ŋɩɩ nɛ Iziral tɩŋŋaa tɩŋ nɩaa ba mʋ Bɛnjamɩŋ doho nɩaa kala teeŋ a pɩɛsɛba, “Bɛɛ kʋŋ wʋbɔŋ nɛ ma ŋaa ŋɩɩ? 13Má chaarɛ Gɩbɩa nɩbɔmɔ-la sɩ ŋaa wɩɩŋ deeŋ pɩla dɩ la kpʋba a lɩɩsɛ wʋbɔŋ-la ta Iziral tinteeŋ lɛ.” Ama Bɛnjamɩŋ doho nɩalɩŋ bɩ jegile nɩɩ wɩɩ-la ba Iziral tɩmma-la dɔnsʋŋ sɩ bʋla. 14Ŋɩɩ nɛ ba lɩɩ ba tasɩŋ a kʋ hɛ dɔŋɔ Gɩbɩa lɛ dɩ ba yuo ba Iziral tɩmma-la dɔnsʋŋ. 15Bɛnjamɩŋ doho nɩaa guu lɩɩsɛ laalɩyuoroo bʋɩ mara arɩ balɩdʋ ba tasɩŋ lɛ, ba kori tokobiee a pɛ nɩaa zɔɔ-balɩpɛ ba sɩ lɩɩsa Gɩbɩa lɛ. 16Bɛnjamɩŋ doho nɩaa laalɩyuoro-la tʋɔŋ, nɩaa zɔɔ-balɩpɛ nɛ fa hɛ nɩmɛ a ŋaa gɛlɛ tɩmma. Ba fa kɛŋ sɩɩŋ nɛ woruŋ, dɩ ŋ nɛ paala joŋ nyu-pʋnʋŋ bil dɩ ba kʋŋ yuou arɩ kpalɩŋ, ʋ bɩ puri.
17Iziral tɩŋŋaa sɩ kɛŋ ba laalɩyuoroo hɛ dɔŋɔ, nɩalɩŋ sɩ jɩŋ laalɩ-yuonuŋ woruŋ ŋaa nɩaa bʋɩ zɔɔ-banɛsɛ nɛ, a lɩɩsɛ Bɛnjamɩŋ doho nɩaa ta.
18Ŋɩɩ nɛ Iziral tɩŋŋaa mʋ Bɛtɛl a pɩɛsɛ Wɩa, “Do bɛɛ laalɩyuoroo nɛ maga dɩ ba laa sɩpaaŋ a mʋ yuo Bɛnjamɩŋ doho nɩalɩŋ?” La TƖƖNA bʋl, “Juda doho nɩaa laalɩyuoroo nɛ jaŋ laa sɩpaaŋ mʋ.”
19Taŋ sɩ pʋla, Iziral tɩmma-la sii mʋ ŋmoo ba buguŋ a kpagɛ Gɩbɩa. 20Ŋɩɩ nɛ Iziral tɩmma-la lɩɩ a chɩŋ lee-la ba sɩ jaŋ yuo Bɛnjamɩŋ doho nɩalɩŋ Gɩbɩa lɛ. 21Bɛnjamɩŋ doho nɩalɩŋ kʋ lɩɩ Gɩbɩa lɛ a kpʋ Iziral laalɩyuoroo bʋɩ mara arɩ balɩa tapʋlɩɩ-la. 22-23Ŋɩɩ nɛ Iziral tɩŋŋaa mʋ Bɛtɛl, lee-la ba sɩɩ dɛnnɛ La TƖƖNA a yel ʋ sɩpaaŋ wɩa tuu jʋʋ. Ba pɩɛsɛ La TƖƖNA, “La bɩra mʋ a yuo la naambiiriŋ Bɛnjamɩŋ doho nɩalɩŋ?” La TƖƖNA sɩ, “Oo, má mʋ yuoba.” Iziral laalɩyuoro-la nyuŋ nyaasɛ, ba bɩra mʋ chɩŋ lere-la ba fa sɩ laa sɩpaaŋ chɩŋ.
24Ŋɩɩ nɛ Iziral tɩŋŋaa bɩra tʋɔra mʋ Bɛnjamɩŋ doho nɩalɩŋ lɛ tapʋl-lɩa lɛ. 25Bɛnjamɩŋ doho nɩaa laalɩyuoroo bɩra kʋ lɩɩ bʋa deeŋ lɛ a kpʋ ba nɩaa bʋɩ fii arɩ chori fa sɩ kori tokobiee.
26Ŋɩɩ nɛ Iziral tɩmma-la kala mʋ Bɛtɛl a hɔŋ La TƖƖNA sɩpaaŋ a yiyel. Tapʋlɩɩ-la ba vɔɔ niiŋ nɛ wɩa tuu jʋʋ, a ŋaa kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ a pɩ La TƖƖNA. 27Ŋɩɩ nɛ Iziral tɩmma-la mʋ dɩ ba chɛ na La TƖƖNA teeŋ. (Bʋa-la lɛ dɩ La TƖƖNA niiriŋ daga-la fa hɛ Bɛtɛl lɛ, 28Arɔŋ nihiŋ Finihas sɩ ŋaa Elieza nanʋala nɛ faa beŋ daga-la.) Ba pɩɛsɛ La TƖƖNA, “La bɩra mʋ a yuo Bɛnjamɩŋ doho nɩaa sɩ ŋaa la naambiiriŋ koo la sɩ́ mʋ?” La TƖƖNA bʋl, “Má mʋ, chie mɩ jaŋ jomba hɛ ma nɩsɩŋ lɛ.”
29Ŋɩɩ nɛ Iziral tɩŋŋaa leŋ ba laalɩyuoroo dɔnsʋŋ mʋ faa a golli Gɩbɩa. 30Ba bɩra mʋ Bɛnjamɩŋ doho nɩalɩŋ lɛ tapʋl-tori chɛɛŋ, a bɩra mʋ chɩŋ lere-la ba fa sɩ laa sɩpaaŋ chɩŋ. 31Bɛnjamɩŋ doho nɩalɩŋ kʋ lɩɩ dɩ ba yuoba, ba nyɩsa kɛmba fá kagɛ ba taŋ lɛ. Bɛnjamɩŋ doho nɩalɩŋ bɩra suomo kpʋkpʋ Iziral tɩmma-la arɩ ba fa sɩ laa sɩpaaŋ kpʋba ŋɩɩ, a kpʋ ba nɩaa mara arɩ fii ŋmaŋkaaŋ nyuŋ, wombii-la sɩɩ mʋ Bɛtɛl arɩ wombii-la sɩɩ mʋ Gɩbɩa lɛ.
32Bɛnjamɩŋ doho nɩalɩŋ bʋl, “La bɩra yuo diiba nɛ arɩ la sɩ laa sɩpaaŋ a yuo diiba ŋɩɩ.” Ama Iziral tɩmma-la chɛ dɩ ba nyɩsa kɛmba fá kagɛ ba taŋ lɛ nɛ a mʋ wombiee.
33Iziral tɩmma-la kala fá a mʋ chɩŋ Baal Tama lɛ, ka ba nɩalɩŋ sɩ faa Gɩbɩa wɩɩjʋʋlʋŋ dɩɩrɩŋ ma nyaga sii. 34Ŋɩɩ nɛ Iziral laalɩyuoroo bʋɩ fii sɩ jɩŋ laalɩŋ yuonuŋ woruŋ jʋʋ a yuo Gɩbɩa. Laal-la fa chaasa lɩŋ nɛ woruŋ. Bɛnjamɩŋ doho nɩalɩŋ fa bɩ jɩŋ arɩ ba jaŋ cheiba. 35La TƖƖNA leŋ Iziral tɩŋŋaa yuo dii Bɛnjamɩŋ doho nɩaa laalɩyuoroo, a kpʋ ba nɩaa bʋɩ mara arɩ banɔŋ arɩ zɔlɔ tapʋlɩɩ-la. 36Ŋɩɩ nɛ Bɛnjamɩŋ doho nɩalɩŋ jɩŋ arɩ ba yuo diiba nɛ.
Iziral tɩmma-la fa fá ŋɩɩ, bɛɛ wɩaa baa yɩɛlɛ ba nɩalɩŋ sɩ faa a golli Gɩbɩa lɛ nɛ. 37Nɩalɩŋ sɩ faa golli Gɩbɩa lɛ guu sii a jʋʋ Gɩbɩa a pɩsa su taŋ-la a kpʋ nʋʋkala sɩ hɛ nɩmɛ. 38Iziral laalɩyuoro-la sɩ faa arɩ nɩalɩŋ sɩ hɛ pɔkɔŋ nyuŋ fa dagɛ magɩl nɛ a pɩ dɔŋɔ: Dɩ nɩalɩŋ sɩ hɛ pɔkɔŋ nyuŋ nɛ na dɩ nyʋɔsʋŋ ka sii taŋ-la tʋɔŋ, 39ba mɩɩra kʋkɔ. Bʋa-la lɛ Bɛnjamɩŋ doho nɩalɩŋ sɩ kpʋ Iziral nɩaa mara arɩ fii aŋ bʋl, “La bɩra yuo diiba nɛ arɩ bumbuŋ-la.” 40Ŋɩɩ nɛ Iziral tɩŋŋaa na magɩl-la, ba na dɩ nyʋɔsʋŋ tɔ taŋ-la a sii jɩjɩl wɩa-nyuŋ. Bɛnjamɩŋ doho nɩaa mɩɩra daasɛ harɩŋ a na dɩ ba jaŋ tɔ arɩ nyiŋgeliŋ. Ʋ ŋaaba wʋkpuŋkpere. 41Iziral tɩmma-la mɩɩra chicheŋ Bɛnjamɩŋ doho nɩalɩŋ. Fawʋllʋŋ kɛŋ Bɛnjamɩŋ doho nɩalɩŋ, bɛɛ wɩaa ba jɩma arɩ Iziral tɩŋŋaa jaŋ cheiba. 42Ŋɩɩ nɛ ba fá to tintee-hɩlɩŋ dɩɩrɩŋ a mʋmʋ, ama ba bɩ foro Iziral tɩŋŋaa nɩsɩŋ lɛ. Iziral tɩmma-la sɩ faa a sii jʋʋ taŋ-la kʋ tɔba hɛ a kpʋba. 43Iziral tɩmma-la tɔba hɛ nɛ a kire kpʋba ŋɩɩ halɩɩ a mʋ yi Gɩbɩa wɩɩpɔsʋŋ dɩɩrɩŋ. 44Bɛnjamɩŋ doho nɩalɩŋ laalɩyuoroo bʋɩ fii arɩ chori nɛ ba kpʋ. Ba kala fa ŋaa laalɩyuori babiibala nɛ. 45Bɛnjamɩŋ doho nɩalɩŋ sɩ mɩɩra fá a tʋʋlɛ tintee-hɩlɩɩ-la a mʋmʋ Rimoŋ bʋŋ-la leriŋ dɩɩrɩŋ, Iziral tɩŋŋaa kpʋ ba ma bʋɩ banɔŋ nɛ wombii-la lɛ, aŋ ha kire to ba harɩŋ a mʋ yi Gidom a kpʋ nɩaa bʋɩ balɩa a pɛ.
46Tapʋlɩɩ-la Bɛnjamɩŋ doho nɩalɩŋ laalɩyuoro-la sɩ kɛŋ tokobiee a yuyuo, ba nɩaa bʋɩ mara arɩ banɔŋ nɛ ba kpʋ. Ba kala fa ŋaa laalɩyuori babiibala nɛ. 47Ama ba ma nɩaa zɔɔ-balɩdʋ nɛ wuo fá a mʋ tintee-hɩlɩɩ-la a mʋ Rimoŋ bʋŋ-la leriŋ a hɔŋ nɩmɛ chɛnsɩŋ banɛsɛ. 48Ŋɩɩ nɛ Iziral tɩmma-la mɩɩra mʋ Bɛnjamɩŋ doho nɩalɩŋ tasɩŋ a kpʋ nʋʋkala sɩ hɛ nɩmɛ, arɩ ba pʋsʋŋ kala a chei ba kʋŋkala, aŋ nyɩgɛ tasɩ-la kala sɩ hɛ lee-la.
Currently Selected:
SƖPAALAARAA 20: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
