SƖPAALAARAA 12
12
Jɛfɩta arɩ Efirem tɩŋŋaa laalɩyuoroo
1Tapʋlɩɩ kʋbala, Efirem doho nɩaa sii a yɩrɛ ba laalɩyuoroo hɛ dɔŋɔ, a chol Jɔdaŋ fuo-la a mʋ lee kʋbala baa yɩrɛ Zafɔŋ a pɩɛsɛ Jɛfɩta, “Bɛɛ nɛ tɩɩ ŋ mʋ yuo Amɔŋ tɩŋŋaa aŋ bɩ la yɩra dɩ la kʋ pɛ ŋ lɛ? La jaŋ nyɩgɛ ŋ dɩa dɩ ʋ dii a tɔ ŋ lɛ.” 2Jɛfɩta bʋl, “Mɩ dɩ mɩ nɩaa fa chaasa kɛŋ Amɔŋ tɩmma-la loo nɛ woruŋ. Mɩ yɩrɛma, ka ma bɩ kʋ laamɛ ta ba nɩsɩŋ lɛ. 3Mɩ sɩ na dɩ ma bɩ kɔ dɩ ma pɛ mɩ lɛ, mɩ joŋ mɩ mɩɩsɩŋ a yɔɔ sʋʋŋ, a chol Jɔdaŋ fuo-la a yuo Amɔŋ tɩmma-la, La TƖƖNA leŋ mɩ yuo diiba. Bɛɛ nɛ saa tɩɩ jɩnɩŋ ma kɔ dɩ ma yuomi?”
4Ŋɩɩ nɛ aŋ ka Jɛfɩta yɩrɛ Gɩlɩad laalɩyuoroo kala kʋ hɛ dɔŋɔ ba mʋ yuo Efirem tɩŋŋaa laalɩyuoroo. Gɩlɩad tɩmma-la chaasa kpʋ Efirem laalɩyuoroo woruŋ, bɛɛ wɩaa Efirem nɩalɩŋ fa sɩ, “Ma Gɩlɩad tɩŋŋaa ŋaa Efirem arɩ Manasɛ doho nɩaa nɛ, aŋ lɩɩ fá.” 5Gɩlɩad laalɩyuoroo laa lere-la kala Efirem nɩaa sɩ jaŋ wuo to chol Jɔdaŋ fuo-la a mʋ ba tinteeŋ nɛ. Dɩ Efirem tɩmma-la nɩkaana-la kʋŋ nɛ kɔ a bʋl, “Má leŋ dɩ mɩ chol.” Gɩlɩad tɩmma-la yie pɩɛsʋ, “Ŋ ŋaa Efirem tɩɩna nɛɛ?” Dɩ ʋ nɛ sɩ, “Aɩ,” 6ba yie bʋl, “Ʋ zɔmɔ, yɩrɛ ‘Sɩɩbɔlɛf’. Dɩ ʋ nɛ bɩ woruŋ wuo yɩrɛ aŋ bʋl, ‘Sɩbɔlɛf’, ba yie kɛnʋ nɛ a kpʋ lere-la ba sɩ too chol Jɔdaŋ fuo-la.” Bʋa-la lɛ ba kpʋ Efirem tɩmma-la bʋɩ mahɩŋ balɩa arɩ balɩa nɛ.
7Jɛfɩta fa laa Iziral tɩŋŋaa sɩpaaŋ jɩsɩŋ balɩdʋ nɛ. Ŋɩɩ nɛ aŋ sʋʋ, ba hugu ʋ jaŋ Mɩzɩpa sɩ hɛ Gɩlɩad tinteeŋ lɛ.
Iziral tɩŋŋaa sɩpaalaaraa Ɩbɩzaŋ, Ɛlɔŋ arɩ Abɩdɔŋ
8Jɛfɩta sɩ sʋba harɩŋ, Ɩbɩzaŋ sɩ lɩɩ Bɛtɩlɛhɛm ma nɛ fa laa Iziral tɩŋŋaa sɩpaaŋ. 9Ʋ fa lʋl hambolibiisiŋ mara arɩ fii nɛ, hantolibiisiŋ ma mara arɩ fii. Ʋ fa joŋ ʋ tolie-la pɩ baalaa sɩ bɩ ʋ nyɩŋ-nɩaa ŋaa nɛ ba jaa. Ka ʋ hambolibiisi-la ma, ʋ jaa hantolibiisiŋ mara arɩ fii sɩ bɩ ʋ nyɩŋ-nɩaa ŋaa a pɩba. Ɩbɩzaŋ ma fa laa Iziral tɩŋŋaa sɩpaaŋ jɩsɩŋ balɩpɛ nɛ. 10Ŋɩɩ nɛ Ɩbɩzaŋ sʋʋ ba hugu Bɛtɩlɛhɛm lɛ.
11Ɩbɩzaŋ ma sʋʋŋ harɩŋ, Zebuluŋ tɩŋŋaa Ɛlɔŋ ma nɛ bɩra laa Iziral tɩŋŋaa sɩpaaŋ jɩsɩŋ fii. 12Ŋɩɩ nɛ Ɛlɔŋ ma sʋʋ, ba hugu taŋ-la ba sɩɩ yɩrɛ Aɩjalɔŋ sɩ hɛ Zebuluŋ tinteeŋ lɛ.
13Ɛlɔŋ ma sʋʋŋ harɩŋ, Hɩlɛl nanʋala Abɩdɔŋ sɩ lɩɩ taŋ-la ba sɩɩ yɩrɛ Pɩratɔŋ ma nɛ laa Iziral tɩŋŋaa sɩpaaŋ. 14Abɩdɔŋ ma fa lʋl hambolibiisiŋ mahɩŋ balɩa nɛ. Ʋ nihee sɩ ŋaa hambolibiisiŋ ma mara arɩ fii. Ba kakusuŋ ma fa ŋaa mahɩŋ batori arɩ fii nɛ ba jɩjɩl. Ʋ fa laa Iziral tɩŋŋaa sɩpaaŋ jɩsɩŋ chori nɛ. 15Ŋɩɩ nɛ Hɩlɛl nanʋala Abɩdɔŋ ma sʋʋ, ba hugu Pɩratɔŋ sɩ hɛ Efirem tintee-la peelee sɩ yʋga lɛ. Nɩmɛ nɛ Amalɛk tɩŋŋaa fa hɛ.
Currently Selected:
SƖPAALAARAA 12: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
