SƖPAALAARAA 10
10
Iziral tɩŋŋaa sɩpaalaara Tola
1Abɩmɛlɛk sʋʋŋ harɩŋ, Pʋa nanʋala Tola sɩ ŋaa Dodo nihiŋ ma nɛ bɩra laa Iziral tɩŋŋaa ta. Ʋ fa ŋaa Ɩsaka doho nʋʋ nɛ, aŋ hɛ taŋ-la ba sɩɩ yɩrɛ Samɩɩ sɩ hɛ Efirem tintee-la peelee sɩ yʋga lɛ. 2Ʋ fa laa Iziral tɩŋŋaa sɩpaaŋ jɩsɩŋ mara arɩ batori nɛ aŋ sʋʋ. Ba hugu Samɩɩ lɛ.
Iziral tɩŋŋaa sɩpaalaara Jaa
3Gɩlɩad tɩŋŋaa Jaa ma nɛ bɩra tɩgɛ ʋ lɛ. Ʋ ma laa Iziral tɩŋŋaa sɩpaaŋ jɩsɩŋ mara arɩ balɩa nɛ. 4Ʋ fa kɛŋ hambolibiisiŋ mara arɩ fii nɛ. Ba jɩjɩl kakusuŋ mara arɩ fii. Gɩlɩad tinteeŋ lɛ ba faa beŋ tasɩŋ mara arɩ fii nɛ. Baa yɩrɛ tasɩ-la Hawof Jaa nɛ, arɩ jɩnɩŋ kala. (Hawof Jaa bʋbʋɔŋ nɛ Jaa tabiisiŋ.) 5Jaa sɩ sʋba, ba hugu taŋ-la ba sɩɩ yɩrɛ Kamɔŋ lɛ nɛ.
Amɔŋ tɩŋŋaa dɔgɩsɛ Iziral tɩŋŋaa
6Iziral tɩŋŋaa bɩra ŋaa wʋbɔŋ La TƖƖNA teeŋ. Baa to vesi-la ba sɩɩ yɩrɛ Baal, Asɩtɔrɛf arɩ Aram tɩŋŋaa vesiŋ, Sɩdɔŋ tɩŋŋaa vesiŋ, Mʋab tɩŋŋaa vesiŋ, Amɔŋ tɩŋŋaa vesiŋ arɩ Fɩlɩsɩtɩa tɩŋŋaa vesiŋ. A tɩŋ Iziral tɩŋŋaa sɩ vɩa La TƖƖNA, a bɩra bɩ ʋ ka to wɩaa, 7ʋ na baanɩŋ ba nyuŋ, a jomba hɛ Fɩlɩsɩtɩa tɩŋŋaa arɩ Amɔŋ tɩŋŋaa nɩsɩŋ lɛ. 8Jɩsɩŋ fii arɩ chori, ba dɔgɩsɛ Iziral tɩmma-la kala sɩ hɛ Jɔdaŋ fuo-la wɩɩpɔsʋŋ dɩɩrɩŋ Gɩlɩad tinteeŋ lɛ. Gɩlɩad fa ŋaa Amɔrɩ tɩŋŋaa tinteeŋ nɛ. 9Amɔŋ tɩŋŋaa ma chol Jɔdaŋ fuo-la dɩ ba yuo Juda, Bɛnjamɩŋ arɩ Efirem doho nɩaa, hɛɛŋ chaasa jʋʋ Iziral tɩŋŋaa kala. 10Ŋɩɩ nɛ Iziral tɩŋŋaa ŋmoo niiŋ a pɩ La TƖƖNA, a bʋl, “La ŋaa wʋbɔŋ nɛ ŋ teeŋ, la sɩ vɩa la Wɩa aŋ tuto vesi-la ba sɩɩ yɩrɛ Baal.”
11La TƖƖNA bʋl, “Bʋa-la lɛ Ijipiti tɩŋŋaa, Amɔrɩ tɩŋŋaa, Amɔŋ tɩŋŋaa, Fɩlɩsɩtɩa tɩŋŋaa, 12Sɩdɔŋ tɩŋŋaa, Amalɛk tɩŋŋaa arɩ Mʋab tɩŋŋaa sɩɩ dɔgɩsɛma, ma ŋmoo niiŋ pɩmɛ dɩ mɩ pɛ ma lɛ, mɩ bɩ ma laa ta ba nɩsɩŋ lɛɛ? 13Ama ma vɩamɛ nɛ aŋ mɩɩra tuto vesiŋ, ŋɩɩ wɩaa mɩ bɩra bɩ jaŋ laama ta. 14Má mʋ ŋmoo niiŋ a pɩ vesi-la ma sɩɩ to. Má leŋ dɩ ba laama ta, dɩ wɩaa nɛ jʋʋma.”
15Iziral tɩmma-la bʋla pɩ La TƖƖNA, “La ŋaa wʋbɔŋ nɛ. Wɩɩ-la kala ŋ sɩɩ chɛ, ŋaa la lɛ, ama lɛɛlɛ laa sʋlʋŋ laala ta.” 16Ŋɩɩ nɛ ba joŋ vesi-la sɩ hɛ ba teeŋ ta, aŋ tuto La TƖƖNA. Ʋ chaasa fá ba nenige. Ʋ bɩra bɩ leŋe ba na hɛɛŋ.
17Amɔŋ tɩŋŋaa sɩ yɩrɛ ba laalɩyuoroo kʋ ŋmoo buguŋ Gɩlɩad tinteeŋ lɛ, Iziral laalɩyuoroo ma kala kʋ hɛ dɔŋɔ lɛ a ŋmoo buguŋ taŋ-la ba sɩɩ yɩrɛ Mɩzɩpa lɛ. 18Gɩlɩad tɩŋŋaa sɩpaalaaraa bʋla pɩ dɔŋɔ, “Nɩɩ-la kala sɩ wuo laa sɩpaaŋ la yuo Amɔŋ tɩŋŋaa, tɩɩna nɛ jaŋ ŋaa nɩalɩŋ kala sɩ hɔŋ Gɩlɩad lɛ nɩhɩaŋ.”
Currently Selected:
SƖPAALAARAA 10: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
