MOSIS KƐŊ IZIRAL TƖŊŊAA LƖƖ 20
20
La TƖƖNA niiriŋ fii-la
1Ŋɩɩ nɛ Wɩa bʋl wɩaa deemba,
2“Mɩ-na nɛ ma TƖƖNA Wɩa. Mɩ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.
3Ma bɩ maga dɩ ma kɛŋ wɩa kala a pɛ mɩ-na Wɩa lɛ.
4Ma pɔ má sɩ́ tɔŋ kala mɛ a pɩ ma tɩtɩa dɩ ʋ nagɛ wɩa-nyuŋ kʋŋ, koo tinteeŋ nyuŋ kʋŋ, koo lɩɩŋ tʋɔŋ kʋŋ. 5Má pɔ dɩ ma sɩ́ ba sɩpaaŋ kpirimi koo a zilba arɩ ba ma ŋaa Wɩa nɛ. Mɩ nɛ ma TƖƖNA Wɩa, a ŋaa Wɩa sɩ kɛŋ hadɔrʋŋ. Nɩalɩŋ sɩ bɛrɛmɛ, mɩ jaŋ dɔgɩsɛba. Mɩ jaŋ dɔgɩsɛ biiriŋ arɩ nihee arɩ nihi-lɩɛrɛba a tɩŋ ba nyɩmmaba wʋbɔŋŋɔɔ wɩaa. 6Ama nɩalɩŋ sɩ chomi a tuto mɩ niiriŋ, mɩ jaŋ dagɛ mɩ chonuŋ a pɩba arɩ ba biiriŋ arɩ ba nihee arɩ ba nihi-lɩɛrɛba a kaa mʋ wuu.
7Ma pɔ má sɩ́ mɩ yɩrɩŋ yɩrʋ pɛɩ. Mɩ-na ma TƖƖNA Wɩa jaŋ dɔgɩsɛ nɩɩ-la kala sɩ yɩrɛ mɩ yɩrɩŋ pɛɩ.
8Máa liisi chɛ-wiesii-la wɩaa dɩ ʋ ŋaa tapʋl-zɔŋ a pɩ mɩ-na ma TƖƖNA. 9Má tɩŋ ma tɩntɩŋŋaa tapʋlaa balɩdʋ pɛgɛ. 10Ama tapʋl-pɛɩ chɛɛŋ ŋaa chɛ-wiesii nɛ a pɩ mɩ-na ma TƖƖNA. Má sɩ́ tɩntɩmɩɩ kala tɩŋ, ma biiriŋ, ma nʋhʋɔraa, ma pʋsʋŋ arɩ ma dɩa tɩntɩnnaa kala, baalaa arɩ haalaa. 11Tapʋlaa balɩdʋ nɛ mɩ-na ma TƖƖNA joŋo ŋaa wɩa-nyuŋ arɩ tinteeŋ, mʋgʋ-balaa arɩ kɩalɩŋ kala sɩ hɛ ba lɛ, tapʋl-pɛɩ chɛɛŋ nɛ mɩ wiesi. Ŋɩɩ nɛ mɩ joŋ chɛ-wiesiŋ deeŋ a wasʋ, a leŋ ʋ ŋaa tapʋl-zɔŋ.
12Má zizil ma naamba arɩ ma nyɩmmaba, dɩ mɩ-na ma TƖƖNA leŋ dɩ ma mɩɩsɩŋ duomi tintee-la lɛ mɩ sɩ jaŋ joŋo pɩma.
13Má pɔ dɩ ma sɩ́ nʋʋ kpʋ.
14Má sɩ́ nʋʋ haal chɛ.
15Má sɩ́ gaa.
16Má pɔ dɩ ma sɩ́ wɩaa nyɩɛ a joŋ cheeriŋ pɩ ma dɔnsʋŋ tɩŋŋaa.
17Má pɔ dɩ ma sɩ́ ma dɔnsʋŋ tɩŋŋaa kɩaa hɩɛnʋ: ba dɩɩsɩŋ, ba haalaa, ba dɩa tɩntɩnnaa baalaa koo haalaa, ba nɛsɩŋ koo ba kakusuŋ, koo kʋŋ na-kala ba sɩ kɛnɛ.”
18Nɩalɩŋ sɩ na dɩ taŋ lɩgɩsa aŋ kpɩa a nɩɩ ba sɩ ŋmʋʋ nyile a na peel-la sɩ tɔ nyʋɔsʋŋ, fawʋllʋŋ kɛmba ba chichel. Ŋɩɩ nɛ ba sʋʋsa mʋ chɩŋ dɩ-bolii, 19aŋ bʋla pɩ Mosis, “Ŋ tɩtɩa bʋl wɩaa pɩpɩla, la jaŋ jegile nɩɩ. Sɩ́ leŋe dɩ Wɩa nɛ bʋla pɩla, dɩ ŋɩɩ dee, la jaŋ sʋʋ.” 20Ŋɩɩ nɛ Mosis bʋla pɩba, “Má sɩ́ leŋe dɩ fawʋllʋŋ kɛmma, Wɩa kɔ dɩ ʋ magɩsɛma a na nɛ dɩ ma fɩfáʋ a sɩ́ wʋbɔŋ wɩaa ŋaa.”
21Ŋɩɩ nɛ nɩalɩŋ chɩŋ dɩ-bolii, ka Mosis mʋ yi biriŋ lim-la tʋɔŋ Wɩa sɩ hɛ.
Vesiŋ arɩ korunuŋ
22Ŋɩɩ nɛ La TƖƖNA bʋla pɩ Mosis, “Bʋla pɩ Iziral tɩŋŋaa: Ma tɩtɩa na mɩ sɩ lɩɩ wɩa-nyuŋ kʋ tuu bʋl wɩaa pɩma ŋɩɩ nɛ. 23Má pʋpɔ ma sɩ́ vene kala ŋaa a pɛ mɩ lɛ. Má pʋpɔ ma sɩ́ sɛlɩmɛ koo hɔpʋla kaa libi vene kala aa zilu.
24Má kɛŋ tɩɛrɩŋ saa Wɩɩsʋllɩ koruŋ pɩmɛ. Nɩmɛ nɛ ma jaŋ kɛŋ ma piesee, bʋʋnaa arɩ ma nɛsɩŋ kʋ ŋaa ma kʋnyɩgaa Wɩɩsʋlʋŋ arɩ ma nii-magɛ dɔŋɔ Wɩɩsʋlʋŋ pɩmɛ. Lee na-kala mɩ sɩ dagɛma dɩ ma dɩdɛnnɛmɛ, mɩ jaŋ kɔ lee-la a pɛ ma lɛ. 25Dɩ ma nɩɩ chɛ dɩ ma kɛŋ tabɩaa saa Wɩɩsʋllɩ koruŋ pɩmɛ, má sɩ́ tabɩa-la wasa ta. Dɩ ma nɛ kɛŋ ma tɩntɩnnɩ kʋŋkala chɩchɛ dɩ ma wasɛba, maa birisiba nɛ ŋɩɩ. 26Má sɩ́ lusuŋ-choluŋ hɛ a to jɩjɩl koru-la, dɩ ma nɛ ŋaa ŋɩɩ, ma jaŋ kɛŋ ma yarɩ-biree nyɩɩsɛ.
Currently Selected:
MOSIS KƐŊ IZIRAL TƖŊŊAA LƖƖ 20: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
