MOSIS BƖRA WULLI WƖA WOMBIIŊ 3

Iziral tɩŋŋaa yuo dii Basaŋ kuoro Ɔgɩ

1La sɩ yuo dii kuoro Sɩhɔŋ arɩ ʋ nɩaa a dɛrɛ, ŋɩɩ nɛ la mɩɩrɛ a to Basaŋ tinteeŋ dɩɩrɩŋ mʋmʋ. Basaŋ tɩŋŋaa kuoro Ɔgɩ arɩ ʋ laalɩyuoroo kala kʋ lɩɩ dɩ ba yuola Ɛdɩrɛ lɛ. 2Ŋɩɩ nɛ La TƖƖNA bʋla pɩmɛ, “Sɩ́ leŋe dɩ ŋ bɔyɛ joŋ a tɩŋ kuoro Ɔgɩ wɩaa. Mɩ joŋ ʋ dɩ ʋ nɩaa arɩ ba tinteeŋ kala hɛ ŋ nɩsɩŋ lɛ nɛ. Wɩɩ-la ŋ fa sɩ joŋo ŋaa Amɔrɩ tɩŋŋaa kuoro Sɩhɔŋ fa sɩ hɛ Hɛsɩbɔŋ lɛ, joŋ ŋɩɩ tɩtɩa ŋaa Basaŋ tɩŋŋaa kuoro Ɔgɩ ma lɛ.”

3Ŋɩɩ nɛ La TƖƖNA Wɩa joŋ Basaŋ tɩŋŋaa kuoro Ɔgɩ arɩ ʋ laalɩyuoroo kala a hɛ la nɩsɩŋ lɛ, la kpʋ ba kala, ba kʋbala ma bɩ ka. 4Kuoro Ɔgɩ fa sɩɩ beŋ tabala-la mahɩŋ batori sɩ hɛ Agɔb lɛ Basaŋ tinteeŋ, ba kala nɛ la yuo dii, ba kʋbala ma bɩ ka. 5Tabalaa deemba kala ba fa saa kɛrɩsɩŋ sɩ leŋie nɛ a golli, a hɛ boiŋ niiree a kɛŋ borusuŋ arɩ daadoloo a tʋtɔ. Tabiisiŋ ma fa yʋga nɩmɛ ba sɩ bɩ kɛrɩsɩŋ saa golli. 6La chei ba tasɩŋ kala nɛ a kpʋ baalaa, haalaa arɩ hambiisiŋ, arɩ la sɩ ŋaa ŋɩɩ Amɔrɩ tɩŋŋaa kuoro Sɩhɔŋ lɛ. 7Ba pʋsʋŋ arɩ ba dʋa dʋndʋŋa nɛ la fa paa ba ŋaa la kɩaa.

8Bʋa-la lɛ, la laa Amɔrɩ tɩŋŋaa kuoroo deemba balɩa tinteeŋ Jɔdaŋ fuo-la wɩɩpɔsʋŋ, a chɩŋ Anɔŋ fuonaa-la wɩɩpɔsʋŋ nadiiŋ, a kɛŋ ŋɩɩ mʋʋ yi peel-la ba sɩɩ yɩrɛ Hɛmɔŋ wɩɩpɔsʋŋ nagʋa. 9(Sɩdɔŋ tɩŋŋaa kɛŋ peel-la yɩyɩrɛ Sirioŋ nɛ, ka Amɔrɩ tɩŋŋaa ma yɩyɩrɛ Sɛnɩ.) 10La yuo dii tasɩ-la kala sɩ hɛ peelee nyuŋ nɛ, a yuo dii Gɩlɩad arɩ Basaŋ tinteyee kala a kaa mʋʋ yi Salɩka arɩ Ɛdɩrɛ. Kuoro Ɔgɩ nɛ faa beŋ Basaŋ tinteeŋ tasɩ-la kala. 11(Kuoro Ɔgɩ nɛ fa ŋaa Refem doho nɩaa nɩwaayiile-la nɩkaanɩŋ. Hɔɔŋ nɛ ba fa kaa ŋaa ʋ kʋpɩnɩŋ. Ʋ duomuŋ ŋaa naakieliŋ bʋnɛsɛ arɩ kpaa magɛ dɔŋɔ, ʋ jalɩŋ ma ŋaa naakieliŋ bʋlɩa. Ʋ kʋpɩnɩɩ-la ha hɛ Amɔŋ tɩŋŋaa tabal-la ba sɩɩ yɩrɛ Raba lɛ.)

Doho doho-la sɩ hɔŋ Jɔdaŋ fuo-la wɩɩpɔsʋŋ

12Bʋa-la lɛ la sɩ yuo dii tinteeŋ deeŋ, mɩ joŋ taŋ-la ba sɩɩ yɩrɛ Arʋa, wɩɩpɔsʋŋ nagʋa a kpagɛ Anɔŋ fuo-la arɩ Gɩlɩad tintee-la peelee sɩ yʋga kpaa magɛ dɔŋɔ a pɛ tasɩ-la kala sɩ hɛ nɩmɛ a pɩ Rubiŋ arɩ Gad doho nɩaa nɛ. 13Gɩlɩad tintee-kaaŋ-la arɩ Basaŋ tinteeŋ lee-la kuoro Ɔgɩ fa sɩɩ beŋ, mɩ joŋ ba kala a pɩ Manasɛ doho nɩaa kpaa magɛ dɔŋɔ-la nɛ. (Basaŋ tinteeŋ sɛmɛ-la ba sɩɩ yɩrɛ Agɔb, Refem tɩŋŋaa nɛ fa tɩɩʋ.) 14Jaa sɩ ŋaa Manasɛ doho nʋʋ nɛ fa joŋ Basaŋ tinteeŋ sɛmɛ-la ba sɩɩ yɩrɛ Agɔb kala, a kaa mʋʋ yi Gesu tɩŋŋaa arɩ Maakɩ tɩŋŋaa tinteeŋ bʋa. Ʋ fa joŋ ʋ tɩtɩa yɩrɩŋ nɛ a hɛ pɩ tabiisi-la, arɩ jɩnɩŋ kala ba haa yɩrɛ tabiisi-la Jaa tabiisiŋ nɛ. 15Mɩ joŋ Gɩlɩad tinteeŋ a pɩ Maakɩ ma nɛ, ʋ ŋaa Manasɛ doho nʋʋ nɛ. 16Mɩ joŋ tintee-la sɩ chɩŋ Gɩlɩad lɛ a kaa mʋ Anɔŋ fuo-la a pɩ Rubiŋ arɩ Gad doho nɩaa nɛ. Anɔŋ fuo-la tʋtʋɔbaanɩŋ nɛ ŋaa ba wɩɩpɔsʋŋ nadiiŋ dɩɩrɩŋ bʋa, ba wɩɩjʋʋlʋŋ nagʋa dɩɩrɩŋ bʋa ma nɛ ŋaa Jabɔk fuo-la. Jabɔk fuo-la nɛ ŋaa Amɔŋ tɩŋŋaa ma bʋa. 17Tintee-la wɩɩjʋʋlʋŋ dɩɩrɩŋ bʋa nɛ, a lɩɩ Jɔdaŋ fuo-la lɛ a kaa mʋ Galilii mʋga-la a kɛŋ ŋɩɩ mʋ to Mʋgʋ-sʋʋ-la sɩ hɛ wɩɩpɔsʋŋ nadiiŋ a kaa mʋ yi Pisiga peel-la sɩ hɛ wɩɩpɔsʋŋ dɩɩrɩŋ.

18Bʋa-la lɛ mɩ bʋla pɩma, “Ma Tɩɩna Wɩa joŋ tinteeŋ deeŋ a pɩma nɛ ʋ ŋaa ma kʋŋ. Ama ma baala-la kala sɩ jaŋ wuo mʋ laalɩŋ, má paa ma laalɩyuori kɩaa a laa ma naambiiriŋ Iziral tɩŋŋaa sɩpaaŋ a chol Jɔdaŋ fuo-la. 19Ama ma haalaa, ma biiriŋ arɩ ma pʋsʋŋ, má lemba dɩ ba hɛ tasɩ-la mɩ sɩ joŋo pɩma lɛ. Mɩ jɩma, ma kɛŋ pʋsʋŋ nɛ woruŋ. 20Dɩ ma nɛ chol Jɔdaŋ fuo-la, a pɛ ma naambiiriŋ Iziral tɩŋŋaa lɛ dɩ ma yuo laa tintee-la La TƖƖNA Wɩa sɩ joŋo pɩba dɩ ba hɔŋ nɩmɛ, ma jaŋ wuo mɩɩra mʋ a hɔŋ lere-la mɩ sɩ joŋo pɩma.”

La TƖƖNA sɩ Mosis bɩ jaŋ chol Jɔdaŋ fuo-la

21Bʋa-la lɛ mɩ bʋla pɩ Josua, “Ŋ tɩtɩa na wɩɩ-la La TƖƖNA Wɩa sɩ ŋaa kuoro Sɩhɔŋ arɩ kuoro Ɔgɩ lɛ nɛ. Ŋɩɩ tɩtɩa nɛ La TƖƖNA jaŋ ŋaa tasɩ-la kala sɩ hɛ lee-la ma sɩɩ mʋ kuoroo lɛ. 22Má sɩ́ leŋe dɩ fawʋllʋŋ kɛmma, ma TƖƖNA Wɩa tɩtɩa nɛ jaŋ yuoba a pɩma.”

23Bʋa-la lɛ mɩ sʋl La TƖƖNA nɛ woruŋ, a bʋl, 24“Mɩ Tɩɩna Wɩɩjarɩbakɔ, ŋ dagɛmɛ ŋ doluŋ sɩ magɛ ŋɩɩ nɛ, veŋ bɛɛ ma nɛ hɛ wɩa-nyuŋ koo tinteeŋ a jaŋ wuo pagɩsɩŋ a ŋaa wʋduoru-la ŋ sɩɩ ŋaa? 25La TƖƖNA, leŋ dɩ mɩ chol Jɔdaŋ fuo-la a na tintee-la sɩ sɩma woruŋ aŋ na tintee-sɩŋ-la peelee sɩ yʋga arɩ Lɛbanɔŋ peelee.”

26Ama a tɩŋ ma wɩaa, La TƖƖNA na baanɩŋ nɛ mɩ nyuŋ, a bɩ jegile nɩɩ mɩ teeŋ, aŋ bʋla pɩmɛ, “Ʋ maga nɛ, bɩra sɩ́ wɩɩ-la bʋl mɩ teeŋ. 27Jɩl Pisiga peel-la nyuŋ, a beŋ wɩɩpɔsʋŋ, wɩɩjʋʋlʋŋ, wɩɩpɔsʋŋ nagʋa arɩ wɩɩpɔsʋŋ nadiiŋ dɩɩrɩŋ a na tintee-la kala, bɛɛ wɩaa mɩ bɩ jaŋ jʋʋ nɩmɛ. 28Ama dagɛ Josua wɩalɩŋ ʋ sɩ jaŋ ŋaa, a pʋ doluŋ a leŋ dɩ ʋ nyuŋ nyaasɛ, bɛɛ wɩaa ʋ nɛ jaŋ laa Iziral tɩŋŋaa sɩpaaŋ a kɛŋ ba chol Jɔdaŋ fuo-la dɩ ba yuo laa tintee-la ŋ sɩ jɩl peeliŋ a na.” 29Ŋɩɩ nɛ la hɔŋ Bɛf Pio fuonaa-la lɛ.

Currently Selected:

MOSIS BƖRA WULLI WƖA WOMBIIŊ 3: SIS

Highlight

Copy

Compare