MOSIS BƖRA WULLI WƖA WOMBIIŊ 23
23
Nɩalɩŋ sɩ bɩ maga dɩ ba guoli La TƖƖNA nɩaa tʋɔŋ
1Dɩ nʋʋ nɛ ba feri koo dɩ ʋ peniŋ nɛ ba kere ta, ʋ bɩ maga dɩ ʋ guoli La TƖƖNA nɩaa tʋɔŋ. 2Dɩ nʋʋ nɛ ŋaa mɛŋgaa-bii, ʋ bɩ maga dɩ ʋ guoli La TƖƖNA nɩaa tʋɔŋ, a chɩŋ ʋ tɩtɩa lɛ a kaa mʋ ʋ doho doho fii sɩ jaŋ to ʋ harɩŋ kɔ.
3Amɔŋ tɩɩna kala koo Mʋab tɩɩna koo ba doho nʋʋkala bɩ maga dɩ ʋ guoli La TƖƖNA nɩaa tʋɔŋ, a chɩŋ ba lɛ a kaa mʋ ba doho doho fii sɩ jaŋ to ba harɩŋ kɔ, 4bɛɛ wɩaa, bʋa-la lɛ ma fa sɩ lɩɩ Ijipiti lɛ a kʋkɔ, ba vɔmma lɩɩŋ arɩ kʋdiilee nɛ aŋ mʋ kpal Balam sɩ ŋaa Bioo nanʋala a lɩɩ taŋ-la ba sɩɩ yɩrɛ Pɛtɔ a hɛ Mesopotemia lɛ, dɩ ʋ kalɩbɛ hɛ ma lɛ. 5Ama ma TƖƖNA Wɩa sɩ choma wɩaa nɛ tɩɩ ʋ bɩ jegile nɩɩ Balam teeŋ, aŋ leŋ ŋmɩaŋ-la mɩɩra wasɛma. 6Má mɩɩsɩŋ kala lɛ, má pɔ ma dɩ ba sɩ́ wɩɩ pɛ.
7Ma pɔ má sɩ́ Ɛdɔm tɩŋŋaa bɛrʋ, ba ŋaa ma naambiiriŋ nɛ. Má sɩ́ Ijipiti tɩŋŋaa ma bɛrʋ, bɛɛ wɩaa ma fa ŋaa nʋhʋɔraa nɛ ba tinteeŋ lɛ. 8Ba doho doho tʋmbʋ-tori ha sɩ jaŋ to ba harɩŋ kɔ jaŋ wuo guoli La TƖƖNA nɩaa tʋɔŋ.
Wɩalɩŋ sɩ jaŋ leŋ dɩ ma dɩhɔnʋŋ kɛŋ disiniŋ
9Dɩ ma nɛ ŋmoo buguŋ dɩ ma yuo ma dʋndɔŋŋɔɔ, má lɩɩsɛ ma tɩtɩa wɩalɩŋ sɩ kɛŋ disiniŋ lɛ. 10Dɩ ma baala-la kʋŋ nɛ pɩŋ tɩtaŋɩŋ a duoso fɩɩ bafɩɩrɩŋ, ŋɩɩ leŋe ʋ kɛŋ disiniŋ nɛ. Ʋ maga dɩ ʋ lɩɩ ma dɩhɔnʋŋ tʋɔŋ lɛ. 11Dɩ dɩdaanɩŋ nɛ kʋ yi, ʋ maga dɩ ʋ fo lɩɩŋ, dɩ wɩɩ-muluŋ nɛ jʋa, ʋ mɩɩra kʋ jʋʋ ma dɩhɔnʋŋ.
12Ʋ maga dɩ má lɩɩ dɩhɔnʋŋ lɛ nɛ a chɛ lee ma sɩ jaŋ mʋ a fɩfɩɩ fɩɩrɩŋ aŋ nyɩnyɛ bɩnɩŋ. 13Ma kʋŋkala maga dɩ ʋ pɛ kɛŋ kʋŋ ʋ sɩ jaŋ kaa lu bʋa a nyɛ bɩnɩŋ a fɩɩ fɩɩrɩŋ hɛ aŋ gbaa tɔ nɛ. 14Má leŋ dɩ ma dɩhɔnʋŋ zɔŋ ma TƖƖNA Wɩa sɩaa lɛ, bɛɛ wɩaa ʋ hɛ ma tʋɔŋ nɛ ma dɩ-hɔnɩɩ-la lɛ, a pʋpɔma, a leŋ ma yuo didii ma dʋndɔŋŋɔɔ. Ma pɔ dɩ má sɩ́ wɩɩkala sɩ kɛŋ disiniŋ ŋaa dɩ ŋɩɩ leŋ dɩ ʋ mɩɩrɛ ma harɩŋ.
Wombie-la dɔnsʋŋ Iziral tɩŋŋaa sɩ jaŋ tuto
15Dɩ nʋʋ yomo nɛ fá kɔ ŋ teeŋ a chɩchɛ dɩ ŋ laaʋ ta, sɩ́ ʋ kaa mɩɩra mʋ pa ʋ tɩɩna. 16Leŋ dɩ ʋ hɛ ma tʋɔŋ lee na-kala ʋ sɩ cho arɩ taŋ na-kala ʋ sɩ lɩɩsa lɛ, sɩ́ ʋ dɔgʋsʋ.
17Iziral tɩɩna kala, baal koo haal bɩ maga dɩ ʋ jʋʋ vene kala, dɩ bachɔrʋŋ koo hachɔrʋŋ wɩaa nɛ ŋaa ʋ tɩntɩmɩŋ. 18Ma pɔ má sɩ́ haal koo baal sɩ ŋaa wʋchɔrʋŋ a dʋa kʋŋ kaa kʋ jʋʋ ma TƖƖNA Wɩa dɩa a lɩɩsɛ niiŋ, bɛɛ wɩaa ma TƖƖNA Wɩa ka kɩsɛ wʋdosunu-la nɛ.
19Dɩ ma kʋŋ nɛ joŋ moribiee koo kʋdiilee koo kʋŋ na-kala a chɩŋ ŋ naambii Iziral tɩɩna, sɩ́ lɩɩŋ kaa daŋ. 20Ŋ jaŋ wuo kɛŋ lɩɩŋ daŋ a pɩ nʋhʋɔraa, ama ŋ naambie-na, ŋ bɩ ŋɩɩ wuo ŋaa. Dɩ ma nɛ bɩ lɩɩŋ kaa daŋa pɩ ma naambiiriŋ, ma TƖƖNA Wɩa jaŋ pɛ ma lɛ tɩntɩmɩɩ-kala ma sɩ jaŋ tɩtɩŋ tintee-la ma sɩ jaŋ jʋʋ dɩ ʋ ŋaa ma kʋŋ lɛ.
21Dɩ ma kʋŋ nɛ ta niiŋ ma TƖƖNA Wɩa teeŋ, sɩ́ leŋe dɩ ʋ dieni ka ŋ lɩɩsɛ nii-la. Ma Tɩɩna Wɩa jaŋ chɩchɛ dɩ ŋ lɩɩsɛ nii-la, dɩ ŋɩɩ dee ʋ jaŋ ŋaa wʋbɔŋ ŋ lɛ. 22Dɩ ŋ nɛ paala bɩ niiŋ ta, ŋ bɩ wɩɩkala cheye. 23Wɩɩkala ŋ sɩ suri ŋ niiŋ a bʋl La TƖƖNA teeŋ, ʋ maga dɩ ŋ ŋaa nɛ, bɛɛ wɩaa ŋ tʋɔtɔrʋŋ lɛ nɛ ŋ ta nii-la ŋ Tɩɩna Wɩa teeŋ.
24Dɩ ŋ nɛ jʋʋ ŋ dɔŋɔ tɩɩna tɩɩnɛnɛɛ baga, ŋ jaŋ wuo dii a magɛ ŋɩɩ kala ŋ sɩɩ chɛ, ama ʋ bɩ maga dɩ ŋ tɔrɛ a hɛ ŋ lʋaga lɛ. 25Dɩ ŋ nɛ jʋʋ ŋ dɔŋɔ tɩɩna kuori-mɩaa baga, ŋ jaŋ wuo kɛŋ ŋ nɩsɩŋ a kɩɩlɛ mʋa a chaŋ, ama ʋ bɩ maga dɩ ŋ kɛŋ sɩa jʋʋ a ta.
Currently Selected:
MOSIS BƖRA WULLI WƖA WOMBIIŊ 23: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
