2 Kɔrɩntɩ Nɩaa 8

Wɩa nɩaa maga dɩ ba pɛ nɩalɩŋ sii to Wɩa lɛ

1La naambiiri, laa chɛ dɩ ma jɩŋ tɩntɩmɩɩ-la nɩalɩŋ sɩ laa Yesu wɩaa dii aa hilimi Masidoonia tinteeŋ kala lɛ sɩ tɩma Wɩa lahɔrɩmɔ lɛ nɛ. 2Ba faasa na hɛɛŋ nɛ, hɛɛ-la magɩsɛba nɛ woruŋ. Nɩaa deemba fa ŋaa summoo nɛ, ama a tɩŋ tʋɔtɔrʋ-la kɩŋkɛŋ ba sɩ kɛnɛ wɩaa, kɩalɩŋ mʋa ba sɩ kɛnɛ, ba joŋo dii zil-kʋkʋrʋkʋ nɩaa lɛ. 3Wʋtɩtɩɩ nɛ mɩ bʋlaa pɩma arɩ nɩaa deemba pɩla kɩaa a magɛ ba doluŋ maŋŋaa nɛ, ba paala pa kɩɩ ba doluŋ nɛ. Ba tɩtɩa tʋɔtɔrʋŋ lɛ, 4ba faasa sʋlla nɛ woruŋ dɩ la pɩba wombiiŋ dɩ ba ma wuo joŋ kɩaa pɩpɛ Wɩa nɩaa sɩ hɛ Judiya tinteeŋ lɛ. 5La fa bɩ yɩɛla dɩ ba jaŋ wuo pa a magɛ ŋ-la. Ba laa sɩpaaŋ joŋ ba tɩtɩa a pɩ La Tɩɩna Kirisito nɛ. Ʋ ŋɩɩ harɩŋ lɛ nɛ ba sɛɩ la ma niiŋ wɩaa. Wɩa tʋɔtɔrʋŋ lɛ nɛ ba ŋaa ŋɩɩ. 6Taatɩs nɛ suomo laa kɩaa deemba ma teeŋ. Ŋɩɩ wɩaa laa sʋlʋ, ʋ sɩ suomo ŋɩɩ, dɩ ʋ pɛ ma lɛ dɩ ma dagɛ chonuŋ deeŋ a mʋ dɛrɛ. 7Ma kuoro nɛ wɩɩkala lɛ. Ma laa Wɩa dii nɛ, ma wuo Wɩa wɩaa bʋbʋl nɛ, a kɛŋ wʋjɩmɩŋ, a kɛŋ ma tɩtɩa dɩ ma pɛ nɩaa lɛ, aŋ faasa cho la ma. Laa chɛ dɩ ma faasa kɛŋ zile nɛ a pɩpɛ Wɩa nɩalɩŋ lɛ.

8Mɩ bɩ maa fʋgɛ dɩ ma joŋ kɩaa pɩpɩ nɩaa. Nɩaa dɔnsʋŋ fɩɛsɛ sɩɩŋ nɛ a cho dɩ ba ŋaa kɩaa kpɩkpaa nɩaa. Ŋɩɩ nɛ tɩɩ mɩɩ chɛ dɩ ma ma dagɛ arɩ wʋtɩtɩɩ, ma sɛnɛ cho nɩaa nɛ. 9Ma jɩma, La Tɩɩna Yesu kɛŋ zile nɛ. Aŋ ka dɩ ʋ kʋ tuu dʋnɩa, ʋ fa kɛŋ kɩaa nɛ woruŋ Wɩa-jaŋ lɛ, ama a tɩŋ ma wɩaa ʋ kɛŋ ʋ tɩtɩa kaa ŋaa summu nɛ dʋnɩa lɛ. Ʋ ŋaa ŋɩɩ dɩ ma wuo to ʋ lɛ nɛ a kuori. 10Wɩɩ-la tʋɔŋ, wɩɩ-la mɩ-na sɩ na arɩ ʋ maga dɩ ma ŋaa nɛ ŋ-la, dɩɩmɩŋ ma sɩ suomi wɩɩ-la, ma ŋaaʋ a mʋ dɛrɛ. Ma nɛ laa sɩpaaŋ kɛŋ tʋɔŋ dɩ ma kɩɛsɛ kɩaa kaa mʋ pɩ Wɩa nɩalɩŋ, aŋ sɛnɛ ŋaa ma. 11Wɩɩ-la ma sɩ suomo, má ŋaaʋ mʋ dɛrɛ ma doluŋ maŋŋaa. Dɩ ma nɛ ŋaa ŋɩɩ, ʋ jaŋ dagɛ arɩ wɩɩ-la ma fa sɩ kɛnɛ ma tʋɔŋ lɛ ma sɛnɛ ŋaaʋ nɛ. 12Dɩ ŋ nɛ kɛŋ ŋ tɩtɩa hɛ dɔŋɔ dɩ ŋ joŋ kʋŋ pɩ nʋʋ, tɩɩna jaŋ laa kʋ-la ŋ sɩ joŋo pʋ nɛ, ama ʋ bɩ jaŋ laa kʋ-la ŋ sɩ bɩ kɛnɛ. 13Ma sɩ joŋ kɩalɩŋ pɩ nɩalɩŋ, mɩ tʋɔtɔrʋŋ dee dɩ ba nɛ mɩɩra kɛŋ kɩaa ka ma nɩna hɛɛŋ, ama dɩ ma kala kɛŋ kɩaa. 14Bʋa deeŋ lɛ ma kɛŋ kɩaa yʋgɛ nɛ, aŋ ka ba bɩ kʋŋ kɛnɛ. Ŋɩɩ wɩaa, má pɛ ba lɛ dɩ ba na kɩalɩŋ ba sɩɩ chɛ. Ʋ harɩŋ lɛ, dɩ nɩalɩŋ ma nɛ kʋ kɛŋ kʋŋ, ba ma jaŋ pɛ ma lɛ dɩ ma kɛŋ kɩalɩŋ ma sɩɩ chɛ. Ŋɩɩ jaŋ leŋ dɩ ma kɛŋ a magɛ dɔŋɔ. 15Ŋ-la nɛ ba bʋl Wɩa teniŋ tʋɔŋ, “Nɩalɩŋ sɩ paa yʋgɛ bɩ na kieli, nɩalɩŋ ma sɩ paa muuri ma bɩ na muuri.”

Pɔɔl tɩŋ Taatɩs dɩ ʋ mʋ na Kɔrɩntɩ nɩaa

16Mɩɩ lɔllɛ Wɩa nɛ kɩŋkɛŋ, ʋ sɩ leŋe Taatɩs choma arɩ mɩ ma sɩ choma ŋɩɩ. 17Ʋ bɩ naga la sɩ tɩŋ Taatɩs dɩ ʋ kʋ laa kɩalɩŋ ma teeŋ nɛ tɩɩ ʋ kʋkɔ. Ʋ ma fa paala cho dɩ ʋ kɔ ma teeŋ nɛ. 18La naambii dɔŋ ma nɛ to Taatɩs harɩŋ kʋkɔ. Nɩalɩŋ kala sɩ laa Yesu wɩaa dii aa hilimi ka zilu nɛ woruŋ a tɩŋ ʋ sɩɩ bʋl Wɩa wʋzɔmɔ-la wɩaa. 19Ŋɩɩ ma dʋndʋŋa dee. Nɩalɩŋ sɩ laa Yesu wɩaa dii a hihilimi tasɩ-la kala lɛ nɛ lɩɩsʋ dɩ ʋ pɛ la lɛ dɩ la lɩlaa kɩalɩŋ a pɩpɛ Wɩa nɩaa lɛ. Ŋɩɩ daga arɩ la kɛŋ la tɩtɩa nɛ dɩ la pɛ ba lɛ, dɩ Wɩa yɩrɩŋ yɩrɛ. 20Ŋɩɩ wɩaa laa chɛ dɩ la kɛŋ kʋ-daŋ-la ma sɩ kɩɛsa pɩla a tɩŋ woruŋ nɛ, la bɩ chɛ dɩ nʋʋkala wuo na wʋbɔŋ a bʋla tɩgɛ kɩalɩŋ la sɩɩ chɛ dɩ la kaa kpaa Wɩa nɩaa lɛ. 21Bɛɛ wɩaa wɩɩ-na kala la sɩɩ ŋaa lɛ, laa chɛ dɩ ʋ ŋaa wʋzɔŋ nɛ Wɩa arɩ nuhuobiinee kala teeŋ. 22La naambii dɔŋ ma nɛ to ba harɩŋ kʋkɔ. Wɩɩkala lɛ la magɩsʋ nɛ a na arɩ ʋ kɛŋ wʋtɩtɩɩ. Lɛɛlɛ ʋ paala chaasa fɩɛsɛ sɩɩŋ nɛ woruŋ dɩ ʋ pɛ ma lɛ, bɛɛ wɩaa ʋ laama dii nɛ. 23Taatɩs-na ŋaa mɩ tɩntɩnnɩ dɔŋ nɛ, la pɛ dɔŋɔ lɛ a tɩma pɩpɩma. Ka la naambiiri-la-na chɩŋ nɩalɩŋ sɩ laa Yesu wɩaa dii a hihilimi tasɩ-la kala lɛ naasɩŋ lɛ nɛ. Baa tɩŋ Kirisito tɩntɩŋŋaa nɛ dɩ ʋ yɩrɩŋ yɩrɛ. 24Ŋɩɩ wɩaa, má dagɛ nɩaa deemba arɩ ma sɛnɛ choba nɛ, arɩ ŋɩɩ la sɩ bigisi ma lɛ pɩba, dɩ nɩalɩŋ sɩ laa Yesu wɩaa dii aa hilimi tasɩ-la lɛ na dɩ wʋtɩtɩɩ nɛ.

Currently Selected:

2 Kɔrɩntɩ Nɩaa 8: SIS

Highlight

Copy

Compare